Help – ek soek liefde!

 

Beeld het berig: ‘Bybel is mees gesoekte boek op web’, dat die woord LIEFDE en JESUS van die gewildste ‘soekwoorde’ is, skryf Trienie Mahné van Woord in Aksie.

            Terwyl daar skrywers en kommentators is wat debatteer oor die Bybel se geloofwaardigheid en mekaar in die hare vlieg, is daar mense wat in die harde werklikheid buite, stukkend en koud rondlê... opsoek na ware opregte liefde.

Waarom sal hierdie mense so desperaat in hul wanhoop na ’n soekenjin gaan, hopende dat die woorde:  “Jesus” en “Liefde” dalk kan help? ’n Bybelvers op ’n koue komper kan mos nie warm liefde gee en my lewe verander nie. Of kan dit?

            Prof Jorrie Jordaan van die Dept Teologie aan die Universiteit van Noordwes het gesê dit dui op die krag en waarheid van die Bybel. ‘Ongeag tegnologiese vooruitgang word die Bybel steeds erken.’

Ek glo saam met  Du Rand dat die Internet handig te pas kom om die kennis wat nodig is vir ’n dieper geloof, te bekom. Ware gelowiges moet net seker maak van hul eie geloofsraamwerk as maatstaf, en nie deur enige wind of siening omgewaai word nie.

            Die opregte ware gelowige het egter ’n verpligting: Saai van liefde. Hulle verkondig nie ’n evangelie van hel en oordeel nie, want dit ontlont net ’n ander hel. Hul Evangelie is een van liefde. Want God is liefde.

Dit laat my terugdink... Blondie (nie regte naam) het in die sirkel reg oorkant my gesit. Tenger fyn vroutjie met prag-styl blonde hare. Eers later deur die naweek het ek ontdek dat haar oë ’n aantreklike hemelblou is!

Vrydagaand kon sy nie praat nie, trane te voorop, kon my ook nie in die oë kyk. Sy het ook nie geweet waar is die Ou testament of die Nuwe. Haar Bybel, nog ’n maagd. Dis nou as dit haar eie Bybel was. Haar oudste seun as baba aan haar eie ma tydelik gegee om groot te maak, want syself was nog te jonk. Vandag weier ma om haar kind terug te gee en smag sy na hierdie kind se liefde. Nou is die hele familie verwyderd van mekaar.

Toe kom die tweede kind (ook buite die huwelik) en toe loop dinge eers verkeerd, want sy was opsoek na ware liefde! Nou kan sy haarself nie vergewe vir al haar foute. Maar sy is hier, om reg te stel. Oor te begin.

            Die liedjieskrywer dig ’n koortjie: “Liefde red my, toe alles verlore was, red liefde my ...”  Blondie was verbaas toe ek haar in my arms toevou en my hart teen haar hart vasdruk. Styf, baie styf. Lank. Tot haar skrik daaroor bedaar. Iets wat sy nie ken nie.

Ek hou haar vas soos haar aardse moeder moes, maar as kind haar eerder verwerp het. Dan sal ek vra: “Kan jy voel hoe Jesusliefde uit my hart vloei tot binne in joune?”  Gewoonlik is ek verbaas as hul terugantwoord:  “Ja, ja – ek kan dit voel!” Net om jou éérs daarna vas te gryp. Dan snak ek na asem en huil en lag saam met hulle. Om te dink so ’n klein bietjie Jesusliefde kan so ’n groot verskil maak. Dit is in staat om ’n nuwe jubeljaar waarin alles weer herstel, aan te kondig.Levit 25:12 Vernaam wanneer hulle besef dat hulle spesiaal aan Hom behoort. Joh 17:17

            Nie een van ons is goed nie. Het niks om ander te bied. Maar wanneer goddelike genade en liefde vloei vanuit Sy troonsale tot binne in stukkende harte, dan moet ek en jy erken: God is goed!

            Geniet opregte, ware en rein liefde hier op aarde. Dis verniet en gee jou lewe kleur. (Jy gaan dit beslis nie in die biegkolom vind nie.)

Glorieryke Herlewings

Herlewing in verskeie lande is sterk aan die toeneem. Gelowiges ter plaatse sal hulle oë op Jesus moet vestig in afwagting op die uitbreek van die Herlewing in SA.

          Sekere kenmerke van die Herlewing in ander lande bevat verskeie interessanthede.

          ‘n Sleutelvers is Jon 14:12 “Voorwaar, voorwaar Ek sê vir julle, wie in My glo – die  werke wat Ek doen, sal hy ook doen; en hy sal groter (meer) werke doen as dit...”

          Die beleid is: Ons is nie geroep om te oortuig nie, maar om té getuig.

          Pleks van preek, word Jesus  eerder  in aksie aan mense voorgestel.

          Hande word gelê op mense van alle rasse, tale en gelowe vir fisiese en of geestelike genesing en die wonderwerke laat die mense na Jesus as Verlosser gryp. Hulle word nie vertel van Jesus nie, maar fisies gewys wie Jesus is.

Diegene wat die wonderwerke belewe, begin ook sommer dadelik vir ander bid en lei hulle na die HERE.

          Getuienisse oor Goddelike gesigte, interaksie met Engele kom van oral. Mense kom in hulle duisende tot bekering. Geld om kostes te dek word nie eers oor gepraat nie, dit is eenvoudig net beskikbaar.

Tussen al die Herlewingsnuus deur belewe skrywer ‘n gesig: Ek ry kerk toe. Die kerk is op die een hoek van ‘n breë kruising. Daar aangekom vra ek: Maar waar is die kerk dan? Daar was geen teken van ‘n kerkgebou nie. Dit was laas naweek nog hier.

          Pleks daarvan staan daar honderde van die allermooiste bome en plantegroei. Dis ‘n begraafplaas... lowerryk, pragtig en netjies.

          En daar sit ek en verkyk my aan dit alles. Ek vra: HERE, en dit?

          Dis die einde van die kerkera. Jesus se Koms is naby en dit kan nie langer geduld word dat Sy volk in duisende kerkgenootskappe verdeel is, elkeen met sy eie  stel dogmatiese reëls nie. Praatjies soos “ek het my kerk” kom tot ‘n einde. Dit word vervang met “ek is die kerk!”

          Die aardsgebondenheid van Gelowiges word vernietig. Engele raak al hoe meer by Gelowiges se lewens betrokke.

          Maar waarom ‘n kerkhof wou ek weet? Dis die Gelowiges se “Eie Ek” wat daar begrawe word. Alle fantasieë verdwyn, alle eie opvattinge, alle eie oortuigings, alle weerstand, alle selfvoldaanheid, alle wanpersepsie, alle geheime en lidmaatskap aan geheime organisasies, alles wat nie tuishoort in die lewe van ‘n Jerusalem Pelgrim nie, verdwyn, so ook eie trots en windmakerigheid.

          Alles word vervang met liefde, omgee en nederigheid.

          Geen begrafniskar ry ooit die kerkhof binne nie. Gelowige begrawe self hul “Eie Ek” daar. Oral maak Gelowiges gereed om sonder vlek of rimpel Jesus se Koms af te wag.

          Geestelik verdwyn alle spoggerige haarstyle, kleredrag, spogmotors, spoghuise.  Gelowiges beweeg terug na eenvoud.

          Gelowiges sal nooit weer oor die duiwel praat nie, nooit weer belas raak met Skriflose uitsprake nie. Almal sal van Engele praat en geestelike boodskappe uitruil, mekaar bekragtig. Hier ontstaan ‘n Hemelse opgewondenheid soos wat almal na oorwinningsgrond beweeg. – Einde van die gesig.

          Dit is inderdaad ook wat nou in die Herlewings gebeur: Dogma, kerk en tradisie verval.

          Die mens staan naak voor God, gestroop van aardse gebondenheid. Saam met die Herlewing kom die reikhalsende verlange na Jesus se koms.

          Gelowiges in SA smag al lank na Herlewing. Oral is gebedgroepe aan die bid daarvoor. Dit gaan kom, vir seker. Hou moed. – Wekroep

Liefde

Liefde…

Die liefde word nie op ons afgedwing nie, al maak ons ook die mooiste beloftes by ons troues. Liefde is soos ‘n pragtige blomtuin wat gereeld geskoffel moet word om die onkruid uit te hou.

So lyk die Liefde:


“Die liefde is geduldig,

die liefde is vriendelik;

dit is nie afgunstig nie,

is nie grootpraterig nie,

is nie verwaand nie.

Dit handel nie onwelvoeglik nie,

soek nie sy eie belang nie,

is nie liggeraak nie,

hou nie boek van die kwaad nie.

Dit verbly hom nie oor onreg nie,

maar verheug hom oor die waarheid.

Dit bedek alles, glo alles, hoop alles, verdra alles.” 1 Kor 13:4-7

            On sweet almal, dis veel makliker gesê as gedaan?

            Wat hier staan, vertel van ʼn liefde wat skaars oorleef.  1 Kor 13 beskryf ‘n liefde wat alles in die stryd moet werp om in ʼn oorlog staande te bly.

            Wanneer is jy geduldig?  As iemand jou teister, en jy jou moet inhou.

            Wanneer is jy vriendelik?  As die ander ou afgunstig, grootpraterig en verwaand is.

            Hoekom weerhou jy jou van onwelvoeglikheid?  Oor dit lelik is?  Nee, oor jy iemand nie wil vervreem nie.

            Om dieselfde rede soek jy ook nie jou eie belang nie, maar is jy meer bedag op wat vir ander goed sal wees.

            Net so is jy meer as net effens dikvellig, en nie so vreeslik liggeraak nie.  Sodat jy nie sommer aan elke ou kleinigheidjie aanstoot neem nie, en gekrenk sal voel oor jou waardigheid nou weer aangetas is nie.

            Jy reken ook nie die skade wat ander jou aandoen nie, want jy gaan nie later wraak neem en vergoeding eis nie.

            Oor die onreg wat jou vyand oorkom, verlekker jy jou nie. Jy word net oor die waarheid bly, dit wil sê as wat jou vyand oorgekom het, hom tot ander insigte gebring het.  Insig in die waarheid versoen en verenig julle weer met mekaar: aartsvyande kan boesemvriende raak.

            Liefde bedek alles, glo alles, hoop alles, verdra alles.

            1 Kor 13 is die verhaal van liefde wat wil oorleef, en wil keer dat die sonde dit verniel. Hierdie is ʼn liefde wat wil uithou en aanhou.  So lyk liefde wat end-uit met jou die pad wil loop.

            Het jy dit al?  Het iemand jou al so liefgehad?  En jy vir iemand anders?

            Liefde is nie naïef nie.  Dit skram ook nie van die werklikheid weg nie.  Dit kyk die foute en sonde vierkantig in die oë.

            Die statistieke spreek vanself.  Huwelike hou nie.  Want die liefde is ʼn volgehoue geveg teen eiebelang, en ander se kwaad (waarvan jy nie mag boekhou nie).

Weet jy wat dit van jou verg om alles wat julle mekaar aandoen, agter julle te sit – te bedek – en oor te begin en aan te gaan asof dit nie gebeur het nie? Het jy ʼn idee van wat dit vat om alles te bly glo wat iemand jou alweer hart en mond belowe terwyl jy sukkel om saam te leef met al die vergete en mislukte goeie voornemens van die verlede?  Hoe kry mens weer hoop as alles waarvan jy gedroom het, verydel is?

            Hoe hou die liefde dit?

            Hoe hou jy dit met liefde?

            As jy die liefde wil laat oorleef, moet jy nou besluit:  niks anders kom daarby nie.  Niks is so belangrik soos die liefde nie,  nie jou beroep nie, nie jou geld en jou goed nie, nie jou ideale, jou vriende of familie, jou sport of jou vakansies of, wel, trouens enigiets waaraan jy kan dink, verdien soveel van jou aandag as jou liefde nie.

Fokus daarop. Want verloor jy dit, verloor jy iedergeval al die ander goed daarmee saam.  En verlore gaan sal dit, as jy nie keer nie, as jy die liefde nie vertroetel nie.

            En dan kom jy agter hoekom jy voluit op die liefde moes fokus, en jy juis so aan die liefde moes gestalte gee: Ons weet nou al dat van alles wat in die lewe belangrik is, die liefde belangriker is.   Maar het jy geweet dat, van alles wat in die lewe gebeur, dit net die liefde is wat end-uit bly?

            Let op: 1 Kor 13:8 “Die liefde vergaan nooit nie, maar die gawe van profesie sal verdwyn, die gawe om ongewone tale en klanke te gebruik, sal ophou, en dié van kennis sal uitgedien raak.”

            Selfs die heiligste goed, die heel kosbaarste van die godsdienstige praktyke, kan verdwyn en hou op en raak uitgedien.  Maar die liefde moet hou.  Dis die bloed wat lewe gee.  Dis die gom wat klou.

            En 1 Kor 13:9 “En nou: geloof, hoop en liefde bly, hierdie drie. En die grootste hiervan is die liefde!

            1 Kor 13 gaan oor liefde in die spervuur.  Oor liefde in die moeilikheid. Dis liefde wat hom teësit teen die magte van die duisternis, wat wal gooi, wat keer.  Dis liefde wat vas van plan is om elke beproewing te oorleef.  Dis nie sentimentele liefde hierdie nie. Dis liefde op die oorlogspad. Dis liefde in die hitte van die stryd, wat veg om te oorleef. Dis liefde wat baklei om bo uit te kom, en niks sal ontsien om te wen nie. Dis strydende liefde hierdie.

Werkende liefde. Liefde wat teen sonde die rug krom maak. Liefde wat ly, liefde wat swaarkry.  Liefde wat weerstand bied teen ondergang en walgooi teen oorweldig te word.  Liefde wat aanhou en wil staande bly al kom die hel van alle kante op hom af.

            Het ons al aan sulke liefde gestalte kon gee?  Was dit al ooit ons voorneme? Wat dan, het van die liefde geword?  Waar’s dit heen?

            Ons het op die harde manier geleer nie alles hang af van goeie voornemens nie.  Goeie voornemens word nooit in stand gehou nie. Dis God wat in liefde die deurslag gee.  Dis die liefde wat jy kry as God se genade in berekening gebring word, wat jy hier in 1 Kor 13 kry.  Om sulke liefde te kon beleef, is te danke aan die genade van God.  Dit moet dadelik duidelik wees dat ons in hierdie wêreld nog net een keer sulke liefde van naderby beleef het:  in die lewe en dood en lewe van Jesus Christus.

            Dis asof ons ander al daarvan gehoor praat het, maar eerstehandse ondervinding het ons nie. Die liefdesvuur bly brand waar paartjies saam bid en die man sy rol as Hoë Priester van sy huis aanvaar.

            God skryf julle lewensboek en hy is nog lank nie klaar nie. Moet ook nie die pen uit sy hand neem en julle verhaal self probeer klaarskryf nie.

            Seksuele (eros) liefde en menslike (fileo) liefde. lan nooit slag nie. Tydens berading kom dit sterk na vore.

            Wat wel slaag is Goddelike (Agape) liefde. Maak seker voor julle trou, watter liefde die botoon voer.

            Sy genade het goed genoeg in julle gewerk om die afgelope jaar se bietjies liefde moontlik te maak.  God is in julle aan die werk. Julle beleef sy liefde nou, en sy liefde sal nie afkoel of ophou nie. Julle kan op sy liefde wat nooit te min is nie reken, liefde wat geen vervaldatum het nie, maar met Kersfees weer afskop om ons lewe hier saam moontlik te maak.

            “As julle ewenwel die Koninklike wet volbring volgens die Skrif: Jy moet jou naaste liefhê soos jouself -- dan doen julle goed.” Jak 2:8

            Eerste vraag is: Hoe lief het jy jouself?

Kyk wat sê,Jesus: “Soos die Vader My liefgehad het, het Ek julle ook liefgehad. Bly in hierdie liefde van My. (So moet ons ook bly in die Belofte wat ons aan Hom en aan mekaar gemaak het).

            (Hoe kry ons dit reg?) “As julle my gebooie bewaar, sal julle in my liefde bly, net soos Ek die gebooie van my Vader bewaar en in sy liefde bly.

            (Hoekom?) “Dit het Ek vir julle gesê, dat my blydskap in julle kan bly en julle blydskap volkome kan word.

            “Dit is my gebod (Jak 2:8), dat julle mekaar moet liefhê net soos Ek julle liefgehad het” Joh
15:0-12

God skryf nog aan jou storie

God skryf nog aan jou storie. Moenie die pen uit Sy hand wil neem en self wil skryf nie. Doen jy liewer wat Hy gesê het jy moet doen…

            “So behoort die mans hulle (wie?) eie vroue lief te hê (hoe?) soos hul eie liggame. Wie sy eie vrou liefhet, het homself lief; want niemand het ooit sy eie vlees gehaat nie, maar (wat doen hy?) hy voed en koester dit, net soos die HERE die gemeente.” Ef 5:28-29

            Die lewe kan soms oorweldigend besig raak. As die dae so lank raak en die tyd so min vir alles wat daarin moet gebeur is dit opvallend dat meeste mense tog die tyd neem om te eet, maar nie die tyd om lief te hê nie.

Seks is nie liefde nie, bloot ‘n uitvloeisel daarvan.  Daar is ook ‘n breë verskil tussen seks en gemeenskap.

            Dit is egter opmerklik dat daar so dikwels in hierdie tye totaal vergeet word van iets anders wat jy moet beskerm en behou tot jou dood toe... jou huwelik!

            Dikwels word die vroue van besige manne emosioneel anoreksies gelaat, of hulle ly later aan verwerping en allerlei senuwee probleme. Hulle word emosionele wrakke.

            Manne, voed julle vroue met wat hulle nodig het, liefde. Koester vir jou vrou dit wat vir haar kosbaar is, soos die HERE met sy gemeente ook doen!

            En as jy nie weet wat ware liefde is nie, soek dringend hulp.

            Tydens berading is dit duidelik: Sommige het getrou oor Eros (seksuale) liefde, ander weens Fileo (menslike) liefde,  en die suksesvolles, weens Agapé (Goddelike) liefde. Dit was ook Petrus se blaps. Jesus vra: het jy My (Agapé) lief. Petrus begryp nie en antword: Ja, ek het U (Fileo) lief. Hy doen nie selfondersoek nie. Hy probeer nie vasstel wat gaande is nie Drie keer trap hy in diesefde strik… tot die haan kraai.

Doen bietjie selfondersoek: “Jy moet die Here jou God liefhê (hoe?) met jou hele hart en met jou hele siel en met jou hele verstand.

            Dit is die eerste en groot gebod. En die tweede wat hiermee gelykstaan: (let op) Jy moet jou naaste liefhê (hoe?) soos jouself.” Matt 22:37-39

            Vra nou vir jouself, hoe lief het jy jouself. Jy sal nie waarlik kan liefhê as jy nie eers jouself lief het nie.

            Maak werk hiervan, jou huwelik en jou toekoms hang daarvan af... asook jou kinders se welsyn,… en uiteindelik die gemeente. -- Sjibbolet

Ware Liefde is Volmaak

Net liefde kan ‘n herinnering skep. Net liefde kan ‘n oomblik vir altyd vasmaak, sing Nana Mouskouri. Sy sing van ware liefde.

Vergelyk dit met die situasie in jou eie huishouding: Vir jou kinders bedoel jy uit die ware liefde van jou hart, vrede en geluk en dit mag hulle dan ook heeltemal tereg, ryklik smaak, solank hulle gehoorsaam is.

Ouers wil graag in ware Liefde hulle kinders vervolmaak in elke goeie werk solank hulle die ouers se wil uitvoer. Ouers wil liefdevol hul eie talente, kennis, karakters en persoonlikhede vir hulle kinders beskikbaar stel om die kinders ten beste toe te rus vir die lewe wat nog voor hulle ooplê.

As kinders maar net wil luister en gehoorsaam wil wees, kan hulle hulself baie probleme, foute, ellende, verdriet, teleurstelling en ‘n gesukkel in die lewe bespaar.

Dit is ook in ‘n nog sterker graad die verhouding tussen Wedergeborenes en die Vader. Hy wil ons uit ware liefde vervolmaak in elke goeie werk om Sy wil te doen “deur in ons te werk” – as ons Hom net wil toelaat om in ons te werk!

Let op na die volgende verhaal:  'n Vrou is deur omstandighede gedwing om uit haar ouerhuis te vlug en trou toe met 'n man wat sy nie liefgehad het nie. Hy was 'n streng, veeleisende persoon, soms so onredelik, liefdeloos. Sy trots en hoogmoed het alles rondom hom vernietig.

Hy het haar gedwing om elke oggend vyfuur op te staan om sy ontbyt te berei en dit presies om sesuur aan hom te bedien. Sy moes hom volgens presiese, geskrewe reëls dien. Hy het haar lewe ongelukkig gemaak. Uiteindelik is hy dood. Na 'n paar jaar trou sy weer.

Hierdie keer trou sy met 'n man wat sy werklik liefhet. Sy was ook versekerd van die nuwe man se ware liefde. Hy het haar gereeld die hof gemaak, haar soos ‘n vrou laat voel. Jesus se liefde het geseëvier. Hy was ‘n ware Hooglied man, soos beskryf in Hooglied 2. Hy het sy Hooglied vrou bemin.

Sy was nou 'n gelukkige en ontspanne vrou, sonder vrees en angs in haar man se teenwoordigheid.

Op 'n dag maak sy die huis skoon en kom af op die lys van streng reëls wat haar vorige man vir haar uitgeskryf het en waarvolgens sy presies moes leef.

Sy lees dit: "Staan vyfuur op. Bedien ontbyt presies om sesuur." Aan en aan lees sy met beklemde hart.

Toe maak sy 'n wonderlike ontdekking en sy lag spontaan. Sy vervul steeds elkeen van daardie reëls in haar nuwe huwelik, maar sy het dit nie agtergekom nie, omdat sy haar nuwe man liefhet.

Daardie ware liefde is beskikbaar aan elke Wedergeborene deur die “God van Vrede!”

Alles was nie altyd wel tussen ons en God nie. Kol. 1:21 sê: “Ook julle wat vroeër vervreemd was en vyandig gesind deur die bose werke,” het Hy nou versoen.”

Ons was van nature ongehoorsaam en kinders van die toorn, aldus Efes. 2:2-3.

God het egter deur sy Seun, Jesus Christus vir ons vrede en redding bewerk, volgens Efes. 2:14-16. Deur die Wedergeboorte verkry ons nou die Ewige Lewe in Jesus Christus.

            Jy is nou ‘n “nuwe skepsel!” 2 Kor. 5:17 “Daarom, as iemand in Christus is, is hy ‘n nuwe skepsel; die ou dinge het verbygegaan, kyk, dit het alles nuut geword.”

            Wie het dit gedoen? Strofes 18-19 “En dit alles is uit God wat ons met Homself versoen het deur Jesus Christus en ons die bediening van die versoening gegee het, naamlik dat God in Christus die wêreld met Homself versoen het deur hulle hul misdade nie toe te reken nie en die woord van die versoening aan ons toe te vertrou.”

            Watse soort mense is ons nou? Strofe 20 “Ons tree dan op as gesante om Christus wil, asof God deur ons vermaan. Ons bid julle om Christus wil: Laat julle met God versoen.” – Sjibbolet

Niks gebeur sonder goeie rede nie

'n Amerikaanse multimiljoenêr, Jay Gould, het een keer per trein, deur die state, wat langs die Stille Oseaankus lê, gereis vertel die Railroad Evangelist.
Met sy terugkeer besluit hy om deur Texas te reis. Die trein word, in 'n klein westelike dorpie van Texas, 'n paar uur vir herstelwerk vertraag. Om die tyd te verwyl, stap Gould van die stasie af deur die dorpie.


Jay Gould

Op 'n straathoek is 'n groot groep mense bymekaar. Gould stap nuuskierig nader. 'n Vendusie is aan die gang. Die afslaer roep die hoogste bod, vir die artikel wat hy wil verkoop, 'n paar keer uit.
Gould vra vir een van die omstanders wat verkoop word. Die man sê 'n kerkgebou word opgeveil. Die gemeente kon die boukoste nie betaal nie en nou laat die bouer die kerk opveil om sy geld te kry. Die afslaer is op die punt om die koop te beklink, toe Gould hoër bie. Die bod word op Gould toegeslaan.
Dadelik kom drie ou grysaards op Gould afgestap. Dit is duidelik dat hulle nie weet wie hy is nie. Hulle wil weet wat hy met die kerkgebou beplan. Die miljoenêr kyk hulle vriendelik aan.
"Dit is nou myne," sê hy. "Ek kan dit hou as ek wil, of weggee soos ek goeddink."
"Ons is die trustees van die kerk en die kerkraad het ons gestuur om te kyk wat met die kerkgebou gebeur. Op hierdie oomblik is die hele gemeente in die kerk op hulle knieë, om die HERE vir uitkoms te smeek, dat ons nie ons kerk verloor nie."
'n Paar oomblikke kyk Gould stilswyend na hulle. Dan sê hy: "Dit lyk my julle het die kerk nodiger as ek, en julle kan dit beter gebruik as ek, daarom gee ek dit vir julle."
Toe eers ontdek hulle, hulle is besig om met een van die land se rykste manne te praat.
            Hierdie ware verhaal  toon duidelik God se voorsienigheid. Gould moess  sy terugreis deur Texas aanpak. Die probleem met die trein se aandrywing moes op die regte oomblik op die regte plek gebeur. Gould moes na die toneel toe stap, alles presies en net betyds.
            Binne die kerk bid die gemeente vir uitkoms. God stuur Gould via Texas en ‘n probleem na die toneel. Dit maak nie saak wat gebeur nie. Pleks van kwaad word en selfs vloek en skel, raak rustig en vra: HERE hoekom.
            Skrywer neem sy motor vandeesweek om die lugreëlaar te laat herstel. Die werktuigkundige verstaan verkeerd en maak ‘n groot en duur probleem in die enjin reg. Hy vra agterna groot verskoning vir die fout.
            Feit is, skrywer het ‘n  week gelede ernstig oorweeg om ‘n langs reis aan te pak. As die reis sou plaasgevind het, sou die motor tussen êrens en nêrens gaan staan het. Dit sou baie ongerief en baie geld gekos het want die onderdeel moes van Johannesburg af kom.
            Die Gelowige beweeg in die geloof en weet deur jare se ondervinding, niks gebeur sonder goeie rede nie. – Sjibbolet

Liefde ongekend...

Want so lief het God die wêreld gehad, dat Hy sy eniggebore Seun gegee het, sodat elkeen wat in Hom glo, nie verlore mag gaan nie, maar die ewige lewe kan hê. Want God het sy Seun in die wêreld gestuur nie om die wêreld te veroordeel nie, maar dat die wêreld deur Hom gered kan word.” Joh 3:16-17
           Na alles volg Golgota.
           DIE vraag word allerweë gevra: Wie het Christus doodgemaak, die Romeine of die Jode?
          Christus gee self die antwoord in Joh. 10:17-18: “Daarom het die Vader my lief, omdat Ek my lewe aflê om dit weer op te neem.
          “Niemand neem dit van My af nie, maar Ek lê dit af uit Myself.  Ek het mag om dit af te lê en Ek het mag om dit weer op te neem.  Hierdie gebod het Ek van my Vader ontvang.”
          Niemand sou die voorreg hê om Christus dood te maak nie.
          Lukas 23:46 lees:  “En Jesus het met ‘n groot stem uitgeroep en gesê :  “Vader, in U hande gee Ek my gees oor!  En toe Hy dit gesê het, blaas Hy sy laaste asem uit.”
          Mense het normaalweg 36 ure aan ‘n kruis gehang voordat hulle dood is.  Jesus het na ses ure besluit, Hy sterwe.
          So gaan 1 Kor. 15: 54-55 ook in vervulling: “Die dood is verslind in die oorwinning.  Dood, waar is jou angel? Doderyk, waar is jou oorwinning?”
          Die Hoofman oor ‘n Honderd staan daardie oomblik voor Christus. Toe hy sien wat plaasvind bely hy :  “Waarlik, hierdie man is regverdig!”
          Saam hiermee word die waarheid oor die Ewige Lewe bevestig. Hemel of hel, daar is beslis ‘n Ewige Lewe. Oor waar mens die Ewigheid gaan deurbring is jou eie keuse.
          Paulus weet waar hy die Ewigheid gaan deurbring en sê in Rom. 8:38-39 “Wat ek is versekerd dat geen dood of lewe of engele of owerhede of magte of toekomstige dinge of hoogte of diepte of enige ander skepsel, my sal skei van die Liefde van God wat daar in Jesus Christus is nie!”
         As jy dit ook kan sê, loof ons die Here saam met jou.
         As jy dit nie kan sê nie, as jy nie daardie versekering het nie, dan moet jy dringend werk daarvan maak. Dit is jou lewe en jou toekoms.
         Die HERE sê in Joh. 1:9 “As ons, ons sondes bely, Hy is getrou en regverdig, om ons nie net al ons sondes te vergewe nie, maar ons ook van alle ongeregtigheid te reinig.
         En jy wat reeds hierdie kragtige versekering het, bid saam met ons vir ‘n magtige Herlewing.
         As jy hierdie boodskap reeds tot by hierdie punt gelees het, dan moet jy besef dit is die Heilige Gees wat jou gedring het om tot hier te lees. Dan praat Hy met jou omdat hy jou lief het en dan verwag Hy reaksie van jou kant af!
        Jy moet jou saak met die HERE uitmaak want, die Liefde waarna aan die begin van hierdie skrywe verwys word, voltooi ‘n perfekte sirkel: Jesus sê: “In die huis van my Vader is daar baie wonings; as dit nie so was nie, sou Ek dit vir julle gesê het. Ek gaan om vir julle plek te berei.
       “En as Ek gegaan en vir julle plek berei het, kom Ek weer en sal julle na My toe neem, sodat julle ook kan wees waar Ek is. En waar Ek heengaan, weet julle en die weg ken julle.” Joh 14:2-4          
       Hy stuur nie iemand nie, Hy kom ons self haal... binnekort.
       “Want Ek sê vir julle: Julle sal My van nou af sekerlik nie sien nie totdat julle sal sê: Geseënd is Hy wat kom in die Naam van die HERE YAWEH!” Matt 23:39

700 000 preke sonder ’n bekeerling!

Herlewing is nodig – Oswald J. Smith

Waarom predikers misluk!

Oswald J. Smith was ‘n prediker rondom 1900. Wat hy hier – ‘n 100
jaar gelede – beskryf het, is presies wat ons vandag in Suid-Afrika
en reg oor die wêreld heen beleef.

Smith_OJ
Oswald J Smith (1889-1986)

Die Kerk strewe dikwels nie na positief geestelike resultate nie en kry dit ook nie. Mense preek en dink nooit daaraan dat iets buitengewoons moet gebeur nie.
          O’ hoe ver het ons weggedryf! Hoe magteloos het ons nie geword nie!
          In 1904 in Wallis is beraam dat 7 000 gemeentes gedurende die jaar nie een siel vir Jesus Christus gewen het nie.
          Altesame 7 000 Evangelie bedienaars het ‘n jaar lank sowat 700 000 keer die Evangelie verkondig sonder om een verlore siel te bereik.
          Nou, my broers, daar moet êrens ‘n baie ernstige skroef los wees. Daar moet of iets verkeerd wees met die 7 000 predikers, of daar is fout met 700 000 preke of met albei!
          Toe ek die Twaalf Reëls van die vroeë Metodiste Kerk lees, is ek getref deur die feit dat dit gemik is op die wen van siele en dat hulle dit as hul vernaamste taak beskou.
          Ek haal aan:  “Gee uself dus geheel en al oor aan u werk. U taak is om nie soveel keer moontlik te preek nie, maar om soveel moontlik siele te wen as wat u kan, om soveel sondaars as wat u maar kan, tot berou te bring, en om met al u mag hulle in heiligmaking op te bou, waarsonder hulle die HERE nie sal sien nie” – Uit: Die Twaalf Reëls deur John Wesley.
          Toe het ek my bediening met die beloftes van God vergelyk. In Jer. 23:29                                                                                                                                                                                                                   lees ek: “Is my antwoord nie so, soos ‘n vuur, spreek die HERE, en soos ‘n hamer wat ‘n rots vermorsel nie?”
          En in Efes. 6:17: “…die swaard van die Gees – dit is die Woord  van God.”
          Maar hoe meer ek daaroor nagedink het, hoe meer het ek onder die oortuiging gekom dat in my bediening, die Woord van God nie ‘n vuur, ‘n hamer en ‘n swaard was nie.  Dit het nie gebrand, gebreek en deurgedring nie. Daar was geen teregstelling nie.
·       Heb. 4:12 verklaar: “Die Woord van God is lewend en kragtig en skerper as ’n tweesnydende swaard, en dring deur tot die skeiding van siel en gees en van gewrigte en murg, en is ‘n beoordelaar van die oorlegginge en gedagtes van die hart!
John Wesley het dit so ingesien. John Smith was ‘n gedurige waarnemer
daarvan. David Brainerd was ‘n getuie van die realiteite daarvan, maar nie ek nie.
          “So sal my Woord wees wat uit my mond uitgaan: dit sal nie leeg na My terugkeer nie, maar doen wat My behaag en voorspoedig wees in alles waartoe Ek dit stuur.” Jes. 55:11
          Ek het geweet dat hierdie wonderlike belofte nie in my prediking in vervulling getree het nie. Ek het geen getuienis gehad soos Paulus, Bramwell en Finney, in wie se geval die Woord nooit leeg teruggekeer het nie.
          Ek was ook geregtig op hierdie belofte. Dit was dus vir my ‘n uitdaging.
          Nie net my prediking nie, maar ook my gebedslewe het onder die soeklig gekom. Dit moes ook uitgedaag en getoets word aan die uitslag.
          Ek is gedwing om te erken dat die hoopvolle versekering wat straal uit Jer. 33:3 “Roep My aan, en Ek sal jou antwoord, en jou bekend maak groot en ondeurgrondelike dinge wat jy nie weet nie,” dat dit in my ondervinding nie ‘n werklikheid was nie.
          Die “groot en ondeurgrondelike dinge” was die byna daaglikse ondervinding van Evan Roberts, Jonathan Goforth en ander, maar nie myne nie. Daar was geen definitiewe en daaglikse antwoorde op my gebede nie.
          Die volgende was dus nie ‘n werklikheid in my lewe nie: “Wat julle ook al in my Naam vra, dit sal Ek doen,” en “As julle iets in my Naam vra, sal Ek dit doen.” Joh. 14:13,14
          Hierdie beloftes was nie vir my ‘n lewende werklikheid nie omdat ek so baie dinge gevra het wat nie volgens die beloftes was nie. So het ek besef dat daar met my gebedslewe iets radikaals verkeerd was.
          Toe ek die outobiografie van Charles Finney lees, ontdek ek dat hy dieselfde mislukking in sy lewe ondervind het.
          By die afsluit van sy boodskap het John Wesley altyd vir God aangeroep om “Sy Woord te bevestig” en God het dit gedoen.
          Sondaars het onmiddellik om genade begin roep omdat hulle onder diepe en ontsettende oortuiging van sonde gekom het, waarna hulle onmiddellik vryheid  verkry het en met onuitspreeklike vreugde vervul is.
          Finney skryf hieroor soos volg in sy dagboek:
          “Ons het verstaan dat baie aanstoot geneem het weens die uitroepe van diegene oor wie die krag van God gekom het. Onder hulle was ‘n geneesheer wat baie bang was dat daar bedrog daarin kon wees. Vandag het iemand wat hy baie jare al ken, hard uitgeroep en in trane. Die geneesheer kon skaars sy oë en ore glo.
          “Hy het digby haar gestaan en elke simptoom waargeneem totdat groot sweetdruppels langs haar wange afgerol het en haar ledemate begin skud het, toe het hy geweet daar is nie bedrog of enige natuurlike ongesteldheid nie.
          “Maar toe haar siel en liggaam in ‘n oogwenk genees is, het hy die hand van God daarin erken!”
          Dit was ook die ervaring van die vroeë Kerk, want daar staan geskrywe: Toe hulle dit hoor, is hulle diep in die hart getref en het vir Petrus en die ander apostels gesê: Wat moet ons doen broeders? Hand. 2:37
          “Hulle het toe ‘n geruime tyd daar deurgebring en vrymoediglik gespreek in die HERE, wat aan die woord van Sy genade getuienis gegee het deur te beskik dat tekens en wonders deur hulle hande plaasvind.” Hand. 14:3
          Hulle het gebid dat “tekens en wonders mag plaasvind.” Hand. 4:30. En Paulus het verklaar dat die Evangelie “’n krag van God tot redding” is.” Rom. 1:16
          Nogtans was dit alles aan my onbekend.
          Gedurende die Ierse herlewing van 1859 is “tekens en wonders” oral waargeneem. Onder die vroeë Metodiste het dit daagliks voorgekom.
          Maar in my eie geval was die Evangelie nie “die krag van God tot redding” nie. God het “Sy Woord nie bevestig nie,” Sy “seël nie daarop gesit nie,” of “daar getuienis van gegee” wanneer ek dit verkondig het nie.
          Nogtans het ek geweet dat ek die reg gehad het om dit te verwag omdat Jesus die belofte gegee het. “Die werke wat Ek doen, sal julle ook doen en julle sal meer werke doen as dit,” het Jesus in Joh. 14:12 verklaar.
          Toe het ek eendag die Handelinge van die Apostels gelees om uit te vind of God se diensknegte in die eerste Kerk resultate gekry het oral waar hulle gegaan het. En ek het gevind dat hulle na vrug mik, daarvoor gearbei, en dit verwag het, en hulle is nooit teleurgestel nie.
          So preek Petrus op Pinksterdag en 3 000 siele neem die uitnodiging aan om Jesus te volg. Met Paulus was dit dieselfde, sodat hy oral gemeentes gestig het.
          Hoe ver het ek nie te kort geskiet nie! Hoe verduidelik ek dat ek misluk het! Ek het te kort geskiet juis in die saak waarvoor God my geroep het. Ook was dit nie vir my moontlik om saam met Paulus te kon sê “watter groot dinge God deur my diens gedoen het” nie.
          God verklaar: “Ek het julle uitverkies en julle aangestel om vrug te dra.” Joh. 15:16
          Te lank was ek tevrede om net te saai en die Evangelie te verkondig, met die verskoning dat ek die resultate aan God oorlaat, denkende dat ek my plig gedoen het.
          Wanneer mense gered word en baie seën ontvang sal hulle daarvan begin vertel, en as hulle dit nie doen nie, is daar rede om te twyfel aan die uitslag.
          Dr Watts skryf: “Gaan na die dienste met die doel om siele te bereik en te oortuig tot bekering en redding. Gaan om die oë van die blindes te open, om dowe ore te ontsluit, om die kreupeles te laat wandel, om die dwase wys te maak, om diegene wat dood is in die sonde, op te wek tot ‘n Hemelse en Goddelike Lewe, en om skuldige rebelle te laat terugkeer na die Liefde en gehoorsaamheid van hul Skepper deur Jesus Christus, die Groot Versoener, sodat hulle vergifnis van hulle sondes kan ontvang en gered kan word. Gaan om die geur van Christus en sy Evangelie deur die hele vergadering te versprei en om siele te lok om deel te hê aan Sy Genade en heerlikheid.”
          Ek het gevoel ek moet jong Christene lering gee oor die diepere lewe in Christus en het altyd toesprake hieroor voorberei, totdat God in Sy genade my oë oopgemaak het en my gewys het hoe ver ek die spoor byster was.
·       Daar is niks wat die Christelike ondervinding so sal verdiep, wat gelowiges so vinnig sal opbou in die geloof nie, as juis wanneer sondaars tot bekering kom!
Diepgaande Heilige Gees-vergaderings, waar die krag van God sondaars kragdadig oortuig en red, sal meer vir Christene doen as jare se prediking daarsonder.
John Smith het gesê: “Die man wat ernstig en Skriftuurlik na die bekering van sondaars strewe, sal die een wees wat die sekerste en doeltreffendste die gelowiges opbou.”
Dr Watts het gesê: “Baie van hierdie mense het meer leerstellige kennis aangaande Goddelike waarhede geleer sedert ek hulle die eerste maal besoek het, as wat aan hul verstand gebring kon word deur die toegewydste gebruik van goeie leermiddels vir jare aaneen, sonder so ‘n Goddelike invloed.”
Dit maak geen saak hoe geestelik ‘n kerk mag voorgee om te wees nie, as siele nie gered word nie, is daar iets radikaals verkeerd, en die beweerde geestelikheid is eenvoudig ‘n valse ondervinding, ‘n misleiding van die duiwel. Mense wat bymekaar kom eenvoudig om ‘n aangename tyd met mekaar te hê, is ver van God af.
Daar sal ‘n hunkering na en ‘n Liefde vir siele moet wees. Ons het na plekke gegaan wat die naam dra dat hulle diep geestelik is, maar ons het dikwels gevind dat dit net in hulle gedagtes was, maar hul harte nie geroer het nie. Heel dikwels was daar sonde wat nie bely was nie.
“Hulle het ‘n gedaante van Godsaligheid, maar die krag daarvan het hulle verloën.” Is dit nie pateties nie!
Laat ons, ons geestelike toestand ondersoek en vra: Wat bring dit voort? Niks anders as ‘n ware geestelike herlewing en ontwaking onder die wedergeborenes, sal ooit die hart van God bevredig nie.
Ons is op die drumpel van die grootste Herlewing wat die wêreld nog ooit aanskou het. Bid en getuig enduit. – Sjibbolet

Die hoofrede vir egskeidings en die gees van losbandigheid en liberalisme

Waarom die hoë egskeidingsyfer onder veral Blankes in Suid-Afrika? Vanwaar die gees van liberalisme asook die gees van gesinskonflik en huwelikstweedrag tesame met die  boelie van ander kinders en onderwysers in die skole?

Die hoofrede is buite huwelikse geslagsverkeer en verkragting van die eg, losse sedes.

’n Vrou se gees word deur dié van ’n man beset. Buite huwelikse geslagsverkeer beteken ’n vrou word deur die gees van verskeie mans beset.
Daardie geeste heers oor haar, tesame met die gees van die man aan wie sy uiteindelik haar trou beloof en bekendmaak. So ’n huwelik sal kwalik standhou.

Vir die vroue om vry te kom van die geeste van ander mans en hulle oorheersing, moet daardie mans die Wedergeboorte deelagtig word sodat Christus se gees almal genees.
Mans moet hulle gees in die naam van Jesus Christus terugroep vanuit die vroue met wie hulle verkeer het.

Met die gawe van genesing kan boosgeworde geeste in die Naam (gesag) van Jesus Christus uit die gees van ontroue en ongetroude vroue wat owerspel gepleeg het, gedryf word.
Die bose se saad groei wanneer die band van getrouheid tussen pare verbreek word deur die man wat die maagdelikheid wat hy geneem het of deur die jongvrou wat dit gegee het, geminag word.
Sonder die beheer oor bose geeste wat Hy aan Sy dissipels met Sy Gees gee is herstel en genesing onmoontlik.

Die man as veroweraar van die liefde van ’n vrou, sal met meer as een vrou ’n risiko loop om sy gees deur ’n onvervulde vrou se ontrou te laat besoedel. Sy gesonde jaloesie word afguns op haar of haar nuwe veroweraar.

Vroue word bevry van die geestelike oorheersing van die mans met wie hulle gemeenskap gehad het, deur sonde-aflegging en ’n selibate lewe daarna, of deur toe te laat dat daardie geeste uit hulle gedryf word.

Die gemeenskaplike gees of volksetos moet bewaar word soos God in Maleagi 2:15 aan die mans sê:  Neem julle dan in ag ter wille van julle gees – en wees nie ontrou aan die vrou van jou jeug nie. Sien ook strófe 16.

Tydens die Anglo Boere-oorlog is duisende Boervroue deur Britse soldate asook deur inboorlinge verkrag.  Ander vroue het weens die afwesigheid van hulle mans goedsmoeds die eg gebreek. Dit was ook die geval in die twee Wêreldoorloë.
So het hierdie mense se gees vaardig geraak in die gees van die vroue en is die volksetos van hulle nageslag versteur.

Maar in ons tyd is geslagsverkeer buite die eg die norm.

Alle eer aan God.

 

Die Christendom se Voor- en Agterhoede...
Die Christendom word deurentyd voorgestel as ’n leërmag, nogtans is sy Leidsman die Prins van Vrede. Die doel van hierdie leërmag is om vrede te bewerk en die soldate is mans en vroue met ’n geaardheid en ‘n passie vir vrede.
            Dit is ook die rede waarom Genl. Booth, die stigter van die Heilsleër –  leërmag van Heil – sy beweging hierdie besondere naam gegee het en ook waarom al die predikante en lidmate uniforms dra om die beeld van soldaat uit te beeld, en ook waarom Heilsleër predikante vandag nog aan militêre range uitgeken word.

Foto: Genl. William Booth
         
Hulle opereer soos ‘n fisiese leërmag met die Bybel (Swaard) as enigste wapen.
            Wanneer hulle mekaar groet, staan hulle op aandag en salueer mekaar met ’n gebalde vuis met die wysvinger reguit na bo en betoon so: Alle eer aan God!
            In hierdie oorlog van Liefde lê mense hulle lewens af vir Christus en word hulle “nuwe skepsels”.
            Die gees van ’n werklike oorlog is presies die teenoorgestelde. Daar is geen liefde nie, net haat en die totale vernietiging van menselewens. Sulke leërmagte het ’n voorhoede en ’n agterhoede.
            God se leërmag het ook ’n agterhoede en ’n voorhoede: “Want julle sal nie baie haastig weggaan en nie soos vlugtelinge vertrek nie; want die HERE trek voor julle uit, en die God van Israel is julle agterhoede.” Jes. 52:12.
           Die Christendom as gedugte leërmag moet geestelik militant en gedissiplineerd wees, gedurigdeur “oorlog maak”, welwetende dat die oorwinning is reeds in sy hand  want die HERE is sy voorhoede sowel as sy agterhoede. Dit is God se Wil dat siele gered word.
            Om “oorlog” te maak vir die Waarheid is Waarheid – Waarheid sonder foute en sonder leemtes. Die foutlose reinheid van die Waarheid is altyd in oorlog gewikkel teen die duisternis se kettery en valsheid.
            Die spreekwoord is waar: Al gaan die leuen twee keer om die aarde, die Waarheid agterhaal hom wel.
            Wanneer mens die Waarheid praat, hoef jy nooit te onthou wat jy gesê het nie. Wanneer jy lieg het jy probleem om die verdraaide feite te onthou.
            Die Christendom is die enigste Waarheid op aarde en dit word van hom verwag om die Waarheid uit te leef en die leuen te beveg, en, as die Christendom dit nie so doen nie, dan bevraagteken hy sy eie Waarheid!  
            Niemand kan die natuurwet, swaartekrag, verbreek nie. Net so is dit ook die wet van die natuur dat heiligheid en sonde teenoor mekaar staan. Die Waarheid en die leuen, net soos die Lig en die duisternis, het geen gemeenskap met mekaar nie.
Moenie in dieselfde juk trek saam met ongelowiges nie, want watter deelgenootskap het die geregtigheid met die ongeregtigheid, en watter gemeenskap het die lig met die duisternis?
“En watter ooreenstemming het Christus met Bélial, of watter aandeel het die gelowige met die ongelowige?
“Of watter ooreenkoms het die tempel van God met die afgode? Want julle is die tempel van die lewende God, soos God gespreek het: Ek sal in hulle woon en onder hulle wandel, en Ek sal hulle God wees, en hulle sal vir My 'n volk wees.” 2 Kor. 6:14-15.
Oor die wêreld heen het ’n nuwe wending ontstaan: Christus moet weg want Hy gee aanstoot in die parlemente en byeenkomssale van die wêreld. Die duisternis maak beswaar teen die noem van sy Naam.
“Wie is die leuenaar, behalwe hy wat ontken dat Jesus die Christus is? Dit is die Antichris wat die Vader en die Seun loën.” 1 Joh. 2:22
Die gees van die Antichris is reeds in ons midde. Die leuen word geglo en die Waarheid word verdraai.
Kyk wat sê die HERE vir Jeremia: “Ek het jou onder my volk as toetser gestel, as vesting, dat jy hulle weg kan ken en toets.
“Hulle is almal die oproerigste van die oproeriges wat omgaan met kwaadsprekery; koper en yster is hulle; hulle handel almal verderflik.
“Die blaasbalk blaas hard; wat uit die vuur gereed kom, is lood; tevergeefs hou hulle aan met smelt, maar die slegtes word nie afgeskei nie.
“Hulle word genoem: Verworpe silwer; want die HERE het hulle verwerp.
“Die woord wat van die HERE tot Jeremia gekom het: So sê die HERE van die leërskare, die God van Israel: Maak julle weë en julle handelinge goed, dat Ek julle kan laat woon in hierdie plek.
“Vertrou nie op bedrieglike woorde nie – wat sê: Die HERE se tempel, die HERE se tempel, die HERE se tempel is dit!
“Maar as julle jul weë en julle handelinge waarlik goed maak, as julle waarlik reg doen onder mekaar; vreemdeling, wees en weduwee nie verdruk nie en geen onskuldige bloed in hierdie plek vergiet nie en agter ander gode nie aan loop tot julle eie skade nie, dan sal Ek julle laat woon in hierdie plek, in die land wat Ek aan julle vaders gegee het, van eeu tot eeu.
“Kyk, julle vertrou op bedrieglike woorde wat nie baat nie. Jer. 6:27-30; 7:1-8.
As bedrieglike woorde, die leuen, binne die Christendom voorkom, is daar ‘n baie groot fout: Johannes sê: “Kinders, dit is die laaste uur; en soos julle gehoor het dat die Antichris kom, bestaan daar ook nou baie antichriste, waaruit ons weet dat dit die laaste uur is.
“Hulle het van ons uitgegaan, maar hulle was nie van ons nie; want as hulle van ons was, sou hulle by ons gebly het; maar dit moes aan die lig kom dat hulle nie almal van ons is nie. 1 Joh. 2:18-19.
Is jou lewe ’n leuen? Spreek jy leuens?
Die Christendom moet volgens die skrif die ware Kerk wees, ’n heilige Kerk wees, hulle moet bewapen wees, hulle moet besig wees om oorlog te maak teen die duisternis, siele te wen en die Koninkryk te bou. Dit kan mens net met die Waarheid doen!
Onthou jy Hallelujalied 234: “Moet ek gaan met leë hande, moet ek so my Heer ontmoet? Nie een dag aan Hom gewy nie, niks te offer aan Sy voet.
 En dan die pleidooi in strofe 4: “O Gods kinders, wees tog wakker, haas u, werk, dit is nog dag! Smeek en stry vir kosb’re siele, eerlank is dit ewig nag!”
            Jou houding van “wat sal wees, sal wees” is ’n wilde verbeeldingsvlug. Jy en ek het ’n opdrag:  Bly in die Waarheid, verkondig die Waarheid. Maak oorlog teen die leuen.
“As Ek aan die goddelose sê: Jy sal sekerlik sterwe – en jy waarsku hom nie en spreek nie om die goddelose vir sy goddelose weg te waarsku om hom in die lewe te hou nie, dan sal hy, die goddelose, deur sy ongeregtigheid sterwe; maar sy bloed sal Ek van jou hand eis.
“Maar as jy die goddelose waarsku, en hy hom nie van sy goddeloosheid en van sy goddelose weg bekeer nie, dan sal hy deur sy ongeregtigheid sterwe; maar jy het jou siel gered.”
En die Christendom dan?
“En as 'n regverdige hom van sy geregtigheid afkeer en onreg doen, en Ek ‘n struikelblok voor hom gooi, dan sal hy sterwe; omdat jy hom nie gewaarsku het nie, sal hy deur sy sonde sterwe, en aan sy geregtigheid wat hy beoefen het, sal nie gedink word nie; maar sy bloed sal Ek van jou hand eis.
“Maar as jy die regverdige waarsku, dat die regverdige nie moet sondig nie, en hy sondig nie, dan sal hy sekerlik lewe, omdat hy hom laat waarsku het; en jy het jou siel gered. Eseg. 26:18-21.
As jy hierdie boodskap al tot hier gelees het en besef dat jy nie tussen Waarheid en leuen onderskei het nie, dan het die tyd nou vir jou aangebreek om jou hand aan die ploeg te slaan en nooit weer om te kyk nie.
Hoekom doen jy nie wat die Bybel van jou vereis nie? Is dit omdat jou lewe ‘n leuen is wat onder allerlei komplekse en valse regverdiging, huigelary en geveinsdheid verberg is?
Jy kan vrykom van die leuen en met jou broers en susters in die Lig begin wandel. Komaan, lê dapper die leuen af en omgord jou met die Waarheid.
Dan sal ook jy die beskutting van die HERE in jou voorhoede sowel as jou agterhoede hê.
Daar is nie meer tyd om met die leuen te flankeer nie, om in onmin met ander te lewe nie. Ons gaan almal huis toe, ons moet sorg dat ons reg is.
Sowat 32 miljoen mense in Suid-Afrika het op hulle sensusvorms ingevul dat hulle Christene is. Lyk dit vir jou of dit die Waarheid is?
Kyk na die lewe rondom jou – in jou werkplek, in jou skool, op die sportveld, in jou straat waar jy woon...  dink jy dit is die Waarheid dat hier 32 miljoen Christene is, Christene wat die Waarheid aanhang en die leuen teenstaan, wat soos dapper soldate die duisternis beveg?
Is jy een van daardie soort Christene, ’n Christen op papier, of ’n Christen in Woord en Daad!
            “Daarom, rig die slap hande en die verlamde knieë weer op; en maak reguit paaie vir julle voete (hoekom?), sodat wat kreupel is, nie uit lit raak nie, maar liewer gesond gemaak word.
            “Jaag die vrede na met almal, en die heiligmaking waarsonder niemand die Here sal sien nie; en pas op dat niemand in die genade van God veragter nie; dat geen wortel van bitterheid opskiet en onrus verwek en baie hierdeur besoedel word nie.” Heb 12:12-15 – Sjibbolet

Hoop, liefde en oorwinning in Jesus

Maak vandag, ‘n dag in jou lewe vir nuwe dinge – Dinge van hoop en liefde en oorwinning in Jesus se Naam.

Jou verlede met sy teleurstellings, ontnugtering en hartseer moet ook nou plekmaak vir lente in jou lewe.

Pak al jou ou bagasie in ‘n sak, in ‘n groot sak, pak daai sak self, noem elke ding by sy naam wanneer jy dit insit, moenie iets vergeet nie en sit dit vandag, sommer nou, by Jesus se voete… En sê vir HOM,”Ek is nou klaar met my verlede, my hartseer, my tekortkominge, my foute, my teleurstellings… Ek het genoeg gehad. Dit alles het my niks gebaat nie, net vermoei en belas.”

Daar is meer glas in die voorruit as in die truspieëltjie.

Dankie HERE dat U vir my voorspoed beplan en ek vat dit, en ek dank U daarvoor. En as ek enige tyd weer terugkyk na my ou sak, herinner my asseblief dat ek klaar is daarmee.”

“En ek het ‘n nuwe Hemel en nuwe aarde gesien... die heilige stad, die Nuwe Jerusalem... en HY(die HERE) sal by hulle (ons) woon... En God sal al die trane van hulle (ons)  oë afvee, en daar sal geen dood meer wees nie; ook droefheid en geween en moeite sal daar nie meer wees nie.”

“Kyk, Ek maak alles nuut.”

“Aan die dorstige sal Ek gee uit die fontein van die water van die lewe, verniet. Hy sal oorwin, sal alles beërwe; en ek sal vir hom ‘n God wees, en hy sal vir My ‘n seun/dogter wees.”

En God wil vandag vir jou ‘n God wees en jy sal Sy kind wees.”AMEN.

Maak vandag, die eerste dag van die res van jou lewe, pak daai sak en moenie weer terugkyk nie, ons weet almal wat het met Lot se vrou gebeur. Nie een van ons wil ‘n soutpilaar word nie. Ons is Koningskinders!

Lees Openb 21:1-7 en skep moed. Strek jou uit na wat voor is. Daag die toekoms uit met nuwe moed, nuwe visie, nuwe ywer, want, die toekoms, ja, die Ewigheid, behoort aan jou en my! – Sjibbolet

Bemoedig mekaar – Dis Liefde sonder weerga

Bemoediging word deur Paulus beklemtoon (1 Thes 2:11-12) as een van die pilare waarop die Evangelie gebou is. Dis die hoeksteen van die openbaring van Christelike liefde een teenoor ‘n ander (1 Thes 4:18; 5:11,14).
            Die woord bemoedig kom talryk in die Nuwe Testament voor, en beslis nie sonder besondere goeie rede nie.
            Die Griekse woord Parakaleo beteken om saam langs iemand te stap omdat daardie iemand vreesagtig of swak is, probleme het, onder groot druk gebuk gaan. neerslagtig is, om so iemand te bemoedig.
            Stap ‘n entjie saam met hom of haar. Dis jou roeping!
            Dit beteken ook om iemand te ondersteun met die benodigde hulp. Om iemand wat sy werk verloor het te ondersteun met ‘n houer kruideniersware, los nie die probleem op die. Die benodigde hulp is veel groter.
            Gal 6:2 “Dra mekaar se laste (hoekom?) en vervul so die wet(liefde) van Christus.”
            Jak 5:16 “Bid vir mekaar (hoekom?) sodat julle gesond kan word. As jy ‘n misdryf teenoor iemand gepleeg het, bely dit en bid dan vir mekaar.
            Ons leef in ‘n geestelik vyandige wêreld. Ons het nodig om mekaar op deurlopende grondslag te bemoedig en te ondersteun. Moenie skinder nie, gaan help.
            Wanneer ons iemand bemoedig dan skenk ons God se waarheid en hoop aan ander.
            Dis ons plig, ons opdrag, om mekaar te bemoedig.
            Daar is mense wat van tyd tot tyd wil weet, maar as God dan ‘n God van liefde is, waarom gebeur daar sulke treurige goed op die aarde? Feit is, dat ons God se ambassadeurs op aarde is. Dis ons wat die liefde van God so sterk moet versprei dat die treurmares nie sal plaasvind nie.
            As gereddes is dit ons roeping om Christus se onvoltooide werk op aarde te volbring. Dit moet ons doen deur die Evangelie uit te dra, deur Christus se liefde en erbarming uit te dra. Om te bemoedig, om waarheid en hoop te verkondig en toe te pas.
            Die opdrag is ook: Bid vir mekaar. Ons bid hopeloos te min. Ons besef nie dat ons totale behoud van gebed afhang nie. Om vir mekaar te bid en mekaar te bemoedig is een van die groot kragte wat aan die werk moet wees binne die Christen-gemeenskap.
            Omdat die mens verskeie soorte druk moet trotseer, neem bemoediging ook verskeie vorme aan, soos bv. fisiese of geldelike hulp, vermaning, aansporing, bevestiging, lofprysinge, troos, ens. Dit bevestig aan die lydendes hulle waarde en potensiaal, ja, dat hulle meer werd is as mossies Matt 10:31.
            So bemoedig Jesus vir Petrus toe Hy aan Petrus sê dat Petrus ‘n rots is waarop Hy sy gemeente sal bou.
            Het jy al iemand bemoedig met Efes 2:10 “Want ons is sy maaksel, geskape in Christus Jesus tot goeie werke wat God voorberei het, (hoekom?) sodat ons daarin kan wandel.”
            So moet ouers ook hul kinders bemoedig, daar vanaf hul eerste tree.
            Terloops: Het jy al saam met jou predikant gaan bid omdat jy vir hom omgee? Wanneer laas het jy en jou gesin saam gebid?
            Paulus was ‘n meester op die gebied van bemoediging soos bv in 1 Thes 1:2-8 “Ons dank God altyd oor julle almal as ons aan julle dink in ons gebede en onophoudelik in gedagte hou die werk van julle geloof en die arbeid van julle liefde en die lydsaamheid van julle hoop op onse Here Jesus Christus, voor onse God en Vader, omdat ons weet van julle verkiesing, broeders wat deur God bemin word.
             “Want ons evangelie het tot julle nie gekom in woord alleen nie, maar ook in krag en in die Heilige Gees en in volle versekerdheid, soos julle weet hoedanig ons onder julle om julle ontwil gewees het.
            “En julle het navolgers van ons geword en van die HERE deurdat julle die woord in baie verdrukking ontvang het met die blydskap van die Heilige Gees,  sodat julle voorbeelde geword het vir al die gelowiges in Macedónië en Acháje.
            “Want van julle uit het die woord van die Here weerklink nie alleen in Macedónië en Acháje nie, maar ook op elke plek het julle geloof in God uitgegaan, sodat ons nie nodig het om daar iets van te sê nie.”
            As iemand goed doen, bemoedig hulle. As iemand onder druk verkeer, bemoedig hulle. Bemoediging moet ‘n deurlopende aksie wees.
            Mense vra mekaar hoe dit gaan, maar stel nie werklik belang in die antwoord nie. Ons moet ten alle koste belangstel. As daar goeie nuus is, dan moet ons die HERE loof.
            As dit nie sulke goeie nuus is nie, dalk probleme en sorge is, dan moet ons betrokke raak (hoekom?), want “die vrug van die Gees is liefde, blydskap, vrede, lankmoedigheid, vriendelikheid, goedheid, getrouheid, sagmoedigheid, selfbeheersing.” Gal 5:22
            1 Kor 12:20-27 lees: “Maar nou is daar wel baie lede, maar net een liggaam.
            “En die oog kan nie vir die hand sê: Ek het jou nie nodig nie; of ook die hoof vir die voete: Ek het julle nie nodig nie.
            “Maar veel eerder is dié lede van die liggaam noodsaaklik wat die swakste lyk; en dié lede van die liggaam wat vir ons minder eerbaar lyk, beklee ons met oorvloediger eer, en so het ons onsierlike lede oorvloediger sierlikheid, terwyl ons sierlike lede dit nie nodig het nie;
            “God het die liggaam saamgestel en aan die misdeelde lid oorvloediger eer gegee, (hoekom?)  sodat daar geen verdeeldheid in die liggaam mag wees nie, maar dat die lede gelyke sorg vir mekaar mag dra.
            “En as een lid ly, ly al die lede saam; en as een lid geëer word, is al die lede saam bly.”
            “Maar julle is die liggaam van Christus en lede afsonderlik.”
            Bemoedig, vertroos diegene wat as gevolg van een of ander gebeurtenis neergevel is.
            “Bemoedig die kleinmoediges, ondersteun die swakkes, wees lankmoedig teenoor almal.” 1 Thes 5:14.
            Ons sal geliefdes langs die lewenspad moet groet (tot ‘n latere vir sekere weersiens), ons kan finansieel seerkry, ons kan van tyd tot tyd mislukking op die lyf loop, ons kan gesondheidsprobleme ondervind. folterende familieprobleme beleef, veral wanneer sommige goed mos gelyktydig gebeur.
            Ons kan ook gebroke harte hê, maar Jesus heel die gebroke harte. Bemoedig iemand het hierdie woorde:
            “Want so sê die Hoë en Verhewene wat in die ewigheid woon, Heilig is sy Naam: Ek woon in die hoogte en in die heilige plek en (maar ook) by die verbryselde en nederige van gees (hoekom?), om te laat herlewe die gees van die nederiges en te laat herlewe die hart van die verbryseldes.” Jes 57:15
            Lees in 2 Tim 4 hoe Paulus vir Timotheus bemoedig.
            Soms word ‘n gelowige deur ‘n misdaad oorval. Wat dit ook al mag wees, staan hom en haar by deur dik en dun. Moenie oordeel nie, help, bemoedig, want”
            “Broeders, as iemand ewenwel deur een of ander misdaad oorval word, moet julle wat geestelik is, so een reghelp met die gees van sagmoedigheid, terwyl jy op jouself let, dat jy ook nie versoek word nie.
            “Dra mekaar se laste en vervul so die wet van Christus.
            “Want as iemand meen dat hy iets is, terwyl hy niks is nie, mislei hy homself.” Gal 6:1-3
            En as jy self ‘n gevangene is of ‘n pasiënt in een of ander inrigting, bemoedig die ander rondom jou. “Die siel wat seën, word versadig; en hy wat laaf, word self ook gelaaf.” Spreuke 11:25
            Bemoedig iemand ook met die volgende: Heb 12:11-13 Nou lyk elke tugtiging of dit op die oomblik nie ‘n saak van blydskap is nie, maar van droefheid; later lewer dit egter ‘n vredevolle vrug van geregtigheid vir die wat daardeur geoefen is.
            “Daarom, rig die slap hande en die verlamde knieë weer op; en maak reguit paaie vir julle voete, sodat wat kreupel is, nie uit lit raak nie, maar liewer gesond gemaak word.”
            Moedig die gebrokenes aan om terug te kom in die wedloop, om die wedloop te voltooi. Elkeen kan in die naam van Jesus Christus oorwin.
            Is jy genoegsaam betrokke by ander Christene sodat hulle kan weet wanneer jy in ‘n lewensslaggat getrap het?
            Dis wonderlik om bemoedig te word, maar dis ‘n groter wonder om iemand anders te bemoedig. Dit is ‘n kragtige bediening wat elkeen van ons geroep is om te lewer.
            Om effektief in hierdie roeping te kan optree, moet mens die Woord goed ken. Dis nie ons persoonlikhede, ons knaphandigheid, ons intelligensie wat die punte aanteken nie, maar die Woord van die HERE, want die Woord is lewendig!
            “Want alles wat tevore geskrywe is, is tot ons lering tevore geskrywe, sodat ons deur lydsaamheid en bemoediging van die Skrifte hoop kan hê.
            “En mag die God van lydsaamheid en bemoediging aan julle gee om eensgesind onder mekaar te wees ooreenkomstig die wil van Christus Jesus, sodat julle die God en Vader van onse Here Jesus Christus eendragtiglik uit een mond kan verheerlik. Rom 15:4-6
            Kyk hoe beskryf Jesaja die uitwerking wat die HERE op Sy kinders het: “Die Here HERE het My 'n geoefende tong gegee, dat Ek kan weet om die vermoeide te verkwik met woorde; Hy wek elke môre, Hy wek my oor om te hoor soos die leerlinge.” Jes 50:4.
            Ja, soms is dit nodig om iemand met die Skrifte te bemoedig. Soms parafraseer ons dit in ons eie woorde. Soms is dit nodig om te vertel hoe ‘n betrokke Skrifgedeelte jou eie lewe verander het.
            “Laat ons die belydenis van die hoop onwankelbaar vashou, want Hy wat dit beloof het, is getrou; en laat ons op mekaar ag gee om tot liefde en goeie werke aan te spoor; en laat ons, ons onderlinge byeenkoms nie versuim soos sommige die gewoonte het nie, maar laat ons mekaar vermaan, en dit des te meer namate julle die dag sien nader kom.” Hebr 10:23-25
            Hoop in die Bybel beteken nie wens nie, maar toekoms-feit.
            Ons bemoedig egter nie net mede-gelowiges nie, maar ook die ongereddes. Liefde is die sleutel tot mense se harte en lewens.        
            Bemoediging gaan nie sonder gebed gepaard nie. Die opdrag is om vir mekaar te bid, vir die gereddes en die ongereddes en op die Heilige Gees te vertrou rakende die soort bemoediging wat ons moet verleen.
            “En laat ons nie moeg word om goed te doen nie, want op die regte tyd sal ons maai as ons nie verslap nie.
            “Laat ons dan, terwyl ons geleentheid het, aan almal goed doen, maar die meeste aan die huisgenote van die geloof.” Gal 5:9-10
            Soos wat mens vir die verdruktes bid, kom lê die Heilige Gees dit op ‘n mens se hart oor hoe mens moet optree. Dalk deur ‘n persoonlike besoek, ‘n telefoonoproep, ‘n e-pos. Dalk ‘n bemoedigende woord, dalk ‘n skenking van die een of ander aard.
            As mens ‘n goeie luisteraar is, kry mens vele geleenthede om te bemoedig, ook oor watter soort bemoediging nodig is. Dit maak ook dat die ontvanger meer ontvanklik is vir jou bemoediging. Soos met elke bekwaamheid in die lewe oefen mens jou in bemoediging in.
            Moenie aan ‘n verdrukte sê hy moet na jou predikant toe gaan, of jy sal die predikant na hom of haar toe bring nie, nee, jy moet self die bemoediging hanteer.
            Bemoedig elke dag iemand. Dis jou roeping! – Sjibbolet

Die klein jakkalsies verniel die wingerd...

Die klein jakkalsies verniel die wingerd (Hoogl 2:15): Skinderstories waaraan ons, onsself so maklik skuldig maak. “Wie ‘n oortreding bedek, soek liefde; maar hy wat ‘n saak weer ophaal, skei vriende van mekaar.” Spr 17:9
            “Die verstandelose verag sy naaste, maar ‘n verstandige man bly stil.” Spr 11:12
            Iemand het gestruikel, ‘n ander het geval. En wat staan ons dan te doen wat nog staande is, voordat ons ook straks struikel of dalk val?
            “As iemand ewenwel deur een of ander misdaad oorval word, moet julle wat geestelik is, so een reghelp met die gees van sagmoedigheid, terwyl jy op jouself let, dat jy ook nie versoek word nie.” Gal. 6:1
            Doen ons dit, of kan ons nie wag om die struikelende en die vallende se saak te beskinder nie?
            Paulus bemoedig ons om die regte ding te doen: “En laat ons nie moeg word om goed te doen nie, want op die regte tyd sal ons maai as ons nie verslap nie.
            Paulus sê ook: “Laat ons dan, terwyl ons geleentheid het, aan almal goed doen, maar die meeste aan die huisgenote van die geloof.” Gal 6:9-10
            Die HERE sê: “As ons, ons sondes bely, Hy is getrou en regverdig om ons die sondes te vergewe en ons van alle ongeregtigheid te reinig.” 1 Joh 1:9
            Die HERE sê ook dat hy die een wat gestruikel het of geval het, se sondes werp in die dieptes van die see. Miga 7:19
            Die HERE sê ook: “So ver as die ooste verwyderd is van die weste, so ver verwyder Hy ons oortredinge van ons af.” Ps 103:12
·       Die afstand tussen noord en suid is net-net meer as 20 000km, maar die afstand tussen oos en wes, is onberekenbaar. As twee vuurpyle langs mekaar afgeskiet word, die een oos en die ander wes sal hulle nooit by mekaar uitkom nie.

            As die HERE dan ons sonde wat ons bely en oor jammer is, so ver van ons af verwyder, hoe durf ander Christene dit by herhaling ophaal en teen ons inbring? As jy dit doen, dan sondig jy.
            As jy nie ‘n gevallene ophelp nie, dan sondig jy. As jy sy struikeling of gevallene beskinder dan doen jy ‘n nog erger sonde.
            “Want so sê die Hoë en Verhewene wat in die ewigheid woon, Heilig is sy Naam: Ek woon in die hoogte en in die heilige plek (en waar nog?) en by die verbryselde en nederige van gees, (hoekom?) om te laat herlewe die gees van die nederiges en te laat herlewe die hart van die verbryseldes.” Jes 57:15
            Vraag is: Waar woon of beweeg jy?
            As jy in geselskap beland waar iemand beskinder word, neem standpunt in en gebruik hierdie Skrifte om die skindertonge te berispe. Een of ander tyd sal die nuus van jou tussenbeitreding die gevallene bereik en julle vriendskap met hom of haar versterk.
            Maar as jy saam skinder het jy die toets gedop! Dan het jy nie Bybelse beginsels voorop gestel nie.
            Maar wees reguit, altyd. “‘n Man wat sy naaste vlei, sprei ‘n net uit voor sy voetstappe.” Spr 29:5
            “Die regverdige laat sy pad vir hom wys deur ‘n vriend; die goddeloses verdwaal op die pad wat hulle self kies.” Spr 12:26
            “Op ‘n vriend wat jou seermaak, kan jy reken; iemand wat jou haat, is oordadig met sy soene.” Spr 27:6
            “Deur die mond stort die roekelose sy naaste in die verderf, maar deur kennis word die regverdiges gered.” Spr 11:9
            Vriende en ander wat jou op hierdie wyse leer ken, sal jou met eerbied behandel. Hulle sal graag jou raad wil vra, graag op jou vertrou. Dit beteken egter dat ons na ander se raad ook sal luister.
            Christenskap is nie soseer om vir almal te vertel jy is ‘n Christen nie, maar om vir ander te wys jy is ‘n Christen, ‘n kind van GOD.
            In Israel en in ander lande durf sendelinge dit nie waag om die Evangelie te verkondig nie. Dit word verbied. Maar die sendelinge verkondig die Woord deur hul lewenswandel. Dit geld ook vir ons. – Sjibbolet