Wat sou jy gedoen het?

`n Boer in ­North Carolina ry op `n dag dorp toe met sy twee hooggeteelde perde voor sy duur en netjiese waentjie, skryf L. G. Broughton.

Hy hou voor die winkel stil, en wou net by die winkel instap, toe die perde losruk van skrik vir `n vreemde geraas. Hy spring dadelik voor hulle in en gryp die teuels.

Dat die boer nou reg voor die perde is en gebiedend met hulle prat, help net mooi niks. Verskrik hol die perde straataf. Die boer klou vir lewe en dood heel voor aan die teuels tussen die perde.

Uiteindelik stop die perde, klim met hulle voorpote in die lug en kom met ‘n slag op die boer neer wat intussen sy greep verloor het.

Mense storm uit en red die man se bloeiende liggaam onder die warboel uit. Dit lyk of hy gaan sterf. `n Vriend buig oor hom en vra:

“Hoekom het jy jou lewe gewaag en die perde nie hulle gang met die waentjie laat gaan nie?” “Gaan kyk in die waentjie,” fluister die man swak en totaal uitgeput.

Die vriend draai om en gaan kyk in die waentjie. Daar, op sagte strooi, lê die man se seuntjie en slaap. In stilte verstaan almal skielik die man se wanhopige poging om die perde tot bedaring te bring en die waentjie te behou.

In Jesus het God Homself opgeoffer om ons te red, omdat Hy ons liefgehad het. So verduidelik Jesus dit aan sy dissipels: “…want die Vader self het julle lief…Ek het van die Vader gekom en Ek is hier in die wêreld.” Joh.16:27-28

            En die strofe wat ons almal so goed ken met die verstand, maar dalk nog nie heeltemal met die hart verstaan nie, beskryf die groot liefde van God vir ons:

“God het die wêreld so lief gehad dat Hy sy enigste Seun gegee het, sodat dié wat in Hom glo, nie verlore sal gaan nie, maar die Ewige Llewe sal hê.” Joh.3:16

Ons vertroue in die groot offer wat Jesus vir ons redding gebring het, maak ons kinders van God en so, soos die verhaal van die Verlore Seun dit aan ons verstand bring, word God se hart verbly en bevredig.

Hierdie boer het sy lewe gegee sodat sy seuntjie gered kon word. Wat doen jy om siele vir die Koninkryk te win? – Wekroep

Ons moenie aan onsself dink nie: ons moet aan ons naaste dink…wat vir…hom goed is. Rom 5: 1-6

Kyk na die hoë moordsyfers in SA. Al gewonder hoeveel van die vermoordes op plase en in strate geleentheid had om hulle saak met die HERE reg te maak?

Die liefde van Jesus is ongekend.

'n Seun, in 'n Christen huisgesin, het namate hy ouer word, eiesinnig en spandabelrige gewoontes aangekweek. Hy het met sy besadigde pa baklei omdat hy hom nie die geld, wat hy wou hê, wou gee nie.

Hy het die huis stormagtig verlaat en hom oorgegee aan 'n roekelose lewe. Soos die Verlore Seun in Jesus se gelykenis, het hy 'n verdorwe rondloper geword. ‘n Tipiese nikswerd.

Die dag het aangebreek dat hy totaal platsak en wanhopig was. Toe dink hy aan sy pa en sy huis, maar ongelukkig níé soos die Verlore Seun nie.

"My pa skuld my 'n bestaan," redeneer hy met homself. "Ek sal dit self vat." Hy hou die huis dop en een aand, toe die hele gesin uit is, breek hy in. Hy het die huis en die veiligheidstelsel goed geken. Die inbraak was vir hom maklik. Hy het ook geweet waar al die waardevolle goed, ook die brandkluis se sleutel, se bêreplekke is.

In die nagstilte soek hy geld. Tussen ander waardevolle dokumente kry hy sy pa se Testament. Met nuuskierige oë lees hy die Testament. Dit weerspieël 'n groot boedel.

Sy naam staan tussen dié van ander erfgename, met 'n groot erflating by sy naam. As sy pa sou sterf, gaan hy 'n rykman wees. 'n Moordgedagte kom in hom op. Hy skrik vir homself. Hy lees die Testament weer en 'n stilte kom in sy gemoed.

Die pa met wie hy so getwis het, wie hy gevloek en verwens het, teen wie hy so verbitterd was, het nie sy naam uit die Testament geskrap nie.

"Kan dit wees," vra hy homself af, "dat my pa my nog liefhet? Wil hy my, na al die skande en smart wat ek oor hom gebring het, nog as seun hê?" Hy is verbysterd.

Herinneringe oor die aangename jare wat hy as kind en gehoorsame seun in sy ouerhuis gehad het, spoel oor sy gemoed. Hy sien in sy gedagtes die goeie jare wat vir hom kan voorlê, in sy huis by sy ouers.

Hy sak in een van die groot gemakstoele neer, druk sy sakdoek teen sy gesig en begin huil. Later die nag kry sy ouers hom in die stoel, sakdoek nog oor sy gesig, aan die slaap. Op sy knieë lê die Testament, sy vinger by sy naam.

Sy pa en ma weet met diepe liefde en ongekende blydskap, hulle kind het huis toe gekom.

Jesus het die verhaal van die Verlore Seun vertel om sélf te illustreer hoe God die mens, wat sy rug op Hom gedraai het, Hom verag en gesmaad het, steeds liefhet en as kind wil verwelkom. Ons erflating in God se Testament, die Ewige Lewe, is met Christus se bloed geskryf. Die Heilige Gees bring deur die Evangelie die wete van 'n erfenis by God, na ons toe. Hy werk in ons hart die sondebesef en gebrokenheid, wat ons na God toe laat keer.

            In Suid-Afrika het menige ouers met sulke seuns en dogters gesukkel. Dit was vir hulle ‘n sware las, maar by hulle laaste stilhouplek, het die kind na Jesus teruggekeer.

            So is ‘n alkoholis op sy knieë by sy bed gekry met sy oop Bybel voor hom. HERE, wat ‘n deurbraak.

            In ander geval het ‘n ouerpaar deur groot trauma met hul seun gegaan. Hy is een nag in sy slaap Huis toe. Skrywer het kort daarna na ‘n bandopname van die seun geluister. Hy het in trane Jesus se lof besing.         

By so ‘n begrafnis moet geen swart en rou wees nie... liewer ‘n wit kar, ‘n wit kis en oorwinningsliedere.

Gaan lees weer self die lewensverhaal van Petrus en hoe ook hy teruggekom het. God se Genade is onmeetbaar.

Is jy flenters? Jesus heel die gebroke harte: "So is ons dan deur Sy genade vrygespreek en het ons erfgename geword van die Ewige Lewe wat ons verwag." Titus 3:7

Jou naam staan in die Boek van die Lewe en jy is en bly ‘n erfgenaam... dis jou beurt om terug te kom. – Wekroep

Die Christen en Aborsie

“Ek roep vandag die Hemel en die aarde tot getuie teen julle dat ek die lewe en die dood aan jou voorgehou het, die seën en die straf. KIES DIE LEWE, sodat jy en jou nageslag kan lewe.” Deut. 30:19, 20

Die mens kan nie ‘n spermsel of eiersel skep nie. Meng die twee selle kom ‘n lewende wese tot stand… alles deur God geskep. Daarom sê God tereg: “Voordat Ek jou in die moederskoot gevorm het, het Ek jou geken.…” Jer 1:5

Die Bybel spreek nie spesifiek aborsie aan nie. Maar daar is verskeie leringe in die Skrif wat dit duidelik maak wat God se siening oor aborsie is, soos in Jer 1:5 dat Hy ons geken het nog voordat ons in ons moederskoot gevorm is. As jy deur God self geskep is, op watter gronde is daar regverdiging om jou dood te maak of te laat aanneem?

Ps 139:13-16 praat van God se aktiewe rol in ons skepping en formering in die moederskoot. Eks 21:22-25 beskryf die straf aan iemand wat veroorsaak dat ‘n vrou haar baba in moederskoot verloor. Die daad word gelykgestel aan moord. Dit dui duidelik aan dat God ‘n baba as ‘n volwaardige mens beskou in moederskoot.

Vir ‘n Christen is ‘n aborsie nie ‘n vrou se reg nie. Niemand het so ‘n reg nie. Dit is ‘n kwessie van lewe en dood van ‘n wese van God geskep het. Die eerste argument wat opkom teen die Christen se beskouing oor aborsie is, “wat van kwessies soos verkragting en bloedskande?”

Hoe afgryslik dit ook al mag klink, dit regverdig nie moord op ‘n baba nie. Die kind kan opgegee word vir aanneming aan liefdevolle ouers – of die kind kan grootgemaak word deur die moeder self. Streng gesproke moet die eie familie van die moeder help om so ‘n baba groot te maak. Die onskuldige kind durf nie gestraf word vir die euwel dade van sy/haar vader nie.

Die tweede argument teen Christene wat staan teen aborsie is, “wat as die moeder se lewe in gevaar is?” Dit is een van die moeilikste vrae met betrekking tot aborsie. Eerstens moet ons onthou dat hierdie vraagstuk slegs voorkom by een tiende van 1 persent van die aborsies wat wêreldwyd uitgevoer word. En waar dan is ons geloof in God om in te gryp!

Tweedens moet ons onthou dat God wonderwerke verrig. Hy kan die moeder en baba se lewe spaar ongeag die mediese diagnose teen hulle. Eventueel kan die vraagstuk slegs besluit word tussen die man, vrou en God.

Enige egpaar wat voor hierdie uiters moeilike situasie staan moet tot God bid vir wysheid wat Sy wil is.

Altesame 94% van die aborsies wat uitgevoer word in die wêreld is vir ander redes buiten die risiko wat ‘n swangerskap vir die moeder inhou. Die oorgrote meerderheid aborsies kan gekwalifiseer word onder “’n vrou en/of haar maat het besluit hulle wil nie die baba hê wat God deur hulle verwek het nie.”

Dit is absoluut ‘n euwel. Selfs in die moeilike 6% van gevalle moet aborsie nooit eerste oorweeg word nie. Vir diegene wat ‘n aborsie ondergaan het – die sonde van aborsie is nie minder onvergeeflik as ander sonde nie. Deur geloof in God kan enige sonde vergewe word. ‘n Vrou wat ‘n aborsie gehad het, of a man wat dit aangemoedig het, of self die dokter wat die aborsie uitgevoer het – almal kan vergewe word in geloof deur Jesus Christus.

Waarom is aborsie verkeerd? Aborsie is die vernietiging van die ongebore kind vóór die geboorte. Dit word op verskillende wyses gedoen. Dit mag deur ‘n operasie wees, of die moeder kan medisyne drink. Onwettige aborsies word soms gedoen deur mense sonder mediese opleiding. Dit is baie gevaarlik en lei dikwels tot die dood van die moeder. Gewoonlik word dit gedoen omdat die kind deur ontug verwek is en mense die skande wil wegsteek. Maar soms word dit binne die huwelik gedoen omdat die ouers die kind nie wil hê nie.

Oorsee het dit skrikwekkende afmetings aangeneem, en maak ware Christene beswaar teen landswette wat dit wettig maak.

Omdat die kind binne-in die moeder ‘n mens is... Mense wat aborsie goedkeur, sê die kind is eers later ‘n mens, lank ná bevrugting. Party sê so 20 weke ná bevrugting. Ander sê nee, vroeër, ander sê met die geboorte. Christen­geleerdes sê die beginpunt van ‘n mens se lewe is by die bevrugting. Aborsie is enige tyd ná bevrugting die vernietiging van ‘n mens se lewe.

Omdat aborsie moord is. Gen 9:6 en Eks 20:13 sluit aborsie in. As Christene moet ons na die Woord van God luister.  2 Tim 3:16-17

Omdat dit meestal ‘n sonde is waarmee ‘n vroeëre sonde bedek moet word. Die kind binne-in die moeder kan die gevolg wees van bloedskande of ontug, dit wil sê seks buite die huwelik. Nou word die kind doodgemaak. Dit kan nooit God se wil wees nie.

Vir jou wat die baba wil dood hê wag daar ‘n skokkende oomblik want jy kan die baba nooit doodmaak nie want nie een van ons kan ‘n siel doodmaak nie. Jou baba wag vir jou in die Hemel. Matt 10:28

Vir meer inligting oor Die Christen en Aborsie, gaan na: http://bedieningpvc.co.za/wat-ons-bedien/aborsie/

Alles waarna jy soek is reeds joune!

Jy getuig jy is gered en jy dien die HERE en verder kom jy nie want jy leef nie in oorwinning en Hemelse vrede nie. Jou geestelike lewe is arm... en hier is die rede:

            Paulus sê, “Geseënd is die God en Vader van onse Here Jesus Christus, wat ons geseën het met (let op) ALLE geestelike seëninge in die Hemele in Christus.”

Het jy gehoor? Lees dit hardop en nog harder: ”Ek is geseënd met ALLE geestelike seëninge in die Hemelse plekke.”

Gelowiges kom wel agter iets makeer in hul geestelike lewens, daarom koop hulle DVD’s, en boeke en boer hulle by spesiale geestelike saamtrekke opsoek na vervulling in Christus.

In die proses leer hulle wonderlike dinge, dog die jare loop aan maar hulle weet nie van die oop deur na die bonatuurlike blydskap wat vir hulle in Christus beskikbaar is nie.

            Meeste van ons ken ons posisie in Christus — dat ons met Hom in Hemelse plekke sit — maar net as ‘n akademiese feit. Ons ken dit nie as ‘n belewenis nie. So beroof ons onsself van heerlikheid en glorie!

            Sommige sê: “Ek voel nooit of ek in ‘n Hemelse plek is nie. Ek voel altyd of ek in ‘n wildernis is en verdrukking en beproewing ly. Nee, ek verstaan dit nie”

“In Christus in die Hemele...” Efés 1:3 is nie iets wat jy kan bereik nie. Dis gratis aan jou gegee. Kyk wat het die verlore seun nie alles gekry toe hy tuisgekom het nie. Alles gratis. Dis presies wat met ons gebeur het. Wanneer ons in Christus is, dan sit ons volgens die Vader, naby Hom.

Hy kom af na jou toe. Christus die Seun en God die Vader het in jou hart ingekom en hulle woning daar gemaak: “As iemand My liefhet, sal hy my Woord bewaar, en my Vader sal hom liefhê, en Ons sal na hom toe kom en by hom woning maak.” Joh 14:23

            Let op, dit word al hoe wonderliker: “En wie My liefhet, hóm sal my Vader liefhê, en Ek sal hom liefhê en My aan hom (let op) openbaar.” Joh 14:21

En nog wonderliker: “En Ek het hulle die heerlikheid (glorie) gegee wat U My gegee het, sodat hulle een kan wees, net soos Ons een is. Ek in hulle en U in My, sodat hulle volkome een kan wees.” Joh 17:21–23

            Wanneer iemand iets aan jou gee, moet jy dit ontvang en baie dankie sê. Het jy al Jesus se glorie (heerlikheid) ontvang en dankie gesê?. Dis die geheim. Soos wat die HERE Sy wil aan ons openbaar, moet ons dit ontvang en dankie sê. So word dit joune.

“Laat ons dan met vrymoedigheid na die Troon van die Genade gaan, sodat ons barmhartigheid kan verkry en genade vind om op die regte tyd gehelp te word.” Hebr 4:16

            Petrus neem ons verder in hierdie heerlikheid en godsvrug in: “Immers, sy goddelike krag het ons (let op ALLES geskenk wat tot die LEWE en GODSVRUG dien, (hoe?) deur die kennis van Hom wat ons geroep het deur sy heerlikheid en deug, waardeur Hy ons die grootste en kosbare beloftes geskenk het, (hoekom?) sodat julle daardeur deelgenote kan word van die (let op) goddelike natuur (wanneer?), nadat julle die verdorwenheid ontvlug het wat deur begeerlikheid in die wêreld is.

            “En juis daarom ook moet julle met aanwending van alle ywer by julle geloof voeg die deug (Sedelik goeie eienskappe 2. Neiging om die goeie te doen 3. Geskiktheid, bruikbaarheid. liewe deug! uitroep van verwondering. 4.

Goed wees vir een of ander doel; in orde wees), en by die deug die kennis (Skrifkennis), en by die kennis die selfbeheersing (beheer jou gemoedstoestande), en by die selfbeheersing die  lydsaamheid (verdraagsaam, berustend), en by die lydsaamheid die godsvrug (vroomheid, Godvresend, vrugte dra wat by die bekering pas), en by die godsvrug die broederliefde, en by die broederliefde die naasteliefde.

Let nou op waarom al hierdie glorie en Godsvrug nodig is: “Want as hierdie dinge by julle aanwesig is en (let op) toeneem, dan laat dit julle nie ledig of onvrugbaar tot die kennis van onse Here Jesus Christus nie; want hy by wie hierdie dinge nie aanwesig is nie, is blind en kortsigtig, en het die reiniging van sy vorige sondes vergeet.” 2 Pet 1:3-9

            Aanvaar hierdie asemrowende geskenke en loof die HERE daarvoor. Dit is hoe jy dit in jou lewe aktiveer... deur te aanvaar en jou eie te maak. Ons leef in die laaste uur en ons kort die dieper lewe in Christus. – Wekroep

Is jy sonder skuld?

'n Man is betrap dat hy steel. Destyds is jou hand summier afgekap wanneer jy gesteel het. In hierdie geval het die koning besluit dat die man gehang moet word.

            Op pad na die galg vertel die dief aan sy bewakers dat hy oor 'n wonderbaarlike geheim beskik en dit sou jammer wees as die geheim saam met hom sterf. Hy sou dit graag aan die koning openbaar wou maak as dit moontlik sou wees.

Hy weet hoe om 'n granaatpit in die aand te plant sodat die boom gedurende die nag groei en die volgende dag ryp vrugte dra; sy oorlede vader het hom dit geleer.

Die dief het toe voor die koning verskyn, wat instem om die geheim die volgende dag op die proef te stel in die aanwesigheid van sy ganse hofhouding. Net voor sononder die volgende dag vergader die koning en sy ganse hof in die tuin van die paleis.

Die dief grou 'n vlak gaatjie, haal 'n saadjie uit sy sak te voorskyn, en sê: "O Koning, hierdie saadjie durf slegs deur 'n man geplant word wat nog nooit iets gevat het wat hom nie toekom nie. Ek is 'n dief en durf dit daarom nie waag nie. Een van u onderdane sal dit moet doen".

Die dief wend hom tot die eerste minister. "Sal u dit plant asseblief?" Verskrik sê die minister dat hy in sy kinderdae iets gevat het wat hom nie toekom nie.

"Sal u dit plant?" vra die dief aan die leërowerste, maar dié het aan soveel veldtogte deel gehad en met soveel krygsgevangenes en verowerings te doen gehad, dat hy nie met sekerheid kon sê dat hy niks geneem het wat hom nie toekom nie.

            "Kan u dit miskien plant?" wend die dief hom tot die koning se boekhouer, maar hy het met die inskrywing van sulke groot geldbedrae te doen dat ook hy nie weet of hy nie dalk verkeerde inskrywings gemaak het nie.

            "O Koning, dan moet u dit plant!" sê die dief. Maar dit val die koning by dat hy 'n halssnoer van sy oorlede vader hom ten onregte toegeëien het.

            "U wat die magtiges van die land is, aan wie niks ontbreek nie, kan nie die saad plant nie. Ek, wat gesteel het uit honger, moet gehang word!" roep die dief.

Is dit vreemd dat die koning hom vrygelaat het?

            Wie is daar van ons, wat hierdie staaltjie gelees het wat bereid sou wees om die saadjie te plant?

            Die Genade en Liefde van die HERE God Jahweh is grensloos. Almal kan hulle sondes vergewe word wanneer hulle hul sondes bely en Jesus Christus as Saligmaker aanneem.

Doen dit onverwyld en verkry so die Ewige Lewe. Help ook ander om by Jesus uit te kom. – Wekroep

Koop die Tyd uit

Tyd is kort. Die oumense het vir ons as jongelinge gewaarsku, tyd is kort. Ons was net 20 jaar oud en ons kon die werklikheid hiervan nie insien nie. Toe ons weer sien was ons 60 en toe 70 en nou nader ons 80.

            Gister was mens 50 jaar oud en oormore sê almal veels geluk met jou 60e jarigwording.  Selfs die Bybel waarsku: Koop die tyd uit.

            Alle nuusmedia werk in spertye. Neem ‘n koerant as voorbeeld. Elke bladsy het ‘n spertyd en die totale koerant ook. Nooit durf iemand dit waag om oor ‘n spertyd te gaan nie. Die rede is eenvoudig. Koerante word per pad en per vliegtuig vervoer. Dit moet ten alle koste op ‘n gegewe tyd al sy verkooppunte bereik.

            Vra maar vir jouself dit af: Hoe kry ‘n Sondagkoerant dit reg om Sondagoggende wanneer die winkels oopmaak, landwyd betyds beskikbaar te wees. Saterdagnagte wanneer jy slaap, beweeg voertuie soos rooimiere kruis en dwars deur ‘n netwerk van  paaie, oorlaai en aflaai kruis en dwars oor Suid-Afrika. En dan is daar die  mense wat donker oggend per fiets die koerant by jou huis aflewer. Alles is uitgewerk en beplan tot op ‘n minuut... en niemand in die netwerk durf slap lê nie. Van almal word ‘n 100% prestasie vereis.

            En jy lees rustig jou koerant met sonder die vaagste benul wat alles landwyd gebeur het, sodat jy jou koerant betyds kon ontvang.

            Skrywer had deur die jare ‘n kennisgewing teen die muur in my kantoor: “Straks Vandag”, verwysend na die Wederkoms. Op my lessenaar ‘n kennisgewing: “Doen dit Nou!” Tyd verskaf nie voorskotte en lenings nie. Tyd wat verby is kan jy noot weer inhaal nie.

            ‘n Stukkende horlosie kan mens vervang of laat regmaak (en tog is ‘n stukkende horlosie twee keer in elke 24 uur op tyd)  maar baie mense is net nooit op tyd nie.

            Moet nooit wat jy vandag kon doen los vir more nie, want jy is dalk nie more meer hier nie.  Moet nooit tyd verspil nie. Dit is net so kosbaar soos water. Kyk na die droogtegeteisterde gebiede, as kos en water nie betyds opdaag nie, vrek alles.... vee, verlore winste, water en tyd wat mens nooit weer sal terugkry nie.

            ‘n Ander waarheid is dat “Tyd is Geld.” As jy tyd verloor, verloor jy geld. Die volledige Skrif lees: “Pas dan op dat julle nougeset wandel, nie as (let op) onwyse nie, maar as wyse; en koop die tyd uit, omdat die dae boos is.

“Daarom moet julle nie onverstandig wees nie, maar verstaan wat die Wil van die HERE is.” Efes 5:15-17

Let op, “die dae is boos”. Dit waarsku weer op die Wederkoms want dit is hoe dit sal wees in die Eindtyd... Boos! Boos beteken: Kwaad.  Goddeloos, sleg. Storend; lastig. Kwaai, onhandelbaar. Lasterend. Sondig. Kommervol, haglik. Vyandiggesind. Afgunstig. In groot mate bose kringloop.

As jy nie die tyd uitkoop nie, is jy onverstandig. Die ouers werk en die kinders is op skool en of universiteit. Almal kom vanaand kapot by die huis aan, maar ma moet rondspring om vir almal kos te maak... en sy moet gou maak! Dis onregverdig. Wat doen die res van die gesin dan met hulle tyd na werk?

Daar is net ‘n sekere aantal ure per dag wat ons kan werk en ons moet inderdaad werk want die nag is op ons. Hoeveel mense bedel nie terwyl hulle kan werk nie.

Gee mildelik aan die eenvoudige nederige karwag. Hulle doen te minste iets om hulle brood te verdien. Menige van hulle begin hulle dag met die HERE met Bybel lees en gebed. Hulle kom spesiaal vroeg om tyd in te ruim daarvoor. Sou jy aldag heeldag op jou voete wil wees in die son en wind en koue en reën. Hulle is die SA wat was. Bemoedig hulle.

Die tyd is boos, baie, baie boos. As die menslike hart nie nou verander word teenoor God nie, is dit te laat. Daar is geen tyd in die Ewigheid nie. Enigiemand wat reeds daar is, voel of hulle maar gister daar aangekom het, alhoewel daar geen gister, vandag of more is nie.

Die geheim oor tyd is nie hoe lank nie, maar watter kwaliteit ons daar inbou. Is daar kwaliteit in jou tyd ingebou? Koop jy die tyd uit? Jy gee ‘n tiende van jou inkomste, maar gee jy ook ‘n tiende van jou tyd wat betref voorbereiding vir die Ewigheid?

Ons het in hierdie tyd mans en vroue en jeugdiges wat saam met die HERE loop.  As jy dit doen, sal ook jy jou taak op aarde vrugbaar voltooi.

Jy is te vroeg vir ‘n afspraak, jy moet tyd verdryf... nee nooit, wanneer jy in ‘n koffiewinkel instap, stap Jesus daar in. Maak ‘n verskil. Spandeer kwaliteit tyd daar. Koop die tyd uit. –   Wekroep

Berei jouself voor vir die grootste Bruilof in menseheugenis!

Dis September ‘n Nuwe Seisoen het aangebreek. Dit maak nie saak wat jy in die verlede verkeerd gedoen het nie, as jy berou daaroor het en dit bely en jou saak met God regmaak, sê die HERE: “As ons, ons sondes bely, Hy is getrou en regverdig om ons die sondes te vergewe en ons (boonop) van alle ongeregtigheid te reinig.” 1 Joh 1:9

            Wat doen God dan met daardie sondes?

            Daar is geen groter blydskap as om te weet God het ons sondes afgekoop, ons genees, ons vernuwe en ons vergewe nie!


            En kyk wat doen God met ons sondes en ongeregtighede: “So ver as die ooste verwyderd is van die weste, so ver verwyder Hy ons oortredinge van ons.” Ps 103:12

            Van Noord na Suid is 19 865km, maar van Oos na Wes is onmeetbaar.

            Omdat God juis dit met ons sondes doen, beteken dit dat dit nooit gevind kan word. “In dié dae en in dié tyd, spreek die HERE, sal die ongeregtigheid van Israel gesoek word, maar dit sal daar nie wees nie; en die sondes van Juda, maar dit sal nie gevind word nie; want Ek sal vergifnis skenk aan diegene wat Ek laat oorbly.” Jer 50:20

            Kyk wat doen die HERE nog met ons sondes en ongeregtighede: “Hy sal Hom weer oor ons ontferm, ons ongeregtighede vertree; ja, U sal al hulle sondes in die dieptes van die see werp.” Ps 7:19

            En verder “.... en aan hulle sondes en hulle ongeregtighede sal Ek nooit meer dink nie.” Heb 10:17. Dit is dus bitterlik verkeerd vir mense om daaroor te dink en dit steeds teen jou in te bring.

            En weer “.... want Ek sal hulle ongeregtigheid vergewe en aan hulle sonde nie meer dink nie.” Jer 31:34

            “Welgeluksalig is hulle wie se ongeregtighede vergewe en wie se sondes bedek is. Welgeluksalig is die man aan wie die HERE die sonde nie toereken nie.” Rom 4:7-8

            “Welgeluksalig is die mens aan wie die HERE die ongeregtigheid nie toereken nie en in wie se gees geen bedrog is nie.” Ps 32:2

            Nou, as God, die Almagtige God, mense hul sondes en ongeregtighede vergewe en dit neem en in die dieptes van die see gooi en Hy sê Hy sal daar nooit weer aan dink nie, waarom is daar selfs Gelowiges wat gedurig mense se verledes teen hulle opraap?

            So iemand is met ‘n gevaarlike spel besig en hy of sy meng hulle in met God se handewerk. God vergewe, en vergeet, maar sommige wil nie vergewe nie en wil steeds onthou. Staak dit!

            “Vreeslik is dit om te val in die hande van die lewende God.” Heb 10:31

            Wanneer ons bely dat ons gered is, of bely dat ons as gereddes gestruikel het, dalk selfs geval het, en ons saak met God reggemaak het, moet elkeen van ons op die Pad na Heiligmaking gevind word.

            Lees die volgende twee strofes stadig en ‘n paar keer deur want hier is ‘n ontsettende groot waarheid op ons pad na die Beloofde Land:

            “Die Here is die Gees, en waar die Gees van die HERE is, daar is vryheid.
            “En terwyl ons almal met onbedekte gesig soos in 'n spieël die heerlikheid van die Here aanskou (Gebeur wat?), word ons van gedaante verander na dieselfde beeld, van heerlikheid tot heerlikheid, as deur die Here wat die Gees is.” 2 Kor 3:17-18

            Dit word ook so vertaal: "Die HERE beteken hier die Gees, en waar die Gees van die Here is, is daar vryheid.
            “Ons almal weerspieël die heerlikheid van die HERE, want die sluier is van ons gesig af weggeneem. Ons word al meer verander om aan die beeld van Christus gelyk te word. Die heerlikheid wat van ons uitstraal, neem steeds toe.
Dit doen die Here wat die Gees is.”

            Dit kan egter nie gebeur as daar struikelblokke in jou lewe is nie.

            Dit bring ons by Dawid. Hy het geval, opgestaan  en sy saak reggemaak. God dink nie meer aan Dawid se fout nie. Die wat die Beloofde Land haal, sal Dawid daar kry. Let op na die volgende:

            “En Ek sal een enkele herder oor hulle verwek, en hy sal hulle laat wei, naamlik my kneg Dawid; hy sal hulle laat wei, en hy sal vir hulle 'n herder wees.
            “En Ek, die HERE, Ek sal vir hulle 'n God wees, en my kneg Dawid 'n vors in hulle midde. Ek, die HERE, het dit gespreek.” Eseg 34:23-24

            “En my kneg Dawid sal koning oor hulle wees, en hulle sal almal een herder hê; en hulle sal in my verordeninge wandel en my insettinge onderhou en daarna handel.” Eseg 37:24   

            Toe Esegiël hierdie strofes geskryf het was Dawid al 400 jaar lank in die Ewigheid. Esegiël het dus van die toekoms gepraat, die Millennium, die tydperk na die Wederkoms.

            Jesus Christus gaan dan Koning oor die hele aarde wees, en Dawid sal aan Jesus ondergeskik wees.

            Diegene wat langs die pad gestruikel en selfs geval het, en hul saak met die HERE uitgemaak het, hulle is net soos ander Gelowiges ook Koningskinders!

            Ek vra dan: “Het hulle miskien gestruikel om te val? Nee, stellig nie! Maar deur hulle val het die saligheid tot die heidene gekom om hulle jaloers te maak.

            “En as hulle val die rykdom van die wêreld is en hulle tekort die rykdom van die heidene, hoeveel te meer sal hulle volheid dit nie wees nie!” Rom 11:11-12 ook Jak 3:2

            “En omdat hulle dit nie die moeite werd geag het om God in erkentenis te hou nie, het God hulle oorgegee aan 'n slegte gesindheid, om te doen wat nie betaam nie:

            “Hulle is vervul met allerhande ongeregtigheid, hoerery, boosheid, hebsug, ondeug; vol nydigheid, moord, twis, bedrog, kwaadaardigheid; nuusdraers, kwaadsprekers, haters van God, geweldenaars, trotsaards, grootpraters, uitvinders van slegte dinge, ongehoorsaam aan die ouers; onverstandig, ontrou, sonder natuurlike liefde, onversoenlik, onbarmhartig, mense wat al ken hulle die verordening van God goed, dat die wat sulke dinge doen, die dood verdien dié dinge nie alleen self doen nie, maar ook hulle goedkeuring skenk aan die wat dit doen.

            “Daarom is jy, o mens wat oordeel, wie jy ook mag wees, sonder verontskuldiging; want waarin jy 'n ander oordeel, veroordeel jy jouself; want jy wat oordeel, doen dieselfde dinge.

            “En ons weet dat die oordeel van God na waarheid is oor die wat sulke dinge doen.” Rom 1:28-32; Rom 2:1-2

            En verder “Broeders, as iemand ewenwel deur een of ander misdaad oorval word, moet julle wat geestelik is, so een reghelp met die gees van sagmoedigheid, terwyl jy op jouself let, dat jy ook nie versoek word nie.

 

        “Dra mekaar se laste en vervul so die wet van Christus.” Gal 6:1-2

            Maar wat doen ons, ons gaan help nie een wat deur ‘n misdaad oorval word nie, nee, ons dra eerder stories aan. Ons verkondig nie die Evangelie van redding en vrymaking nie, maar besing die swanesang van die satan.

            Jou oordele oor ander gaan vir jou kelder. Die lewe is te kort om kortsigtig te wees. Hou die oë op Jesus Christus en nie op mekaar nie. As iemand ‘n las het, bly stil daaroor en bid vir daardie persoon en gaan help hulle. Dis jou opdrag!

            Streef eerder na die verwesenliking van die volgende:

            “Ons almal weerspieël die heerlikheid van die Here, want die sluier is van ons gesig af weggeneem. Ons word al meer verander om aan die beeld van Christus gelyk te word. Die heerlikheid wat van ons uitstraal, neem steeds toe. Dit doen die Here wat die Gees is.”

Berei jouself voor vir die grootste Bruilof in menseheugenis. – Wekroep

‘n Nuwe Seisoen begin ook in ons lewens

Dis bekend oor die wêreld heen dat die grootste  geestelike Herlewings in September plaasvind. Die is die maand van ’n  Nuwe Begin. Dis die begin van ‘n seisoen waarin enorme gebeure plaasvind.

            Dit is die tyd waar God se Glorie oor die aarde sweef, en net soos in die natuur, is daar ook geestelike  golwe van Glorie wat oor die aarde spoel. Dit ls ook die voorspel tot ‘n glorieryke 2020.

            Jy durf nie Rosh Hoshanah misloop  nie, die Joodse Nuwejaar wat vanaf die aand van 29 September tot die aand van 1 Oktober gevier word. Die skepping op aarde van Adam en Eva, word ook gedenk. Daar word groot fees gevier met sang en gebede, heerlike tradisionele kos en soetgoed, asook die aansteek van kerse en die blaas van die Shofar in die oggende... die aankondiging van ‘n nuwe seisoen en nuwe vrystelling van God se Glorie. 

            Gelowiges wêreldwyd is vanjaar ontsettend opgewonde want ‘n reuse oes van siele word verwag, ‘n Herlewing soos wat daar nog nooit in die geskiedenis van die mens op aarde was nie. Die Evangelie en Herlewingsvuur kom selfs uit Jerusalem by monde van wedergebore Joodse Rabbis en ander Messiaanse Jode.

            ‘n Groot geestelike momentum word reeds waargeneem. Genesings na siel, gees en liggaam te same met wonderwerke vind reeds plaas en sal na verwagting sterk toeneem. Soos nog nooit tevore nie word uitgesien na die Koms van die Messias.

            Oorsee veral word buitengewoon groot geestelike saamtrekke gereël vir Sept 29 tot 1 Okt en verder. Omdat so ‘n reuse siele oes verwag word, word stadions oral gehuur.

            Yom Kippoer vind ook in September plaas. Hierdie September word as ‘n Kairos tyd beskryf vanweë die talryke geestelike byeenkomste wêreldwyd.  Niemand betwyfel die feit van ‘n groter potensiaal van groter Glorie, groter Seën en ‘n groter Oes  nie. Oral besef Gelowiges die Getal moet volgemaak word, dis die laaste uur.

            Yom Kippoer is die  Sabbat van alle Sabatte, die grootste heilige geestesfees in die geskiedeis van die Jode waaraan miljoene Gelowiges ook reeds deel het. Dis die heiligste dag van die jaar wanneer die Godsvolk sy saak met God uitmaak.

Baie Gelowiges is op ‘n vas in afwagting van die groter Glorie.  In sommige oorsese lande vas meer mense as ooit tevore. Soos in die Hemel, so ook op die aarde.

            Verwag groter Glorie uit die hand van God, want ook jy gaan ‘n nuwe seisoen binne. – Wekroep    

‘Heilig, heilig, heilig is die HERE van Hemel en Aarde’

Feitlik al die takke was opgesny en met die sny van die laaste tak, kry ek ’n snaakse gevoel in my linkerhand. Ek sien dat die hoekslypmasjien op die grond lê.

            Toe sien ek dat daar bloed in ’n dun straal by my pols uitspuit. En ek sien met ’n skok dat my hand afgesny is, vanaf my pols tot by my linkerhand se pinkie en dat my hand aan ’n stukkie vel by my pinkie hang.

            Die tuinier hardloop en gaan haal ’n handdoek by die wasgoeddraad. Ons rol dit soos ’n tou en draai dit styf om my pols. Bloed het egter steeds gevloei en ek sien dat my arm tussen my pols en elmboog sleg gesny is en dat die slagaar ook afgesny is.

Ek en die tuinier neem toe die handdoek en draai dit om my bo-arm. Ek gebruik die hoekslypmasjien se sleutel en wen die handdoek daarmee styf op totdat die bloed stop.

Ek hou die sleutel met my regterhand vas en vra die tuinier om my dogter te bel.

            Gelukkig antwoord sy dadelik en hy sê vir haar dat sy dadelik moet kom want die oubaas het baie seergekry en dat hy baie bloei. Na ongeveer vyf minute vra ek dat hy weer moet bel en moet sê dat hulle gou moet kom want ek bloei my dood en dat hulle nie eens by rooi verkeersligte moet stop nie.


            Ek het my hand in ’n plastieksak gesit en toe binne-in ’n swart plastieksak sodat hulle nie die motor of klere bemors nie. Toe hulle uiteindelik opdaag het daar ’n groot kol bloed en fyn stukkies been op die plaveisel gelê waar ek gesit en wag het.

            Hulle het met my na Medi Clinic gejaag en by ongevalle het my skoonseun ’n rolstoel gekry en met my na Ongevalle gehardloop. Die vrouedokter by ongevalle en ’n suster het my hand in

’n skottel gesit wat verskriklik gebrand het.

            My kinders het intussen my vrou gebel en vertel wat gebeur het en dat sy dadelik hospitaal toe moet kom omdat ek baie ernstig seergekry het. Intussen het die verpleegpersoneel masjiene aan my gekoppel. My klere het hulle sommer met ’n skêr afgeknip.

            Ek het gesien toe my vrou by ongevalle opdaag en ek was emosioneel en het baie erg gehuil. Sy was ongeveer twee meter weg van my en ek het vir haar gesê dat sy gou moet maak want dit word donker om my en dat sy my moet groet want ek gaan weg.

            Die laaste wat ek onthou is wat ek gehoor het toe die dokter roep: “Meneer Kruger, Meneer Kruger, o, God, sy hart het gaan staan!”

            Ek het van bo-af gesien hoe my vrou en my kinders huil en hoe die dokter en verpleegpersoneel rondhardloop. Skielik het ek ’n baie skerp lig gesien, maar mens kon in die lig kyk en dit was asof iets mens in die lig intrek. Ek is in die lig in en ek het by ’n rivier uitgekom. Die rivier het egter nie water in nie, maar dit skitter soos diamante.

            Aan die anderkant van die rivier het ek my pa en ma gesien. My pa is alreeds 38 jaar gelede weg en my moeder is in 2010 weg. My suster was ook daar, sy is in 2006 weg asook my Oupa en Ouma wat ek nooit geken het nie. Ek kon sien dat hulle baie gelukkig is.

            Daar het ’n wit wolk by die mense verbygekom en hulle het gekniel en vorentoe gebuig en gesê: “Heilig, heilig, heilig is die HERE van Hemel en Aarde”. My pa het my nader gewink en gesê dat ek na hulle moet kom.

            My suster het met my gepraat oor haar kinders en haar man. Ek het beleef dat indien ek na hulle kant sou oorbeweeg ek nie weer sou kon terugkom nie. Ek het ook beleef dat die kleure wat ek gesien het veel mooier was as wat ek nog ooit gesien het.

            Skielik het ’n Engel voor my verskyn. Die Engel het ses vlerke gehad en as die wolk verby beweeg, het die Engel (ek weet nie of die Engel manlik of vroulik is nie) sy gesig bedek met die boonste twee vlerke en het hy sy voete bedek met die onderste twee vlerke en ook gesê: “Heilig, heilig, heilig is die Here van Hemel en Aarde.”

            Die Engel het my verder die rivier (wat nie water in het nie maar skitter soos diamante) afgeneem. Ons het by ’n plek gekom wat ek sal beskryf soos ’n baie groot poort en in die poort het Moses van die Bybel gestaan. In sy hand was daar ’n baie groot swaard. Die swaard het beweeg soos vuurvlamme.

            Die wolk het weer verbygekom en almal het gebuig en die Engel het sy gesig en voete bedek en gesê: “Heilig, heilig, heilig is die HERE van Hemel en Aarde.”

            ’n Stem het uit die wolk gepraat en gesê­-vra: “Vir wie gaan ons stuur?” Die Engel het gesê: “Stuur hom” (dit is nou ek). Die Engel het vir my gesê dat ek Jesaja 6 moet lees en vir my gesê dat ek moet gaan verkondig wat ek gesien het.

            Die dokter by ongevalle het prof Marx gebel en gevra om te kom help. Die berader by die hospitaal het my vrou en kinders tee gegee en kort-kort gaan kyk hoe dit met my gaan. Hulle het my seun in Zeerust laat weet dat hy dadelik moet kom. Die berader het weer gaan kyk en vir my familie gesê dat hulle weer my hart aan die klop gekry het, maar dat hulle my nog nie kon sien nie aangesien die medici nog besig was en poog om my te stabiliseer.

            My hand is die volgende dag weer geheg en toe ek wakker word, was ek in die intensiewe sorgeenheid.

            Om aan die opdrag te voldoen is vir my moeilik. Hierdie is ’n poging om te vertel wat ek beleef het. Vir my was dit duidelik dat daar lewe na die dood is en dat ons verantwoording oor ons lewe sal doen. Ek kan dit wat ek beleef het uiteraard op geen manier bevestig nie, maar dit was vir my die werklikheid. Daar is geen manier hoe ek jou kan oortuig dat wat ek beleef het die waarheid is nie. Ek kan maar net getuig van wat ek beleef het.

            “Lees jou Bybel, want daarin het ek bevestiging ontvang van wat ek ervaar het. My boodskap aan jou is om jou saak met God reg te maak as dit nie is nie, want jy moet weet daar is ’n bestemming wat wag en vir God se kinders ’n bestemming van lewe in sy volheid.

ʼn Verdere pad saam met God

Ek was bevoorreg dat God ’n verdere pad met my gestap het. Maandagaand die 19de Augustus 2019 het my vrou Ursula so ongeveer 21:30 my bloeddruk- en slaappil gegee. Ons is so 22:00 bed toe. Die klein worshond slaap onder die komberse by ons voete en die yorkie bo-op die bed by ons voete. Die Engelse bulhond slaap aan my kant van die bed op haar kombers op die vloer en sy snork soos sy slaap.

            Ongeveer 2:00 Dinsdagoggend op 20/08/2019 word ek bewus van ’n ontsettende krag wat die kamer vul. Ek maak my oë oop en sien ’n man omring deur ’n helder lig by my voete op die bed sit en hy kyk nar my.

            Ek maak my vrou wakker en sê vir haar hier is ’n man in die kamer. Sy kyk en sê dat ek droom en ek moet verder slaap. Die honde slaap ook soos dooie goed. Ek word bang. “Moenie bang wees nie, my kind,” sê die man vir my. Skielik kan ek die krag en liefde sien en voel wat uit die man straal.

            Die man vra my uit oor my hand en ek sê dat ek die hand afgesny het en dat dit nou inmekaar getrek is. Hy antwoord dat hy dit weet. Die man sê toe: “Gee my jou hand, my kind,” en vat my hand baie saggies en teer en kyk na my met liefdevolle oë. Ek voel ’n klomp naalde en spelde in my hand. Hy sê dat ek my hand en vingers moet beweeg en daar beweeg my hand en vingers soos voor die ongeluk!

            Toe ek opkyk van my hand na die man, is hy weg. Ek het in verwondering in die sitkamer gaan sit. Toe besef ek dat dit die HERE self is wat daar by my in die kamer was en dat Hy my hand genees het!

            Elke oggend om 04:45 gaan stap ek met die Engelse bulhond, maar maak eers vir my vrou ’n koppie koffie. Toe ek 05:30 terugkom vertel ek haar en wys my hand vir haar. Sy kon dit nie glo nie. Ek het op my knieë gegaan en die Here gedank dat Hy so goed is vir my. Hy het ook gesê: Gaan verkondig wat jy gesien en beleef het.

            Waarlik die Here is waaragtig! —  Wekroep 

Die skade wat die Nuus aanrig

Vandag se nuus is nie goed vir ons gesondheid nie.  Dit lei onder meer tot vrees en aggressie, ‘n binding in ons gees en beïnvloed ons geestelike wandel met Jesus negatief.

            Ons dink nie meer diep en kreatief nie. Die oplossing? Hou op om die nuus te lees of te kyk of daarna te luister. Wat aan die gebeur is oor die wêreld kan ons niks aan verander nie.

            Sosiale media is ‘n nog groter euwel wat nuus betref. Meesal is dit nuus sonder feite. Toe telefone nog drade gehad het, was ons vry. Selfone het ‘n afgod geword.

            Die gees van die antichris is besig om die wêreld oor te neem. “Kinders, dit is die laaste uur; en soos julle gehoor het dat die Antichris kom, bestaan daar ook nou baie antichriste, waaruit ons weet dat dit die laaste uur is.”
1 Joh 2:18

            Ons is al so gebreinspoel dat ons eerder slegte as goeie nuus verwag. Dis waarom meeste hul selfone dag en nag aanhou, selfs in die kerkdienste... net vir geval van slegte nuus, sê hulle.

            Nuus het misleidend geword. Die rol van terrorisme word oorskat en die rol van verpleegsters onderskat.

            Alles is deurmekaar. Mense sê hulle is verkeerd aangehaal. Wat vandag waarheid was is more ‘n leuen.  Nuus het irrelevant geword. Noem een nuusberig wat jy vanjaar gelees het waarby jy kon baat.

            Nuus het die mondstuk van die antichris geword. Hoe meer mense dit lees, hoe meer mense verssprei dit op verskeie wyses en besoedel al hoe meer ander mense.         

            Mense raak paniekbevange as hulle nie nuus hoor nie. Kry hulle wel die nuus sukkel hulle om te onderskei tussen wat is nuut en wat is relevant. Sommige redeneer nuus bied aan hulle ‘n kompeterende voordeel, dit terwyl die nuus eintlik tot hul nadeel is.

            Nuus is niks anders as borrels op die oppervlak komende vanuit ‘n veel dieper wêreld van onheil nie.

            En as die nuus sommige irriteer, lees hulle die Sterre Voorspel want daar is soms iets “bemoedigend” dog alles is bloot ‘n wilde vlug van die verbeelding.

            Die sekulêre media is nie te blameer vir die nuus wat hulle aanbied nie want dis al nuus wat daar is. Nogtans, as meer inligting tot groter ekonomiese sukses sou lei, dan moet joernaliste mos al skatryk wees!

            Nuus is toksies vir ‘n mens se liggaam en verstand. Die nuus veroorsaak chroniese stres, asook newe effekte soos vrees, aggressie, tonnelvisie en maak mense onsensitief. Ons maak talle foute omdat ons verstrik raak tussen wat sin maak en die ware werklikheid. Solank iets net “sin” maak, bou ons daarop en kom die fout te laat agter.

Die nuus is soos virusse wat ons aandag steel of verdeel. Dit maak van ons vlak denkers. Ons kort- en langtermyn geheue raak verward. Ons begin al hoe minder verstaan wat gaande is. Dit maak ons onstabiel want die soort nuus van die dag laat ons konsentrasie verloor. .

Aanlynnuus het ’n veel erger impak. Reeds in 2001 is in Kanada bewys dat  dit ‘n veel erger invloed op ons denke en vermoë het. Aanlynnuus is aanhoudend en onvolledig en boonop meesal vals. Nuus gaan meesal oor dinge wat ek en jy niks aan kan verander nie. Dit maak ons passief. Dis maak ons pessimisties, sarkasties en fatalisties. Die nuus van vandag hulle.  vernietig kreatiwiteit. Mense wat wegbly van nuus af, presteer onder meer as skrywers, dokters, spesialiste, musikante, wetenskaplikes, ontwerpers, wiskundiges, argitekte, skilders en IT mense.

Kortom, vandag se nuus het geen goeie uitwerking om enige mens nie. Mense wat reeds die stryd teen die nuus verloor het, vind ‘n tuiste in twak praat, drank, dwelms en verloor uiteindelik belangstelling in alles opbouends.

Die enigste slegte nuus wat voordelig is, is oor gebeure in die Midde-Ooste met Jerusalem as barometer want dit dui op die Wederkoms van Jesus Christus op die wolke. Mense met ‘n belangstelling in daardie nuus, hef hul hoof n bowe en kyk uit vir Hom.

Vir die verloregaande wêreld  is die enigste waardevolle nuus: “Bring my die Ou-ou tyding, die Boodskap van God’s Heil.” https://www.youtube.com/watch?v=ccL50VndN44

Speel geestelike musiek in jou huis en in jou motor, wagtend op sy Koms. – Wekroep

https://www.youtube.com/watch?v=uOGt5T56hLQ

Wat sou Jesus van jou sê?

As Jesus jou sien aankom, hoe sou hy jou aan ander voorstel?

In Joh 1:47 sien Jesus Natánael na Hom toe kom en sê van hom: “Hier is waarlik 'n Israeliet in wie daar geen bedrog is nie.”

En as dit ek of jy was wat aangestap gekom het, wat sou Jesus van ons gesê het?

As jy ongered is sou Jesus straks gesê Hy weet nie wie hier aankom nie, maar Hy is baie lief vir jou en Hy verlang dat jy deel van Sy kudde moet word.

En as jy wel deel van Sy kudde is, wat sou hy van jou sê….Sou Hy straks sê: “Dit is my seun/my dogter, in wie Ek ‘n welbehae het?

En as jy vir Jesus moet sê wie jy is?

·       Ek is GOD se kind want, ek is wedergebore, nie uit verganklike saad nie, maar uit onverganklike, (hoe?) deur die Lewende Woord van God wat tot in Ewigheid bly. 1 Pet. 1:23;

·       Ek is ‘n nuwe skepping, omdat ek nou in Christus is. 11 Kor. 5:17;

·       Ek is verlos van die mag van die duisternis en ek is oorgebring na die Koninkryk van die Seun  van Sy Liefde. Kol.1:13;

·       Ek is losgekoop deur Christus van die vloek van die Wet. Gal.3:13;

·       Ek is deur GOD uitverkies nog voor die grondlegging van die wêreld. (fes. 1:4;

·       Ek is verlos deur Jesus se bloed. Efes. 1:7;

·       Ek is ‘n geroepe Heilige. Rom. 1:7;

·       Ek deel in Sy erfenis. Kol. 1:12;

·       Ek is triomfantelik. Openb. 21:7;

·       Ek is dood vir die sonde. Rom. 6:2;

·       Ek is ‘n uitverkorene. Kol. 3:12;

·       Ek is bevestig tot die einde toe. 1 Kor. 1:8;

·       Ek is deur die Waarheid vrygemaak. Joh. 8: 31-33;

·       Ek is besny met ‘n besnydenis wat nie met die hande verrig is nie. Kol. 2:11; Det: 10:16; Filp. 3:3; Rom: 2:28-29;

·       Ek is met Christus gekruisig. Gal. 2:20;

·       Ek is gered deur die bloed van Jesus. 1:14;

·       Ek lewe saam met Christus. Efes. 2:5;

·       Ek is saam met Jesus opgewek. Rom. 2:12;

·       Ek is ‘n getroue navolger van Jesus Christus. Efes. 5:1;

·       Ek is die Lig van die wêreld. Matt. 1:14;

·       Ek is die sout van die aarde. Mat. 5:13;

·       Ek het ‘n heilige roeping. 2 Tim. 1:9;

·       Ek is meer as ‘n oorwinnaar. Rom. 8:37;

·       Ek is gewortel en opgebou in Hom en bestig in die geloof. Kol. 2:7;

·       Ek weet al my behoeftes is vervul. Phil. 4:19;

·       Ek het lewe en oorvloed. Joh. 10:10;

·       Ek is tot alles in staat deur Christus wat my die krag gee. Fil. 4:13;

·       Ek jaag na die doel om die prys te verkry. Fil. 3:14.

As jy dit nie kan sê nie… dan moet jy jou afspraak met Jersus nakom. – Wekroep

‘Voor julle roep sal ek antwoord’

Sophia Ironside se man, John, het sy kort lewe grootliks aan die uitdra van die Evangelie  gewy. Hy het op straat, in parke, in sale, in teaters, net waar hy geleentheid kon kry die Evangelie verkondig.

Op 28-jarige ouderdom is hy aan maagkoors oorlede. Hy het Sophia en sy twee seuntjies, sonder enige inkomste van pensioen of 'n belegging agtergelaat.

Sophia het met naaldwerk die pot aan die kook gehou. Die een seuntjie, Harry, wat later die beroemde dr. Harry Ironside, pastoor van die Moody Memorial Church en uitnemende skrywer, sou word, het sy ma stip dopgehou.

Eendag sou hulle kuiermense vir ete kry. Sy het feitlik alles wat hulle gehad het, saamgeskraap en 'n ete voorberei. Na die besoekers vertrek het, kry sy onder een van die leë borde 'n $10-noot – in daardie dae baie geld. Met betraande oë het sy dadelik, met 'n arm om elke seuntjie, God daarvoor gedank.


Die een seun, Dr Harry Ironside

            Toe kom die dag dat die koskas regtig heeltemal leeg was. Sy roep haar twee kinders om by 'n leë tafel ontbyt te kom eet. Hulle het net water om te drink. Weer slaan sy haar arms om die twee: "My seuns, ons gaan dankie sê vir die water."

Hulle maak oë toe en sy bid: "Vader, U beloof in U Woord (sy haal Jes. 33:16 aan): 'So 'n mens se kos sal hy kry en sy water sal nie opraak nie'. Ons het die water en ons dank U. Maar nou vertrou ons U vir ons kos."

Net toe word aan die deur geklop. 'n Man staan voor die deur. Hy sê vir haar: "Ek voel eintlik baie skaam. Ons skuld jou al vir maande lank geld vir 'n rok wat jy vir my vrou gemaak het, maar ons het regtig nie geld gehad om te betaal nie. Ons is nou besig met die aartappeloes. Sal jy asseblief solank 'n sakkie of twee aartappels neem, totdat ons jou kan betaal?"

"Verseker!" roep Sophia uit. "Baie dankie." Binne minute na sy vertrek begin die vars aartappels in die braaipan sis en die seuns geniet 'n beantwoorde gebed se kos vir ontbyt.

            Wat het gebeur? "Voor hulle roep, sal Ek antwoord, terwyl hulle nog praat, sal Ek hulle gebed verhoor." Jes 65:24

            Let op: “Wat die oog nie gesien en die oor nie gehoor  en in die hart van 'n mens nie opgekom het nie, wat God berei het vir die wat Hom liefhet. 1 Kor 2:9

            Hoe bereik mens hierdie vlak in jou geestelike lewe? “En nou bly geloof, hoop, liefde – hierdie drie; maar die grootste hiervan is die liefde.” 1 Kor 13:13

·       By Harry se geboorte was verpleegpersoneel oortuig hy is doodgebore. Hulle het toe al hulle aandag aan sy ma gegee wat in ‘n bedenklike toestand was. Eers 40 minute later is ontdek Harry leef. Ons vertel sy verhaal ‘n volgende keer.

·       Sluit aan by miljoene en bid vir die Vrede van Jerusalem:  https://eagleswings.mykajabi.com/dayofprayerresources-11e9e9b6-6522-4107-8282-c18b7b96461d

Die merkwaardige Harry Ironside

Harry Ironside, die man wat as baba doodgebore is en as jongeling die Evangelie as onwedergeborene verkondig het.


Henry (Harry) Allen Ironside (14 Oktober 1876 – 15 Januarie 1951) was ‘n Kanadees-Amerikaanse leraar, dosent, teoloog en pastoor van die Moody Kerk in Chicago van af 1929 tot 1948 sonder dat hy ooit in ‘n klas was of enige eksamen afgelê het.

            Ironside is in Torontom Kanada gebore. Sy vader was John Ironside en sy moeder Sophia Stafford. Sy ouers het by die Plymouth Brethren aanbid. By geboorte was aangeneem dat Harry doodgebore is. Mediese personeel het al hulle aandag aan sy ma se bedenklike toestand verleen.

            Veertig minute later het ’n verpleegster lewe by Harry bespeur.  Hy is dadelik behandel en bygebring.

            Toe Harry twee jaar oud was is sy pa John, op 28-jarige ouderdom aan maagkoors oorlede. Harry was van ‘n klein seuntjie af baie geïnteresseerd in die verkondiging van die Evangelie. Hy  het geestelike boodskappe in dienste van die Heilsleër gebring. Later het hy by die Plymouth Brethren ingeskakel.

         

Die gesin het toe na Los Angeles, Kalifornië verhuis. Daar was nie ‘n Sondagskool nie en op 11-jarige ouderdom begin Harry sy eie Sondagskool. Hy en sy maatjies het ‘n spul goiingsakke aanmekaar gewerk en ‘n tent gebou wat 100 kinders kon huisves. Hy het weekliks vir sowat 60 kinders en ‘n paar grootmense gepreek.

            In 1888 woon hy dienste by van Evangelis Dwight L. Moody. Daar was 4 000 mense in die dienste en Harry hoop hy kan ook eendag vir so mense preek. ‘n Jaar later gesels hy persoonlik met Moody en kom toe agter dat hy wat Harry is, nie Wedergebore is nie.

Dr Ironside

            Hy het dadelik opgehou met preek en ses maande lank geworstel met die geestelike “probleem” van Wedergeboorte. Na ‘n aand van gebed in Februarie 1980 is hy op 13-jarige ouderdom Wedergebore. Hy het later so getuig: “Ek het op die Woord van God berus en Jesus Christus as my Saligmaker bely.” Na sy Wedergeboorte het hy weer begin preek en dadelik sy eerste siel vir die HERE ingebring. Op skool was hy bespot, maar niks sou hom laat afsien van sy ywer om siele te wen nie.

            Sy ma Sophia het later daardie jaar weer getrou met ene William D. Watson.

            Harry het die skool na St V111 verlaat en in sy vrye tyd ‘n skoenmaker gewees. Hy het besluit hy het genoeg van skool gehad en dit later berou. Nog later werk hy bedags in ‘n fotografiese ateljee en saans preek hy in dienste van die Heilsleër. Hy was bekend as die seun-prediker.

            Op 16-jarige ouderdom verlaat hy die fotografie en word hy voltydse prediker by die Heilsleër. Daar word hy ‘n luitenant en preek hy 500 preke per jaar. Dit het sy gesondheid aangetas en hy moes die prediking onderbreek om in ‘n hersteloord tuis te gaan.

            Op 20-jarige ouderdom in 1896 verhuis hy na San Francisco en werk hy weer saam met die Plymouth Brethren. Hy begin ook hand bysit by Evangelis Henry Varley se dienste en ontmoet Varley se pianiste Helen Schofield, die dogter van ‘n Presbiteriaanse prediker.

            Die twee is gou getroud. In 1898 sterf Harry se moeder. In dieselfde jaar word Harry en Helen se eersteling Edmund Henry gebore. In 1900 verhuis die gesinnetjie na Oakland.

In 1903 aanvaar hy sy eerste uitnodiging om op die Ooskus te preek. Met hulle terugkeer na hulle tuiste had hulle net genoeg geld om tot in Utah te reis. Hy het 10 dae lank op die strate gepreek en net toe die gesin se geld op was en hulle nie meer die hotel kon bekostig nie, gee ‘n vreemdeling hom ‘n koevert met $15 in. Daarmee kon hulle terugreis na hul tuiste in Oakland. Harry het nooit kollekte opgeneem of vir geld gevra nie. Hy het soos sy ma op die HERE vertrou.

In 1905 is hul tweede seun John Schofield gebore. Harry begin toe ook ‘n eie drukkersbesigheid en boekwinkel. Hier begin sy lewe as skrywer. Verskeie Bybelse kommentare word geskryf en gedruk. Sy bedryf heet: Western Book and Tract Company. Dit was ‘n groot sukses tot en met ressessie in laat 1920.

Steeds sonder enige formele teologiese opleiding preek hy vanaf 1916 tot 1929 bykans 7 000 preke aan meer as 1.25 miljoen mense.

In 1918 werk hy saam met Evangelis George McPherson; en in 1924, begin preek onder die toesig van die Moody Bybel Instituut.

In 1926, wys hy ‘n lektorpos na Dallas Teologiese Seminarie van die hand, alhoewel hy sedert 1925 en 1935 gereeld daar klas gegee het.

Na ‘n reeks preke by die Moody Kerk in Chicago, is hy in 1929 genooi om een jaar lank as pastorale prediker op te tee. Die volgende jaar is hy amptelike ingehuldig as pastoor en het daar tot en met sy aftrede in 1948 gepreek. In al hierdie tyd het hy weekliks vir sowat 4 000 mense gepreek.

In 1932 het hy ook oorsee begin preek en in 1938 lewer hy 142 preke in Engeland, Ierland en Skotland. Elke diens is deur sowat 2 000 mense bygewoon. In 1942 word hy ook president van die  Africa Inland Mission. In 1935 preek hy by die begrafnis van Billy Sunday in die Moody Kerk.

            In 1930 vereer Wheaton Kollege hom met ‘n eredoktorsgraad in die Lettere. In 1942 vereer Bob Jones Universiteit hom met ‘n eredoktorsgraad in Godgeleerdheid.

            Hy het nooit ‘n sent vir homself of sy werk gevra nie, maar hy was ‘n meester om geld vir ander geestelike organisasies in te samel.

            ‘n Paar maande na hul 50e troudag is Harry se vrou op 1 Mei 1948 Huis toe. Hy het as pastoor bedank en afgetree.

Op 9 Oktoberber 1949 trou hy met Annie Turner Hightower. Hy had swak sig, Na ‘n operasie wat sy sig herstel het, het hy op November 2, 1950 na Nieu-Seeland vertrek waar hy weer saam met die Plymouth Brethren gewerk het. Hy is egter met sy hand aan die spreekwoordelike ploeg op 17 Januarie 1952 Huis toe.

            Harry het nooit formele opleiding gehad nie. Hy had ‘n ontsettend verstandelike vermoë met sy fotografiese brein en ‘n onuitputlike liefde vir verlore siele.

            Hy was een van die grootste Christen veelskrywers van die 20e eeu. Meer as ‘n 100 van sy werke is gepubliseer. Sommige daarvan word steeds gepubliseer.

            Hy het ook verskeie liedere geskryf, onder meer sy geliefde “Overshadowed”. Oor sy Bybelse kommentare, het ‘n gesoute redakteur geskryf: “Dit het die toets van die tyd deurstaan.”

Ons hoef nie almal ‘n Ironside te wees nie, maar as Gelowiges is ons almal geroep om siele in te bring. – Wekroep

Die Bybel gee mens Krag

"Soek julle krag in die HERE en in Sy groot mag. Efes 6:10

            In die Tweede Wêreldoorlog het 'n jong soldaat in die loopgraaf, 'n Nuwe Testament gesit en lees. Sy kaptein kom op hom af. "Wat maak jy met daardie boek hier?" vra hy bars. "Dit sal jou 'n ouvrou maak!"

Die soldaat kom flink op aandag. "Ek is bang, Kaptein," antwoord hy eerlik. "Dis al manier hoe ek dapper kan wees. Hierdie boek gee my moed. Dit neem die vrees vir die dood weg."

Terwyl hy praat, bars 'n bom naby hulle. Een van die kartetse verbrysel sy kop.

            Die offisier het die Bybeltjie eerbiedig opgetel en in sy sak gesteek. Hy het dit self begin lees. Dit het 'n groot invloed op hom gehad. Hy het moed geskep en die lewe het vir hom weer sin gemaak. Hy het gesorg elkeen van die manskappe onder sy bevel kry 'n Nuwe Testament.

            Die lees van die Bybel maak 'n mens nie week nie, maar sterk. Vir baie mense het die lees van die Bybel in tye van groot behoefte en neerslagtigheid, nuwe hoop en moed in hul hart ontsteek. Bybellees is nie 'n godsdienstige plig nie. Dit is 'n groot voorreg.

Dit bring lig en geloof in die siel. Dit stil die sielehonger. Verwaarlosing van die Bybel is die grootste onreg wat 'n mens homself kan aandoen. Hy ontsê homself 'n bron van krag en vreugde. Hy ontsê homself die voorreg om na God te luister.

            Bybellees bring ons hart met God se hart in aanraking, want dit is Sy Lewende Woord. Hy praat innig met ons. Die Heilige Gees gebruik God se Woord om die Here Jesus aan ons bekend te maak. Deur ons kennis van Christus en vertroue in Hom, vind ons vergifnis en vrede en gaan al die rykdomme van die hemel vir ons oop.

            Vir meer inligting oor die Bybel: http://www.thesower.org.za/ -- Wekroep

Jy moet jou gawes aanwakker

Om hierdie rede herinner ek jou daaraan om die genadegawe van God aan te wakker wat in jou is deur die oplegging van my hande.
1 Tim 1:6

            Soms ontvang Gelowiges gawes direk van die HERE af, ander kere deur handoplegging. Hoe egter, sal mens weet of jy ‘n gawe of gawes het? Deur dit aan te wakker... Deur te begin om dit te beoefen.

            Wanneer dit deur handoplegging op jou afgebid is, aanvaar dat jy dit ontvang het en beoefen dit.

            Gawes kom uit die Hemel en kan nie deur studies verkry word nie. God gee dit en Hy wil dit gee want ons moet dit gebruik om die Evangelie te verkondig.

            Niemand anders kan jou gawe aktiveer nie, net jy kan.

Moenie die gawes van ander na-aap nie. Jy moet jou eie gawes aanwakker.

Sommige is jaloers op ander se gawes. Dis ‘n ernstige fout.  Gawes word vir jou gegee om die Hemel te bevolk, om die getal mee vol te maak.

            Die bekende Louis Armstrong, so word vertel, wou na ‘n musiekskool toe gaan. Hy was getoets en toe meegedeel dat hy dit nooit sal maak nie. Hy het gehuil van teleurstelling. Agterna het hy aan sy vriende gesê: “Ek weet daar is musiek in my. Hy het hard begin oefen, die bietjie wat hy had aangewakker en uiteindelik een van die wêreld se voorste jazz musikante geword.

Alhoewel ons almal as uniek gebore word, is daar sommige van ons wat ander wil naboots. Hulle beland in die groot uitdagende rot resies. As jy uiteindelik wen is jy maar net die hoof rot.

Met die gawes is jy in geen kompetisie nie. Jy wedywer teen niemand nie. Jy is in diens van die HERE en om die Hemel se ontwil.

            Gawes is nie daar om verdeeldheid (1 Kor 12:25) te saai nie, maar juis om mekaar te bedien.

            Due gawes is ook deel van ons erfporsie en speel ‘n belangrike rol in die uitdra van die Evangelie en die ophou van die Gelowiges.

            “En God het sommige in die gemeente gestel: in die eerste plek apostels, ten tweede profete, ten derde leraars, daarna kragte, daarna genadegawes van gesondmaking, helpers, regeringe, allerhande tale.” 1 Kor 12:28

            “Daar is wel verskeidenheid van genadegawes, maar dit is dieselfde Gees; en daar is verskeidenheid van bedieninge, en tog is dit dieselfde HERE; en daar is verskeidenheid van werkinge, en tog is dit dieselfde God wat alles in almal werk.

            “Maar (let op) aan elkeen word die openbaring van die Gees gegee met die oog op wat nuttig is.

            “Want aan die een word deur die Gees 'n woord van wysheid gegee, en aan die ander 'n woord van kennis vanweë dieselfde Gees; aan 'n ander weer geloof deur dieselfde Gees, en aan 'n ander genadegawes van gesondmaking deur dieselfde Gees; aan 'n ander werkinge van kragte, aan 'n ander profesie, aan 'n ander onderskeiding van die geeste, aan 'n ander allerhande tale, aan 'n ander uitleg van tale.

            “Maar al hierdie dinge werk een en dieselfde Gees wat aan elkeen afsonderlik uitdeel soos Hy wil.” 1 Kor 12:4-11

            Ons weet dat ons dit ontvang het, deur dit te begin uitleef, dit aan te wakker. Soos wat ons dit doen word dit meer. So ook jou Hemelse taal gawe. Hoe meer jy daarin bid hoe meer brei dit uit. – Wekroep