Wie karig saai, sal karig oes

Dit is ‘n Skriftuurlike waarheid: "Dink daaraan: wie karig saai, sal karig oes…want God het die blymoedige gewer lief. En God is by magte om aan julle alles in oorvloed te skenk…" 2 Kor 9:6-8

            Daar is alewig debat oor: Hoeveel tiende moet ek gee, van al my inkomste of net van die deel na aftrekkings? Daar is nog talle argumente. Laat dit wees soos dit wil: Die meetinstrument... God se meetinstrument gaan oor karig saai...

            Twee studente, wat aan die Leland Stanford Universiteit studeer het, moes werk vir hulle studiegelde. Hulle fondse het gedaal en hulle moes 'n plan beraam vir groter inkomste. Hulle kry die plan om 'n konsert aan te bied waarin die Poolse pianis, Ignace Paderewski, 'n klavieruitvoering sou gee.

Die beroemde kunstenaar se bestuurder het 'n waarborg van $2 000 (R30 000) gevra. Die twee studente het voortgegaan en die konsert aangebied. Die aand se opbrengs was $1 600. Hulle het hulle saak aan Paderewski gestel, die volle $1 600 aan hom oorhandig en vir hom 'n skuldbewys van $400 gegee.

"Nee, manne," het Paderewski geantwoord, "dit sal nie werk nie." Hy het die skuldbewys opgeskeur en die $1 600 aan hulle teruggegee. "Trek julle onkoste af en gee vir julle elkeen 10% van die bedrag en laat ek die balans kry."

Die jare het verby gerol en die Tweede Wêreldoorlog het uitgebreek. Paderewski het hard gewerk om sy honger, sterwende Poolse landgenote te help voed. Paderewski het planne beraam om iemand in die buiteland om hulp te nader.

Voor hy sy plan kon uitvoer, begin duisende ton voedsel instroom om die hongeres te voed. Na al die reëlings getref is om die voedsel reg uit te deel, het Paderewski Parys toe gegaan om Herbert Hoover, die skenker, persoonlik te gaan bedank vir sy wonderlike hulp."

Dis alles reg, mnr. Paderewski" het Hoover geantwoord. "Ek het besef die nood is groot en ek is gelukkig in 'n posisie om te help. Buitendien, u sal dit seker nie onthou nie, maar u het eenkeer toe ek en 'n studentemaat in die moeilikheid was, ons uit ons ellende gehelp."

Wat ons vir 'n ander doen, lyk soms vir ons gering, maar God, wat 'n goeie gewer liefhet, sal vir ons sorg as ons die dag in nood verkeer. "Gee, en vir julle sal gegee word: ’'n goeie maat, ingestamp, propvol…" Luk 6:37-42. Dit is God wat ons help, maar Hy gebruik 'n menslike instrument om dit te doen. – Wekroep

Hou moed: Die HERE ken die dae van die Opregtes

“Maar weet dit dat daar in die laaste dae swaar tye sal kom  —  2  Tim. 3:1, skryf Paulus aan  Timotheus, en noem dan in die daarop volgende strofes verskeie voorbeelde van hoe die swaar tye daar sal uitsien.

            Die nuutste is dat daar nou oorlog in 69 lande van die wêreld is. Altesame 824 militante guerrilla groepe tesame met terroriste, anargiste en  separatiste groepe is by die oorloë betrokke. Dit sluit dreigende kernoorloë uit. Die oorloë en en die deelnemers brei steeds uit.

            Hierdie swaar tye gaan gepaard met spanning wat in ons tyd in meeste gevalle aan uiterstes grens.

            Hierdie spanning vernietig gesinne, huwelike, gemeenskappe, en dwing van die grootste maatskappye in die wêreld om spesiale maatreëls te tref om hul werknemers te beskerm en daarvoor te laat behandel.

            Die steeds toenemende spanning van uiterstes raak meer mense se lewens as pandemies soos VIGS. Hospitale en mediese spreekkamers loop oor van mense wat aan  spanning-verwante siektes soos depressie ly.

            In sommige opsigte reeds, is strofe 12 ook besig om in vervulling te gaan:  En almal wat ook Godvrugtig wil lewe, sal vervolg word!

            Vervolging in watter vorm ook al, bring sy eie soort spanning en meesal ook erge spanning.  Spertye bring spanning.  Perfeksionisme bring spanning.  Om iemand geestelik te dra bring spanning.  Ondraaglike werksituasies bring spanning. So ook ondraaglike huwelike.

            In 2 Kor. 11:27-28 praat Paulus oor spanning wat hy persoonlik beleef het en verwys hy onder meer na slapelose nagte en daaglikse bekommernis.

            Ons het almal al dae van druk en uitsonderlike hoë druk beleef, maar Paulus gaan voort en vertel dat hy vasgestaan het en GOD hom daarvan verlos het:

            Bemoediging: 2 Tim. 3:11 lees: “Watter vervolginge het ek nie al almal verdra nie!  En die HERE het my uit almal verlos!”

            As Paulus kon vasgestaan het, dan kan ons ook.  Maar dit sal dieselfde onwankelbare geloof van ons vereis as wat ons by Paulus sien —  aldus  2 Tim. 4:7 lees: Ek het die Goeie Stryd gestry....

            Deurbrake kom nie altyd maklik nie, maar wanneer mens vol vertroue aanhou vertrou, aanhou met klop, dan kom die deurbraak wel die een of ander tyd. Dit sal beslis kom want God self het gesê dat as ons aanhou klop dat sal daar vir ons oopgemaak word.

            Dit bring ook (onnodige) spanning wanneer ons meen dat ons nie genoeg het nie.  Ons vrees tekorte.

Ons gaan ten gronde weens ‘n gebrek aan kennis en dit omdat ons nie moeite maak om ons Bybels te bestudeer nie.

            As ons wel die kennis opdoen, dan is die volgende aan uit Ps 37:18-19, 25 baie betekenisvol:

            Bemoediging: “Die HERE ken die dae van die opregtes, en hulle erfdeel sal tot in ewigheid bly.  Hulle sal nie beskaamd staan in die slegte tyd nie, en in die dae van hongersnood sal hulle versadig word.  Ek was jonk, ook het ek oud geword, maar nooit het ek die regverdige verlate gesien nie, of dat sy nageslag brood soek nie.”

            Koning Dawid sou nie die bogenoemde geskrywe het, as hy nie self getuie daarvan was nie.

            GOD sal ons nie verlaat nie.  Hy sal Hom ook nie aan ons onttrek nie.  Sy Liefde, Genade en Guns, skenk Hy aan ons.

            Een keer was Dawid onseker oor sy verhouding met GOD en toe vra hy in Ps 8:5: “Wat is die mens dat U aan hom dink, en die mensekind dat U hom besoek?”

            Dis ‘n vraag wat ons ook kan vra:  Wie is ons as nietige mens, as gras van die veld, dat die Almagtige GOD  aan ons sou dink?

            1 Pet 5:7 lees: “Werp al julle bekommernisse op Hom (hoekom?) want Hy sorg vir julle!”

            Bemoediging: Asook Ps 55:23: “Werp jou sorg op die HERE en Hy sal jou onderhou;  (let op) Hy sal nooit die regverdige laat wankel nie.”

            En dat is daar Ps 9:10: “So is die HERE dan ‘n rotsvesting vir die verdrukte, ‘n rotsvesting in tye van benoudheid.”

            En strofe 11: En hulle wat U Naam ken, sal op U vertrou, omdat U diegene wat U soek, nie verlaat nie, o’ HERE!”

            GOD behoed en bewaar ons.  Hy dra ons, wat die omstandighede ook al mag wees.  Al wat dit vra is dat ons dit sal erken, bely en glo en Hom daarvoor eer  —  in Gees en in Waarheid aanbid, Sy Naam grootmaak!

            Dan maak dit nie saak hoe hoog die prys van wat ook al word nie,  GOD sal die inkomste voorsien.  Hy sal ons nooit verlaat nie.

            Wat sê onse GOD vandag aan ons?  Eenvoudig:  Moet julle nie bekommer nie. Ek die HERE GOD is in beheer. Bly julle eenvoudig opreg. – Wekroep

Jesus doen ‘n hartoorplanting

‘n Negejarige seuntjie het 12 ure lank per bus na Mexikostad gereis vir ‘n nuwe hart. Hy moes ‘n hartoorplanting kry.

            Hy verkoop toe plantjies om die reisgeld te bekom. Met sy vertrek  het hy aan sy moeder gesê: “Moenie bekommer nie, ek sal my wonderwerk ontvang wanneer ek die hoofstad van Mexiko bereik. 

            Toe hy die stad binnekom is hy deur booswigte van sy  oorblywende geldjies beroof. Dit het nie sy moed of geloof geknak nie. Hy was op pad na sy antwoord  en hy sou nie rus voordat hy saam met 20 000 ander mense die groot diens in die reuse ouditorium bywoon nie.

            Toe Guillermo Maldonado, Evangelis van Florida in die VSA, die ouditorium in Mexikostad binnestap het die heerlikheid van die HERE binnegekom. Vooraf het die HERE vir  Guillermo gesê: “Jy sal vir niemand bid nie, kyk, aanskou hoe Ek, die HERE God Jahweh, dit doen.”  

Lof- en aanbiddingsliedere het vyf ure lank aangehou....  Guillermo het niks gedoen nie, behalwe om saam die naam van die HERE groot te maak.

Tydens die lof en aanbidding het 10 mense uit hulle rystoele uit opgestaan, blakend gesond. Dowes het gehoor, blindes het gesien...

Toe bring hulle die 9-jarige seuntjie na die verhoog... en die seuntjie het in trane vertel: ”Toe die heerlikheid van Jesus oor my kom was daar ‘n brand gevoel in my bors en nou het ek ‘n nuwe hart.”

Twintig mediese dokters wat in die diens aanwesig was, het almal na die seuntjie se nuwe hart geluister en getuig, sy nuwe hartjie klop foutloos.

            Guillermo sê dit het nou in ‘n paar van sy dienste gebeur dat die Heerlikheid van die HERE net op die mense val sonder dat hy preek.

Hy is oortuig daarvan dat genesings en wonderwerke wêreldwyd op groot skaal gaan plaasvind waar Gelowiges op die HERE wag.

            Dit laat mens wonder oor SA. Is ons so behep met die daaglikse lewe, dat ons, ons oë van die HERE afhaal?

            Om vyf ure lank die HERE te loof en te aanbid in gebed en sang, is ongehoord. Gelowiges wat ‘n intieme verhouding met die HERE het, moet dit gerus doen.

Tydens die bekende charismatiese Herlewing vanaf 1970 tot 1980, het Gelowiges dag en nag gebid, en soms sommer hande gevat op sypaadjies om te bid. Sommige het 3vm opgestaan om ander in motorhuise, kerksale en elders te ontmoet vir gebed. Groot en klein het daaraan deelgeneem en getuienisse het soos waterstrome Nuwe Lewe voortgebring. Ere sy die Lam van God. – Wekroep

Ook hulle het my en jou nodig

Ons noem hulle boemelaars of swerwers. Hulle lewe meesal in groepe saam. Bedags split hulle op en elkeen kyk hoeveel geld hy kan bedel.

            Vanaand word die geld getel, word ‘n bottel Old Brown en ‘n bottel brandewyn gekoop en met die res van die dag se geldjies word watter kos ook al gekoop.

            Een vertel: Niemand gee eintlik vir hulle om nie…mense gee hulle wel geld maar meer om van hulle ontslae te raak. Hulle word beskou as dronklappe, vuil, as bosslapers, uitvaagsels. Die enigste liefde wat hulle ken is hulle omgee vir mekaar.

            Ons sal verbaas wees om te weet hoeveel gegradueerdes vandag boemelaars is. Een was bv op skool hoofseun, eerste rugbyspan kaptein. Altyd met lof geslaag. Op varsity het hy skitterend presteer.

            As sakeman  was hy met nog groter sukses begroet, had sy eie geboue,eie straler, eie vlugersoneel, ens. Dan neem drank en dwelms en ‘n loslewe oor. Iemand loop hom gruwelik in. hy verloor alles en hy beland op moedverlore se vlakte. Hy was vyf jaar lank ‘n boemelaar in Kaapstad.

             Dit neem hom 20 dae om Bloemfontein te bereik. Hy maak sy saak met de HERE reg, met sy verlore dogter en ontmoet en trou met die meisie wat hy in matriek trou aan beloof het. Hy het weer ‘n besigheid en tree ook op as motiveringspreker. Hy en sy vrou dien die HERE getrou.

            'n Boemelaar wat onder 'n boom in 'n klein dorpie gesit het, het 'n verlede gehad wat so seer was vir hom dat hy dit wou vergeet, maar nie kon nie.

Die inwoners wou hom wegjaag maar die 'minister' van die dorpie het hom in sy huis geneem en vir hom skoon klere en kos gegee.

 Die boemelaar kon nooit verstaan hoekom die man so vriendelik was terwyl al die ander op hom neergesien het nie,maar die 'minister' en die boemelaar het meer in gemeen gehad as wat hy gedink het aangesien die 'minister' ook eens op 'n tyd sy lewe aan drank oorgegee het.

'n Hele rukkie het verbygegaan.  Dit het goed gegaan met die boemelaar.

Hy het werk gekry en het die apteek uitgehelp deur die medisyne te verpak

Een aand het hy saam met die apteker laat gewerk toe hulle 'n verskriklike slag hoor. Een van die grootste ongelukke.

Omdat dit so 'n klein dorpie was is sulke noodgevalle met helikopters na die naaste groot hospitaal gevlieg,maar daardie aand was daar 'n groot storm.

Die apteker het na die boemelaar gedraai en gesê:"Ek weet wie jy is en jy is die enigste een wat hierdie mense se lewens kan red.”

Trane het oor die boemelaar se wange gerol. "Ek kan nie" het hy gesê. “'n Seuntjie is dood omdat ek te veel gebewe het en nie kans gehad het om gou 'n slukkie drank te vat om te kalmeer voordat ek begin opereer het nie.”

Die boemelaar het begin hardloop. In die donker nattigheid het hy voor 'n geboutjie neergeval en hardop uitgeskreeu: "HERE,hoe gaan ek ooit oor hierdie ding kom? Ek kan nooit ooit weer opereer nie!”

Toe hy sy oë oopmaak staan daar op 'n klip voor die klein geboutjie geskrywe: Jy is tot alles in staat deur die HERE wat jou krag gee!

            Die boemelaar het vir sy sondes jammer gesê,sy hart vir die HERE gegee en homself vergewe.

Daardie aand was dit nie net die twee mense in die ongeluk wat gered was nie,maar die boemelaar dokter ook!

Moet nooit dink jy is beter as ander nie.  Jy weet nie wat hulle situasie of omstandighede is nie. Vir die HERE is daar nie 'n sonde te groot wat Hy nie sal vergewe nie.

Solank jy jammer is oor dit wat jy gedoen het en jouself ook vergewe,sal jy altyd toegevou word in die arms van die HERE en sal jy rus vind in Hom!

Boemelaars vertrou nie iemand maklik nie, maar gaan kuier by hulle, leer hulle ken, wen hulle vertroue en bring hulle in na die heerlikheid van Jesus. Hulle het ons so nodig. – Wekroep

Die Dae van Noag en Lot

Jesus vertel oor die toestand van die wêreld net voordat Hy kom...

“En soos dit gebeur het in die dae van Noag, so sal dit ook wees in die dae van die Seun van die mens: hulle het geëet en gedrink, hulle het getrou en is in die huwelik gegee tot op die dag dat Noag in die ark ingegaan het, en die sondvloed gekom en almal vernietig het.”

Net soos dit ook gebeur het in die dae van Lot: “Hulle het geëet en gedrink, gekoop en verkoop, hulle het geplant en gebou.”

“Maar op die dag toe Lot van Sodom uitgaan, het vuur en swawel van die Hemel af gereën en almal vernietig.” Luk 17:26-29

Jesus het gesê dat dit so sal wees net voordat Hy kom, maar dit klink nie of daar juis iets verkeerd was nie. Die waarheid is, dat terwyl almal oënskynlik hulle eie gang gaan, was hulle blind vir die werklike gebeure.

            Wat die mens nie gesien het nie, het God gesien: “Toe die HERE sien dat die boosheid van die mens op die aarde groot was en al die versinsels wat hy in sy hart bedink, altyddeur net sleg was... Maar die aarde was verdorwe voor die aangesig van God, en die aarde was vol geweld.” Gen 6:5,11

            So raak die sonde in die wêreld al hoe gruweliker, maar die meerderheid mense en ook die kerke, gaan hul gewone gang asof niks verkeerd is nie. Dat 29 miljoen vroue en kinders in SA en wêreldwyd ontvoer is en as seksslawe verkoop is, raak skynbaar niemand nie.

            Dat die vervolging van Christene regoor die wêreld toeneem en al hoe meer suid in Afrika beweeg, pla ook glad nie, ook nie dat tussen nege en tien mense per dag in Kaapstad vermoor word nie, ook nie duisende onskuldige babas wat in aborsies sterf nie.  En so kan mens aangaan. Dink ook maar aan die plaasaanvalle en –moorde. Die lys is nogal lank.

            Hierdie verslegtende toestand heers wêreldwyd. Wet en orde bestaan haas nie meer nie en diegene wat dit moet toepas is nie opgewasse  nie of word vervolg.

            Sommige kerkleiers belowe aan lidmate wat sondig, dat die HERE se genade hulle sal oorsien, al hou hulle ook aan met die sondig. Die konsep van Heiligmaking is vir die meeste ‘n verlore boodskap.

            Oor dit alles sê Paulus: “Terwyl ons dan hierdie beloftes het, geliefdes, laat ons, ons van alle besoedeling van die vlees en die gees reinig, en laat ons die heiligmaking in die vrees van God volbring.” 2 Kor 7:1         

            Ons kan nie dat hierdie gruwelike sondes net aangaan nie, ons moet standpunt inneem in die naam van Jesus Christus, terwille van die Godsvolk en ons kinders.

            Daar is baie mense wat nie gered sal word en gereed sal wees vir Jesus se Koms nie, maar ek en jy moet die tyd uitkoop en siele wen en dissipels maak so ver ons kan.

            Mag God ons help om hierdie tyd van Noag en Lot te oorleef.

            Louwarm gemeentes, Christene en gemeenskappe sal nie triomfeer aan die einde van die tyd nie. Gemeentes wat tot wêreldse standaarde  gedaal het sal nie staande kan bly nie.

            Terwyl almal aangaan asof daar geen fout is nie, is die Groot Afval ook besig om in vervulling te gaan soos wat al hoe meer mense die kerke, die Bybel en God minag. 2 Thes 2:3-12 bevestig die Groot Afval.

            Ons leef in die tyd wat Jesus verduidelik het. Die enigste verskil is dat alles reeds by verre veel erger is as wat dit in die Bybelse tyd was. Jesus kan dus enige oomblik sy verskyning maak.

            As jy enige geestelike hulp of gebed verlang, skryf aan ons by belindapaar@gmail.com – Wekroep

So, herbou ons Suid-Afrika

Hoeveel regmerkies sal julle as gesin vir julle self in hierdie boodskap kan gee? En jy wat geskei is, of wil skei, wat sou jy eendag voor die Regterstoel antwoord wanner jy gevra word oor waar jou huweliksmaat en jou kinders is?

God se ideale situasie is dat die man die hoof van sy huis moet wees – nie om baas te speel nie, maar om verantwoordelikheid vir sy huis te neem... juis omdat God die man verantwoordelik hou vir sy gesin – maar meer nog, hy moet die priester van die huis wees, God se verteenwoordiger in die huisgesin. God hou die man verantwoordelik vir die geestelike welsyn van die vrou en die kinders.       

            Mans verlaat hul ouerhuise om hul vroue aan te kleef en lief te hê. “Daarom sal die man sy vader en moeder verlaat en sy vrou aankleef. En hulle sal een vlees wees.” Gen 2:24

            ‘n Man is die hoof van die vrou. “Maar ek wil hê dat julle moet weet dat Christus die hoof is van elke man, en die man die hoof van die vrou, en God die hoof van Christus.” 1 Kor 11:3. God hou elke man verantwoordelik vir hoe die man sy vrou hanteer.

            Mans moet hulle vroue liefhê. “Manne, julle moet jul eie vroue liefhê, soos Christus ook die gemeente liefgehad en Homself daarvoor oorgegee het.” Efes 5:25. ‘n Man moet sy vrou dus so liefhê dat hy bereid moet wees om homself te offer vir haar.

            Liefde gee die deurslag. Liefde is en bly die grootste Gebod. Met ware getroue liefde vermag mens enigiets, verskuif jy berge.

            Mans moet hul vroue eer. “Net so moet julle, manne, verstandig met hulle saamlewe en aan die vroulike geslag, as die swakkere, eer bewys, omdat julle ook mede-erfgename van die genade van die lewe is – sodat julle gebede nie verhinder mag word nie.” 1 Pet 3:7

            Let op: As ‘n man nie verstandig met sy vrou saamlewe nie en aan sy vrou as die swakkere een, eer bewys nie, word die man se gebede verhinder.

            Baie is altyd gou om strofes aan te haal dat die HERE ‘n mens se gebede beantwoord en dat mens kan vra net wat jy wil, maar hulle laat na om te besef dat die beloftes ook voorwaardes bevat.

            In 1 Pet 3:7 sê die HERE bv. Dat ‘n man se gebed verhoor sal word as hy verstandig met sy vrou saamlewe, as hy aan haar as die swakkere eer bewys.

            Mans moet beheer oor die huishouding neem. “'n Opsiener dan moet onberispelik wees, die man van een vrou, nugter, ingetoë, fatsoenlik, gasvry, bekwaam om te onderrig;

            “geen drinker, geen vegter, geen vuilgewinsoeker nie, maar vriendelik; geen strydlustige, geen geldgierige nie;

            “een wat sy eie huis goed regeer en sy kinders met alle waardigheid in onderdanigheid hou.” 1 Tim 3:2-4

            Let weer op: ‘n Man moet sy kinders in alle waardigheid... in onderdanigheid hou.” Nie met ‘n gevloek en ‘n geskel en dreigemente nie, maar in alle waardigheid.

            Waardigheid kweek liefde en eerbied. Enige ander manier is vernietigend.

            En strofes 12-13: “Die diakens moet manne van een vrou wees en hulle kinders en eie huis goed regeer.

“Want diegene wat goed gedien het, verkry vir hulle 'n eervolle plek en veel vrymoedigheid in die geloof in Christus Jesus.”

Net so die vroue ook. “Net so moet die vroue waardig wees, geen kwaadsprekers nie, nugter, betroubaar in alles.” 1 Tim 3:11.

Die vroue is ook die man se helper en die man mag dus sekere take aan die vroue delegeer. Onthou altyd, die man en die vrou is een vlees. Sodra hulle gemeenskap gehad het, is hulle een vlees. Matt 19:5-6

Ons is voorstanders daarvan dat pleks van geslagsvoorligting, daar gesinsvoorligting op skool moet wees, en op grond van die volgende:

“'n Opsiener (die hoof van die huis, die hoof van enigiets in die lewe) dan moet onberispelik wees, die man van een vrou, nugter, ingetoë, fatsoenlik, gasvry, bekwaam om te onderrig;

“geen drinker, geen vegter, geen vuilgewinsoeker nie, maar vriendelik; geen strydlustige, geen geldgierige nie;

“een wat sy eie huis goed regeer en sy kinders met alle waardigheid in onderdanigheid hou.

“Maar as iemand nie weet om sy eie huis te regeer nie, hoe sal hy vir die gemeente van God sorg dra?

“Hy moet nie 'n nuweling wees nie, sodat hy nie verwaand word en in dieselfde oordeel as die duiwel val nie.

“Maar hy moet ook goeie getuienis hê van die buitestanders, sodat hy nie in veragting en in die strik van die duiwel val nie.” 1 Tim 3:1-7

Mans tree in die huwelik sonder dat hulle die vaagste benul het waaroor dit gaan.

Omdat die man die hoof van die huis is, is hy ook verantwoordelik vir alle besluite wat geneem word. Dit beteken nie dat vroue geen seggenskap het nie, maar dat hulle optree onder die sekuriteit van die man se gesag. Daar moet orde en dissipline wees, asook ‘n begroting.

Dit is interessant om te sien dat mans hulle vroue moet liefhê. Dit is ‘n opofferende liefde.

“Wees aan niemand iets skuldig nie, behalwe om mekaar lief te hê; want hy wat 'n ander liefhet, het die (Koninklike) wet vervul.” Rom 13:8

“Want dít: Jy mag nie egbreek nie, jy mag nie doodslaan nie, jy mag nie steel nie, jy mag geen valse getuienis gee nie, jy mag nie begeer nie, en watter ander gebod ook al, word in hierdie woord saamgevat: Jy moet jou naaste liefhê soos jouself.” Rom 13:9

As jy jouself liefhet, respek het vir jouself, vir jouself omgee voor God en die mens, dan sal jy nie egbreek, doodslaan en dergelike dinge doen nie nie.

En weer ‘n keer: “Want die hele (Koninklike Wet - Jak 2:8) word vervul in een woord, naamlik: Jy moet jou naaste liefhê soos jouself.” Gal 5:14

Het jy jouself lief? Hoeveel het jy jouself lief, ‘n bietjie of met jou hele hart? Kyk na die waarskuwing: “Maar as julle mekaar byt en opeet, pas op dat julle nie die een deur die ander verteer word nie.” Gal. 5:15

Liefde is en bly die Groot Gebod. Wandel in die ware liefde en daar sal nooit probleme wees nie. Die liefde, is ‘n Koninklike Wet: “As julle ewenwel die Koninklike Wet volbring volgens die Skrif: Jy moet jou naaste liefhê soos jouself – dan doen julle goed.” Jak 2:8

As ons nie onsself lief het nie, kan ons nie ons naaste liefhê nie, nie mekaar liefhê nie, dan doen ons nie goed nie. Naaste aan ons is sekerlik ons huismense.

Dat ‘n man sy vrou moet liefhê, is ‘n opdrag, ‘n Koninklike opdrag. Om daarin te kan slaag om so lief te wees, moet ‘n man sekerlik sy vrou wil liefhê.

As alle mans hierdie opdrag ter harte wil neem, dan sal dit alle struikelende huwelike oornag salf en regruk.

Onthou ook, die vrou is uit die man se ribbebeen gemaak, nie uit sy mond, of sy vuiste of sy voete nie, ook nie uit sy strydlustige gees nie. Uit sy ribbebeen beteken na aan sy, sy... koesterend, liefkosend, beskermend.

“So behoort die mans hulle eie vroue lief te hê soos hul eie liggame. Wie sy eie vrou liefhet, het homself lief;

“want niemand het ooit sy eie vlees gehaat nie, maar hy voed en koester dit, net soos die Here die gemeente.” Efes 5:28-29

Let weer op: Wie sy vrou liefhet, het homself lief!

‘n Man sonder ‘n vrou is nie volledig nie. Wanneer hy in die huwelik tree word hy eers volkome man.

Is hulle ‘n eenheid? Nee. Hulle kan nooit ‘n eenheid wees nie want elkeen het sy eie karakter en persoonlikheid. Eenheid beteken noodwendig eendersheid. So ‘n eendersheid huwelik sou ook maar eentonig gewees het.

Maar hulle kan eendragtig wees, vir seker. Die eendragtigheid word ook gesien in die kinders wat hulle in die lewe bring.

Die vrou moet haar onderwerp aan die gesag van die man. “Vroue, wees aan julle eie mans onderdanig, soos aan die Here. (respekteer julle mans)

“Want die man is die hoof van die vrou, soos Christus ook Hoof is van die gemeente; en Hy is die Verlosser van die liggaam.

“Maar soos die gemeente aan Christus onderdanig is, so moet die vroue dit ook in alles aan hul eie mans wees.” Efes 5:22-24

Die egskeidingsyfer is Suid-Afrika is skrikwekkend hoog. Daar moet ‘n rede voor wees. Berading dui telkens op liefdeloosheid, soos wat sogenaamde Christene se liefde teenoor God ook verflou het.

Almal wat hieraan skuldig is, staan skuldig voor God! “Vreeslik is dit om te val in die hande van die lewende God.” Heb 10:31

“Daarom, rig die slap hande en die verlamde knieë weer op; en maak reguit paaie vir julle voete, sodat wat kreupel is, nie uit lit raak nie, maar liewer gesond gemaak word.

“Jaag die vrede na met almal, en die heiligmaking waarsonder niemand die HERE sal sien nie; en pas op dat niemand in die genade van God veragter nie; dat geen wortel van bitterheid opskiet en onrus verwek en baie hierdeur besoedel word nie.” Heb 12:12-15

In die proses van restourasie, kry ook die Huisaltaar weer aan die gang.  – Wekroep

Die ware Hartoorplanting

Toe wyle Prof Chris Barnard die eerste hart oorgeplant het, het dit die hele wêreld aangegryp. Vir maande en langer was dit al waaroor almal in die wêreld kon praat.

            Skrywer was self ‘n daardie tyd ‘n hartpasiënt daar. Ek het alles eerstehands beleef.

            Barnard en sy span kon ’n mens vanaf die rand van ‘n besliste dood red deur vir hom of haar ‘n nuwe hart oor te plant.

            Lank voor hierdie geskiedkundige en opspraakwekkende gebeurtenis, bied God Jahweh aan die mens die geleentheid om ‘n nuwe hart gratis te bekom…. Gratis, want die koste is reeds betaal.

            Die Messias sterf aan die Kruis op Golgota, word begrawe en staan drie dae later op… God se mees dramatiese reddingsplan om die menslike ras teen homself te beskerm.

            In 2019 het die mensdom al vergeet van Chris Barnard en sy baanbrekerswerk… alhoewel dit nog daagliks in Groote Schuur Hospitaal gedoen word.

            Die verhaal van Golgota bly vir altyd nuut. Die mensdom kan steeds gered word, maar verkies om sy eie heil uit te werk…. Die Eindtyd Tekens ten spyt.

            Barnard se oorplantings het verlenging van lewe beteken, maar kon nie die Ewige Lewe bied nie.

            As die Messias nie uit die dood opgestaan het nie, had die bloedbevlekte Kruis geen betekenis nie.

            Geen poging van die mensdom om homself te red sal slaag nie. Met die eerste landing op die Maan, was geglo die mensdom het die wêreld oorwin.

            Hulle wil steeds nie aanvaar dat die HERE God Jahweh  die ganse wêreld in die holte van Sy hand vashou nie.

            Wat gebeur wanneer jy Wedergebore word:

1.         Dan is ek ‘n Nuwe Skepsel.

“As iemand in Christus is, is hy ‘n NUWE SKEPSEL….  Ou dinge het verby gegaan….  Het alles NUUT GEWORD.” –  (1Kor. 5:17).



2.         Dan het ek die Ewige Lewe.

“Hy wat in die Seun glo, het die EWIGE LEWE….” – (Joh.  3:36;  6:47;  1 Joh. 5:12)



3.         Dan het ek Sekerheid van my Verlossing en my Ewige Behoud.

“Die GEES self GETUIG saam met ons gees dat ONS KINDERS VAN GOD IS.” – (Rom. 8:8).

“Ek gee hulle die Ewige Lewe en hulle sal NOOIT VERLORE GAAN  tot in Ewigheid nie….” – (Joh. 10:29; Filip. 1:6; Joh. 5:10-13;  Jes. 43:1 – 8.



4.         Dan moet my Geestelike Lewe Altyddeur groei.

“Julle moet TOENEEM in die GENADE en KENNIS van onse Here ….” – (11 Pet. 3:18).

“Word met die GEES VERVUL.” – (Efes. 5: 18b).

“Jaag die HEILIGMAKING na….” (Heb. 12: 14;  1 Pet. 1:15-16.

            Hiervoor is GEREELDE GEMEENSKAP met die HEILIGES, DAAGLIKSE BYBELSTUDIE en INNIGE GEBEDSGEMEENSKAP MET GOD,

onontbeerlik.



5.         Dan moet ek God en my Naaste Dien.



Deur my GEDRAG -- (1Kor. 6: 19,20;  Filip. 2:15).

Deur my gawes – (1Pet. 4: 10; Tit. 2:14;  Tit. 3: 8; Efes. 2: 10; Jak. 2:20).

Deur my GETUIENIS –  (Hand. 2: 4, 11; Eseg. 3: 17,18).

Want ek is gered om VRUG TE DRA (Joh. 15:  16) om te VERKONDIG  (1 Pet. 2: 9), om TE GETUIG (Hand. 1: 8).



6.         Dan moet ek My Ganse Lewe God Verheerlik.

(1 Kor. 6: 20; 1 Kor. 10: 31 ; Kol. 3: 23).

            Terwyl almal holderstebolder rondbeweeg op soek na oplossings en uitkoms, sal die Messias binnekort Sy belofte gestand doen en op die wolke verskyn om sy Bruid te kom haal. Die Basuin sal die Einde aankondig. Dan is dit vir Ewig te laat.       

            "Blaas die basuin op Sion, en blaas alarm op My heilige berg! Laat al die inwoners van die land bewe, want die dag van die HERE YAHWEH kom, want Hy is naby." Joël 2:1 – Wekroep

God het ons nodig om SA te red

As jy nie weet hoekom jy woon waar jy woon nie, begin die Evangelie in jou straat verkondig en jy sal gou uitvind. Die persoon langs jou in die vliegtuig, in die bus... dit bly dieselfde... jy het ‘n boodskap vir hulle. Gooi ten minste ‘n traktaat in elkeen se posbus.

            In Londen, naby St. Paul’s, is ‘n straat met die naam Godliman Street, vertel die bekende dr. F. B. Meyer. Die ligging van die straat, naby so `n groot, bekende kerk, kon dalk die rede vir die naam gewees het.

Of, daar het dalk ‘n besonder toegewyde persoon gewoon, want die naam is van die Engelse woord, “godly” (Goddelik) afgelei.

Hoe voel die mense, veral die mans, wat in daardie straat woon? Kan dit dalk ‘n verleentheid wees as mens vir ‘n ander moet sê waar jy woon?

Ek kom uit in Sionstraat in die Paarl. Pas die mense wat daar gewoon het of nou woon, se lewensgedrag by die straat se naam?

Voel jy dalk jy sal ontuis voel in so ‘n straat? Ons moet onthou, in die Hemelstad, is ook strate. Of hulle name het, weet ons nie.

Die strate is van goud...

“En die fondamente van die muur van die stad was versierd met allerhande edelgesteentes. Die eerste fondament was jaspis, die tweede safier, die derde chalcedoon, die vierde smarag; die vyfde sardóniks, die sesde sardius, die sewende chrisoliet, die agtste beril, die negende topaas, die tiende chrísopraas, die elfde hiasínt, die twaalfde ametís.” Openb 21:19-20

Ons moet baie seker maak, dat ons, ons toegangsreg tot die Hemel verkry het, deurdat ons Wedergebore is. Dat ons in Jesus Christus, as ons Verlosser, vertrou het. Van alle dinge op aarde is dit die belangrikste voorsorgmaatreël vir ons.

Onthou jy die baksteen?

“En jy, mensekind, neem vir jou 'n baksteen en sit dit voor jou neer, en teken daarop 'n stad, naamlik (jou dorp, stad, voorstad); maak dan 'n beleëring daarteen en bou forte daarteen en gooi 'n wal daarteen op en stel laers daarteen op en lê stormramme daarteen aan rondom.” Eseg 4:1-3. Luister eers hierna voordat jy verder lees: https://youtu.be/si16519XNR0

          Sedert die skepping van die mens het die Almagtige God deur die eeue bewys gelewer van watter waarde Hy heg aan ‘n enkele persoon, EEN MAN, op hierdie aarde.

    Aan EEN man, Adam, word die mag gegee om al die diere van die aarde te noem soos hy wil. Die invloed van die val van dieselfde Adam word vandag nog oor die ganse aarde deur die ganse mensdom gevoel.

    EEN man, Noag, word verkies om die ark te bou, om sodoende ‘n spruit vir die menslike geslag aan die lewe te hou.

    EEN man, Abraham, word geroep uit Ur van die Galdeërs om die vader  van  alle gelowiges te word en die vader van die geslag waaruit Jesus Christus gebore sou word.

    EEN man, die hakkelende Moses, word geroep om die hele volk Israel, uit Egipte uit te lei en vir veertig jaar deur die woestyn te neem. Hy tree op as skakel tussen God en die volk.

    “En ek het onder hulle ‘n man gesoek wat ‘n muur kan bou en voor My aangesig in die bres kan staan vir die land, sodat Ek dit nie verwoes nie, maar Ek het niemand gevind nie.” – Eseg. 22-30

    Toe God die volk wou verdelg, tree Moses  –  EEN MAN  –  op as voorbidder dat die  volk gespaar sou word.

    Na hom volg weer  EEN  man, Josua, en dan elkeen van die Rigters op hul beurt, die profete  Nehemia, Daniël  en andere wat as EENLINGE opgetree het tussen God en die volk, en wat het hulle nie alles uitgerig nie!

Die Nuwe Testament begin met die optrede van Johannes die doper, as voorloper van Christus.

    Toe was daar Jesus Christus, die grootste leraar, prediker, profeet en hervormer wat die wêreld ooit geken het, en dit bo en behalwe Sy liefdevolle Middelaars- en Versoeningswerk.

    Na Jesus volg die apostels waaronder Petrus, toe weer Paulus  –EEN man na die ander.

     En verder deur die geskiedenis van die Kerk het God van tyd tot tyd die EEN man gebruik om Sy doel te bereik. Daar was manne soos Luther, Calvyn, Wesley, Murray, Moody, Hudson Taylor, Billy Graham, George Fuller, Torrey, Finney, John Lake en andere wat as enkelinge opgetree het en uitgeblink het in die werk van God en wonderlike getuienisse vir Hom op aarde geskep het.

Maar, wat van die behoefte in hierdie tyd waarin ons, ons bevind? Ons het nou, soos seker nog nooit tevore nie, die hulp en beskerming van die Allerhoogste aan al kante nodig.

    Wat van jou, jy wat nou hier lees? Al gewonder waarom jy juis hierdie boodskap nou moet lees?  Is dit blote toeval dat jy hierdie boosskap lees? God soek ‘n man! (toevallig – toe val die lig)

            En Hy soek ook ‘n VROU. Vroue het ook groot rolle in die bou van die Christelike Kerk vertolk. Gemeentes is in hulle huise gestig. Meer as 180 vroue het leidende rolle in die Bybel vertolk, meer as 30 van hulle in die Nuwe Testament.

            Dit is nodig dat manne en vroue VANDAG na die stem van die HERE luister en sonder verdere versuim na vore tree en aanmeld vir diens –  heldediens – waardeur hierdie volk gered en vrygekoop sal word!

    Gelowiges is besig om in toenemende maat by die geledere van verskeie  gebedsforums en verootmoedigingsbyeenkomste in te skakel. Hulle reageer op die stem van EEN, die Heilige Gees.

    Hulle het Sy stem gehoor. Hulle het reageer. Hulle is nou voorbidders vir die volk. Hulle tree in vir die volk, vir ons kinders, vir ons toekoms, vir die bou van die Koninkryk van God en die uitbreiding daarvan.

    God soek manne en vroue wat ‘n bres vir Hom kan slaan, ‘n bres vir die Volk kan slaan. Manne en vroue met durf en daad, wat soos Koning Dawid sal sê: “Met my God spring ek oor ‘n muur.”

    Sal God so ‘n man, so ‘n vrou, ook in jou vind? Sal jy gehoorsaam wees aan Sy roepstem?

    Nee, dis nie die werk van die predikante (herders) nie. Herders kry nie lammers nie, net skape. Herders se taak is om die skape so goed te voed (op te lei) dat hulle selfs twee-, drie- en vierlinge aanbring!

    Jy sal nie in jou eie krag optree nie. God sal jou  toerus met krag. Hy het dit met almal voor jou gedoen en Hy gaan dit weer met almal van ons doen.

    “Nie deur krag of geweld nie, maar deur My Gees, sê die Here van die leërskare.” –  Mal. 4:6

      God soek ‘n MAN en ‘n VROU wat die muur van gebed sal bou  “wat gedurig die hele dag en die hele nag nie sal swyg nie… en Hom nie met rus sal laat nie, tot Hy Jerusalem (Sy gemeente) bevestig en maak tot ‘n lofoffer op die aarde.” – Jes. 62:6,7, “want die HERE – Sy oë deurloop die aarde(hoekom?) om diegene kragtig te steun wie se hart onverdeeld op Hom gerig is...” – 2 Kron. 16:9

            God soek na ‘n Man, ‘n Vrou. Is jy bereid om aan te meld?

Onthou jy die baksteen?

           Tik Eseg 4:1-2 op die boonste helfte van ‘n A4 vel. Plaas dit op ‘n strategiese plek in jou huis, soos jou studeerkamer met ‘n baksteen op die onderste helfte van die A4. Almal wat dit sien sal jou beslis daaroor uitvra, en dan getuig jy.

            Enige tyd van die dag of die nag en sovele kere soos wat jy gelei word, bid jy vir jou dorp, jou stad of jou voorstad.

    Geestelik in jou gebed bou jy skanse daarteen op om jou dorp of voorstad te beskerm. Geen onheil moet jou dorp of sy inwoners kan binnedring nie. Bou ook geestelike laers, kampe en stormramme... net soos wat jy gelei word.

            Elke dan en wan salf jy jou voorstad of dorp/stad deur een druppel olyfolie op die baksteen te drup.

            Soms wanneer jy en andersaam bid vir jou buurt of stad, ook Nagmaal daarmee saam gebruik. Bring ere aan die Messias omdat Hy vir jou hele buurt of stad gesterf het en eis die siele op vir die Koningkryk.

    Dit gaan oor die beskerming van jou dorp en sy mense. Jou hele gesin kan deelneem.

    Ons bevind ons in ‘n geestelike oorlog. Op ‘n sekere dorp in Suid-Afrika word dit met groot welslae uitgevoer, presies soos in Sag  4:6 “Nie deur krag of deur geweld nie, maar deur my Gees, sê die HERE van die leërskare.”

       Tydens ‘n beleëring was dit altyd vir die vyand ‘n uitdaging om die stad se water af te sny of te vergiftig.

       Hierdie betrokke dorp in SA het nie water nie, en as daar soms water is, is dit ondrinkbaar. Gelowiges het tien tenks by boorgate opgesit waar dorpenaars gratis water kan kry. Daar was ook  tydens die droogte weekliks 36 000 liter water aangery.

            As iemand sou sê die baksteen is dwaasheid, onthou net, dis ‘n Goddelike opdrag, so ook dat God jou soek om in die bres te staan vir jou dorp, jou stad, jou voorstad. 1 Kor 1:18;20;21;23;25;27

    Die nag is op ons, siele moet gered word, soos verdwaalde skape na die kraal aangekeer word.

    Gehoorsaam jou roeping.

            In Matt. 7:7 dring Jesus daarop aan dat ons moet klop en nogmaals klop, en voeg dan by: Vir elkeen wat klop sal (beslis) oopgemaak word. Dan verduidelik hy self: Die man en sy vrou en kinders slaap reeds, die deure is gegrendel, toe die vriend opdaag en aanklop en vra vir drie brode.

       Maar die man wil nie opstaan en sy vriend help nie. Dan sê Jesus: Alhoewel hy nie sal opstaan en help omdat dit sy vriend is wat aanklop nie, staan hy uiteindelik tog op en help vanweë die vriend se aanhoudende irriterende geklop. Met ander woorde, as mens ophou klop, word daar nie oopgemaak nie. Soms moet mens nogal lank klop, maar die belofte staan vas: As jy aanhou klop dan sal daar vir jou oopgemaak word!

En verder: As jy aanhou soek, sal jy beslis vind. Dit is duidelik dat GOD niks doen, en niks gebeur, as ons nie bid nie. GOD is die GOD van die oes, nogtans dring Hy in Matt. 9:38 daarop aan dat ons moet bid dat Hy arbeiders in die veld moet stuur. Die oes is syne en die arbeiders is tog syne. Hoekom sou Hy “hulpeloos” toekyk terwyl Hy wag dat ons bid dat Hy arbeiders in die oes moet instuur? Hoekom stuur hy arbeiders slegs uit in antwoord op ons gebed?

Waarom moet ek en jy, (hoegenaamd) bid?

As GOD  Almagtig is en enigiets kan doen volgens Sy wil, het Hy dan nog enigiets nodig van enigeen van Sy skepsels?

       Hy wat die heelal geskep het deur enkele woorde te spreek, en steeds alles in stand hou sonder dat Hy die mens benodig, waarom sou Hy ons nou nodig hê vir enigiets wat Hy teweeg wil bring?

       As Hy ons nie nodig gehad het om die heelal te skep nie, waarom het Hy gebed ingestel? Wanneer het Hy dan van ons “afhanklik” geword? Waarom kan Hy niks doen in die sfeer van menslike verlossing, behalwe deur menslike samewerking en dit deur gebed, geloof en dade nie?

       Hoe het GOD homself dan so in ‘n hoek toegeverf? As GOD in totaliteit selfgenoegsaam is – wanneer Hy deur bloot ‘n woord te spreek enige moontlike en onmoontlike ding tot stand kan laat kom – waarom gaan Hy dan nie voort, sonder die hulp van enigiemand se intelligensie of wil, of gebed, en tree arbitrêr op en spreek net die woord nie?

       Is GOD dan “hulpeloos” sonder die mens? Die misterie van gebed as instelling word opgeklaar in Eseg. 22: 30-31.

       In ‘n tyd van nasionale geloofsversaking, het GOD gesê: “En Ek het onder hulle ‘n man gesoek wat ‘n muur kan bou en voor My aangesig in die bres kan staan vir die land, sodat Ek dit nie verwoes nie; maar Ek het niemand gevind nie.”

       “Daarom het Ek my toorn oor hulle uitgegiet; deur die vuur van My grimmigheid het Ek hulle verteer; hulle wandel het Ek op hulle hoof laat neerkom, spreek die HERE, HERE.”

       Hier sien mens duidelik dat GOD na rede soek om ‘n verdiende loon uit te oefen. Hyself verlang daarna om die volk te spaar, maar vreemd genoeg is Hy “magteloos” sonder menslike ingryping, sonder ‘n bemiddelaar. As niemand in die bres wil tree nie, kan Hy nie Sy oordele, Sy toorn, terughou nie.

       Maar waarom moet Hy van ons gebed “afhanklik” wees om die volk te verdedig teen Sy eie toorn? GOD is tog Almagtig en verhewe, soewerein in die heelal?

       Hy is tog die uiteindelik Regter, die Jurie, die Uitvoerende Mag, die Een wat gesag toepas. Of is Hy dalk nie?

       As Hy verlang om nie sy volk te oordeel nie, as Hy graag genade wil betoon, hoekom gebruik Hy nie Sy Almag en soewereiniteit nie, ten spyte selfs van wat ons mag bid of nie bid nie?

       Anders gestel: GOD se Wil is soewerein in alle dinge. As Hy wil dat siele gered word, dat herlewing moet uitbreek, dat Sy afgedwaalde volk na Hom moet terugkeer, hoekom gaan Hy nie net arbitrêr oor ons koppe en voer Sy Wil uit nie? Waarom het Hy ‘n stelsel daar geplaas wat Hom “afhanklik” maak van ons? Is dit nie ‘n verstommende misterie nie?

       GOD pleit by ons om te bid. Hy wil niks doen in die sfeer van menslike verlossing, sonder ons gebed en intersessie nie. Hy pleit nie net dat ons tussenbeide moet tree met gebed nie, Hy dring daarop aan, soebat ons eintlik.

       In Matt. 7:7 dring Hy daarop aan dat ons moet klop en nogmaals klop, en voeg dan by: Vir elkeen wat klop sal (beslis) oopgemaak word. Dan verduidelik hy self: Die man en sy vrou en kinders slaap reeds, die deure is gegrendel, toe die vriend opdaag en aanklop en vra vir drie brode.

       Maar die man wil nie opstaan en sy vriend help nie. Dan sê Jesus: Alhoewel hy nie sal opstaan en help omdat dit sy vriend is wat aanklop nie, staan hy uiteindelik tog op en help vanweë die vriend se aanhoudende irriterende geklop. Met ander woorde, as mens ophou klop, word daar nie oopgemaak nie. Soms moet mens nogal lank klop, maar die belofte staan vas: As jy aanhou klop dan sal daar vir jou oopgemaak word!

       En verder: As jy aanhou soek, sal jy beslis vind. Dit is duidelik dat GOD niks doen, en niks gebeur, as ons nie bid nie. GOD is die GOD van die oes, nogtans dring Hy in Matt. 9:38 daarop aan dat ons moet bid dat Hy arbeiders in die veld moet stuur. Die oes is syne en die arbeiders is tog syne. Hoekom sou Hy “hulpeloos” toekyk terwyl Hy wag dat ons bid dat Hy arbeiders in die oes moet instuur? Hoekom stuur hy arbeiders slegs uit in antwoord op ons gebed?

       Die fundamentele belangrikheid van hierdie instelling van gebed in GOD se Raadsplan, word verder beklemtoon daardeur dat GOD homself onomwonde verbind om te antwoord!

GOD se belofte om te antwoord is byna soos ‘n blanko tjek wat reeds Sy handtekening dra. Dis ‘n verbysterende gedagte, maar ‘n werklikheid. Dis of GOD Sy septer aan ons oorhandig het en by ons pleit om dit te gebruik.

Tyd is kosbaar en mag nie misbruik word nie. Tyd moet winsgewend aangewend word.

Op hierdie wyse kan die Gelowiges in SA alles wat negatief is, tot stilstand bring en tot verantwoordeding roep. – Wekroep

Wanneer gevaar van alle kante af dreig

In ‘n woud is ‘n dragtige  bokkie besig om te lam. Sy raak rustig op ‘n lappie gras langs ‘n sterk vloeiende rivier. Vir haar lyk dit soos ‘n veilige plek.

            Skielik begin die geboortepyne. Terselfdertyd begin daar weerlig uit die donker wolke bo die woud uitslaan. Die aarde dreun van die donder.

            Die weerlig veroorsaak ‘n veldbrand. Die vlamme skiet gou hoog in die digte bome in. Die geboorte is in volle swang. Op ‘n afstand merk sy ‘n jagter met pyl en boog. Hy wil haar skiet.

            Sy merk aan haar regterkant ‘n honger leeu op pad na haar. Sy is vasgekeer... die vlammemuur aan die en kant, die jagter aan die anderkant, regs kom die leeu kruipend nader en aan haar ander kant is die snel vloeiende rivier.

            Die geboorte gaan voort en die arme bokkie staar die dood in die gesig, lammetjie en al.

            Met gevare alkant is die geboorte byna verby. Sal sy en die lammetjie oorleef?

            Sy fokus op die geboorte van ‘n nuwe lewe.


Dan gebeur alles tegelyk te midde van reën, weerlig en donderslae:

·        Die weerlig verblind die  jagter;

·        Die pyl uit die jagter se boog swiep by die bokkie verby en tref die naderende leeu;

·        Dit begin baie hard reën en stadig maar seker word die naderende vuur geblus;

·        Die bokkie skenk geboorte aan ‘n volmaakte lammetjie. Kyk weer na die gebeure  hierbo en vra dan: Had die bokkie enige invloed op die gebeure? Geensins.

            In ons lewens gebeur dit ook dat ons keuses moet maak want gevare dreig van alle kante af. Ons antwoord berus daarin dat ons nie vir ‘n oomblik afwyk van ons doel voor oë nie. Bly gefokus.

            Soms kan gedagtes baie kragtig wees en ons oorweldig. Die bokkie leer ons ‘n les. Sy het gefokus gebly op die skenking aan nuwe lewe. Die res was in elk geval nie in haar hande nie.

            Waar is ons fokus? Waar is ons geloof en hoop? Te midde van watter storm ook al, behou jou geloof in die HERE want Hy sal jou nooit teleurstel nie. Nooit! – Wekroep

Glorieryke Herlewings

Herlewing in verskeie lande is sterk aan die toeneem. Gelowiges ter plaatse sal hulle oë op Jesus moet vestig in afwagting op die uitbreek van die Herlewing in SA.

          Sekere kenmerke van die Herlewing in ander lande bevat verskeie interessanthede.

          ‘n Sleutelvers is Jon 14:12 “Voorwaar, voorwaar Ek sê vir julle, wie in My glo – die  werke wat Ek doen, sal hy ook doen; en hy sal groter (meer) werke doen as dit...”

          Die beleid is: Ons is nie geroep om te oortuig nie, maar om té getuig.

          Pleks van preek, word Jesus  eerder  in aksie aan mense voorgestel.

          Hande word gelê op mense van alle rasse, tale en gelowe vir fisiese en of geestelike genesing en die wonderwerke laat die mense na Jesus as Verlosser gryp. Hulle word nie vertel van Jesus nie, maar fisies gewys wie Jesus is.

Diegene wat die wonderwerke belewe, begin ook sommer dadelik vir ander bid en lei hulle na die HERE.

          Getuienisse oor Goddelike gesigte, interaksie met Engele kom van oral. Mense kom in hulle duisende tot bekering. Geld om kostes te dek word nie eers oor gepraat nie, dit is eenvoudig net beskikbaar.

Tussen al die Herlewingsnuus deur belewe skrywer ‘n gesig: Ek ry kerk toe. Die kerk is op die een hoek van ‘n breë kruising. Daar aangekom vra ek: Maar waar is die kerk dan? Daar was geen teken van ‘n kerkgebou nie. Dit was laas naweek nog hier.

          Pleks daarvan staan daar honderde van die allermooiste bome en plantegroei. Dis ‘n begraafplaas... lowerryk, pragtig en netjies.

          En daar sit ek en verkyk my aan dit alles. Ek vra: HERE, en dit?

          Dis die einde van die kerkera. Jesus se Koms is naby en dit kan nie langer geduld word dat Sy volk in duisende kerkgenootskappe verdeel is, elkeen met sy eie  stel dogmatiese reëls nie. Praatjies soos “ek het my kerk” kom tot ‘n einde. Dit word vervang met “ek is die kerk!”

          Die aardsgebondenheid van Gelowiges word vernietig. Engele raak al hoe meer by Gelowiges se lewens betrokke.

          Maar waarom ‘n kerkhof wou ek weet? Dis die Gelowiges se “Eie Ek” wat daar begrawe word. Alle fantasieë verdwyn, alle eie opvattinge, alle eie oortuigings, alle weerstand, alle selfvoldaanheid, alle wanpersepsie, alle geheime en lidmaatskap aan geheime organisasies, alles wat nie tuishoort in die lewe van ‘n Jerusalem Pelgrim nie, verdwyn, so ook eie trots en windmakerigheid.

          Alles word vervang met liefde, omgee en nederigheid.

          Geen begrafniskar ry ooit die kerkhof binne nie. Gelowige begrawe self hul “Eie Ek” daar. Oral maak Gelowiges gereed om sonder vlek of rimpel Jesus se Koms af te wag.

          Geestelik verdwyn alle spoggerige haarstyle, kleredrag, spogmotors, spoghuise.  Gelowiges beweeg terug na eenvoud.

          Gelowiges sal nooit weer oor die duiwel praat nie, nooit weer belas raak met Skriflose uitsprake nie. Almal sal van Engele praat en geestelike boodskappe uitruil, mekaar bekragtig. Hier ontstaan ‘n Hemelse opgewondenheid soos wat almal na oorwinningsgrond beweeg. – Einde van die gesig.

          Dit is inderdaad ook wat nou in die Herlewings gebeur: Dogma, kerk en tradisie verval.

          Die mens staan naak voor God, gestroop van aardse gebondenheid. Saam met die Herlewing kom die reikhalsende verlange na Jesus se koms.

          Gelowiges in SA smag al lank na Herlewing. Oral is gebedgroepe aan die bid daarvoor. Dit gaan kom, vir seker. Hou moed. – Wekroep

“Jesus, help my, help my...'

‘n Vrou het by ‘n familiebyeenkoms vir Kim Meeder gesê: “Ek is so jammer, maar ek het slegte nuus vir jou: Jou pappa het so pas jou mamma vermoor en toe sy eie lewe geneem.”

Die 9-jarige Kim het geskreeu: “Jy lieg, jy lieg” en uit die huis gehardloop. Sy het so ver gehardloop dat sy uiteindelik pootuit in die stof neergeval het, soekende na haar asem.

Toe skielik hoor sy hoe haar kinderstem uitroep: “Jesus help my, help my, ek het U nou nodig.”

Sy vertel: “Ek het nie eers geweet wie Jesus s nie. Ek was nog net twee keer in my lewe in ‘n kerk en daar het ek van Jesus gehoor. “

“Die volgende oomblik het Jesus voor my gestaan. Hy het my hand geneem en dit nog nooit gelos nie.

“Ons kan God nie altyd verstaan nie, maar ons moet Hom vertrou. Hy verlang dat ons deurentyd in Sy teenwoordigheid moet wandel.

“ Die Heilige Gees is soos ‘n sterk magtige rivier. Ons kan nie vir die rivier sê waarheen dit moet vloei nie... en moet dit ook nie probeer doen nie. Spring net in en laat die stroom jou neem waar die Gees jou wil neem.”

Dit is presies wat op die oomblik wêreldwyd gebeur. Herlewingsvure begin oraloor brand. Mense vergeet van kerklike dogma en tradisies. Die Heilige Gees neem alles oor.

Gelowiges leef oornag in oorwinning.  Niemand is langer ‘n prooi nie, maar eerder ‘n onverskrokke stryder.

Nog ‘n tendens is soos in die vorige Herlewing waar selfs kinders en leke die Evangelie uitdra en vir mense hande oplê ten aanskoue van verstommende wonderwerke.

Uit talle oorde kom die getuienis: “Voorwaar, voorwaar Ek sê vir julle, wie in My glo – die werke wat Ek doen, sal hy ook doen; en hy sal groter (meer) werke doen as dit, omdat Ek na my Vader gaan.

“En wat julle ook al in my Naam mag vra, dit sal Ek doen, sodat die Vader in die Seun verheerlik kan word. As julle iets in my Naam vra, sal Ek dit doen.” Joh 14:12-14















Kim by een van haar perde.

Kim Meeder en haar man Troy het in 1993 in Oregon, Amerika grond gekoop waar hulle hawelose en mishandelde kinders en perde versorg.

Een dag het ‘n jong perd se been gebreek. Kim en vier vroue het met die jong perd huis toe aangesukkel waar hulle die perd gemaklik gemaak het, Die een been was agterstevoor gedraai in die breek.

Sy het die veearts gaan bel om die jong perd te kom uitsit. Nadat sy gebel het, het sy bitterlik begin huil en gesê: “HERE, ek gaan nou ‘n lewe neem en dis so onregverdig, kyk net hoe jonk is die perd.”

Sy en haar werkers het toe vir die perd gaan bid. Met die vroue veearts se koms was die perd se been heeltemal genees en die perd het rondgeloop asof niks verkeerd was nie.

Die veearts het gegroet en na haar motor gestap.  Skielik sê die Heilige Gees vir Kim: “Keer die veearts, hierdie situasie is nie oor die perd nie, maar oor die veearts.”

Sy het dadelik die veearts agterna geloop en gekeer. Toe Kim liefdevol met haar begin praat, het sy ‘n halfuur lank bitterlik gehuil.

Sy vertel dat sy ‘n gemors van haar lewe gemaak het en op die punt was om selfmoord te pleeg, toe Kim gebel het. Die rewolwer was reeds teen die veearts se kop, gereed om die sneller te trek.

Albei vroue het besef, dit was toe nie oor die neem van ‘n lewe nie, maar die redding van ‘n lewe. Toe die veearts tot bedaring kom, het sy Jesus aangeneem, is sy Wedergebore.

Sulke getuienisse kom van oral. Gelowiges word  uiters sensitief vir die Heilige Gees.  Gelowiges in Suid-Afrika moet ophou murmureer en God vir wonderwerke begin vertrou. Eseg 37 gaan in vervulling. – Wekroep

WATTER gebed vir jou?

“As die Evangelie wat ons verkondig, tog nog met ’n sluier bedek is, is dit bedek vir dié wat verlore gaan …wie se verstand deur die god van hierdie wêreld verblind is…”
Rom 4:4

            Dr. Wolcott Calkins, ’n Amerikaanse predikant, was in Suid-Frankryk toe hy gevra is om ’n landgenoot te besoek: ’n geboë, teruggetrokke, ouman. Na ’n paar algemene, vriendelike kennismaak woorde vra dr. Calkins hom: “Glo u in die Eewigheid?” Sonder om ’n oomblik te huiwer antwoord hy: “Ja, ek glo dit vas.” “Wat is u hoop vir die Ewigheid?” is dr. Calkins se volgende vraag.

Weer sonder huiwering kom die antwoord: “Ek hoop om Ewig gelukkig in die Hemel te wees.” “Sal u my vertel waarop u, u goeie hoop grond?”

“Dit doen ek graag,” kom die antwoord weer dadelik. “Ek het in my lewe niks gedoen wat sleg is nie. My klein foutjies, wat algemeen onder alle mense is, glo ek sal God oorsien. In alle ernstige dinge is my rekening skoon. Ek vertrou op ’n regverdige beloning vir ’n goeie lewe.”

Dr. Calkins was sprakeloos. Vertrouende in die werking van die Heilige Gees in die ouman se hart, probeer hy die onverdienstelikheid van ’n mens se eie goeie dade verduidelik. Hy vertel hom van die vrye gawe van God se vergifnis en die Ewige Lewe op grond van Christus se verdienste en offerdood aan die kruis. Hy kan sien dit maak geen indruk op die ouman nie.

Uiteindelik staan dr. Calkins op om te gaan. “Maar gaan u nie vir my ’n gebed doen nie?” wil die ouman verbaas weet.

“Wat kan ek bid?” vra dr. Calkins. “Die Fariseër se gebed: ‘O, God ek dank U dat ek goed is en nie so sleg soos ander nie,’ kán ek nie saam met u bid nie.

“Die tollenaar se gebed, ‘O, God, wees my sondaar genadig,’ wil ú nie saam met my bid nie.”

Die ou­man het dit nie verstaan nie. Op die ouman se verdere aandrang, doen dr. Calkins ’n kort gebed vir hom en vertrek. Kort daarna is die ouman oorlede.

            Terug in Amerika doen dr. Calkins moeite om die ouman se weduwee op te soek. Hy wou ook graag meer van die ouman te wete kom.

Uiteindelik neem een van die weduwee se broers dr. Calkins eenkant toe. “U het hom kort voor Sy dood besoek, waaroor ons dankbaar is, en u het reg om die waarheid oor hom te weet. Hy was ’n vervalser. Hy het juis Frankryk toe gevlug om aan die gereg te ontkom.”

Die onbekeerlike hart, verblind deur Satan, weier om Sy sondes raak te sien en dit te bely. Hy verwerp Christus se soenverdienste en roem in Sy eie goeie werke. Hy wíl nie voor God skuldig voel nie.

“God is ryk in goedheid, verdraagsaamheid en geduld…Besef jy nie dat God jou deur Sy goedheid tot bekering wil lei nie? Maar deur jou verharding en jou onbekeerlike hart is jy besig om vir jouself straf op te gaar vir die oordeelsdag…” Rom 2:4,5

Kom, maak vandag jou hart oop vir Sy lig, sodat jy jouself in Sy lig kan ken.” – Wekroep

Dra ‘n las en red jouself!

Jes 55: 1–6; “Kom…selfs ook dié wat nie geld het nie, kom, koop en eet; ja, kom, koop sonder geld en sonder om te betaal… “

            ‘n Vrou bel en soek hulp. Haar man ly aan ‘n ongeneeslike siekte. Dit laat ons dadelik aan Dr Lambie dink.

Dr. Thomas Lambie, wat as geneesheer sendingwerk in Ethiopië gedoen het, moes dikwels snel vloeiende en diep riviere oorsteek, skryf Christian Victory.




Die gevaar van die snel vloeiende riviere was, 'n mens word van jou voete afgepluk en dan met die snelstroom meegesleur na 'n dieper stroom, of na 'n waterval, of dat mens teen een van die baie rotse verpletter kon word.

Dr. Lambie het by die plaaslike bewoners die geheim geleer om veiliger deur so 'n stroom te kom. 'n Mens soek 'n groot klip. Hoe groter en swaarder hoe beter. Die gewig word op die skouer geneem en dit dien as anker.

Die ekstra gewig druk jou voete stewiger op die bodem vas en jy kruis die rivier met groter veiligheid. Jou voete word nie so gou onder jou uitgespoel nie.

Foto: Dr Lambie en sy vrou

Dr. Lambie se gevolgrekking: “Terwyl ons die gevaarlike stroom van die lewe deurkruis het ons die gewig van di         e dra van laste nodig om op ons geestelike voete te bly.”

            Dr. Lambie (1885 - 14 April 1954), wat van Pittsburgh in Amerika kom, het  later ‘n Ethiopiese burger geword en twee hospitale daar gevestig.

Hy het ook as mediese dokter  sendingwerk in  Soedan, Nigerië en Palestina gedoen. Hy was juis op besoek by Jesus se graf in Jerusalem toe hy Huis toe is.

            Rom 5:3-5 sê: "Ons verheug ons ook in die swaarkry, want ons weet: swaarkry kweek volharding, en volharding kweek egtheid van geloof, en egtheid van geloof kweek hoop; en die hoop beskaam nie, want God het Sy liefde in ons harte uitgestort deur die Heilige Gees wat Hy aan ons gegee het".

            Dwarsdeur die Skrif kry ons hierdie negatiewe elemente en swaarkry, wat gelowiges soos laste moes dra. Abraham moes kinderloos voortbeweeg, Jakob se broer veg teen hom, Josef word as slaaf verkoop en beland in Egipte in die tronk, Job ervaar groot teëspoed en word deur sy vriende misverstaan, Dawid moet gedurig vir Saul vlug, Daniël beland in die leeukuil en sy vriende in 'n brandende oond, Jeremia word vervolg en in 'n put gegooi.

So loop hierdie patroon deur die Skrif.  ‘n Vrou het een oggend baie beswaard vir wyle dr Andrew Murray gebel oor haar probleem.  Hy het vir haar gesê: “Soek vir jou vir nog ‘n beswaarde vrou dan bid julle saam.”

”Wees in alles dankbaar, want dit is die wil van God in Christus Jesus oor julle.” 1 Thes 5:18 – Wekroep

‘Watter reg het jy om bedruk te wees?’

Terwyl Martin Luther midde in die Hervorming was, het die Pous 'n hewige poging aangewend om hom terug te bring Roomse Kerk toe. Hy het 'n kardinaal gestuur om hom om te praat en 'n groot geskenk in goud saamgestuur.

Die kardinaal het vir die Pous teruggeskryf: "Die gek het geen smaak vir goud nie!"


Toe die kardinaal hom nie kon omkoop nie, het hy hom gedreig: "Wat dink jy gee die Pous om vir die opinies en uitsprake van'’n eenvoudige Duitse boer? Die Pous se pinkie is sterker as die hele Duitsland (Luther se geboorteland). Dink jy die Duitse prinse sal wapens opneem om jou – 'n ellendige wurm soos jy – te verdedig? Ek sê nou vir jou, nee, dit sal nooit gebeur nie!

“En dan, waar is jy dan?"

Luther het kalm geantwoord: "Presies waar ek nou is. In die hande van Almagtige God."

Luther het egter ook tye van vertwyfeling beleef. Eenkeer was hy so bedruk en bekommerd hy kon nie werk nie; wou nie eet nie; kon nie slaap nie. Een oggend, in daardie moeilike tyd, kom sy vrou in sy studeerkamer in, geklee in rouklere.

Luther skrik. "Wie is dood?" vra hy angstig. "Het jy gehoor nie?" antwoord sy ernstig, "God is mos dood." "Moenie laster nie," bestraf hy haar.

"Ek laster nie. Ek handel uit wat ek van jou gedrag aflei. As God lewe, watter reg het jy, Sy uitgesproke kneg, om so bedruk en bekommerd te wees?"

Luther het geluister en beskaamd op sy knieë gegaan en sy ongeloof bely en met nuwe moed en oorwinning opgestaan om die Here se werk te doen.

            Geloofsoorwinning en geloofsneerlaag kan mekaar afwissel in die hart van 'n kind van die HERE. Die HERE gee ons nie prys as ons begin twyfel nie, maar bly naby ons en stuur vir ons die versterking wat ons nodig het.

Selfs Paulus het aan bemoediging behoefte gehad. "Die gelowiges in Rome het van ons gehoor, en hulle het ons by die Appiusmark kom ontmoet en party by die Drie Herberge. Toe Paulus hulle sien, het Hy God gedank en moed geskep." Hand 28:15

                        "U is my toevlug en veilige vesting, my God op wie ek vertrou." Ps 91:1,2 -- Wekroep

Medici erken: God Genees!

Sedert die dae toe Evangeliste Rassie Erasmus, Hansie Henning en ander vir siekes gebid en mense verstommende genesings ondervind het, het die media in Suid-Afrika altyd skepties gestaan en selfs doemprofete aangehaal om ‘n vraagteken oor God se handewerk te plaas.

            Medici het ook skepties gestaan, so asof gebedsgenesing vir hulle ‘n bedreiging sou inhou.

            Al hoe meer mediese wetenskaplikes het die afgelope twee na drie dekades die wedergeboorte deelagtig geword. Een so iemand was Prof. J.C. van der Spuy wat vir meer as 28 jaar hoof van Kardio-Torakale Chirurgie aan die Pretoria Akademiese Hospitaal was.

            Prof. Van der Spuy het die volgende selfs ter boek gestel: Of genesing deur middel van gebed, chirurgie, fisioterapie of medikasie geskied, dit is en bly Jesus Christus wat genees!

            Die afgelope dekade het medici pogings aangewend om die effek van gebed op mediese resultate nagevors. Dit het op plakke algemene praktyk geword, maar is ook op plekke met polemiek begroet.

            Intussen bied groot getalle mediese skole hul toekomstige chirurge opleiding oor hoe om pasiënte se godsdienstige behoeftes aan te spreek.

            Dit is veral vir Harold Koenig, professor in psigiatrie en gedragswetenskap aan die Mediese Fakulteit by Duke Universiteit, welkome nuus want hy was nog altyd een van die wêreld se voorste medici vir die inkorporering van godsdiens  as deel van mediese behandeling.

            Koenig het in 1997 ‘n verslag uitgebring dat diegene wat gereeld kerkdienste bywoon ‘n beter funksionele immuunstelsel mag hê as diegene wat nie gereeld kerk toe gaan nie.

            In hierdie verband het prof. Van der Spuy weer vasgestel dat die na-operatiewe herstel van wedergeborenes, heelwat vinniger geskied as die van mense wat die HERE nie persoonlik ken nie.

            Koenig sê: “Ek glo dat wanneer God besluit om mense gesond te maak en mense gebed aanvra en mense begin bid, dat daar beslis ‘n verskil intree.”

            Chuck Lynch, pastoor in opvoedkunde by Lakeland Victory Kerk, sê dat in sy 20 jaar in die bediening was hy ooggetuie van vier gevalle waar mense “bonatuurlike genesing” ontvang het, so uitsonderlik dat dit as “dramaties” beskryf was.

            Lynch glo dat mense altyd baat vind by ernstige gebed. “Die eerste ding wat gebed doen, is om mense werklikwaar te verander, dit doen iets aan hulle uitkyk op die lewe en ook aan hulle houding.

“Wat ek opgelet het was dat mense wat werklik ernstig in ‘n krisis bid ‘n vrede openbaar wat ander mense eenvoudig verstom,” sê Lynch.

            Selfs ‘n vurige rasionalis soos dr. Sloan Davidson erken dat gebed vertroosting en ander godsdienstige aktiwiteite kan meebring vir mense wat ‘n gesondheidskrisis in die gesig staar.

            Hy sê hospitale moet geestelike versorging vir pasiënte aanbied, maar beklemtoon dat dit deur predikante, eerder as dokters en verpleegsters uuitgevoer moet word.

            “God doen wonderwerke            en ons geloof word daardeur versterk, het Davidson gesê.

            Die drama wat homself in die sewentiger jare in ‘n teater in HF Verwoerd Hospitaal in Pretoria afgespeel het, mag nou eers bekendgemaak word.

            Prof. JC van der Spuy het met ‘n pasiënt se oopgesnyde hart in sy hande gestaan. Behalwe snykunde om die hart te herstel, het Prof. Van der Spuy met ‘n skok besef dat ‘n klepvervanging ook nodig is.

            Die skok van die oomblik was dat daar geen klep beskikbaar was nie. Toetse vooraf het ook nie aangetoon dat ‘n klepvervanging nodig was nie.

            Hy kon die hart nie weer toemaak en terugplaas sonder om die betrokke klep te vervang nie.

            Prof. Van der Spuy het die gebeure in destyds met my gedeel op voorwaarde dat ek dit nie bekend sal maak voordat hy weg is nie. Hy het op 87-jarige ouderdom heengegaan.

            As diep gelowige mens had hy geen ander uitweg as om hom tot God te wend nie.

            Hy het ernstig begin bid vir leiding. Toe hy hom weer kom kry was sy hande besig om weefsel uit die pasiënt se bobeen te sny en het hy staan en kyk hoe sy hande 'n klep uit die weefsel vervaardig.

            Die operasie was ‘n skitterende sukses en die klep het 100 persent gewerk.

            Sowat twee jaar later het presies dieselfde situasie met ‘n ander pasiënt opgeduik.

            Weer het hy gebid en gesê: Here, dis nie of ek dit al gedoen het nie. Gryp U tog weer in.

            En dieselfde prosedure het homself herhaal.

            Sy kollegas wat alles gadegeslaan het, het in beide gevalle nie besef wat gebeur het nie.

            “Mens moet besef dit was ‘n veel groter mediese wonder as ‘n hartoorplanting. ‘n Hartoorplanting is basies die diskonnektering van ‘n ou hart en die opkoppeling van ‘n nuwe hart. Wat hier gebeur het is ‘n mediese wonderwerk uit die hand van God.

            “Maar ek het gesien hoe die wêreld prof. Chris Barnard vereer het. Dit wil ek nie beleef nie want God moet al die eer kry vir wat daardie dag in daardie teater gebeur het. Belowe my, dat jy eers hieroor sal skryf die dag wanneer ek weg is,” het prof. Van der Spuy versoek.

            Hy het die betrokke dag ook aan my vertel dat sy navorsing getoon het dat die na-operatiewe herstel van ‘n gelowige baie vinniger geskied as die van ‘n ongelowige.

            Om hierdie rede het hy altyd by die eerste ontmoeting van ‘n nuwe pasiënt bepaal of die pasiënt wedergebore is. As dit nie so was nie, het hy op sy besondere vaderlike en liefdevolle manier berading toegepas.

            Een keer toe hy sy siekesaal besoek het, het hy by ‘n pasiënt gekom wat die volgende dag ‘n hartoperasie moes ondergaan. Die pasiënt het plat op sy rug gelê, besig om ‘n sedebedorwenede tydskrif te lees.

            Prof. Van der Spuy het die boek sag uit die man se hande weggeneem en aan hom gesê: More-oggend haal ek jou hart uit. Jou lewe is in God se hande. Hoe kan jy op die vooraand van so ‘n groot operasie dit waag om hierdie smerige boek tussen jou en die Hemel in te druk?”

            Hierop het prof. Van der Spuy ‘n Nuwe Testament aan die pasiënt oorhandig en aan hom gesê: “Vriend, dit is wat jy nou nodig het.”

            Vir hom was die redding van ‘n siel die grootste wonderwerk in ‘n mens se lewe.

            Oor genesing het hy gesê: “Of dit geskied deur die gebruik van ‘n skalpel, of deur medikasie of deur gebed, dit bly Jesus Christus wat genees, want die mediese wetenskap kon nie bereik het wat hy vandag doen, as dit nie deur God se wysheid aan die wetenskap geskenk is nie.” - Wekroep