Jesus Christus sê: ‘Ek noem julle vriende’

“Ek noem julle nie meer ondergeskiktes nie … nee, Ek noem julle vriende … “  Joh. 15:15.

Iemand sê nou anderdag: “Ek het nie meer vriende nie want mens kan niemand vandag vertrou nie.” Hy voeg by: “Weet jy, dis so erg dat ek nie eers myself kan vertrou nie.”
Die HERE praat met ‘n mens op vele maniere. Een daarvan is tog deur menslike vriendskap.
GOD bring mense bymekaar, laat word hulle vriende, op so ‘n wyse, dat die vriendskap kragtig werk om ons te red van die verwarring en ellende waarin ons onsself van tyd tot tyd bevind en ons te bou tot rotspilare in Sy Koninkryk, ook onder ons volk.
            Aristoteles wat 300 voor Christus gelewe het, word nie eintlik as ‘n Christen-filosoof beskou nie, maar sy drie elemente oor vriendskap straal die mooi gesindheid van Christus uit.
            Eerstens het hy gesê, vriende is mense wie se geselskap ons geniet. Een van die dinge wat ‘n ware vriendskap tot gevolg het  is om mekaar te laat glimlag wanneer hulle van mekaar hoor of mekaar besoek bring.
            Die ervaring tussen ware getroue vriende is altyd vrolik. Hulle kan die verskrikking van die lewe vir mekaar verander in geleenthede van soveel opregte erns, maar ook uitbundige vrolikheid.
            Die Prediker sê in die Boek van die Wyse: “’n Getroue vriend is ‘n sterk vesting. Hy wat so ‘n vriend gevind het, het ‘n skat gevind.”
            Die dissipels kon sekerlik dieselfde van die HERE Jesus Christus sê: Of hy nou iets met hulle gedeel het, saam langs die See van Galilea gaan stap het, gelag het by ‘n eetmaal, wyn geskink het by ‘n bruilof, gehuil het by ‘n vriend se graf, selfs wanneer Hy hulle vermaan het – sy blote teenwoordigheid kon die gewone teleurstellings en die bitter van die lewe transformeer na ware lewenskrag, oomblikke van bruisende varsheid, nuwe insig, nuwe visie en ook nuwe insig oor die werklikheid van die Ewige Lewe.
            Soms wil mens net by daardie iemand besonders wees. Nie by enigiemand nie, daardie besonderse vriend wat jy weet wat nooit uitpraat nie omdat hy of sy lojaal aan jou is, graag wil luister wanneer jy praat. Al klink jou gepraat soms ook na die versinsels van verdwaalde gedagtes.
            So is GOD ook ons Vriend. Soms wil ons net alleen in ons binnekamer, in die woud, langs die strand, iewers, alleen met Hom wees. Daar is sake wat jy op Sy uitnodiging eenvoudig moet uitpraat.
            Tweedens het Aristoteles gesê: Vriende is mense wat mekaar help. Paulus beklemtoon  dit in ‘n brief aan die Korinthe:  In elke  moeilikheid  bemoedig Hy ons. Daarom kan ons ook ander  bemoedig  wat in allerlei  moeilikhede verkeer. Ons kan hulle  bemoedig met dieselfde  bemoediging waarmee GOD ons bemoedig. (2 Kor. 1-4)
            Soms gaan mens deur ‘n dal van doodskaduwee. Ons weet GOD is steeds by ons. Die volgende oomblik stuur Hy ‘n vriend om ons te help. Inderdaad is dit GOD wat help. Hy gebruik die vriend.
Alhoewel ons altyd baie dankbaar is vir die vriend, moet ons onthou dat onse GOD ‘n jaloerse GOD is en dat Hy AL die eer wil hê.
            Derdens het Aristoteles gesê: Vriende is mense met wie ons ‘n visie deel, soos ‘n Dawid en ‘n Jonathan, een van hart en siel. (1 Sam. 18:1-5)
            Ons is nou omring deur moeilikhede en gevare. Nou stry ons saam vir dit wat die hoogste waarde het. Geen omstandigheid kan vriende se dunk van mekaar verander nie.
            Kyk weer na Joh. 15:15: Ek  noem  julle  nie meer  ondergeskiktes nie, want ‘n ondergeskikte  weet nie  wat sy  heer doen nie. Nee, Ek  noem  julle vriende, omdat Ek  alles wat  Ek  van  my Vader  gehoor  het, met  julle  gedeel  het.”
            Vriende se lewens verskil in baie opsigte. Dit word respekteer. Maar ware vriende word saamgebind deur die visie van GOD se heerskappy, GOD se geregtigheid, GOD se vrede, GOD se Koninkryk, GOD se wil vir ons VOLK en ons toekoms, en geen omstandighede van tyd of afstand kan vriende skei van die gemeenskaplike visie wat ons in Christus Jesus deel nie!
            En wat sal die mense eendag van vriende sê? ‘n Prediker sê een keer tydens ‘n begrafnisdiens: Die oorledene was ‘n wonderlike vader, ‘n liefdevolle eggenoot, ‘n reuse bate vir die samelewing…
            Toe stamp die ma aan haar seun en sê: Gaan kyk vir my in die kis en maak seker dis jou pa van wie hy praat.
            Maar, oor ware vriende sal die mense praat soos vandag oor Dawid en Jonathan.
            Jesus noem ons ook Sy Volk, Sy eiendom, Erfgename. Sy medewerkers. Ons het die geloof van 'n mosterdsaadjie  –  ons (moet) groei tot 'n reuse Geloofsboom !
            Oor ons visie vir Sy Volk se herlewing en verlossing het ons Sy belofte in Jeremia 32: 27: Kyk, Ek is die HERE, die GOD van alle vlees;  sou enige ding vir My té wonderbaar wees?
            Die HERE behartig die regsaak van Sy volk; Hy ontferm hom oor sy dienaars. Ps. 135:14 (...maar dien die volk Hom?)
            “Die HERE is naby almal wat Hom aanroep, almal wat Hom aanroep in waarheid. Hy vervul die wens van die wat Hom vrees, en Hy hoor hul hulpgeroep en verlos hulle.” Ps 145 18-19

Luister eers na die oorsprong van “Wat ‘n Vriend het ons in jesus”
https://www.youtube.com/watch?v=tKjUoE2fack

Die grand finale…

Maar iemand wat vir sy eie mense, en veral sy huisgenote, nie sorg nie, het die geloof verloën en is slegter as 'n ongelowige. 1 Tim 5:8

Laat ons dan, terwyl ons geleentheid het, aan almal goed doen, maar die meeste aan die huisgenote van die geloof. Gal 6:10

Joël het voorspel dat die koms van die Heilige Gees die geestelike bemagtiging van ou mans, hulle seuns en kleinkinders sal insluit. Joël 2:28

Maleági profiteer dat in die laaste dae die gees van Elia vaardig sal raak en die die hart van die vaders sal terugbring tot die kinders, en die hart van die kinders tot hulle vaders. (Maar let op)
            Maleági het ook gewaarsku dat as die beloofde uitstorting van die “Gees van Elia” nie toegelaat word om families te versoen nie, daar bittere gevolge sou wees – vir die hele land Mal 4:15!

“Wees nie bevrees nie, o aarde, juig en wees bly, want die HERE doen groot dinge!”
            Hier word verwys na die HERE God Jaweh. Hy is vandag presies dieselfde as deur die eeue.
            So bv. vind ons een van die grootste matesis-wonderwerke in die wêreld by Moses en die Israeliete in die woestyn.
              Ons beleef  die verskil tussen vlees en gees, tussen geloof en ongeloof.
  Sowat 3,5 miljoen mense moes 40 jaar lank in ‘n woestyn versorg word.  Volgens ‘n militêre strateeg sou Moses, as hy nie in die geloof gewandel het nie,  moes sorg vir:
•          1 500 ton voedsel per dag
•          Twee goedere treine van 1,6km in lengte sou die kos moes aanry
•          4 000 ton brandhout per dag sou nodig wees om kos te kook
•          Verskeie  goedere treine van 8km in lengte sou die hout moes aanry
•          Hulle sou 20 miljoen liter water per dag benodig het want daar was geen mere of riviere in die woestyn nie
•          ‘n Trein met tenkwaens van 18.8km in lengte sou die water moes aanry
•          As hulle dubbel-gelid deur die Rooi See sou beweeg, sou die tou 1 280km lank gewees het.
•          Die tog deur die Rooi See sou 35 dae en nagte geduur het
•          Daar moes dus ‘n breë opening van sowat 4.8km gewees het sodat die Israeliete 5 000 in gelid in een nag kon deur beweeg
•          Elke keer wat hulle gekamp het, het die kamp ‘n area van 1 200 vk  km beslaan, ‘n area van 48km in die lengte en 40km wyd.

Hierdie lysie sou vir elke dag oor ‘n tydperk van 40 jaar moes gegeld het.
Dink jy Moses het aan al hierdie dinge gedink voordat hy vertrek het?  Sekerlik nie.
Hulle het ook geen materiaal gehad om sandale en klere van te maak nie. Hulle sandale en klere het 40 jaar lank gehou.
Die groter wonderwerk is dat die kinders se sandale saam met hulle voete groter geword het.
Moses het God geglo. Hy het geweet God sal na al hierdie dinge omsien.
              Die verskil tussen om in die vlees en in die gees te wandel, is enorm en onvergelykbaar, soos toe die vissies en broodjies aan 5 000 man en hulle vroue en kinders uitgedeel was.
Dit verbyster mens se verstand, maar om die dinge van God te verstaan skakel mens juis jou verstand af.
             Ons het presies dieselfde God vandag as wat die Israeliete destyds gehad het. God het nie verander nie en sal nooit verander nie.
             Ons probleme lyk vir ons soms so oneindig groot, maar dink dan daaraan wat God kan doen!
         
Skep moed, ons het dieselfde God.
              Ons moenie God by ons planne en strategieë inskakel nie.  Kom ons skakel by Sy plan in want dan onderneem Hy in alles.
            As daar negatiewe dinge is wat jou lewe beinvloed, dink net daaraan dat daar ‘n Judas nodig om Christus aan die kruis te laat sterf.
            En nou is ons aan die einde van die tyd… en kyk wat God beloof gaan nou gebeur:
              Die pad vorentoe is een van geloof, waarheid en gees!

“Wees nie bevrees nie, diere van die veld, want die weivelde van die woestyn spruit uit, want die bome dra hulle vrugte, die vyeboom en die wingerdstok lewer hulle drag!
            “En julle, kinders van Sion, juig en wees bly in die HERE julle God, want Hy gee julle die leraar tot geregtigheid en laat op julle neerdaal die reën, die vroeë reëns en die laat reëns, soos voorheen.

“Dan sal die dorsvloere vol koring wees en die parskuipe van mos en olie oorloop.
            “En Ek sal julle vergoed die jare wat die treksprinkaan, die voetganger, die kaalvreter en die afknyper verslind het – my groot leërmag wat Ek teen julle gestuur het.
            “Dan sal julle oorvloedig eet en versadig wees en die Naam van die HERE julle God prys wat wonderbaar met julle gehandel het, en my volk sal in ewigheid nie beskaamd staan nie.
            “En julle sal weet dat Ek in die midde van Israel is, en dat Ek die HERE julle God is, en niemand anders nie; en my volk sal in ewigheid nie beskaamd staan nie.
            “En daarna sal Ek my Gees uitgiet op alle vlees, en julle seuns en julle dogters sal profeteer, julle ou mense drome droom, julle jongelinge gesigte sien.
            “En ook op die diensknegte en op die diensmaagde sal Ek in dié dae my Gees uitgiet.
            Dan die transformasie: “En Ek sal wondertekens gee aan die hemel en op die aarde: bloed en vuur en rookpilare.
            “Die son sal verander word in duisternis en die maan in bloed, voordat die groot en deurlugtige dag van die HERE kom.
            “En elkeen wat die Naam van die HERE aanroep, sal gered word; want op die berg Sion en in Jerusalem sal daar ontkoming wees soos die HERE gesê het, en onder die vrygeraaktes die wat die HERE sal roep.” Joël 2:21-32

Hou jou lamp heeltyd brandend

Dis bykans 2000 jaar. Die grootste wonder in hierdie tyd is dat die Gelowige nooit moed verloor het nie. Die hoop op die Wederkoms het nooit gewankel nie… hoop, nie soos in “ek wens nie,” maar soos in “toekomsfeit”.
            Gelowiges weet dat hulle weet, Jesus sal Sy belofte van Weerkom nakom. Dag en nag is die Gelowiges, die Wedergeborenes wagtend.
            Weens sekere tekens wat deur Jesus en Johannes aangedui is, weet mens die Koms van Christus Jesus is voor die deur.
            Solank as wat die Heilige Gees in die Gelowige se gees inwoon sal die Gelowiges se gees aanhou verlang na Jesus se terugkoms. Almal glo onwrikbaar dat die hoop van 2 000 jaar nie verlore sal gaan nie, maar binnekort in vervulling sal gaan.
            Maar daar is ‘n getal wat volgemaak moet word en die tyd is min.
            Daar is ‘n lied “Let the Lower Lights be Burning”. Die lied is geskryf as gevolg van ‘n seeramp.
            Die bekende DL Moody het in een van sy preke in Amerika na die seeramp verwys…
            Dit was stormagtige nag. Daar was nie eers ‘n ster sigbaar nie. ‘n Skip was op pad na die hawe van Cleveland. Die enigste sigbare lig was die dan en wan in die storm en reën van die lighuis.
Die bevelvoerder van die skip het aan die loods gevra: “Is jy doodseker dit is Cleveland se hawe?”
            Al die ligte van die hawe was dood. Die gesprek vind plaas terwyl die skip erg deur die reuse golwe rondgeslinger word en golwe oor die skip breek.
            Die loods het geantwoord dat hy 100% oortuig is.
            Die bevelvoerder vra: “Maar waar is die ligte wat laag moet brand?”
            Die loods: “Daar is niks kaptein, alles is dood.”
            Bevelvoerder: “Sal jy dan die hawe kan haal?”
            Loods: “Ons moet net, anders sterf ons almal.”
            Die loods, ‘n ou ervare skipper, het dapper probeer, maar helaas, hy het die hawe se ingang misgevaar en die skip is op die rotse flenters geslaan. Baie het gesterf.
            Moody het die gehoor versoek: Broeders, die Meester sal beheer van die lighuis neem, kom dat ons die ligte wat laag moet brand, brandend hou.
            Philip P. Bliss het toe hierdie pragtige lied geskryf:

Brightly beams our Father’s mercy,
From His lighthouse evermore,
But to us He gives the keeping
Of the lights along the shore.

Refrain:
Let the lower lights be burning!
Send a gleam across the wave!
Some poor *struggling, fainting seaman
You may rescue, you may save.

Dark the night of sin has settled,
Loud the angry billows roar;
Eager eyes are watching, longing,
For the lights along the shore.

Trim your feeble lamp, my brother;
Some poor sailor, tempest-tossed,
Trying now to make the harbour,
In the darkness may be lost.
https://www.youtube.com/watch?v=_jq9sYx2mVI

Deur die jare het skrywer aan drie soektogte na drenkeling deelgeneem na ‘n seeramp. Toe was ons baie mense met lampe en sterk flitse soekende deur die nag in die deining en die branders na drenkelinge. Die ligte langs die strand help ook die drenkelinge rigting kry.
Nou stap ek sedert my Wedergeboorte langs die lewensstrand met my lamp en soek haar en ander in die deining…. (Die baba meisie wat die ysige nag van 20/21 Junie 1964 in Port Elizabeth tussen struike gevind is en ‘n paar dae later aangeneem is).
            Dis al by skrywer ingeburger om siele langs die lewensstrand te help red.
            As jy vandag hier lees, verwag die HERE presies dieselfde ook van jou. Jou lamp is jou getuienis. Hou dit altyd brandend!

Gee Julle (ek en jy) vir Hulle iets om te eet

Oorsese vistermanne (predikers en evangeliste) word ten duurste na Suid-Afrika gebring in die hoop op Herlewing. Dis die verkeerde vistermanne. Die ware vistermanne is ek en jy.
            Ons (ek en jy), is verder onder verpligting want, die Vader sê in Eseg 3:18: “As Ek aan die godlose sê: Jy sal sekerlik sterwe en jy – kind van die Vader – waarsku nie die godlose nie, en spreek nie om die  godlose vir sy godlose weg te waarsku nie,  dan sal die godlose deur sy  ongeregtigheid sterwe, maar…… sy bloed sal van jou hand geëis word.” Hoe verskriklik tog!
            Maar God is regverdig en Hy voeg by: “Maar… as jy die godlose waarsku, en hy hom nie van sy godlose weg bekeer nie, dan sal hy deur sy ongeregtigheid sterwe, maar jy het jou  siel gered.”
Dis hoe regverdig die Vader is!
Dit is of eenkant toe of anderkant toe. Die Bybel maak geen plek vir kompromieë nie. Vir huigelaars en geveinsdes is daar nie plek in hierdie arena nie.
In Luk 9:10-17, lees ons dat Jesus Christus na ‘n verlate  plek sou gaan sodat daar ‘n keer gerus kon word. ‘n Skare mense vind egter daarvan uit en sorg dat hulle Jesus en die dissipels inwag.
            Ai, en met  deernis kry Hy die skare jammer en Hy ontvang hulle, Hy verkondig die Koninkryk van die Vader aan hulle en Hy maak die siekes gesond.
            Skielik  gebeur die  totaal onverwagte. Jesus  kom agter dat die skare honger is en hy gee opdrag aan die dissipels: “Gee julle vir hulle iets om te eet!”
            Die verskoning was byderhand: “Maar ons het nie meer as twee brode en vyf vissies nie.”
Hulle regverdig hul saak verder deur by te voeg: “Tensy ons vir hulle iets gaan koop.”
Dit sê hulle, welwetende dit sou ‘n nog groter onmoontlikheid gewees het om kos vir sowat tien duisend mense te gaan koop het.
Maar, terwyl die dissipels op die menslike vlak beweeg, beweeg Jesus op die geestelike vlak: Opdrag word gegee dat die mense almal ordelik in groepe sal sit, dat daar administrasie en dissipline sal wees, dat ‘n werksprogram saamgestel word en dat daar eendragtigheid en spanwerk sal wees.
Die seën word uitgespreek en 12-man voed vyf duisend mans, hul vroue en kinders. Na raming is minstens tien duisend mense is gevoed.
Maar, as die12 dissipels net daar in ongeloof bly staan het en gesê het: “Maar dis tog onmoontlik, ons voel soos arme drommels, hoe op aarde kan ons hierdie massa mense met hierdie paar broodjies en vissies voed?”
Waarom het hulle dan positief gereageer en wel die kos begin uitdeel? Eenvoudig. Hulle het hulle fout besef en van die menslike vlak na die geestelike vlak beweeg.
Dit is ook ons probleem. Ons verstand is in die pad. Ons probeer die geestelike dinge met ons verstand beredeneer, en dis  onmoontlik. Die verhaal leer ons juis dat met die min waaroor ons dalk beskik, ons ook menigtes kan voed. Is dit nie wonderlik nie!
            Die dissipels het die eerste treë gestap na die eerste ry mense. Dit was ‘n stap in die geloof.
Toe hulle afbuig om die eerstes te begin bedien, het die Almagtige Vader se Almag en wonderbare vermenigvuldende krag in werking getree. En almal is gevoed. En boonop het 12 mandjies brokstukke oorgebly.
Nou is die opdrag ook aan ons: “Gee julle vir hulle iets om te eet!”
Dis nie ‘n versoek nie. Dis ‘n opdrag.
En ons moet dit noodwendig uitvoer!
In die verlede  het ons telkens die net aan die verkeerde kant van die skuit uitgegooi. Ons het besef die massas is honger, en dan het ons iets vir hulle gaan koop. Ons het spesiale dienste gereël en evangeliste ingevoer. Ons was bereid om geld te gee solank ons net nie self  betrokke hoef te raak nie.
Die Vader veroordeel ons nie hieroor nie. Al wat  Hy sê is, hy hou by Sy oorspronklike opdrag: “Gee  JULLE vir hulle iets om te eet!”
In Matt. 6:25 - 34, sê die Vader: “Daarom sê ek vir julle: Moenie julle kwel; oor julle lewe – wat julle sal eet of wat julle sal drink nie. Is die lewe  nie meer as voedsel en die liggaam meer as klere nie?
“Kyk na die voëls van die Hemel; hulle saai nie en hulle maai nie en hulle bring nie bymekaar in skure nie, en tog voed hul Hemelse Vader hulle. Is julle nie baie meer werd nie? Wie tog onder julle kan, deur hom te kwel, een el by sy lengte voeg?
            “En wat kwel julle jul oor klere? Let op die lelies van die veld, hoe hulle groei. Hulle arbeid nie en hulle spin nie. Ek sê vir julle dat selfs Salomo in al sy heerlikheid nie bekleed was soos een van hulle nie.
“As die Vader die gras van die veld, wat vandag daar is en more in ‘n oond gegooi word, so beklee, hoeveel te meer vir julle kleingelowiges?
“Daarom moet julle jul nie kwel nie en sê: Wat sal ons eet, of wat sal ons drink of wat sal ons aantrek nie?
“Want …na al hierdie dinge soek die heidene, want … julle Hemelse Vader wéét, dat julle hierdie dinge nodig het.
“Maar, soek eers die Koninkryk van God die Vader en Sy geregtigheid, en, al hierdie dinge sal vir julle gegee word.
“Kwel  julle dus nie  oor more nie, want more  sal hom oor sy eie dinge kwel. Elke dag het genoeg van sy eie kwaad.”
Hierdie paar Skrifte is tog nie ydele woorde nie!
Ons is oneerlik. Ons sê ons is Christene, kinders van die Vader, maar ons vertrou Hom nie. Ons glo Hom nie. Ons neem Hom nie op Sy Woord nie. Maar ons verwag dat Hy gedurigdeur vir ons moet instaan, mens wil byna sê: regstaan.
            En net daar mis ons weer die doel want Jesus sê self: “As julle My voor die mense bely, (eers) dan sal Ek julle by My Vader bely.” Skitterend!
            Die Bybel leer verder dat ons alleen kan ontvang wanneer ons gee. Dit is ook die  ongeskrewe  wet van ons dag, ons kan niks bekom sonder dat ons gee nie.
Daarom, kom ons, ek en jy, gee vir hulle iets om te eet, en die Vader sê, Hy sal in alles vir ons voorsien. En, Hy sal nie net in ons behoeftes voorsien nie, hy gee
inderdaad aan ons in oorvloed!
            Die Vader gee altyd in oorvloed. Die bloed wat  aan die Kruis gestort was, is meer as genoeg om die hele mensdom te red.
            Wanneer ons na bv. voortplantingsaad by mens, dier, vis, planteryk en voël kyk, dan vind ons daar is miljoene meer saad as wat nodig is vir voortplanting.
            In ons eie liggaam het ons ook ‘n oorvloed aan bloed. Dit is waarom ons so maklik bloed kan skenk.
            Ons kan onsself nooit dood werk nie, daarvoor het ons meer as genoeg reserwekrag.
            Die Vader gee aan ons alles en baie, baie meer, solank ons die opdrag uitvoer: “Gee julle vir hulle iets om te eet!”
            Ons hoef nie belydenis te doen en te sê Vader ek is jammer ek staan hier met ‘n leë mandjie nie. Die Vader veroordeel ons ook nie. Al wat Hy by herhaling sê, is: “Gee julle vir hulle iets om te eet.”
            Maak so: “Gee vir hulle iets om te eet!” Jou bietjie wat jy gee sal deur God se Almag vermenigvuldig word.

Word toornig en gryp jou sweep

Die HERE wil vir jou skoon klere aantrek

Nuwejaarsvoornemens werk nooit. Dis ‘n illusie. Dit vergroot net die binding in jou gees. Wat nodig is, is ‘n nuwe lewe deur Wedergeboorte.
            En as jy Wedergebore is, dan is restourasie sonder enige voorhehoud, die oplossing.
            “En Hy het in die tempel gevind die wat beeste en skape en duiwe verkoop, en die geldwisselaars wat daar sit.
En Hy het 'n sweep van toutjies gemaak en almal uit die tempel uitgedrywe, ook die skape en die beeste, en die kleingeld van die wisselaars het Hy uitgegooi en hulle tafels omgekeer.
En vir die duiweverkopers het Hy gesê: Neem daardie dinge hier weg; moenie die huis van my Vader 'n handelshuis maak nie.” Joh 2:14-16
Het jy al gedink wat dit van Jesus moes geverg het om hierdie dinge te kon doen. Maskas, dit was erg, baie erg. Hy was bloedig kwaad.
            Hierdie gebeurtenis was voordat Golgota plaasgevind het.
            Hierdie was die vyeboom wat geen vrug gedra het nie, maar mense wat meer belang gestel het om geld te maak binne die Tempel uit diegene wat hul sondes wou bely het deur middel van offerhande. Dra jy vrug? Dink jy die HERE is gelukkig met die vrug wat jy dra?
            Na Golgota verander alles: “Julle is egter nie in die vlees nie, maar in die Gees, as naamlik die Gees van God in julle woon. Maar as iemand die Gees van Christus nie het nie, dié behoort nie aan Hom nie.
Maar as Christus in julle is, dan is die liggaam dood vanweë die sonde, maar die gees is lewe vanweë die geregtigheid.
En as die Gees van Hom wat Jesus uit die dode opgewek het, in julle woon, dan sal Hy wat Christus uit die dode opgewek het, ook julle sterflike liggame lewend maak deur sy Gees wat in julle woon.
Daarom dan, broeders, is ons skuldenaars, nie aan die vlees om na die vlees te lewe nie; want as julle na die vlees lewe, sal julle sterwe, maar as julle deur die Gees die werke van die liggaam doodmaak, sal julle lewe.
Want almal wat deur die Gees van God gelei word, dié is kinders van God.” Rom 8:9-14
Met die Wedergeboorte vind twee dinge plaas: Jou siel word gered van die ewige verderf, tesame met bekering. Jy bekeer jou van jou verkeerde weë. Daarna beleef ons voortgesette bekering of wat ook genoem word, die groei in heiligmaking. Dit vind plaas soos wat jy deur die Woord gewas word.
Daar is baie goed wat mens moet aflê.
            “Maar nou moet julle ook dit alles aflê, naamlik toorn, woede, boosheid, laster, skandelike taal uit julle mond.
“Lieg nie vir mekaar nie, omdat julle die oue mens met sy werke afgelê het en julle jul met die nuwe mens beklee het wat vernuwe word tot kennis na die beeld van sy Skepper,  waar daar nie Griek en Jood, besnedene en onbesnedene, barbaar, Skith, slaaf, vryman is nie, maar (let op) Christus is alles en in almal.
“Beklee (dis ‘n proses) julle dan, as uitverkorenes van God, heiliges en geliefdes, met innerlike ontferming, goedertierenheid, nederigheid, sagmoedigheid, lankmoedigheid.
“Verdra mekaar en vergewe mekaar as die een teen die ander 'n klag het; soos Christus julle vergeef het, so moet julle ook doen.
En beklee julle bo dit alles met die liefde wat die band van die volmaaktheid is.
En laat die vrede van God, waartoe julle ook in een liggaam geroep is, in julle harte heers, en wees dankbaar.
Laat die woord van Christus ryklik in julle woon in alle wysheid. Leer en vermaan mekaar met psalms en lofsange en geestelike liedere, en sing in julle hart met dankbaarheid tot eer van die Here.
En wat julle ook al doen in woord of in daad, doen alles in die Naam van die HERE Jesus en dank God die Vader deur Hom.” Kol 3:8-17
Maak jou eie lysie of voeg by, dinge soos bv. Ek moenie van my tiende steel nie, ek beroof God, ens., ens.
            As jy 2017 reg wil begin, word toornig op al die verkeerde dinge in jou lewe. Smyt alles wat verkeerd is uit jou tempelwoning uit. Jy sal nie in ‘n vuil woning bly nie en nog minder wil Jesus in ‘n vuil woning bly. Jy is sekerlik al moeg om deur verkeerde of negatiewe goed getorment te word.
            Die by kry sy heuning vanuit die skoonheid van blomme om die edelste produk op aarde te skep. Bye haal nie hulle voorraad vanuit die afval wat vlieeë by rondswerf nie. Is daar iets reiner as nektar?
            En ek en jy, waar haal ons, ons voorraad vandaan: Uit die koerante, ander mense se meninge, filosofie, politieke korrektheid, smerige grappe, vuil flieke, die Internet, sosiale media… die lysie kan nog al ontstellend wees.
            Smyt alle afgodsgoedre uit ons huise en tuine. Kap stukkend, verbrand, smyt weg. Maak skoon!
            Ons moet ons voorraad uit die Skrifte haal, die Almagtige God se Woord. Daar gebeur niks op hierdie aarde wat nie reeds geskrywe is nie. Ons God is alwetend.
            Neem jou sweep en beweeg deur jou tempelwoning en maak skoon. Smyt alles uit jou temperwoning uit. Restoureer.
            As jou oorgewig bv. in jou pad na heiligmaking staan, gryp jou sweep. Word roekeloos van toorn. Slaan die wit brood, die suiker, die gemorskos, die gaskoeldranke en wat ook al van die rakke en van die tafels af, uit by die deur.
            Begin reg eet, oefen en bedink die Woord terwyl jy dit doen.
            Ons moet niks in ons pad laat staan om ons lewe rein voor God te kry nie, juis omdat ons gereed maak vir sy Koms!
            Bestudeer die Woord. Ek en jy is die sout van die aarde. Sout wat laf geword het, beteken niks. Om sout sy ware werk te laat doen moet dit oral deeglik eweredig gesprinkel word.
            “Hy wat sy oortredinge bedek, sal nie voorspoedig wees nie; maar hy wat dit bely en laat staan, sal barmhartigheid vind.Spr 28:13
            En jy gevallene, staan op, GOD wag vir jou!
            Hy sê vir jou soos Hy ook vir Josua in Sag. 3: 1,3,4 gesê het: “Ek wil jou oortredinge vergewe en Ek gaan vir jou skoon klere aantrek!

Die Merk van die HERE

2017 kan ‘n besondere geseënde en voorspoedige jaar wees. Daar is iets wat elkeen van ons moet doen, om dit te verwesenlik.
“Elkeen dan wat My sal bely voor die mense, hom sal Ek ook bely voor my Vader wat in die Hemele is.” Matt 10:32
In Openb 13:16-18 lees ons van die Merk van die Dier. Dis ‘n werlikheid soos wat ons ID-nommers vandag is. Sonder ‘n ID-nommer kan ons ook nie handel dryf nie, kan mens nie eers ‘n pakkie by die poskantoor afhaal nie.
            Openbaring vertel dat ons die Merk van die Dier sal moet ontvang (let op), op jou voorhoof en op jou hand. Nie die een of die ander nie, maar beide jou hand en jou voorhoof. Daarsonder sal jy onder meer nie kan handeldryf nie.
         


Om die ware betekenis hiervan te kan begryp gaan ons na Deut 6:4-8.

“Hoor, Israel, die HERE onse God is 'n enige HERE…

·        “Daarom moet jy die HERE jou God liefhê met jou hele hart en met jou hele siel en met al jou krag. (sien ook die Koninklike Wet Jak 2:8)       

·        “En hierdie woorde wat ek jou vandag bevel (let op), moet (1) in jou hart wees; en jy moet (2) dit jou kinders inskerp en (3)  daaroor spreek as jy in jou huis sit en (4)

·         as jy op pad is en (5) as jy gaan lê en as jy opstaan.

·        “Ook moet jy dit as 'n teken bind (let op) op jou hand, en dit moet as 'n voorhoofsband tussen jou oë wees.

·        “En jy moet dit (ook) op die deurposte van jou huis en op jou poorte skrywe.”

       
As ek en jy as Gelowiges hierdie vier strofes toepas dan hoef ons geen aandag te gee oor wat die Merk van die Dier is en hoe dit op mense se voorhoofde en op hulle hande aangebring gaan word nie. Dis nie vir ons nie, ons is reeds gemerk.


Dit word by die huise op Koffiefontein aangebring

            Die enigste aanbidding wat geld, is die aanbidding van die lewende God Jaweh. Ons sal nie die Merk van die Dier aanvaar nie, ons het reeds ons Merk aangebring:
“Ook moet jy dit as 'n teken bind op jou hand, en dit moet as 'n voorhoofsband tussen jou oë wees.”
            En ons gaan nou reeds verder: “En jy moet dit op die deurposte van jou huis en op jou poorte skrywe.”
            Ons bind ons een hand en voorkop met die teken in die Gees. (Ons kan dit ook letterlik beoefen deur vir ons smal leerbandjies aan te skaf waarop ons die Skrif aanbring en dit om ons een hand en oor ons voorkop te bind tydens ons oggend gebed.)


           
            Op Koffiefontein het ‘n Herlewing uitgebreek. Vier lidmate het toegeneem tot 259, met ‘n verdere 64 wat weens werksomstandighede na ander dele van die land moes uitwyk… die HERE se manier om die Herlewing te versprei. Dit alles oor ‘n tydperk van 2½ jaar!
            Die aanbiddingsplek is lank reeds te klein en ‘n nuwe word gebou.
            Uit die Herlewing het onder meer ‘n tabloid koerant ontstaan Revelation Times, wat reeds in 50 Vrystaatse dorpe versprei.
            Dis wat ons in 2017 landwyd gaan beleef. Strome van seën van Bowe… want dit het die Liefde beloof. Koffiefontein is maar die eerste druppels.          

  https://www.youtube.com/watch?v=CCoq4BY42OQ

            Op Fauresmith, die enigste dorp in Suid Afrika en een van slegs drie in die wêreld, waar die treinspoor in die middel van die hoofstraat loop, val die eerste druppels van die Herlewing ook reeds. En in jou kontrei? Laat weet ons asseblief.

            “Ek vermaan julle dan, broeders, by die ontferminge van God, dat julle jul liggame stel as 'n lewende, heilige en aan God welgevallige offer dit is julle redelike godsdiens. En word nie aan hierdie wêreld gelykvormig nie, maar word verander deur die vernuwing van julle gemoed, sodat julle kan beproef wat die goeie en welgevallige en volmaakte wil van God is. Rom 12:1-2

Vang hulle met lis omdat jy slim is. 2 Kor 12:16

                     
Waarde lê in die toekoms.

Om dit te kan verwesenlik vra van elkeen om mense van More te wees.
Wees versigtig hoe jy vandag leef. More het jy straks niks en oormore wag die Ewigheid.

Ons gedenk Jesus se geboortedag. Los die geskenke aan mekaar en bring vanjaar vir Jesus ‘n
geskenk… ten minste een nuwe Wedergebore siel. Ruk hulle uit die vuur uit. Juds 1:22-23.

Wanneer jy uiteet, vergeet van die 10% fooitjie, verdubbel die rekening en gee daarmee saam die
Evangelie van Liefde en Genade. Lei die kelner sommer net daar na die HERE toe.

Dit sal die grootste en mooiste Kersfees wees wat jy ooit beleef het.

Kersboodskap

Dis die Laaste Uur

Daar is haas nie meer tyd nie. Almal moet gereed maak vir Christus se Koms. Diegene wat gereed is, moet die ander waarsku.
            Daar is geen datum in die Bybel van wanneer Jesus Christus weer kom nie. Dit beteken egter nie dat daar nie wel ‘n datum is nie.
            Die HERE werk met datums, en tye en seisoene. Hy gee aan ons ‘n aanduiding van die tydvak wanneer Hy gaan kom:
“En Jesus antwoord en sê vir hulle: Pas op dat niemand julle mislei nie.
“Want baie sal onder my Naam kom en sê: Ek is die Christus! en hulle sal baie mense mislei.
“En julle sal hoor van oorloë en gerugte van oorloë. Pas op, moenie verskrik word nie, want alles moet plaasvind, maar dit is nog nie die einde nie.
“Want die een nasie sal teen die ander opstaan en die een koninkryk teen die ander; en daar sal hongersnode wees en pessiektes en aardbewings op verskillende plekke.
“Maar al hierdie dinge is 'n begin van die smarte.
“Dan sal hulle jul aan verdrukking oorgee en julle doodmaak; en julle sal deur al die nasies gehaat word ter wille van my Naam.
“En dan sal baie tot struikel gebring word en mekaar verraai en mekaar haat.
“En baie valse profete sal opstaan en baie mense mislei.
“En omdat die ongeregtigheid vermeerder word, sal die liefde van die meeste verkoel.
“Maar wie volhard tot die einde toe, hy sal gered word.” Matt 24:3-13
            Net in kort: Daar tans oorlog in 67 lande van die wêreld met 736 militante groepe wat daaraan deelneem, en dit neem toe.
            Van al die ander dinge wat Jesus na verwys lees ons elke dag in die media, aardbewings, vloedrampe, vuurspuwende berge, tekens in die lug, droogtes, hongersnood. Die lys is lank en die huidige statistiek daaroor, skrikwekkend.
·       Maar daar is ‘n ander teken wat oornag baie belangrik geword het:
            “Kinders, dit is die laaste uur; en soos julle gehoor het dat die Antichris kom, (let op) bestaan daar ook nou baie antichriste, waaruit ons weet dat dit die laaste uur is.” 1 Joh 2:18
            Jesus het ‘n tydvak aangedui, maar Johannes kom later en dui die Laaste Uur aan… die koms van die antichrist se gees, invloed en karaker.
            “En hy sal woorde spreek teen die Allerhoogste en die Heiliges van die Allerhoogste mishandel; en hy sal probeer om tye en wet te verander, en hulle sal in sy hand oorgegee word gedurende 'n tyd en tye en die helfte van 'n tyd.” Dan 7:25
            Die antichris is nog nie hier in persoon nie, want hy kom eers na die Wegraping, maar sy gesindheid, sy invloed en karakter word reeds beleef.
            Die koms van die Islamitiese Staat (ook bekend as ISIS) is deels die voorloper van die antichris.
            Christene word in die strate onthoof. Van Christene word vereis om Jesus Christus te verloën en wanneer hulle weier word hulle summier op wrede wyses vermoor. Die rede? Die antichris wil oorneem en is besig om dit te doen.
            Selfs kinders word so afgedreig en daar is getuienis en fotomateriaal beskikbaar wat toon hoe die kinders ook weier om Jesus te verloën en dan doodgemaak word.
            Oral oor die wêreld is teenstand aan die opbou teen Jesus Christus. Sy naam mag nie genoem word nie, want dit gee aanstoot aan ander gelowe.
            Op plekke word selfs suksesvol druk uitgeoefen dat wette verander word. Dis Christen-lande wat die handdoek ingooi.
            Die Bybel self moet weg en mag nie in die openbaar gelees word nie. Predikante word gemonitor sodat hulle politiek korrek moet preek. Sommige het al in die tronke beland oor hul uitsprake oor onheile.
            Die Christendom is in die pad en word doodgesmoor. Van Bybel lees en gebed by openbare byeenkomste, is daar skaars sprake van, want dit gee aanstoot.
            Ons is nou midde in die bekende Feestyd waar die geboorte van Jesus herdenk word. Geen Skrif oor Sy koms en geboorte mag aangehaal word nie. Geen Kersliedere mag gesing of gespeel word nie, geen versierings mag aangebring word nie.
            Selfs in Suid-Afrika is daar ‘n demper op die feesvieringe, maar nog nie so erg soos in ander lande van die wêreld nie.
            Daar is niks mee verkeerd om Jesus se geboorte te gedenk nie (maar weg met die kersvaders en kersbome. Dit was nooit deel van Sy geboorte nie).
            In die Midde Ooste en in Sjina word kruise by aanbiddingsplekke afgebreek en in sommige gevalle word die aanbiddingsplekke, selfs kerke, vernietig. Bomme word in kerke ingegooi terwyl Christene daar aanbid en almal sterf. Of selfmoord bomme word geb ruik.
            Sommige druk op dat die Bybel herskryf moet word en daar is gevalle waar die Bybel al herskryf is en van sy gees en waarheid ontneem is, selfs in SA.
            Met die droogte in SA uiter sogenaamde Christene erge uitsprake soos bv: “Watse God is dit dat wanneer mens vir reën bid dan stuur hy verwoestende haelstorms?”
            “Wat baat dit om ‘n biddag vir reën te hou en God reageer nie?” Sommige bid nie meer nie, lees nie meer Bybel nie en gaan selfs nie meer kerk toe nie.
            As mens die droogte as ‘n toetstydperk beskou, ‘n tyd om eksamen te skryf oor jou geestelike groei en verhouding met God, dan dop baie die toets.
            “En leer van die vyeboom hierdie gelykenis: Wanneer sy tak al sag word en sy blare uitbot, weet julle dat die somer naby is.
            “So weet julle ook, wanneer julle ál hierdie dinge sien, dat dit naby is, voor die deur.
            “Voorwaar Ek sê vir julle, hierdie geslag sal sekerlik nie verbygaan voordat al hierdie dinge gebeur het nie.” Matt 24:32-34
            Watter geslag word hier na verwys? Dis die geslag wat in die lewe was met die land van Israel se herstel en die terugkoms van die Jode. Die Jode kom deesdae byna weekliks terug na die Joodse staat.
            Die verstommende aspek is dat die vyeboom nie net bot nie, dit dra geruime tyd al vrugte. Daar is reeds 271 Messiaanse Joodse gemeentes in Jerusalem en omstreke. Ook wêreldwyd is Messiaanse gemeentes aan die toeneem soos wat die Jode die Messias Jesus Christus as Verlosser en Saligmaker aanneem.
            Luister hierna: “Die Here vertraag nie die belofte soos sommige dit vertraging ag nie, maar Hy is lankmoedig oor ons en wil nie hê dat sommige moet vergaan nie, maar dat almal tot bekering moet kom.” 2 Pet 3:9
            Mens kan vra: Moes die einde al gekom het, want hoekom gebruik die HERE die woord “vertraag?” Sy Wederkoms word vertraag (hoekom?) Omdat Hy lankmoedig is oor ons (hoekom?) en wil nie hê dat sommige moet vergaan nie, maar dat almal tot bekering moet kom.”
            Almal gaan beslis nie tot bekering kom nie, maar dit is Sy hoop. Niemand sal agterna kan sê God was nie redelik en regverdig nie.
            Let op: “Maar Ek bid nie vir hulle alleen nie, maar ook vir die wat deur hulle woord in My sal glo – dat almal een mag wees net soos U, Vader, in My en Ek in U; dat hulle ook in Ons een mag wees, sodat die wêreld kan glo dat U My gestuur het.” Joh 17:20-21
            Selfs hierdie gebed van Jesus, luister ons nie na nie. Hier is meer as 3 000 kerkgenootskappe in SA. Ons rig ons geestelike geweervuur op mekaar pleks van in eenheid op die ware vyand, die satan.
            En dit ten spyte van die volgende: “En Ek het hulle die heerlikheid (glorie) gegee wat U My gegee het (hoekom?), sodat hulle een kan wees, net soos Ons een is .Joh 17:22. As jy nie die glorie (heerlikheid) van God in Christus Jesus in jou lewe beleef nie, dan moet jy self jou gebrek aan kennis bevraagteken.
            Die teken oor die antichris en die Laaste Uur, beteken daar is nie meer tyd nie. Ja, die betrokke strofe staan al eeue lank in die Bybel, maar dit het nou eers in vervulling begin gaan.
            Dis almal se laaste geleentheid om hulle saak met die HERE reg te maak. Doen dit, doen dit nou! Maak hierdie Feestyd joune, word Wedergebore... net daar waar jy is.

Die verbryselde kan herlewe

Jesus heel die gebroke harte

In mev. (Lettie) Charles Cowman se dagboek, Springs in the Valley, vertel sy hoe die beroemde Noorweegse violis van die middel van die 19e eeu, Ole Bull, op sy toer deur Europa, laat een aand by die klein, houthutjie van 'n kluisenaar aanland.


 


Die ou man nooi hom in en gee hom kos. Na die ete gaan hulle voor die kaggel sit en die kluisenaar probeer op sy gehawende ou viool vir sy gas musiek maak. Dit was krassende musiek.
“Mag ék op jou viool speel?” vra Ole Bull.
“Jy kan probeer,” antwoord die ou kluisenaar, “maar dit het my jare geneem om soos nou te kon speel.”
Ole Bull het die strykstok sag oor die snare gestreel. Skielik was die ou kluisenaar se hut met lieflike musiek gevul. Verstom staar die ou man Ole Bull aan en begin huil soos 'n kind.
“Ek het nie geweet dit kan so wees nie... Ek het nie geweet dit kan so wees nie,” snik die ou kluisenaar oor en oor.
Mev. Cowman maak die opmerking: “Ons is soos mishandelde instrumente, selfs met gebreekte snare en gebuigde brug. Tog, as ons net die hand van Jesus in ons lewens wil inneem, dan sal hy ons heelmaak om die mooiste musiek selfs vir Engele voort te bring.”
Let op: “Want so sê die Hoë en Verhewene wat in die Ewigheid woon, Heilig is sy Naam: Ek woon in die hoogte en in die heilige plek (en waar nog?) en by die verbryselde en nederige van gees (hoekom?), om te laat herlewe die gees van die nederiges en te laat herlewe die hart van die verbryseldes.” Jes 57:15

‘n Brandende lig bemoedig ander

Rudyard Kipling, was ‘n Skrywer, Joernalis en Digter en is in Desember 1865 in Indië gebore. In 1907 het hy die Nobelprys vir Literatuur ontvang.


Rudyard Kipling – Skrywer, Joernalis en
Digter (1865–1936)

Sy ouers was destyds na Indië gestuur as lede van die Britse Ryk. Hulle het hom egter in Engeland laat skoolgaan. Hy is in 1882 terug na Indië. ‘n Dekade later trou hy met Caroline Balestier en hulle koop in Brattleboro, Vermont vir hulle ‘n huis teen ‘n berghang waar alles nog onbewoon was.
           Na hulle goed in hul plaaswoning ingeburger was, besluit hulle om die omgewing te verken. Hulle het teen die verlate berghang afgestap, deur die vallei en teen die berghang aan die oorkant opgeklim.
            Tot hul verbasing en verrassing kom hulle af op 'n klein huisie waar 'n vrou stoksielalleen woon. "Is dit julle huis daar ver oorkant die vallei teen daardie berg? Is dit julle vensters waaruit die lig saans skyn?” vra sy hulle uit. Hulle antwoord bevestigend.
            Sy vertel vir hulle wat daardie verligte vensters vir haar, in die donker aande beteken, hoe dit haar troos en bemoedig en die gevoel van eensaamheid wegneem. Skielik raak sy gespanne en begin bang lyk. “Gaan julle nog lank daar bly? Sal julle, julle ligte nog vir 'n ruk saans laat brand?”
            Hulle stel haar gerus. Daarna het die Kiplings hul ligte gereeld saans tot laatnag laat brand. Hulle het selfs sommige vensters se gordyne en blindings verwyder, sodat die lig nog helderder en duideliker kon uitstraal.
Die skrywer van die storie sluit af: “As dit jou geleentheid was in jou gemeenskap, sou jy ook die ligte laat brand het?”
            Gelowiges is soos brandende ligte. Die lewe maak mens afgestomp en ons lig flou, die Woord en gemeenskap met Jesus hou jou skerp. So moet Gelowiges ook gereeld skyn om ander te bemoedig. “Leef dan as mense van die lig. Uit die lig kom alles voort wat goed en reg en waar is.” Efes 5:8-9
            “Herinner die mense nadruklik daaraan... hulle moet van niemand kwaadpraat nie en nie rusie soek nie. Hulle moet inskiklik wees ...bedagsaam teenoor almal. (en luister nou) vriendelik wees en aan alle mense alle sagmoedigheid bewys.” Tit 3:1-2

Suid-Afrika, soos Pandora se kis

    

Nou is ‘n Revolusie van Gebed nodig!

Die enigste sekerheid is ons saligmaking en redding in en deur Jesus Christus en die enigste permanensie, is die Ewige Lewe.
            Rondom ons skilder koerantberigte ‘n skandvlek.
            Dis hartverskeurend om plant en dier sonder water te sien vrek. Hoeveel kansels en gemeentes lyk ook so… dor, droog, dood?
            Hierdie en vele ander aspekte wat nie eie aan ons eie Christelike kultuur en agtergrond is nie, het ons mense in absolute onsekerheid gedompel. Vrae op vrae word gevra. Sommige sê hulle gaan bly, ander emigreer.
            Maar diegene wat bly, kan net bly as hulle ‘n verskil aan die situasie gaan maak, anders moet hulle ook maar emigreer!
            Die verskil kan alleen deur vurige en kragtige gebed gemaak word.
            Wanneer ons bid, dan kom  GOD se vermenigvuldende krag in werking en dan aanskou ons dat gebed ‘n nasie-skuddende, geskiedenis-makende, wêreld-verskuiwende saak word.
            Dis nie die gebed as sodanig wat magtig is nie, maar GOD is. Dis Hy wat belowe om groot en deurgrondelike dinge te doen as Sy kinders maar net sal bid.
            Met respek, die vrome aandgebedjies bring nie die verskil nie. Dit is die vurige gebede waarmee besigheid met God bedoel word, wat in grootse erns en besliste verwagting word, wat die verskil  teweeg bring.
            Dat die HERE opsoek is na voorbidders maar hulle selde vind, word duidelik weerspieël uit die pyn van Sy uitroep deur Jesaja:
“Hy het gesien dat daar niemand was nie en Hom verbaas dat niemand tussenby tree nie,” asook Sy teleurgestelde protes deur Esegiël:
“Ek het onder hulle ‘n man gesoek wat ‘n muur kan bou en voor My aangesig in die bres kan staan vir die land… maar Ek het niemand gevind nie!”
Daar is drie dinge wat in ‘n voorbidder gesien sal word, wat nie noodwendig in gewone gebed  gevind sal word nie: vereenselwiging, sielesmart en gesag.
Die vereenselwiging van die voorbidder met diegene vir wie hy intree word op volmaakte wyse in Jesus self gesien.
Van Hom is gesê dat Hy sy siel uitgestort het in die dood en saam met die oortreders getel was, terwyl Hy tog die sonde van baie gedra en vir die oortreders gebid het.
As die Goddelike Voorbidder wat vir ‘n verlore wêreld ingetree het, het Hy die beker van ons verlore toestand tot die laaste druppel geledig en “vir elkeen die dood gesmaak.”
Om in die volste sin van die woord dit te kon doen, moes Hy sit waar ons sit.
Vereenselwiging is dus die eerste vereiste van die voorbidder. Hy pleit met sukses omdat hy sy lewe gee vir diegene vir wie hy pleit. Hy is hulle verteenwoordiger. Hy het sy eie belang in hulle behoeftes en lyding laat wegsink en het sover moontlik letterlik hulle plek ingeneem.
Die tweede vereiste is sielesmart, want Hy, die Heilige Gees, “tree vir ons in met onuitspreeklike versugtinge.”
Mens lê dan alles op die altaar, want siele wat nie gered is nie, stort oor ‘n ewige afrgond, die helle dieptes in. Dan kruisig mens jouself met Christus. Jy lê alles af. Jy sterf. Nie ‘n teoretiese dood nie, maar ‘n egte kruisiging met Jesus. In die kruisigingsproses begin die voorbidding.
Let op hoe dat Moses, die jong voorbidder, uit vrye wil die paleis verlaat om hom met sy slawe-broers te vereenselwig.
Jesaja moes vir drie jaar lank “nakend en kaalvoet” loop as ‘n waarskuwing aan Israel teen die aakligheid en tragedie van gevangenisskap.
Esegiël is nie toegelaat om een traan te stort by sy vrou, die begeerte van sy oë, se dood nie.
En derdens moet ons met gesag bid. Ons is tot alles instaat deur Jesus Christus wat ons die krag daartoe gee. Ons neem dus gesag oor die magte van die duisternis, ons bind en vervloek dit, en dryf  dit uit elke sektor van ons samelewing in die naam van jesus Chrtistus.
Ons berei die pad voor vir die Heilige Gees om mense se lewens binne te vaar en hulle om te keer.
Maar daar is ook ‘n laaste vereiste: Dat ons een(dragtig) sal wees. Waar ons oral saambid moet ons wees soos een wat gesamentlik ‘n swangerskap, ‘n dragtigheid dra.
Ons praat nie hier van eenheid nie want selfs nie ‘n getroude paar kan ‘n eenheid vorm nie. Eenheid beteken eendersheid, en dit kan tog nie. Ons het tog elkeen ons eie karakter en persoonlikhied. Maar ons kan eendragtig wees!
Elke keer wanneer die dissipels eendragtig in gebed  en in gees was, dan het die HERE gewerk.
Wanneer moet ons bid? Begin vandag nog. Al is u net twee of drie… die HERE sal daar teenwoordig wees om te hoor wat jy te sê het.
Net so terloops: “Alhoewel Ék die reën van julle teruggehou het toe dit nog drie maande voor die oestyd was en op die een stad laat reën maar op die ander nie laat reën het nie, die een stuk land reën gekry het, maar die ander waarop geen reën geval het nie, verdor het; en twee, drie stede na een stad geslinger het om water te drink sonder om die dors te les –  nogtans het julle jul tot My nie bekeer nie, spreek die HERE.
“Ek het julle met brandkoring en met heuningdou swaar getref, baie van julle tuine en julle wingerde en julle vyebome en julle olyfbome het die sprinkaan verslind--nogtans het julle jul tot My nie bekeer nie, spreek die HERE.
“Ek het die pes onder julle gestuur, op die manier van Egipte; Ek het julle jongmanne met die swaard gedood saam met die wegvoering van julle perde; en Ek het die stank van julle laer laat opstyg, ja, tot in julle neus--nogtans het julle jul tot My nie bekeer nie, spreek die HERE.
“Ek het julle omgekeer soos God Sodom en Gomorra omgekeer het, sodat julle soos 'n stuk brandhout was wat uit die vuur geruk is – nogtans het julle jul tot My nie bekeer nie, spreek die HERE.
“Daarom sal Ek só met jou handel, o Israel; omdat Ek só met jou sal handel – maak jou klaar om jou God te ontmoet, o Israel!” Amos 4:7-12
            Een ding is seker: God bedoel besigheid.
 “Want so sê die HERE aan die huis van Israel: SOEK MY, DAN SAL JULLE LEWE!” Amos 5:4