Soos in die Hemel, so ook op die aarde

Soos in die Hemel, so ook op die aarde
Wat maak ons met al die mag en
gesag wat aan ons gegee is?

”It’s Time” sal komende Maart 2018 opgevolg word deur Mighty Families!
Lourieke Haller van JUIG skryf: “Die Springbok Ollie le Roux se plaas
Wildeals buite Bloemfontein sal weer eens die plek van samekoms wees.
Die geleentheid sal van 16-18 Maart op Wildeals gehou word. Daar sal
kampeerplek vir 20 000 gesinne op die terrein beskikbaar wees. individue
is ook welkom.”

‘n Magtige Familie saamtrek is nodig, maar so ook groter Christen-aksie: Vervang seksonderrig in skole met Gesinsonderrig, tree toe tot die politieke toneel en lei ‘n nuwe dispensasie binne met die 34-miljoen selfverklaarde Christene in SA. Geloof en die werke loop hand aan hand. Jak 2:24.

Ons beleef almal van tyd tot tyd hopelose situasies, of, dis hoe dit lyk. Ons word so depressief dat ons vergeet dat die kragte van die Hemel in ons enige situasie kan keer of omkeer.
            Ons vergeet dat ons erfgename is Rom 8:16-17. Om ‘n erfporsie joune te maak moet jy dit gaan opeis.
            Geseënd is julle in die naam van Jesus Christus! O ja, ons is beslis geseënd. Let op die volgende:

Moenie bid vir seëninge nie, want God het “ons geseën het met alle geestelike seëninge in die hemele in Christus,” Efes. 1:4 Ons triomf berus op Lofprysinge (ontvang en sê dankie) want ons is reeds geseën.

Moenie God soebat om iets vir ons te gee of te doen nie, want “Hy wat selfs sy eie Seun nie gespaar het nie, maar Hom vir ons almal oorgegee het, hoe sal Hy nie saam met Hom ons ook alles genadiglik skenk nie? Rom. 8:32. Weer berus ons triomf op Lofprysinge (ontvang en sê dankie) want Hy skenk ons alles genadiglik.

Moenie bid vir dit wat tot die lewe en Godsaligheid lei nie, want “Immers, sy goddelike krag het ons alles (let op) geskenk wat tot die lewe en godsvrug dien (hoe?), deur die kennis van Hom wat ons geroep het deur sy heerlikheid en deug,  waardeur Hy ons die (let op) grootste en kosbare beloftes geskenk het (hoekom?), sodat julle daardeur deelgenote kan word van die goddelike natuur (wanneer?), nadat julle die verdorwenheid ontvlug het wat deur begeerlikheid in die wêreld is. 2 Pet. 1:3-4.

In hierdie drama van Geloof is daar twee betrokkenes: God, die Algoede Gewer en ek en jy, die bloedgewaste ontvangers. God, die Algoede Gewer het reeds “alles aan ons geskenk wat tot die lewe en godsvrug dien.” En weer berus ons triomf in Lofprysinge (ontvang en sê dankie) vir alles wat ons reeds as geskenk ontvang het.

Moenie hoop en bid vir opbrengs en toename nie, want “Die volke sal U loof, o God, die volke almal saam sal U loof. Die aarde het sy opbrings gelewer; God, onse God, sal ons seën.” Ps. 67:5-7. Nogmaals berus ons triomf op Lofprysinge (ontvang en sê dankie) en dan kom die opbrengs en die toename.

Moenie bid en neul vir genesing nie en dalk daardeur voorgee dat daar iets skort in God se voorsiening vir ons genesing nie, want “Hy het self ons sondes in sy liggaam op die kruishout gedra het, sodat ons die sondes kan afsterwe en vir die geregtigheid lewe; deur wie se wonde julle genees is.” 2 Pet. 2:24. Ons triomf berus weer op Lofprysinge (ontvang en sê dankie) want ons is reeds genees.

Moenie die doping in die Heilige Gees benader asof dit iets is wat mens van God moet afsmeek nie, want “Petrus sê vir hulle: Bekeer julle, en laat elkeen van julle gedoop word in die Naam van Jesus Christus tot vergewing van sondes, en julle sal die gawe van die Heilige Gees ontvang. Hand. 2:38. En weer, Lofprysinge ontvang en sê dankie) is ons triomf vir die gawe van die Heilige Gees. Ontvang net die Heilige Gees in jou lewe.

“Alles behoort aan ons.” 1 Kor. 3:21. Lofprysinge is ons triomf vir alles wat ons nodig het want alles behoort aan ons. Ons ontvang en sê dankie deur middel van lofprysinge,
            Nou kan jy sien wat word bedoel met kennis en dat die Woord ‘n lamp is. Sonder kennis en sonder ‘n lamp ly mense ontsettend gebrek.
            Nou verstaan jy ook: “En daar is siter en harp, tamboeryn en fluit en wyn by hulle maaltyd; maar op die dade van die HERE gee hulle geen ag nie, en die werk van sy hande sien hulle nie. Daarom gaan my volk in ballingskap weens gebrek aan kennis, en hulle aansienlikes word hongerlyers en hulle menigte versmag van dors.” Jes. 5:12-13
            God bevestig dit aan Hosea: “My volk gaan te gronde weens gebrek aan kennis.” Hos. 4:6
            Mens moet jouself met Lofprysinge beklee. Jubel altyd(!) in die HERE.
            Habakuk wys ons hoe dit gedoen moet word: “Alhoewel die vyeboom nie sal bloei en aan die wingerdstokke geen vrug sal wees nie, die drag van die olyfboom sal teleurstel en die saailande geen voedsel oplewer nie, die kleinvee uit die kraal verdwyn en geen beeste in die stalle sal wees nie –  nogtans sal ek jubel in die HERE, ek sal juig in die God van my heil.
            Die HERE Here is my sterkte, en Hy maak my voete soos dié van herte, en Hy laat my tree op my hoogtes. Vir die musiekleier op snaarinstrumente.” Hab 3:17
            Let op watter mag en gesag God ons ook gegee het:
            “Want ons worstelstryd is nie teen vlees en bloed nie, maar teen die owerhede, teen die magte, teen die wêreldheersers van die duisternis van hierdie eeu, teen die bose geeste in die lug.” Efes 6:12
            Dit beteken dat ons as Christene by totale oorlogvoering betrokke is teen verskeie onsigbare leërinstellings...  wesens sonder fisiese liggame. Hulle ontvang hul opdragte vanaf ‘n hoofkwartier wat in die ruimte gevestig is. Hulle doel is ‘n globale oorname.
            Gebeure die afgelope jare en ‘n toename van belangstelling in die okkulte en die geestelike werkinge het Christene genoop om inligting en raad te kry oor geestelike oorlogvoering.
            Alhoewel die klem in die verlede op die bedrywighede van demone geval het, begin al hoe meer Christene besef dat demone nie die hoof kragte is wat ons bedreig nie.
            Omdat ons oorlogvoering op ‘n geestelike vlak afspeel, het God aan ons geestelike wapens voorsien om in hierdie besondere oorlog te kan optree.
            “Want hoewel ons in die vlees wandel, voer ons die stryd nie volgens die vlees nie; want die wapens van ons stryd is nie vleeslik nie, maar kragtig deur God om vestings neer te werp, terwyl ons planne verbreek en elke skans wat opgewerp word teen die kennis van God, en elke gedagte gevange neem tot die gehoorsaamheid aan Christus.” 2 Kor 10:3-5
            Hierdie wapens is dus nie fisies nie, maar geestelik, en “kragtig deur God om (satan se) vestings neer te werp” asook “om planne te verbreek en elke skans wat opgewerp word teen die kennis van God, en elke gedagte gevange neem tot die gehoorsaamheid aan Christus.”
            Alhoewel dit die magtigste wapens is, sê die HERE in Sag. 4:6 “Nie deur krag of deur geweld nie, maar deur my Gees, sê die HERE van die leërskare.”
            Kyk weer: “Om elke skans wat opgewerp word teen die kennis van God... “Dit kom vanaf die satan se geestelike koninkryk in die ‘lug’”.
            Daar is net twee magte op die aarde aan die werk, die mag van God en die mag van die satan. Die twee staan lynreg teenoor mekaar. Satan wil God se koninkryk vernietig en ons is die soldate wat die mag het om die aanslag af te weer en die satan se werke te vernietig.
            Ons, die ware gelowiges, is die enigste mense op aarde wat die mag het om hierdie wapens op te neem en die sataniese koninkryk te vernietig.
            Die mees belangrikste aspek van hierdie oorlog egter, is om te onthou dat God deur Jesus Christus reeds die werke  van satan totaal vernietig het. Ons moet dus op ‘n vlak van oorwinning lewe.
            In Kol. 2:15 staan dat God die “vyandskap” van die satan “tot niet gemaak het” deur sy “vrede” wat hy tussen Christus en ons bewerk het sodat ons en Christus nou een is.
            Dit word herhaal in 1 Kor. 2:14 “Maar God sy dank wat ons (wanneeer?) altyd laat triomfeer in Christus en wat die reuk van sy kennis deur ons oral versprei.” ‘n Triomf is nie net die eintlike oorwinning wat behaal word nie, maar die feesvieringe van die oorwinning wat reeds behaal is.
            Net terloops: Ons weet dat die volk ten gronde gaan weens ‘n gebrek aan kennis, maar daardie kennis moet deur ons versprei word want 1 Kor. 2:14 sê God wil die reuk van Sy kennis deur ons versprei.
            Christus het die oorwinning oor satan namens ons behaal, maar Christus het die verantwoordelikheid aan ons opgedra om die oorwinning te bevestig en dit te administreer namens Hom.
            Daarvoor moet ons in oorlogsdrag geklee wees, aldus Efes. 6:13. Dit bestaan uit ses dinge:

Ons lende omgord met die Waarheid
·       Met die borswapen van geregtigheid
·       Skoene aan ons voete (die bereidheid vir die Evangelie van vrede)
·       Die skild van die geloof
·       Die helm van Verlossing
·       En die swaard van die Gees.

            In hierdie oorlog tree ons op “met alle gebed en smeking en by elke geleentheid te bid in die Gees, en juis daartoe waak met alle volharding en smeking vir al die heiliges.”
            Hierdie ses dinge is egter alles ter verdediging, behalwe die Swaard wat gebruik word om aan te val. Dis hoekom ons die Woord (Swaard) moet ken.
            Met ‘n swaard kan mens egter maar net armlengte veg, maar in die gebed (op die geestelike vlak) is daar geen beperkinge nie.
            Bid... in die Gees... Efes 6:18 ontbloot dat hierdie wapen se effektiwiteit nie beperk kan word deur spasie of tyd nie. “... terwyl julle met alle gebed en smeking by elke geleentheid bid in die Gees.”
            Gebed is die magtigste en verrykendste geestelike wapen wat aan gelowiges gegee is. Dis byna soos ‘n interkontinentale ballistiese missiel... Inderdaad is gebed ‘n nasie-skuddende, geskiedenis-makende, wêreld-verskuiwende saak.  Nie dat gebed as sodanig magtig is nie, maar onse God is!
            Ons wapenarsenaal bestaan onder meer uit:
            Die Woord van God, die naam van Jesus Christus en die Bloed van Jesus.
·       Al drie wapens word deur dieselfde kanaal gelanseer: Die mond.
·       Die mond doen dit deur gebed, lofprysinge, getuienis en prediking.

            Wat hier uitstaan is gebed, spesifiek twee tipes aggressiewe gebed:

Bind en ontbind

Die eerste is die gebed van bind en ontbind. Jesus sê aan Petrus is Matt. 16:19 “En Ek sal jou die sleutels van die koninkryk van die Hemele gee; en wat jy ook op die aarde mag bind, sal in die Hemel gebonde wees, en wat jy ook op die aarde mag ontbind, sal in die Hemel ontbonde wees.”
            Deur hierdie woorde het God aan Petrus ‘n enorme geestelike gesag toegeken – gesag wat op die aarde uitgeoefen kan word, terwyl dit ook in die Hemel van krag is.
            Dit is duidelik dat God aan Petrus hierdie mag gegee het omdat Petrus dit sou nodig kry.  Dit beteken dat ons dit ook nodig het. Hoe weet ons dit?
            In Matt. 18:18-20 sê Jesus: “Voorwaar Ek sê vir julle, alles wat julle op die aarde bind, sal in die Hemel gebonde wees; en alles wat julle op die aarde ontbind, sal in die hemel ontbonde wees.
            “Weer sê Ek vir julle: As twee van julle saamstem op die aarde oor enige saak wat hulle mag vra, dit sal hulle ten deel val van my Vader wat in die hemele is.
            “Want waar twee of drie in my Naam vergader, daar is Ek in hul midde.”
            Die woord “saamstem” heet “sumphoneo” in die Grieks en beteken simfonie in Afrikaans. Dit beteken dus nie net saamstem op intellektuele gebied nie, maar soos in  musikale harmonie.
            Met ander woorde: As twee van julle kan harmoniseer oor enige saak wat julle mag vra, dan sal dit julle ten deel val.
            Dit is harmonie in die Gees, nie net ‘n besluit deur die verstand rakende ‘n gebedslysie nie. Ons neem baie besluite oor gebed sonder dat dit in harmonie is. Die Godsaak gaan nie oor besluite of stemme vir en teen nie, dit moet elke keer gaan oor almal saam in harmonie.
            Jesus gaan dan verder:  “...waar twee of drie in my Naam vergader....” Die Grieks lees: “Waar twee of drie gelei is om saam te vergader.” Om gelei te kan word vra om ‘n leier. Die Heilige Gees is die leier.
            “Want almal wat deur die Gees van God gelei word, dié is kinders van God.” Rom. 8:14
            Jesus praat dus van gelowiges wat deur die Heilige Gees bymekaar gebring is, gefokus om die persoon van Jesus Christus en dus verteenwoordig deur Sy Naam.
            Hy sê dus: “Wanneer julle gelei is deur My Gees om saam te kom en julle is in  harmonie, dan kan julle reken op My teenwoordigheid.
            Die uitoefening van hierdie gesag hang dus af van die leiding van die Heilige Gees en waar ons in harmonie saam is met ons mede-gelowiges.
            Wanneer Jesus sê “Voorwaar Ek sê vir julle, alles wat julle op die aarde bind, sal in die Hemel gebonde wees; en alles wat julle op die aarde ontbind, sal in die hemel ontbonde wees,” dan dui dit nie op twee aksies nie, maar een.
            Inderdaad kom dit daarop neer dat wat ons bind of losmaak, is reeds in die Hemel gebind of losgemaak.
            In die aardse gebeurtenis dui dit op die gelowige se verantwoordelikheid en in die Hemelse gebeurtenis dui dit op God se soewereiniteit. Dit wat plaasvind is onherroepbaar.
            Alles wat ons op die aarde bind is in die Hemel gebonde. Wat ons op die aarde losmaak, is in die Hemel losgemaak. Wat ons besluit is ‘n reeds gedane saak.
            Nogtans plaas dit ‘n verantwoordelikheid op ons want die effektiwiteit van die bind en die losmaak vind eers plaas wanneer ons bid.
            Sien dit ook soos volg: Ons almal is reeds gered, maar dit vind in effek eers plaas wanneer ons tot aksie oorgaan en Christus as Saligmaker aanneem in gebed. Christus het gesterf sodat ons almal gered kan word. Dis inderdaad ook Sy gebed dat ons en Hy almal een moet wees.
            Die HERE sê Hy ken ons nog voordat ons die moederskoot ingegaan het, maar ons het in effek eers mens geword toe twee selle met mekaar verbind het.
            Ons bid: “HERE, laat U wil geskied, soos in die Hemel en so ook op die aarde.” Die werklikheid is dat alles reeds in die Hemel plaasgevind het, maar dis ons verantwoordelikheid om dit op die aarde te implementeer. Dis byna verbysterend, dog feit!
            Ons neem so maklik die houding aan om te wag dat God moet reageer, maar talle kere wag God op ons. Hy wag al baie lank op ons.
            Dis ons wat dit wat ruimskoots aan ons geskenk is, in werking moet stel.
            Ons almal, alle gelowiges, het ‘n geweldige verantwoordelikheid om Jesus se onvoltooide werk op aarde voort te sit!
            Kyk weer: Wanneer julle deur die Heilige Gees gelei in harmonie in die naam van Jesus Christus bymekaarkom dan dui dit ook op die korrekte verhouding tussen ons – gelowiges wat in die regte verhouding met mekaar en met God staan. Solank gelowiges nie in ‘n eerbare korrekte verhouding met mekaar lewe nie, kan daar geen antwoord op gebed wees nie.
            God het ons genooi om Sy troon met Hom te deel: “Uit genade is julle gered – en saam opgewek en saam laat sit in die hemele in Christus Jesus. Efes 2:5-6 Nogtans kan ons nie daar sit sonder om aan ‘n paar voorwaardes te voldoen nie.
            Om te bind en om los te maak sluit feitlik elke moontlike situasie in
·       As onheilsmagte  aan die werk is, kan ons hulle bind
·       So kan ons ook voorrade en voorsiening losmaak
·       As mense in een of ander vorm van binding is dan kan ons hulle losmaak

            Jesus gaan verder: “As twee van julle saamstem op die aarde oor enige saak wat hulle mag vra, dit sal hulle ten deel val van my Vader wat in die hemele is.”
            In die twee genoemde strofes is ingesluit al die gesag wat ons ooit nodig sal hê in gebed.
         
Die bind van die sterk man

In Matt 12:28-29 lees ons: “Maar as Ek deur die Gees van God die duiwels uitdryf, dan het die koninkryk van God by julle gekom. Of hoe kan iemand in die huis van ‘n sterk man ingaan en sy goed roof, as hy nie eers die sterk man geboei het nie? En dan sal hy sy huis beroof.”
            ‘n Strofe wat hiermee saamloop is Luk. 11:20-22 “Maar as Ek deur die vinger van God die duiwels uitdryf, dan het die koninkryk van God waarlik by julle gekom.
            “Wanneer ‘n sterk man wat goed gewapend is, sy huis bewaak, is sy besittings in veiligheid.
            “Maar as een hom oorval wat sterker is as hy en hom oorwin, neem hy sy volle wapenrusting weg waar hy op vertrou het, en deel sy buit uit.”
            Ten eerste dui dit op Jesus en die satan. Die satan was die sterk man in sy paleis en niemand kon hom teenstaan nie. Die wêreld was onder sy beheer. Jesus het die satan egter oorweldig en sy mondering waarop hy vertrou het, van hom af weggeneem.
            Dit is in ooreenstemming met Kol. 2:15 “...nadat Hy die owerhede en magte uitgeklee en hulle in die openbaar ten toon gestel en daardeur oor hulle getriomfeer het.”
            Neem kennis daarvan dat die satan ongewapend is. Dis ons wat bewapen is. Nadat Jesus oor die satan triomfeer het “deel Hy sy buit uit.” Hy wys na alles wat satan in sy paleis gehad het en sê aan ons “help julleself”.
            Maar ons het ‘n belangrike verantwoordelikheid – dit is ons verantwoordelikheid om Jesus se triomf oor die satan te administreer.
            Ons deel dus in die bind van die sterk man soos wat Mattheus dit verduidelik: “Hoe kan iemand in die huis van ‘n sterk man ingaan en sy goed roof, as hy nie eers die sterk man geboei het nie?”
            Dit wil,voorkom dat die Heilige Gees aandui dat meeste van ons aktiwiteite oneffektief in meeste situasies sal wees as ons nie eers die sterk man gebind het nie.
            Ons wil sy goed van hom af wegneem, maar ons het hom nog nie gebind nie. Die gevolg is dat ons baie van ons tyd en kragte misbruik deur sy aanvalle te probeer afkeer. Dit verhinder ons om sy goed te vernietig of sy gevangenes vry te stel. Ons mag dalk effe resultate kry, maar glad nie in vergelyking met die triomf wat ons sal behaal as ons hom eers bind nie.
            Die vrou vra eendag: “Bid asseblief dat my man sal ophou drink. Hy drink erg en rand my gedurig aan.”
            Ons het nie gebid nie, maar haar teruggestuur huis toe juis met die opdrag dat wanneer haar man daardie nag slaap, sy haar hand op hom moet lê en die sterk man in sy tempelhuis moet bind en uitdryf en die Heilige Gees vra om haar man te beset sodat hy gered kan word.
            Die man is geen dronklap nie, hy is ‘n verlore sondaar. Dit gaan nie oor die drank nie, maar oor sy siel. Wanneer sy siel gered is, verdwyn die drankprobleem vanself, want die mag van die drank word verbreek.
            Sien egter ook Lukas11:24-6  “Wanneer die onreine gees uit die mens uitgegaan het, gaan hy deur waterlose plekke en soek rus; en as hy dit nie vind nie, sê hy: Ek sal teruggaan na my huis waar ek uitgegaan het. En hy kom en vind dit uitgevee en versierd. Dan gaan hy en neem sewe ander geeste, slegter as hy self, en hulle kom in en woon daar; en die laaste van daardie mens word erger as die eerste.”
            Dit is waarom mens ewewigtige lering moet gee. Die mens uit wie die onheil verdryf is, moet sy lewe nou volmaak met die Heilige Gees en die Woord sodat wanneer die onreine gees terugkeer hy die huis beset sal vind. Dit geld vir individue maar ook vir groepe en gemeentes.
            Aanvaar dit, ons het ‘n verantwoordelikheid dat, in watter situasie God ons ook al plaas, ons ‘n bediening ontvang het, deel daarvan om die sterk man te bind en sy werke te vernietig in die naam van Jesus Christus.
            Kyk na die voorbeeld in Daniël 10. Voordat Daniël antwoord op sy gebed vir Israel kon kry, moes hy eers die magte van die prins van Persië (hedendaagse Iran) oorwin. Die prins was die besondere sterk man wat satan se belange daar verteenwoordig het en die volk Israel in daardie tyd onderdruk het.
            Laat ons die sterk man in die manne en vroue rondom ons bind. Daar is baie van hulle in satan se koninkryk, op baie vlakke van gesag selfs. Hulle kom voor op alle vlakke van die samelewing en selfs in ons eie families en gesinne. Dis ons verantwoordelik om in harmonie saam te staan in gebed en die sterk manne in hierdie mense se lewens te bind in die naam van Jesus Christus.
            Ons kan onsself baie harde werk en tyd spaar as ons, ons verantwoordelikheid besef en met die sterk man afreken. Dis die een manier van bid.
         
Ons het die mag. Dis aan ons gegee.

“En Hy het sy twaalf dissipels na Hom geroep en aan hulle mag gegee oor onreine geeste, om hulle uit te dryf en om elke siekte en elke kwaal te genees.” Matt 10:1
            “En vir die wat geglo het, sal hierdie tekens volg: in my Naam sal hulle duiwels uitdryf, met nuwe tale sal hulle spreek, slange sal hulle opneem; en as hulle iets dodeliks drink, sal dit hulle geen kwaad doen nie; op siekes sal hulle die hande lê, en hulle sal gesond word.” Mark 16:17-18
            “Kyk, Ek gee aan julle die mag om op slange en skerpioene te trap, en oor al die krag van die vyand; en niks sal julle ooit skade doen nie.” Luk 10:19
            “Maak siekes gesond, reinig melaatses, wek dooies op, dryf duiwels uit. Julle het dit verniet ontvang, verniet moet julle dit gee.” Matt 10:8
            “Nou is dit die oordeel van hierdie wêreld, nou sal die owerste van hierdie wêreld buitentoe gedryf word.” Joh 12:31
            “... en van oordeel, omdat die owerste van hierdie wêreld geoordeel is.” Joh 16:11
            “Dit het Ek vir julle gesê, dat julle in My vrede kan hê. In die wêreld sal julle verdrukking hê; maar hou goeie moed, Ek het die wêreld oorwin.” Joh 16:33
            En ook Efes 1:17-23 “Dat die God van onse Here Jesus Christus, die Vader van die heerlikheid, aan julle die Gees van wysheid en openbaring in kennis van Hom mag gee,
            “verligte oë van julle verstand, sodat julle kan weet wat die hoop van sy roeping en wat die rykdom van die heerlikheid van sy erfdeel onder die heiliges is;
            “en wat die uitnemende grootheid van sy krag is vir ons wat glo, na die werking van die krag van sy sterkte
            “wat Hy gewerk het in Christus toe Hy Hom uit die dode opgewek het en Hom laat sit het aan sy regterhand in die hemele,
            “bo alle owerheid en mag en krag en heerskappy en elke naam wat genoem word, nie alleen in hierdie wêreld nie, maar ook in die toekomstige.
            “En Hy het alle dinge onder sy voete onderwerp en Hom as Hoof bo alle dinge aan die gemeente gegee, wat sy liggaam is, die volheid van Hom wat alles in almal vervul.”
            En ook Heb. 2:14-15 “Aangesien die kinders dan vlees en bloed deelagtig is, het Hy dit ook op dieselfde manier deelagtig geword, sodat Hy deur die dood hom tot niet kon maak wat mag oor die dood het – dit is die duiwel – en almal kon bevry wat hulle hele lewe lank uit vrees vir die dood aan slawerny onderworpe was.”
            Nou begin ons Jak. 4:7 verstaan: “Onderwerp julle dan aan God; weerstaan die duiwel, en hy sal van julle wegvlug.” (want ons het die mag, die gesag om dit te doen).
            “Wees nugter en waaksaam, want julle teëstander, die duiwel, loop rond soos ‘n brullende leeu, en soek wie hy kan verslind. Hom moet julle teëstaan, standvastig in die geloof, omdat julle weet dat dieselfde lyding opgelê word aan julle broederskap wat in die wêreld is.” 1 Pet 5:8-9 (en weer, want ons het die mag en die gesag om dit te kan en moet doen).
            “Ek het aan julle geskrywe, jongmanne, omdat julle sterk is en die woord van God in julle bly en julle die Bose oorwin het.” 1 Joh 2:14b
            “Vir hierdie doel het die Seun van God verskyn, om die werke van die duiwel te verbreek.” 1 Joh 3:8b
            So sien ons keer op keer dat die satan reeds verslaan is, maar dis ons verantwoordelikheid om dit op aarde te verwesenlik. Ons het ‘n keuse: Ons kan of onder die satan se heerskappy staan, of ons kan in oorwinning aan God se kant kom staan en oor die satan en sy magte heers.
            “Julle is uit God, my kinders, en het hulle (die vyand) oorwin, omdat Hy wat in julle is, groter is as hy wat in die wêreld is.” 1 Joh 4:4
            “Moenie vrees nie; Ek is die eerste en die laaste en die lewende; en Ek was dood en kyk, Ek leef tot in alle ewigheid. Amen. En Ek het die sleutels van die doderyk en van die dood.” Openb 1:17-18
            “En hulle het hom oorwin deur die bloed van die Lam en deur die woord van hulle getuienis, en hulle het tot die dood toe hulle lewe nie liefgehad nie.” Openb 12:11

Heilige Gees-gedrewe gebed

Die ander manier van bid is spesifieke, doelgerigte aanhoudende gebede soos ingegee deur die Heilige Gees. Daar is twee voorbeelde in die Ou testament:
            In Josua 8 is die kinders van Israel besig om ‘n stad in te neem toe God te midde van die oorlog aan Josua iets sê wat geen militêre betekenis hoegenaamd gehad het nie.
            “En die HERE het vir Josua gesê: Steek die spies wat in jou hand is, na Ai toe uit, want Ek wil dit in jou hand gee. Daarop steek Josua die spies wat in sy hand was, na die stad uit.” Jos 8:18
            Die uitgesteekte spies het geen militêre waarde gehad nie, maar wel geestelik waarde.
            In strofes wat volg word vertel hoe dat die Israeliete die stad oorgeneem en vernietig het. In strofe 26 volg dan die volgende: “En Josua het sy hand met die uitgestrekte spies nie teruggetrek voordat hy al die inwoners van Ai met die banvloek getref het nie.”
            Josua het sy arm met die spies uitgesteek toe die oorlog begin het en dit in daardie posisie gehou, spesifiek gerig teen Ai, totdat die totale oorwinning behaal is.
            Die spies het militêr niks uitgerig nie, maar op die geestelike vlak het Josua God se belofte oor Ai aangegryp en dit opgeeis tot op die oomblik van die oorwinning.
            Dit dui op God-gegewe, deurdringende, onwankelbare, doelgerigte gebed, soos ook in Luk 5-10.
As die man wat die brode in die nag kom vra het, opgehou het om te klop, het hy nooit die brode ontvang nie. Dit was juis sy doelgerigte aanhoudende (irriterende) geklop wat hom die brode besorg het. En dan Jesus se belofte: As jy klop dan sal daar (beslis) vir jou oopgemaak word.
            Sommige mense beweeg die spies die wêreld vol in plaas daarvan om gefokus, doelgerig, spesifiek te bly.
            Dawid beklemtoon, veral in die Psalms die vernietiging van die vyande sodat hulle nie eers geleentheid het om op te staan nie. Hy sê in Ps 18:43 “Toe het ek hulle vermaal soos stof voor die wind; ek het hulle uitgegooi soos modder van die strate.”
            God is ontevrede met ‘n gedeeltelike oorwinning. Baie keer bereik Christene ‘n gedeeltelike oorwinning en dan laat sak hulle die spies. God gaan nooit ‘n kompromie aan nie. Hy leef nie in grys areas nie.
            In 2 Kon 13:15-19 is Elisa op sy sterfbed wanneer hy aan Joas ‘n opdrag gee. Israel is uit die ooste bedreig deur Sirië en Elisa wou voorsiening maak om die bedreiging af te weer.
            “En toe Elísa siek was aan die siekte waaraan hy sou sterwe, het Joas, die koning van Israel, afgekom na hom en oor hom geween en gesê: My vader, my vader, wa van Israel en sy ruiters!
            “Daarop sê Elísa vir hom: Neem ‘n boog en pyle. En hy het vir hom ‘n boog en pyle geneem.
            “En hy sê vir die koning van Israel: Sit jou hand aan die boog. En hy het sy hand aan die boog gesit; en Elísa het sy hande op die hande van die koning gelê.
            “Verder sê hy: Maak oop die venster na die ooste toe! En hy het dit oopgemaak. En Elísa sê: Skiet! En hy het geskiet. Toe sê hy: ‘n Pyl van oorwinning van die HERE en ‘n pyl van oorwinning op Aram: jy moet die Arameërs volkome verslaan in Afek.
            “Verder sê hy: Neem die pyle. En hy het dit geneem. Toe sê hy vir die koning van Israel: Slaan teen die grond! En hy het drie maal geslaan en opgehou.
            “Daarop word die man van God baie kwaad vir hom en sê: Jy moes vyf of ses maal geslaan het; dan sou jy die Arameërs volkome verslaan het; maar nou sal jy die Arameërs drie maal verslaan.”
            Hier sien ons weer ‘n pragtige beeld van Gees-gerigte en Gees-bekragtigde gebed.
            Die venster het na die ooste oopgemaak. Dit wys op rigting. Die Siriërs sou vanuit die ooste aanval. Die pyl is deur daardie venster in daardie rigting gerig. Wat is die betekenis van die koning wat sy hand op die boog plaas en die profeet wat sy hand op die koning sin plaas? Dit dui aan dat die bron van die profeet se gesag – die Heilige Gees – besig was om die koning te bekragtig toe hy die pyl in die rigting van Sirië afgevuur het. Dit dui ook op harmonie en eendragtigheid.
            Maar, omdat hy net drie maal in plaas van vyf maal geslaan het, was die oorwinning beperk. Die verslag moes later herhaal word soos wat ons lees in Matt 13:25 “En Joas, die seun van Jóahas, het weer die stede uit die hand van Bénhadad, die seun van Hásael, teruggeneem wat hy aan sy vader Jóahas in die oorlog ontruk het; Joas het hom drie maal verslaan en die stede van Israel herower.”
            Dit beteken dat sukses op die natuurlike vlak is afhanklik van geestelike kragte. As mens die oorwinning op die geestelike vlak behaal, dan sal dit die deurslag gee op die militêre, die politieke, die sosiale of ekonomiese vlak.
            Die geestelike vlak is deurslaggewend en ons vernaamste wapen is en bly Gees-gerigte, Gees-bekragtigde, deurdringende gebed. Joas het misluk omdat hy nie genoegsame vasberadenheid op die geestelike vlak toegepas het nie. Aan die ander kan het Joshua sy spies gerig gehou totdat die oorwinning volkome was.
            Wanneer die Here sê dat Sy Liggaam vir die regering moet bid, dan is dit ‘n opdrag wat eenvoudig uitgevoer moet(!) word, al is dit ook hoe moeilik. As daar nie vrede in die land is nie, dan is dit heel waarskynlik omdat die Liggaam nie vir die regering bid nie.
            Die Here is in beheer van die koning. In Spr 21:1 lees ons: “Die koning se hart  is in die hand van die Here soos waterstrome; Hy lei dit waarheen Hy wil.”
            Die nuwe vertaling lees: “Die Here kan ‘n koning se gedagtes net so maklik beheer soos water in ‘n leivoor en dit stuur in die rigting wat Hy wil!” Skitterend!
            So, kom maar gerus jou plig en opdrag na en bid vir die Owerhede. Hulle dink maar hulle is in beheer.
            Luister wat sê Psalm 149 oor “Lofgesang en Oorlogswaard”:
         
            Halleluja! Sing tot eer van die Here ‘n nuwe lied,
            Sy lof in die vergadering van die gunsgenote!
            Laat Israel hom verheug in sy Maker;
            Laat die kinders van Sion juig oor hul Koning!
           Laat hulle Sy naam loof in koordans,
            Hom psalm sing met tamboeryn en siter.
            (Hoekom?)
            Want die Here het ‘n welbehae in Sy volk;
            Hy versier die ootmoediges met heil.
            Laat die gunsgenote juig in heerlikheid;
Laat hulle jubel op hul bedde.
Lofverheffinge van God is in hulle keel,
en ‘n tweesnydende swaard in hulle hand;
(Hoekom?)
om wraak te oefen onder die heidene,
strafgerigte onder die volke;
om hulle konings met kettings te bind
en hulle edeles met ysterboeie;
(Hoekom?)
om ‘n vonnis wat opgeskrywe is,
aan hulle te voltrek.
‘n Eer is dit vir Sy gunsgenote!
Halleluja!
         
            Dus, nie deur krag of geweld nie, maar deur lofprysinge aan die God van ons heil. Lofprysinge is ‘n tweesnydende swaard: Terwyl ons God loof, oefen ons ook wraak uit onder die heidene, strafgerigte onder die volke, om hulle konings in kettings te bind en hulle edeles met ysterboeie… Waarom? Om ‘n vonnis te voltrek wat reeds opgeskrywe is! – Sjibbolet

Die HERE kan die regering se gedagtes verander…

In Rigters 6:1 sê God aan Gideon: Maar, toe die kinders van Israel gedoen het wat verkeerd was in die oë van die Here, het die HERE die kinders van Israel oorgegee in die hand van die Midianiete – sewe jaar lank!
            Sewe jaar lank! Dis mos nie nodig om langer vrae te vra nie. Ons eie situasie moet vir ons mos nou meer duidelik wees as ooit te vore.
            Dit lei geen twyfel nie dat die Skrif verwag dat die Christen hom moet onderwerp aan die Owerheid wat oor hom aangestel is.
            So, loof die HERE, bid vir die owerheid, dien die HERE. Alles is nog lank nie verlore nie. Dit lyk maar net so.
            Die prentjie word verder ingekleur wanneer God ons verbied om te vergeld. God sê dat Hy ‘n jaloerse God is en dat die wraak Hom (alleen) toekom.
            Met ander woorde, terwyl ons wraak wil neem met allerlei verset en optredes, staan God terug, want ons probeer doen wat God sê Sy eksklusiewe reg is. Die Christen moet sy verstand afskakel sodat hy kan hoor wat die Gees van God aan hom wil sê.
            Wanneer die HERE sê dat Sy Liggaam vir die regering moet bid, dan is dit ‘n opdrag wat eenvoudig uitgevoer moet(!) word, al lyk dit ook hoe moeilik. As daar nie vrede in die land is nie, dan is dit heel waarskynlik omdat die Liggaam nie vir die regering bid nie.
            Daar is Christene wat die regering wil verkla by die Internasionale Menseregtekommissie, en by die VN en by ander internasionale liggame. Nie een van hierdie liggame is in beheer van die koning nie.
            In Bybelse dae had hulle nie regerings nie, maar konings. Wanneer die HERE dus ‘n koning aanspreek, spreek Hy ‘n regering aan. Die waarheid is dat die HERE enigiemand se gedagtes kan verander wanneer ons bid.
            Die HERE is in beheer van die koning. In Spreuke 21:1 lees ons: “Die koning (regering) se hart is in die hand van die HERE soos waterstrome; Hy lei dit waarheen Hy wil.”

·       Die nuwe vertaling lees: “Die HERE kan ‘n koning (regering) se gedagtes net so maklik beheer soos water in ‘n leivoor en dit stuur in die rigting wat Hy wil!” Skitterend!
                  Die HERE het ook die gedagtes van John Newton, ‘n slawehandelaar, in die middel van die oseaan te midde van ‘n ontsettende stormsee verander.
                  Newton het die wedergeboorte deelagtig geword en sy skip vol slawe omgedraai en hulle in hul tuisland in Oos-Afrika gaan aflaai. Newton het later ‘n Presbiteriaanse predikant geword. Hy het teen die slawehandel begin preek en die Brtitse parlementslid William Wilberforce beïnvloed om die slawehandel in Brittanje en die kolonies af te skaf.
                  Newton het die lied “Amazing Grace” gekomponeer. Op sy sterfbed het hy gesê: “Ek is steeds in die land van die sterwendes, maar ek sal binnekort in die land van die lewendes wees.”
So, kom maar gerus jou plig en opdrag na en bid vir die Owerhede. Hulle dink maar hulle is in beheer. Die waarheid is dat die Christendom in beheer van die wêreld is, en dit onder Leierskap van die Almagtige GOD.
            Luister wat sê Psalm 149 oor “Lofgesang en Oorlogswaard”:
         
Halleluja! Sing tot eer van die Here ‘n nuwe lied,
Sy lof in die vergadering van die gunsgenote!
Laat Israel hom verheug in sy Maker;
Laat die kinders van Sion juig oor hul Koning!
Laat hulle Sy naam loof in koordans,
Hom psalm sing met tamboeryn en siter.
Want die Here het ‘n welbehae in Sy volk;
Hy versier die ootmoediges met heil.
Laat die gunsgenote juig in heerlikheid;
Laat hulle jubel op hul bedde.
Lofverheffinge van God is in hulle keel,
en ‘n tweesnydende swaard in hulle hand;
Hoekom?
Om (sodoende) wraak uit te oefen onder die heidene,
strafgerigte onder die volke;
om hulle konings met kettings te bind
en hulle edeles met ysterboeie;
Hoekom?
om ‘n vonnis wat opgeskrywe is,
aan hulle te voltrek.
‘n Eer is dit vir Sy gunsgenote!
Halleluja!

“Nie deur krag of deur geweld nie, maar deur my Gees, sê die HERE van die leërskare.” Sag. 4:6. Jesus het aan die Kruis gebid: “Vader vergewe  hulle want hulle weet nie wat hulle doen nie.” Dan bid ons ook so!
Dat die HERE op soek is na voorbidders maar hulle selde vind, word weerspieël in die pyn van Sy uitroep deur Jesaja:
            Die Vader het gesien dat daar niemand was nie en Hom verbaas dat niemand tussen bytree nie,”
            En sy teleurgestelde protes deur Esegiël:
            Ek het onder hulle ‘n man gesoek wat ‘n muur kan bou en voor My aangesig in die bres kan staan vir die land…  maar Ek het niemand gevind nie.
Laat die Lofsange oor berg en dal aangerol kom!  

Die verbryselde kan herlewe

Jesus heel die gebroke harte

In mev. (Lettie) Charles Cowman se dagboek, Springs in the Valley, vertel sy hoe die beroemde Noorweegse violis van die middel van die 19e eeu, Ole Bull, op sy toer deur Europa, laat een aand by die klein, houthutjie van 'n kluisenaar aanland.


 


Die ou man nooi hom in en gee hom kos. Na die ete gaan hulle voor die kaggel sit en die kluisenaar probeer op sy gehawende ou viool vir sy gas musiek maak. Dit was krassende musiek.
“Mag ék op jou viool speel?” vra Ole Bull.
“Jy kan probeer,” antwoord die ou kluisenaar, “maar dit het my jare geneem om soos nou te kon speel.”
Ole Bull het die strykstok sag oor die snare gestreel. Skielik was die ou kluisenaar se hut met lieflike musiek gevul. Verstom staar die ou man Ole Bull aan en begin huil soos 'n kind.
“Ek het nie geweet dit kan so wees nie... Ek het nie geweet dit kan so wees nie,” snik die ou kluisenaar oor en oor.
Mev. Cowman maak die opmerking: “Ons is soos mishandelde instrumente, selfs met gebreekte snare en gebuigde brug. Tog, as ons net die hand van Jesus in ons lewens wil inneem, dan sal hy ons heelmaak om die mooiste musiek selfs vir Engele voort te bring.”
Let op: “Want so sê die Hoë en Verhewene wat in die Ewigheid woon, Heilig is sy Naam: Ek woon in die hoogte en in die heilige plek (en waar nog?) en by die verbryselde en nederige van gees (hoekom?), om te laat herlewe die gees van die nederiges en te laat herlewe die hart van die verbryseldes.” Jes 57:15

‘Die Evangelie nou die mees gehate dogma!’

Nogtans, vertrou op ‘n magtige Herlewing!

Jesus Christus is skielik in die spervuur.  Weer skreeu die gepeupel:  Kruisig Hom!  Ook Sy volgelinge is in die spervuur.
Al hoe meer regerings, verwerp Jesus Christus en God se gesag. Christus is nou ook nie welkom in die nuwe grondwet van die Europese Unie nie en ook nie in die Suid-Afrikaanse grondwet nie... en dit ten spyte daarvan dat ver meer as die helfte van die bevolking verkjlaar dat hulle Christene is, altesame 36 miljoen van hulle.
Reg oor die wêreld word Jesus weggestoot en verstoot. Die staatskerk van Noorweë het pas meer as 25 000 lidmate in ’n maand verloor nadat hy ’n aanlyn registrasiestelsel ingestel het waar mense makliker kan aansluit of hul lidmaatskap beëindig.
Die Independent berig dat die Lutherse Kerk van Noorweë is die amptelike Noorse kerk en amper driekwart van die bevolking is geregistreerde lidmate.
Maar nou het 25 743 lidmate die kerk amptelik verlaat. Intussen het 1 177 die webwerf gebruik om aan te sluit.
“Die getal onttrekkings moet gesien word teen die agtergrond van die groot getal lidmate van die Noorse Kerk,” sê Helga Haugland Byfuglien, hoof van die Noorse Biskoppekonferensie.
Let nou op die volgende skoksyfers: ’n Jaarlikse peiling onder Noorweërs het bevind die meeste Noorweërs sê hulle glo nie in God nie. Altesame 39% van die bevolking het nee gesê op die vraag of hulle glo daar is ’n God, 37% het ja gesê en 23% het gesê hulle weet nie... en dit uit ‘n bevolking van vyf miljoen mense.
In die Verenigde Koninkryk noem slegs twee uit vyf mense hulself Christen.
In 1983 het net minder as ’n derde van Britte gesê hulle volg geen godsdiens nie. In 2014 het amper die helfte van Britte aangedui hulle is sonder godsdiens.
Die persentasie van mense in Suid-Afrika wat hulleself as godsdienstig beskryf het geval van 83% in 2005 tot 64% in 2012, volgens ’n peiling deur die Win-Gallup-groep.
Paige Patterson, president van die Suidwestelike Baptiste Teologiese Seminarie in Texas, sê: “Die mees gehate dogma in die wêreld vandag, is die eksklusiwiteit van Christus as Saligmaker.”
Patterson sê die Evangelieboodskap van redding is nie langer gewild onder koninklikes, baie predikers, akademici, filosowe en politici nie. “Dit is die mees gehate dogma in die wêreld vandag!”
Pastoor Voddie Baucham het vroeër tydens die Suidelike Baptiste Konvensie gesê predikers moet hulle gereed maak om “duur te betaal om die Evangelie te verkondig.” In Rusland moet mens nou betaal vir ‘n permit om die Evangelie te mag verkondig en ook net aan die groepie wat jy op jou aansoek aandui.
Soos Bauchan tereg gesê het, is dit reeds so dat predikers in die VSA reeds voor die keuse gestel word om ’n verwaterde Evangelie te verkondig en om die wette van die mens te gehoorsaam, of om die volle Evangelie te verkondig en die risiko te loop om in die tronke te beland, of selfs die doodstraf opgelê te word.
“Wat ook al gebeur, die Evangelie moet ten alle tye in Gees en Waarheid verkondig word,” het hy gesê.
Baucham het na Hand. 4 verwys waar Petrus en Johannes geweier het om op te hou om Jesus Christus te verkondig toe hulle gearresteer is. Hy het gesê die huidige kultuur mag nie neutraal staan wat betref die Bybelse Christendom nie.
Dit is geen opsie nie want ’n Bybelse Christendom pas nie in by die terme van ons huidige filosofiese denke nie. Dit is waarom ons in die media verkeerdelik voorgestel, verkeerdelik aangehaal en misverstaan sal word – want hulle opereer vanuit ‘n filosofiese denke wat nie kan begryp wat ons glo en waarom nie.  Neutraliteit is dus geen opsie nie,” het Baucham beklemtoon.          
In Europa is verskeie groepe en kerke, selfs die Pous, wat beswaar daarteen maak dat die nuwe grondwet nie verwys na Europa se Christelike wortels nie en geen erkenning aan God die Vader verleen nie. Daar word bloot gepraat van “Europa se kulturele, godsdienstige en humanistiese erfenis.”
Die regerings van Poland, Malta, Slowakye en die Tsjeggiese Republiek het saam met Italië en Portugal beswaar gemaak en gesê dat die kwessie rondom Christus vir hulle en miljoene ander Europeërs ’n prioriteit is.
Terwyl Italië en Portugal die bastions van Europese Roomse Katolisisme is, is dit die ander volkere wat die aandag trek, soos die voormalige godlose Sowjet Republieke van Poland, Lithuanië, Slowakye en die Tsjeggiese Republiek.
Hierdie lande was vir lank onderworpe aan ’n godlose sekulêre humanistiese regime, hulle weet waartoe ’n land in staat is wat geen verantwoordelikheid teenoor God het nie.
            Spanje het vroeër ook geëis dat God in die grondwet genoem word, maar het hulle nou by die sekulêre groep geskaar nadat al-Kaida gehelp het om die Sosialistiese regering aan bewind te bring na die vroeëere bombardement van ‘n trein in Madrid.
Frankryk, wat deur Duitsland en Brittanje ondersteun word om Christus uit die grondwet te laat, sê die grondwet akkommodeer alle mense van alle gelowe en as mens Christus in die grondwet sou inbring, dan ignoreer mens die Jode en die Moslems.
Hoe “vroom” hierdie sienswyse ook al klink, is en bly dit ’n valse begrip, ’n illusie waaraan Christene hulle nie mag onderwerp nie. Hulle word deur God geroep om standpunt in te neem vir die Evangelie van Jesus Christus.
Christene staan voor ‘n (finale) uitdaging: Om Christus te verloën of om Christus te bely! Geen kompromie is hoegenaamd aanvaarbaar nie.
Baucham is natuurlik korrek dat swaar tye op Christene wag wat die Waarheid enduit gaan verkondig. Christene sal vervolg word want dit sal gesê word dat hulle – met die Evangelie – inbreuk maak op die privaatheid van ander mense. Mense sal hulle agter hulle menseregte-illusies verskans, enigiets, solank hulle nie die Waarheid hoef te hoor nie.
            Berigte die afgelope tien dae uit Amerika toon ook ‘n skokkende afval vanuit die Christendom.
Vir die ware Gelowiges is hierdie verwikkelinge geensins ’n verassing nie, want die HERE het Sy volk lank reeds hierop voorberei: “En julle sal deur almal gehaat word ter wille van my Naam.” Matt. 10:22.
Nogtans moedig die HERE Sy volk aan om hulle deur geen mag ter wêreld te laat keer nie en voeg by: “Maar wie volhard tot die einde toe sal (beslis) gered word.”
Die HERE self gaan verder in Matt. 24:4-14 “Pas op dat niemand julle mislei nie. Want baie sal onder my Naam kom en sê: Ek is die Christus! en hulle sal baie mense mislei.
“En julle sal hoor van oorloë en gerugte van oorloë. Pas op, moenie verskrik word nie, want alles moet plaasvind, maar dit is nog nie die einde nie.
“Want die een nasie sal teen die ander opstaan en die een koninkryk teen die ander; en daar sal hongersnode wees en pessiektes en aardbewings op verskillende plekke.
“Maar al hierdie dinge is 'n begin van die smarte.
“Dan sal hulle jul aan verdrukking oorgee en julle doodmaak; en julle sal deur al die nasies gehaat word ter wille van my Naam.
“En dan sal baie tot struikel gebring word en mekaar verraai en mekaar haat. En baie valse profete sal opstaan en baie mense mislei.
En omdat die ongeregtigheid vermeerder word, sal die liefde van die meeste verkoel.
“Maar wie volhard tot die einde toe, hy sal gered word. En hierdie Evangelie van die Koninkryk sal verkondig word in die hele wêreld tot 'n getuienis vir al die nasies; en dan sal die einde kom.”
Feit is ook dat die Christendom as dominante en dinamiese mag in Europa aan die kwyn is, soveel so dat dit vandag niks meer as ‘n godsdienstige sekte soos Islam en Boeddhisme is nie, aldus die redakteur van die wêreldbekende Omega Nuusbrief.
Wat bly vir my en jou oor? Om te bid vir ‘n magtige Herlewing soos nog nooit tevore nie. En dit kom, wees verseker daarvan. – Sjibbolet

Die Finale Vredesverdrag – Die sleutel tot God se profetiese Tyd

 

Die verwagte ondertekening van die Midde Oosterse Vredesverdrag tussen Israel en die Palestyne – en as verlengstuk daarvan ook met die Arabiese wêreld – sal ‘n betekenisvolle gebeurtenis op God se profetiese kalender wees.
            Daar is druk vanaf Frankryk, Amerika en die VN dat Israel en die Palestyne so ‘n vredesverdrag sluit.
            Op Vrydag 3 Junie vanjaar het Frankryk ‘n vergadering gehou wat deur 30 ministers van Buitelandse Sake van hul onderskeie lande bygewoon is. Israel die Palestyne is nie genooi nie.
            Israel is basies omsingel met ‘n opbou van oorlogskepe in die Mediterreense en Rooi See. Vegvliegtuie, vliegdekskepe, aanvalshelikopters en tenks is voortdurend by oorlog op Israel se grense betrokke. Die oorlog in Sirië kry net nie einde nie.
            Rusland minag Amerika en is nou die hoofrolspeler in die Midde Ooste. Rusland en Turkye het pas saamgesweer om die Koerde te verslaan sodat daar niks van hul planne kan kom om ‘n onafhanklike staat te stig nie.
            Intussen is die verwagting dat ‘n vredesverdrag teen 16 November vanjaar tussen Israel en die Palestyne onderteken kan word. Sommige analiste vrees dat so ‘n ooreenkoms die begin van die einde kan beteken omdat dit op die twee partye afgedwing word en dat wat ook al besluit word, nie die ware besluite van Israel en die Palestyne sal wees nie.
            Die verwagting is dat die VN eenvoudig ‘n Resolusie sal uitvaardig om dit af te dwing.
            Die kernaspek van so ‘n vredesverdrag is en bly Jerusalem. Israel het onlangs nog gesê hy sal nooit Jerusalem of die Golan Hoogtes afgee nie. Israel is bereid om ‘n twee-staat model in beginsel te aanvaar te aanvaar, maar hy weier om Jerusalem te herverdeel of om Israel se soewereiniteit oor Jerusalem af te staan.
            Die Palestyne eis dat Jerusalem die hoofstad van die nuwe Palestynse staat moet wees.
            Die Palestyne en ander eis ook dat Israel alle grondgebied teruggee wat hy sedert die 1967 oorlog beset het. Dit sluit Oos-Jerusalem en die Golan Hoogtes in.
            Uit ‘n Bybelse oogpunt beskou word ‘n finale vredesverdrag voorspel soos vervat in Dan 9:27. Die prins wat sal kom, die AntiChris sal die vredesverdrag bevestig. Dit sal deur baie, ook Israel onderteken word.
            Dit sal heel waarskynlik die implementering van die Arabiese Vredesplan wees en deur meer as 22 lande onderteken word.
            Die profeet Daniël sê hierdie Verdrag sal vir sewe jaar geld. Daar is nog gewysigde sienings, maar feit is dat Israel uiteindelik teken, vrywillig of onder dwang. Die Verdrag is tydelik en dan volg die ergste en dodelikste tyd wat die aarde nog ooit beleef het.
            Jesus sê: “Want dan sal daar groot verdrukking wees soos daar van die begin van die wêreld af tot nou toe nie gewees het en ook nooit sal wees nie.” Matt 24:21
            Ons weet nie in hierdie stadium hoe die Vredesverdrag gaan lyk nie, maar die druk is daar van alle kante dat dit wel saamgestel en onderteken moet word. Al wat die Gelowiges kan doen is om die situasie te monitor omdat dit elkeen van ons sal raak.
            Israel sal dalk op sekere dinge toegee solank die Derde Tempel herbou word 11 Thess 2:4. Die Arabiese Moslem wêreld gaan hier beslis ‘n groot rol speel want hulle eis dat die Tempelberg aan hulle behoort.
            Dit is waar Ps 83 ook ‘n rol speel. En die dreigemente is die afgelope maande keer op keer herhaal: Israel moet van die landkaart af verdwyn.
            As alles teen Israel werk, sal Israel die “Simson Opsie” uitoefen, al loop dit uit op ‘n derde wêreldoorlog.
            Die Amerikaanse president Barak Obama is daarop uit om sy termyn af te sluit met ‘n “suksesvolle” vrede in die Midde-Ooste. Hoekom? Niemand weet nie maar dit word gemeen hy is straks op pad na die VN vir ‘n leiersrol daar.
            Hoof Rabbi David Lau het heel onlangs gesê die Moskee van Omar kan bly staan want daar is genoeg plek op die Tempelberg vir twee tempels.
            Veronderstel dat die partye nie vrede het oor die inhoud van die Verdrag nie en dit word nie geteken nie, wat dan? Dit sal sekerlik op grootskaalse oorlog uitloop.
            Dis straks waarna Eseg 38 verwys?
            Hoe dit ook al sy, gesien in die lig van die reeds bestaande tekens van die tye, is ons reeds in die laaste uur. – Sjibbolet

Dit is waar Ps 83 ook ‘n rol speel. En die dreigemente is die afgelope maande keer op keer herhaal: Israel moet van die landkaart af verdwyn.
            As alles teen Israel werk, sal Israel die “Simson Opsie” uitoefen, al loop dit uit op ‘n derde wêreldoorlog.
  Die Amerikaanse president Barak Obama is daarop uit om sy termyn af te sluit met ‘n “suksesvolle” vrede in die Midde-Ooste. Hoekom? Niemand weet nie maar dit word gemeen is straks op pad na die VN vir ‘n leiersrol daar.

Om die HERE te dien is ‘n Werklikheid

 

Daar is kere wat ons bid en die antwoord is daar, tog ander kere neem die antwoord ‘n kort rukkie of bly dit ‘n lang ruk weg. Bly dit werklik weg, of is dit net nog nie tyd vir die antwoord nie?
            Hoe dit ook al sy, wat doen ek en jy intussen? Het jy al by iemand aangeklop en daar was nie antwoord nie? Later in die dag sien jy die mense in die supermark en jy noem dat jy by hulle was... en hulle sê: “Maar hoekom het jy nie langer geklop nie, ons was tuis, seker net in die agterplaas.”
            “Bid, en (wat?) vir julle sal gegee word; soek, en (wat?) julle sal vind; klop, en (wat?) vir julle sal oopgemaak word. Dis feite!
“Want elkeen wat bid, ontvang; en hy wat soek, vind; en vir hom wat klop, sal oopgemaak word.” Matt 7:7-8
En wie het dit gesê? Jesus Christus.
In Lukas 11 vertel Jesus self van die man wat die nag sy vriend kom opklop het vir drie brode. Die man het aanhou klop... en uiteindelik die brood gekry. As hy ophou klop het, het hy dit nie gekry nie.
Dit maak nie saak hoe lank jy klop nie, weet dit vir seker, jy sal beslis jou antwoord kry.
Hier is die klinkklare bewys:”Want hoeveel beloftes van God daar ook mag wees, in Hom is hulle ja en in Hom amen, tot heerlikheid van God deur ons.” 1 Kor 1:20
Ons moet bly vertrou, positief bly, in afwagting leef... want jy moet in die geloof bid, sonder om te twyfel; (hoekom?) want hy wat twyfel, is soos 'n golf van die see wat deur die wind gedrywe en voortgesweep word.
“Want dié mens moenie dink dat hy iets van die Here sal ontvang nie... Jak 1:6-7
Staan vas, weier om te twyfel, Jesus is ‘n waarmaker van sy Woord.”
Net so vertrou ons ook, sonder om te twyfel, op die magtige Herlewing wat kom. – Sjibbolet

Die Groot Oes

“En Hy sal sy Engele uitstuur met harde trompetgeluid,
en hulle sal sy uitverkorenes versamel uit die vier
windstreke, van die een einde van die hemele af tot
die ander einde daarvan.” Matt 24:31



Die doel van die oes aan die einde van die tyd is om
die uitverkorenes (en en jy) uit die vier windstreke
byeen te bring. Die gelowiges sal uitgeroep word
uit die geledere van die geestelike kragte wat in
daardie stadium in beheer van die wêreld is.

Min vrug by die loslopers

Die prediker Samuel Dickey Gordon, gebore in Philadelphia op 12 Augustus 1859, was gewild  as geestelike spreker en skrywer aan die einde van die 19e Eeu en in 20e Eeu.
            Hy het talle boeke geskryf en  is bekend vir sy reeks “Quiet Talks”.
            Hy het een keer vertel dat ‘n tak van ‘n kersieboom in sy tuin feitlik afgeskeur is in ‘n hewige storm. Hy het dit net so gelos.
            Met die koms van die lente het beide die hoofboom en die betrokke tak gebot, alhoewel nie so baie soos dit hoort nie. Die tak se verbindingslyn met die boom het die tak lewendig gehou, maar met die koms van die vrugte het die tak veel minder vrug gedra.
            Die rede was dat die bloedstroom, die sap, ‘n belemmerde vloei na die tak gehad het. Dit het Samuel Gordon dadelik laat dink aan: Joh 15:4-8
“Ek is die wynstok, julle die lote. Wie in My bly, en Ek in hom, hy dra veel vrug; want sonder My kan julle niks doen nie.
            “As iemand in My nie bly nie, word hy uitgewerp soos die loot en verdroog, en hulle maak dit bymekaar en gooi dit in die vuur, en dit verbrand.
            “As julle in My bly en my woorde in julle, sal julle vra net wat julle wil hê, en julle sal dit verkry.
            “Hierin is my Vader verheerlik, dat julle veel vrug dra; en julle sal my dissipels wees.”
            Meer spesifiek: “Wie in My bly, en Ek in hom, hy dra veel vrug; want sonder My kan julle niks doen nie.”
Vir Gordon was die boodskap: Die Christen wat heelhartig aan Christus verbind is en in noue aanraking met God lewe, dra baie vrug.
Die losloop  Christen, met sy geringe omgang met die Here, het net hier en daar 'n vruggie, maar die losse verbintenis met Christus verhinder 'n oorvloedige lewe.
            Soos die HERE dit self stel: “Wie in My bly, en Ek in hom, hy dra veel vrug; want sonder My kan julle niks doen nie.”
Uit ons eie krag ly ons Christelike lewensgang skade. Die Gees van Christus, soos die sap van die boom, bring die vrug in ons Christenlewe voort.
Ons het nodig om tyd te bestee aan Bybelstudie, gebed en ook verootmoediging. "
“As ons deur die Gees lewe, laat ons ook deur die Gees wandel.” Gal 5:25.
            “Maar daar kom 'n uur, en dit is nou, wanneer die ware aanbidders die Vader in gees en waarheid sal aanbid; want die Vader soek ook mense wat Hom só aanbid.
“God is Gees; en die wat Hom aanbid, moet in gees en waarheid aanbid.” Joh 4:23-24 – Sjibbolet

Die Grootste Revolusie van alle Tye! – Hiertoe is jy en ek geroep!

Ons bevind ons vandag in die mees revolusionêre tydvak van alle eeue. Revolusie beskryf die gees van ons tyd. Wêreldleiers en die mensdom vrees wat die dag van more sal bring.

Die voormalige Britse leier, Sir Winston Churchill, het gesê: “Ons generasie mag stellig nie meer leef wanneer die einde van die beskawing aanbreek nie.”

Die voormalige Amerikaanse President Dwight Eisenhower, het gesê: “Sonder ‘n morele en geestelike ontwaking, is daar geen hoop vir die wêreld nie... eendag sal ons onsself sien verdwyn in die stof van ‘n atoomontploffing.”

Dag Hammerskjold, voormalige Sekretaris-generaal van die VN, het kort voordat hy in ‘n vliegramp in die Kongo gesterf het, gesê: “Ek sien geen hoop vir die wêreld nie. Ons het so hard probeer en so tragies misluk. Tensy die wêreld in die volgende paar jaar ‘n geestelike hergeboorte ondergaan, is ons verlore.”

Daar is hoop. Jesus sê: “Ek staan by die deur en Ek klop. As iemand my stem hoor en die deur oopmaak, sal Ek ingaan na hom toe en saam met hom maaltyd hou, en hy met My.
          “Aan hom wat oorwin, sal Ek gee om saam met My te sit op my troon, soos Ek ook oorwin het en saam met my Vader op sy troon gaan sit het.
          “Wie 'n oor het, laat hom hoor wat die Gees aan die gemeentes sê.” Openb 20-22
          So  maak jy die deur oop: “As jy met jou mond die Here Jesus bely en met jou hart glo dat God Hom uit die dode opgewek het, sal jy gered word; want met die hart glo ons tot geregtigheid en met die mond bely ons tot redding.” Rom 10:9-10

·       Hierdie is die uur vir gelowiges om betrokke te raak in wat gestalte kan kry as die grootste geestelike oes en ontwaking sedert die uitstorting van die Heilige Gees op Pinksterdag!


·       Hierdie is die uur waarvoor ons gebore is en Wedergebore is. “... mense se harte beswyk van vrees en verwagting van die dinge wat oor die wêreld kom.” Luk 21:26. Mense se harte is oop vir die ontvang van die Evangelie wat ek en jy vir hulle moet bring.


·       Nou is die tyd om die Goeie Nuus op elke denkbare wyse te versprei. Ons moet Jesus Christus se werk op aarde voltooi en die Getal volmaak. Ons dwing niemand nie, ons oortuig niemand nie, ons saai net die saad. Die Gees van God sal die Woord nooit leeg laat terugkeer nie.


Baie Gelowiges het nog nooit die Groot Opdrag ernstig opgeneem nie. Meeste redeneer dat Herders al die werk moet doen. Herders kry egter nie lammers nie, net skape kan lam en simbolies hou die Bybel ons, vir my en jou, voor as skape.

Herders is daar om na die welstand van die skape om te sien, hulle te voed en te versorg sodat hulle selfs twee-, drie- en vierlinge per keer kan lam.

Daar is drie goeie redes hoekom ek en jy siele moet inwin: Eerstens omdat Jesus ons die Groot Opdrag gegee het om dit te doen; Tweedens omdat die mensdom verlore is sonder Hom en Derdens omdat die mensdom honger na ‘n Verlosser, al besef sommige dit selfs nie.
        Ek en jy kan niemand dwing om Christus te volg nie. Ons vertel en getuig oor die Goeie Nuus en Sy wonderwerkende krag. Die heilige Gees laat groei.
            Die profeet Sagaria profeteer oor die toekoms (Sag. 4:6) “Nie deur krag of geweld nie, maar deur My Gees, sê die Here van die leërskare.”
            Die klem val op ‘n nuwe revolusie. Christus was seker in ons taal die grootste revolusionêr van alle tye.  Kyk net wat het Hy nie alles gedoen en bereik nie.
            Nechayev, ‘n Marxis wat in die tronk dood is na die sluipmoord op Tsaar Alexander 11, het gesê:
            “Die revolusionêr is ‘n toegewyde persoon. Hy stel nie sy eie belange voorop nie, ook nie sy eie gevoelens nie, nog minder het hy belang by eiendom, selfs sy naam is nie vir hom belangrik nie. Vir die revolusionêr is alles saamgevat in die enkele eksklusiewe gedagte – die een-passie revolusie!”
            Maar hierdie toegewydheid was nie oorspronklik Kommunisties nie. Dit was Jesus Christus wat gesê het:
            “As enigeen ‘n begeerte het om My dissipel te wees, laat hy homself verloën (homself alles ontsê, van homself en sy eie belange vergeet), sy kruis opneem en My volg (word gelyk aan My voorbeeld wat ek stel in lewe, daad en dood).
            Joshua 5: 15-15 is ‘n weerspieëling van wat tydens die Yom Kippoer Oorlog in Israel in Desember 1973 en Januarie 1974 gebeur het.
            “En terwyl Joshua by Jerigo was, slaan hy sy oë en kyk, en daar staan ‘n man teenoor hom met ‘n ontblote swaard in sy hand; en Joshua het na hom gegaan en hom gevra: Behoort u by ons of  by ons vyande?
            “En hy sê:  Nee, maar Ek is die leërowerste van die HERE; Ek het nou gekom. (Ek het pas gearriveer).”

            Die Hoof van die Leër van die HERE!

            Die gedagte verruk ‘n mens se sinne. Dis byna te groot vir die mens om te begryp.
            Die harde feite is dat ons in hierdie stadium onsself in ‘n geestelike oorlog bevind. Maar ons is beslis nie alleen nie. Jesus belowe: “En kyk, Ek is met julle al die dae tot aan die voleinding van die wêreld.” Matt 28:20
            Die tweede wat hieraan gelykstaan is dat Jesus Christus die Hoof van ons Leërmag is. Aan Hom is “alle mag gegee in die Hemel en op Aarde.” Matt. 28:18.
            En hier is die mees verstommendste aspek van die geestelike lewe wanneer Jesus in Lukas 10:19 sê:
            “Ek gee julle die mag om op slange en skerpioene (die okkultisme, towery, heksery en magte van die duisternis) te trap, en oor al die mag van die vyand, en niks sal julle ooit skade doen nie.”
            Eers is die mag aan Hom gegee, en toe gee Hy dit aan ons. Ek wat maak ons daarmee?
            Ons sukkel met ons perspektiewe omdat ons nie in en deur die Gees van God wandel nie.
            Saam met die Hoof van die Leërmag is etlike legioene Engele.
            Hulle was daar toe die Rooi See oopgekloof is, hulle het die mure van Jerigo  omgegooi, hulle was ook saam met Josafat toe die vyand skielik homself vernietig het, en met Jonathan toe hy die Filistyne bestorm het, saam met Dawid toe hy Goliat  verslaan het, saam met Daniël in die Leeukuil  en helaas, ook telkemale saam met  ons eie volk.
            Die sonde van ons tyd is wanpersepsies omdat ons toelaat dat ander invloede uitwerkings op ons het, in plaas daarvan om te bly in dit wat ons geleer was – die Waarheid en nogmaals die Waarheid soos vervat in die Bybel. Ons lewe onder die omstandighede in plaas van bo die omstandighede.
            God se Engele is oral. Hulle het nie visums en paspoorte nodig nie. Dit is ook hulle wat in Angola ons troepe keer op keer uit benoudhede gered het. Die getroue gebede aan die tuisfront, was nodig.
            Dis ook hulle wat die Yom Kippoer Oorlog in 1973 gewen het.
            Jare gelede het die SAUK-tv  ‘n program gebeeldsaai waarin sommige van ons eie soldate vertel het van Goddelike ingrypings in die Angolese-oorlog.
            Christen-soldate wat in die Viëtnam-oorlog geveg het, het later ook van vele Goddelike ingrypings vertel.
            In 11 Konings 6:15-17 beleef ons weer ‘n pragtige Goddelike ingryping:
            “En toe die dienaar van die man van God vroeg opstaan en uitgaan, was daar ‘n leër met perde en strydwaens rondom die stad.
            “En sy dienaar sê vir hom: Ag my heer, hoe sal ons maak?
            “Maar hy antwoord hom: Vrees nie; want dié wat by ons is, is meer as die wat by hulle is!
            “En Elisa het gebid en gesê: Here, open tog sy oë dat hy kan sien. En die Here het die oë van die dienaar geopen, dat hy kon sien, en meteens was die berg vol perde en waens van vuur rondom Elisa.”
            Van wie het Elisa gepraat? Van God se legioene Engele natuurlik. Die dienaar kon hulle eers nie sien nie, nie voordat God sy geestelike oë geopen het nie.
            Ook ons moet die plek bereik waar God ons geestelike oë vir ons open. Lees gerus die hele 11 Konings 6 en sien hoe Elisa die vyand verslaan het.
            Die leërmagte van die Hemel is gemobiliseer, maar ons is nie gereed nie. Ons verhouding met God en met mekaar is nie reg nie.
            Sonder geloof (Heb. 11:6) gaan daar ook niks gebeur nie. Voordat die Goddelike ingryping kan plaasvind, moet ons as volk verootmoedig, ons bekeer en terugkeer na die weë van God, ons God.
            Adam en Eva is nie uit die Paradys gesit omdat hulle gesondig het nie, maar omdat hulle nie bely het nie. Pleks van bely het Adam die skuld op Eva gepak en sy het die skuld op die slang gepak.

Met die vyandige vliegtuie wat in die Wêreld Handelsentrum in Amerika vasgevlieg is, het Amerikaners opnuut na die kerke gestroom, maar ‘n rukkie later was dit weer tot niet want niemand het bely nie.
            In Suid-Afrika kry die regering en ander die skuld vir alles, maar die Christene bely nie.
            Die sensusopname toon dat 32-miljoen Suid-Afrikaners sê dat hulle Christene is. Waar is hulle?  Waar is die Christen-stem?
            Op een van ons oorsese sendingtogte het ‘n Belg, nadat hy die Waarheid aangehoor het, gesê: “Dan was ons nog die hele tyd net papier Christene”.
            “As my volk, oor wie my Naam uitgeroep is, hulle verootmoedig en bid en my aangesig soek en hulle bekeer van hul verkeerde weë, dan sal Ék uit die Hemel hoor en hulle sonde vergewe en hulle land genees.
            “Nou sal my oë oop wees en my ore luister na die gebed van hierdie plek.” 1 Kron 7:14-15
            Maar gelowiges maak nie hulself bymekaar en bekeer hulself en verootmoedig nie. Die HERE se oë is oop en sy ore luister, maar daar gebeur niks.
            Liefdeloosheid, twis, haat, skinder, tweedrag is eerder aan die orde van die dag.
            Lees Jesus se laaste gebed in Joh 17 en kyk of daar van my en jou gepraat word.
            Ons moet heilig wees. Wat beteken heilig? Die Verklarende Woordeboek verduidelik dit so:
            Aan God opdra, aan God toewy.  Waardig maak.  Regverdig. As heilig erken. Heilig maak.  Volmaak, sonder sonde, godvresend.  Gewyd; met besondere gawes bedeel.  Eerbiedwekkend.  Trou.  Eerbiedwaardig.  Afgesonder. Pligsgetrou. Diep (eerbied). Heilig bly, onskendbaar bly; iets heilig glo, iets onvoorwaardelik glo; (hulle is nie almal heilig wat baie kerk toe gaan nie, 'n mens kan nie net na uiterlike vroomheid oordeel nie).
            “Maar as julle mekaar byt en opeet, pas op dat julle nie die een deur die ander verteer word nie.
            Maar ek sê: Wandel deur die Gees, dan sal julle nooit die begeerlikheid van die vlees volbring nie; want die vlees begeer teen die Gees, en die Gees teen die vlees; en hulle staan teenoor mekaar, sodat julle nie kan doen wat julle wil nie.
“Maar as julle deur die Gees gelei word, dan is julle nie onder die wet nie.
“En die werke van die vlees is openbaar, naamlik owerspel, hoerery, onreinheid, ongebondenheid; afgodery, towery, vyandskap, twis, jaloersheid, toornigheid, naywer, tweedrag, partyskap; afguns, moord, dronkenskap, brassery en dergelike dinge, waarvan ek julle vooraf sê, soos ek al vroeër gesê het, dat die wat sulke dinge doen, die koninkryk van God nie sal beërwe nie.” Gal 5:5-21
            As ons sê dat ons gelowiges is, dan behoort die Groot Gebod, die van Liefde, tekenend van ons bestaan te wees:
            “Maar die vrug van die Gees is liefde, blydskap, vrede, goedheid, lankmoedigheid, vriendelikheid, getrouheid, sagmoedigheid, selfbeheersing.” Gal 5:22. Ervaar jy dit in jou eie lewe?
            1 Pet 2:24 lees: “Deur die wonde van Jesus het daar vir ons genesing gekom.” So moet daar deur ons wonde ook genesing vir ander kom.
            Dan is ons lief vir mekaar en lief vir ander. Dan “Dra ons mekaar se laste” Gal 6:2. Dan “Bid ons vir mekaar.” Jak 5:26
            “Seën die wat vir julle vervloek, en bid vir die wat julle beledig.” Luk 6:28
            Die revolusionêre magte van die duisternis saai onheil, terwyl die revolusionêre magte van die Hemel, waarvan ons as Christene deel is, die situasie net mooi kan omkeer na ware vrede en heil.
            Om siele by Jesus Christus uit te kry vereis van ons ‘n ware Christen-lewenswandel, die uitdra van die Evangelie en gebed... en nogmaals gebed. Jesus het die Revolusie begin en vandag is dit die grootste beweging in die wêreld met die Bybel steeds as die top verkoper, maar ek en jy moet die Revolusie voltooi, die Getal volmaak.
            Waarvoor wag jy?
            Luister: https://www.youtube.com/watch?v=ad54bH-nQTM
            En: "Al loop hy en huil terwyl hy die saaisak dra, hy kom juigend terug terwyl hy sy gerwe dra." Ps 126:6
Bid deurentyd vir ‘n magtige geestelike Herlewing in SA. Raak betrokke, dis die Groot Opdrag – Sjibbolet

https://www.youtube.com/watch?v=ad54bH-nQTM&authuser=0