Ons kan die Engele in ons lewens beleef

 

Engele is by ons lewensloop betrokke. In 1973/74 se Yom Kippoer Oorlog had die Israeli’s geen kans om die oorlog te wen nie. Engele het die oorlog vir Israel beklink.
            Joshua 5:15-15 is ‘n weerspieëling van wat tydens die Yom Kippoer Oorlog gebeur het.
            “En terwyl Joshua by Jerigo was, slaan hy sy oë en kyk, en daar staan ‘n man teenoor hom met ‘n ontblote swaard in sy hand; en Joshua het na hom gegaan en hom gevra: Behoort u by ons, of  by ons vyande?”
            Hierdie man met die ontblote swaard was nie vir Joshua identifiseerbaar nie. Daarom vra Joshua hom: Behoort u by ons, of by ons vyande?
            “En die man sê:  Nee, maar Ek is die leërowerste van die HERE; Ek het nou gekom. (Ek het pas gearriveer).”
            Die man het geantwoord hy is die Hoof van die Leër van die HERE!
            Die gedagte verruk ‘n mens se sinne. Dis byna te groot vir die mens om te begryp.
            Ons sukkel met ons perspektiewe omdat ons nie in en deur die Gees van God wandel nie. Ons moet in Gees en Waarheid aanbid.
            “Maar daar kom 'n uur, en dit is nou, wanneer die ware aanbidders die Vader in gees en waarheid sal aanbid; want die Vader soek ook mense wat Hom só aanbid.
“God is Gees; en die wat Hom aanbid, moet in gees en waarheid aanbid.” Joh 4:23-24
            Saam met die Hoof van die Leërmag is etlike legioene Engele.
            Hulle was daar toe die Rooi See oopgekloof is, hulle het die mure van Jerigo  in mekaar laat tuimel, hulle was ook saam met Josafat toe die vyand skielik homself vernietig het, en met Jonathan toe hy die Filistyne bestorm het, saam met Dawid toe hy Goliat verslaan het, saam met Daniël in die Leeukuil en helaas, ook telkemale saam met ons eie volk.
            Die sonde van ons tyd is persepsies eb wanpersepsies omdat ons toelaat dat ander invloede op ons inwerk, in plaas daarvan om te bly in dit wat ons geleer was – die Waarheid en nogmaals die Waarheid soos vervat in die Bybel.
Ons lewe onder die omstandighede in plaas van bo die omstandighede.
            Ons soek na antwoorde op allerlei plekke in plaas daarvan om die aangesig van God te soek.
            God se Engele is oral. Hulle het nie visums en paspoorte nodig nie. Dit is ook hulle wat in Angola sommige Suid-Afrikaanse troepe wat op GOD vertrou het, telkens uit benoudhede gered het. Die getroue gebede aan die tuisfront, was noodsaaklik.
            Die Yom Kippoer Oorlog was die een oorlog wat die Israeli’s moes verloor het. Hulle was in die Sinagoges en ander bymekaarkomplekke besig toe die vyand onverwags toegeslaan het. Daar was geen vooraf waarskuwing nie.
            Israeli soldate het gedoen wat hulle kon. Sowat 400 van hulle het opgeruk na Berg Hermon waar hulle hulself teen sowat  sewe duisend Siriese magte vasgeloop het.
            Wedergebore Israelse weermagoffisiere vertel daarna in persoonlike onderhoude aan ons: die 400 Israeli soldate het besluit om te veg tot die dood toe om die Israelse Leër geleentheid te gee om op dreef  te kom.
            En toe skielik was daar die reuse hand uit die Hemel met die palm na die Siriërs, ‘n hand byna sy groot soos ‘n stel rugbypale in omvang. Die hand het die Siriese soldate laat omdraai en op die vlug laat slaan.
            Intussen  kom ‘n hele konvooi tenks ‘n ent daarvandaan soos ‘n dodelike slang teen die styl bergpad af langs die Golan Hoogtes op pad na Ein Gev. Die opdrag was dat hulle daarvandaan om die See van Galilea sou beweeg in die rigting van Tiberias en Porea Eilat en eenvoudig die wêreld voor hulle moes platvee.
            Hulle sou dit ook kon doen want daar was geen Israeli weermag om hulle te keer nie. Dit sou ‘n bloedige slagting gewees het.
            Maar skielik het die voorste tenk stilgehou en bly staan. Na die oorlog is vertel dat die soldaat in beheer van die voorste tenk vertel het hoe hy duidelik die opdrag oor sy radio gekry het om stil te hou en te wag, maar daar was nooit so ‘n opdrag gegee nie.
            Toe die lang konvooi  tenks oorkant die See van Galilea tot stilstand kom, kon duisende Israeli’s dit waarneem en het hulle alarm gemaak en die Israelse Leër had geleentheid om gereed te maak om terug te slaan.
            Die Israelse magte het verwoesting gesaai onder die Siriërs en hulle teruggedryf oor die Golan Hoogtes.
            Israelse militêre offisiere het vertel hoe tydens die oorlog, ‘n klein Israelse militêre eenheid oor ‘n heuwel beweeg het en onder in die vallei op ‘n horde van die vyand afgekom het.
            Die vyand het egter skielik die wit vlag gehys en oorgegee. Die groepie Israeli’s het die oormag tot binne ‘n krygsgevangekamp laat marsjeer. Eers toe die vyand veilig agter slot en grendel was, wou die Israeli’s weet: Waarom het julle oorgegee?
            Die vyand het geantwoord: Julle was ‘n totale berede oormag, ons sou nooit teen julle kon standhou nie.
            Die Israeli’s het net hulle koppe geskud want die meeste wis nie waarvan die vyand praat nie. Wedergeborenes onder hulle het toe aan hulle makkers verduidelik dat wat die vyand gesien het, niks anders was as  die Hoof van God se Leërmag en sy legioene Engele nie.
            Jare gelede het die SAUK-TV  ‘n program gebeeldsaai waarin sommige Suid-Afrikaanse soldate vertel het van Goddelike ingryping in die Angolese-oorlog.
            Gelowige soldate wat in die Viëtnam-oorlog geveg het, het later ook van vele Goddelike ingryping vertel wat in daardie oorlog plaasgevind het.
            Op een plek het gelowige manskappe se militêre voertuig tot byna teen sy bakwerk in modder vasgeval. Die vyand was op pad en daar was geen manier om daardie voertuig uit die modder te kry sodat hulle kon vlug nie. Die manskappe sou sekerlik sterf.
            Terwyl die manskappe bid het onsigbare hande die voertuig eenvoudig uit die modder gelig en die manskappe kon die vyand ontvlug.
            In 11 Kon. 6:15-17 beleef ons weer ‘n pragtige Goddelike ingryping:
            “En toe die dienaar van die man van God vroeg opstaan en uitgaan, was daar ‘n leër met perde en strydwaens rondom die stad.
            “En sy dienaar sê vir hom: Ag my heer, hoe sal ons maak?
            “Maar hy antwoord hom: Vrees nie; want dié wat by ons is, is meer as die wat by hulle is!
            “En Elisa het gebid en gesê: Here, open tog sy oë dat hy kan sien. En die Here het die oë van die dienaar geopen, dat hy kon sien, en meteens was die berg vol perde en waens van vuur rondom Elisa.”
            Van wie het Elisa gepraat? Van God se legioene Engele natuurlik. Die dienaar kon hulle eers nie sien nie, nie voordat God sy geestelike oë geopen het nie.
            Ook ons moet die plek bereik waar God ons geestelike oë vir ons open. Lees gerus die hele 11 Kon. 6 en sien hoe Elisa die vyand verslaan het.
            Paulus-hulle is in Hand. 16:25 in die tronk. Gaan kyk hoe GOD se Engele hulle daar uithaal.          
            Ons aanbid nie en bid ook nie tot Engele nie. Engele is dienende geeste wat deur GOD uitgestuur word.
“Is hulle nie almal dienende geeste wat vir diens uitgestuur word ter wille van die wat die saligheid sal beërwe nie?” Heb. 1:14.
            Ps. 91:11 “... want Hy sal sy Engele aangaande jou bevel gee om jou te bewaar op al jou weë.”
            Waar moet ek en jy wees (Ps. 91) om die beskerming van die Engele te geniet:

•          In die skuilplek van die Allerhoogste (strofes 1 & 2)
•          Die HERE ons toevlug maak (9)
•          Ons moet GOD waarlik liefhê (14)
•          Ons moet GOD aanroep (15)
         
Gaan kyk hoe bid Dawid in Ps. 34.
“Hierdie ellendige het geroep, en die HERE het gehoor, en Hy het hom uit al sy benoudhede verlos.
“Die Engel van die HERE trek ‘n laer rondom die wat Hom vrees, en red hulle uit. Ps. 34:7-8
            Dit is nodig om die hele Psalm te lees om die vereistes te sien wat GOD stel. As ons aan die vereistes voldoen, trek die Engel van die HERE ‘n laer van Engele om ons.
            En hier is Daniël se ondervinding: “Toe sê hy (die Engel) vir my: Wees nie bevrees nie, Daniël; want van die eerste dag af dat jy jou hart daarop gerig het om ag te gee en jou voor die aangesig van jou GOD te verootmoedig, is jou woorde gehoor, en om jou woorde ontwil het ek gekom;
“maar die vors van die koninkryk van die Perse het een en twintig dae lank teenoor my gestaan, en kyk, Mígael, een van die vernaamste vorste, het gekom om my te help; en ék het daar oorgebly by die konings van Persië.” Dan. 10:12-13.
Hier lees ons van ‘n stryd tussen Engele in die Hemele. Die Engel was deur GOD gestuur met ‘n boodskap vir Daniël. Die Engel sê aan Daniël dat GOD sy gebed al die eerste dag gehoor het en hom (die Engel) gestuur het, maar die vors (Engel) van Perse het hom 21 dae lank vertraag.
Toe kom die Aartsengel Migael, en help hom sodat hy die stryd teen die bose Engel van Perse kon oorwin en Daniël kon bereik.
Sulke dinge gebeur dus ook. Dis nie vir ons vreemd nie want Die Bybel leer duidelik in Efes. 6:11-18, dat ook ons worstelstryd nie teen vlees en bloed is nie:
“Trek die volle wapenrusting van God aan, sodat julle staande kan bly teen die liste van die duiwel.
“Want ons worstelstryd is nie teen vlees en bloed nie, maar teen die owerhede, teen die magte, teen die wêreldheersers van die duisternis van hierdie eeu, teen die bose geeste in die lug.
“Daarom, neem die volle wapenrusting van God op, sodat julle weerstand kan bied in die dag van onheil en, nadat julle alles volbring het, staande kan bly.
“Staan dan vas, julle lendene met die waarheid omgord, met die borswapen van die geregtigheid aan,
“en as skoene aan julle voete die bereidheid vir die Evangelie van vrede.
“Behalwe dit alles neem die skild van die Geloof op waarmee julle al die vurige pyle van die Bose sal kan uitblus.
“En neem aan die helm van verlossing en die swaard van die Gees — dit is die woord van God —
“terwyl julle met alle gebed en smeking by elke geleentheid bid in die Gees, en juis daartoe waak (hoe?) met alle volharding en smeking vir al die heiliges.”
Daniël stap ongeskonde uit die leeukuil en sê: “My God het sy Engel gestuur en die bek van die leeus toegesluit, sodat hulle my geen leed aangedoen het nie, omdat ek voor Hom onskuldig bevind is en ek ook teen u, o koning, geen onreg gedoen het nie.” Dan. 6:23
 Sadrag, Mesag en Abednégo word in ‘n vuuroond gegooi. Toe die omstanders weer kyk stap daar nie drie nie, maar vier mense in die oond rond.
“Daarop het Nebukadnésar gespreek en gesê: Geloofd sy die God van Sadrag, Mesag en Abednégo, wat sy Engel gestuur en sy knegte verlos het wat hulle op Hom verlaat het en die bevel van die koning oortree het, en wat hulle liggame oorgegee het om geen ander god te dien of te aanbid nie, behalwe hulle God.” Dan. 3:28.
Abraham stuur sy dienskneg om vir Isak ‘n vrou te gaan haal en sê aan die dienskneg: “Die HERE, die God van die Hemel, wat my uit my vader se huis en uit my geboorteland weggeneem het, en wat met my gespreek en vir my gesweer het met die woorde: Aan jou nageslag sal Ek hierdie land gee –  Hy sal sy Engel voor jou uit stuur, en jy moet vir my seun daar ‘n vrou gaan haal. Gen. 24:7
Dan is daar Petrus se geval: “Toe hy hom dan gegryp het, het hy hom in die gevangenis gesit en oorgegee aan vier wagte, elkeen van vier soldate, om hom te bewaak, met die bedoeling om hom ná die Paasfees voor die volk te bring.
“So is Petrus dan in die gevangenis bewaak; maar daar het ‘n aanhoudende gebed tot GOD deur die gemeente vir hom opgegaan.
“En toe Herodes hom wou voorbring, het Petrus in daardie nag tussen twee soldate geslaap, met twee kettings geboei, en wagte voor die deur het die gevangenis bewaak. (Petrus kon hoegenaamd nie ontsnap nie, maar nie ver daarvandaan nie het ‘n groep Christene eendragtig in ernstige gebed verkeer).
“En meteens staan daar ‘n Engel van die Here by hom, en ‘n lig skyn in die gevangenis. Toe slaan hy Petrus op die sy, maak hom wakker en sê: Staan gou op! En die boeie het van sy hande afgeval. (As Petrus nie wou opstaan nie sou die boeie seer sekerlik nie van sy hande afgeval het nie).
“En die Engel sê vir hom: Omgord jou en trek jou skoene aan! En hy het dit gedoen. Verder sê hy vir hom: Gooi jou bo-kleed om en volg my! (Let op, alles word nie vir Petrus gedoen nie, sommige goed moes hy self doen).
“En hy het uitgegaan en hom gevolg; en hy het nie geweet dat wat deur die Engel plaasgevind het, werklikheid was nie, maar hy het gemeen dat hy ‘n gesig sien. (Hy bly GOD-gerig: As die werklikheid dan vir hom te groot is, dan sien hy ten minste gesig).
“En toe hulle by die eerste en die tweede wag verbygegaan het, kom hulle by die ysterpoort wat na die stad lei, en dit het vanself vir hulle oopgegaan. En hulle het buitekant gekom en een straat ver gegaan, en dadelik het die Engel hom verlaat.
“Toe kom Petrus tot homself en sê: Nou weet ek waarlik dat die Here sy Engel gestuur en my gered het uit die hand van Herodes en uit al die verwagtinge van die Joodse volk.
“En nadat dit vir hom duidelik geword het, kom hy by die huis van Maria, die moeder van Johannes wat ook Markus genoem word, waar baie in die gebed bymekaar was.
(Let op wat nou gebeur) “En toe Petrus aan die deur van die poort klop, het ‘n diensmeisie met die naam van Rhodé gegaan om te hoor wie daar was.
“En sy het die stem van Petrus herken en van blydskap die poort nie oopgemaak nie, maar na binne gehardloop en vertel dat Petrus voor die poort staan.
“Maar hulle sê vir haar: Jy is van jou verstand af. Maar sy het volgehou dat dit so is. Daarop sê hulle: Dit is sy Engel. (Hulle dink dit is Petrus se Engel. Dit beteken ons het elkeen ‘n Engel, maar lewe ons so getrou naby aan die HERE dat ons van Engele bewus kan wees? Let egter ook op: Dit waarvoor hulle gebid het, is beantwoord, maar glo hulle dit nie. Petrus steur hom egter nie aan wat hulle dink of sê nie, hy hou aan met klop).
“En Petrus het aangehou met klop; en toe hulle oopmaak, sien hulle hom en was verbaas.
“Maar hy het vir hulle met die hand gewink om stil te bly en aan hulle vertel hoe die Here hom uit die gevangenis uitgelei het. En hy sê: Vertel dit aan Jakobus en die broeders. En hy het uitgegaan en na ‘n ander plek vertrek.
“En toe dit dag geword het, was daar onder die soldate geen kleine opskudding oor wat van Petrus geword het nie.
“Daarop het Herodes hom gesoek en nie gekry nie, en die wagte onder verhoor geneem en bevel gegee dat hulle tereggestel moes word. En hy het van Judéa weggegaan na Cesaréa en daar gebly.”
Wanner ons in die geloof bid sonder om te twyfel. Jak. 1:6, antwoord GOD nie net nie, Hy vernietig ook die oorsaak van ons probleme. Hand. 12:4-19.
Petrus wou in ‘n latere stadium verhoed dan Jesus Christus in hegtenis geneem word en pluk sy swaard uit, maar Jesus sê: “Sit jou swaard in sy plek terug; want almal wat die swaard neem, sal deur die swaard vergaan.
“Of dink jy dat Ek nie nou my Vader kan bid en Hy vir My meer as twaalf legioene van Engele beskikbaar sal stel nie?
Selfs Jesus Christus het geen Engel gebied om enigiets te doen nie. Hy sê dat as Hy wou dan kon Hy tot die Vader bid om 12 legioene Engele beskikbaar te stel.
Ons volg in Jesus Christus se voetspore. Hy het gesê ons sal doen wat Hy gedoen het, maar veel meer as wat Hy gedoen het. Net hier val ons vas. Ons doen nog eers wat Jesus gedoen het nie, wat nog van meer doen as wat Hy gedoen het. Die rede? Ons het nog geleer om in die Gees te lewe nie.
“Voorwaar, voorwaar Ek sê vir julle, wie in My glo — die werke wat Ek doen, sal hy ook doen; en hy sal groter werke doen as dit, omdat Ek na my Vader gaan.”
             Daardie liefdevolle verhouding met GOD vergestalt ook die volgende:
“En wat julle ook al in my Naam mag vra, dit sal Ek doen, sodat die Vader in die Seun verheerlik kan word.
“As julle iets in my Naam vra, sal Ek dit doen.
“As julle My liefhet, bewaar my Gebooie.”
Dis duidelik, as mens nie GOD se Gebooie en Insettinge bewaar nie, dan word jou liefde vir Hom bevraagteken.
“En Ek sal die Vader bid, en Hy sal julle ‘n ander Trooster gee om by julle te bly tot in ewigheid (Wie is hierdie Trooster?):
“die Gees van die Waarheid wat die wêreld nie kan ontvang nie, omdat dit Hom nie sien en Hom nie ken nie; maar julle ken Hom, omdat Hy by julle bly en in julle sal wees.” Joh. 14:12-17.
As die Heilige Gees dan in jou is, belewe jy geestes-ervaringe? Wat baat dit dan dat jy daarin roem dat jy kind van GOD is, maar GOD is nie in aksie in jou lewe nie!
Terug by Engele: Jy mag GOD vra om Engele beskikbaar te stel om jou in  verskillende situasies by te staan.
Al moet jy soms wag vir die antwoord of die oplossing, wag dan. Die enigste manier wat jy kan verloor, jou gebed onbeantwoord bly, is wanneer jy opgee.
Dis die aanhouer wan wen, want Jesus Christus sê: As jy (aanhou) klop sal daar vir jou oopgemaak word.
            “En Ek sê vir julle: Bid, en vir julle sal gegee word; soek, en julle sal vind; klop, en vir julle sal oopgemaak word.
            “Want elkeen wat bid, ontvang; en hy wat soek, vind; en vir hom wat klop, sal oopgemaak word.” Luk. 11:9-10
            Aktiveer jy Engele om jou en jou geliefdes te beskerm, om te help in verskeie situasies? Niks gebeur vanself nie, ons moet betrokke wees. So is ons erfgename van die Nuwe Testament wat Jesus vir ons nagelaat het, maar as ons nie die erfporsie op eis nie, besit ons dit nie.
            Ons aanbid nie Engele nie, ons aanbid God deur Jesus Christus. Ons vra dus God in Jesus se naam om vir ons Engele te stuur vir beskerming, hulp van watter aard ook al.
            “Pas op dat julle nie een van hierdie kleintjies verag nie; want Ek sê vir julle dat hulle Engele in die hemele altyd die aangesig sien van my Vader wat in die hemele is.” Matt 18:10
            En as ‘n kind vroeg sou gaan, dan het sy Engel hom kom haal. Daar is miljoene kinders in die Hemel, ook geaborteerde kinders. Mense kan liggame doodmaak, maar niemand kan ‘n siel doodmaak nie.    
            In Handelinge is Engele byna deel van die daaglikse lewe wat sigbaarheid betref.
            Dr Billy Graham (96) in sy boek “Angels: God’s Secret Agents” sê: “Daar is ‘n tragiese en wydverspreide onkunde tussen Christene oor die Bybel se lering rakende hierdie bonatuurlike wesens. Meeste het ‘n verdraaide beeld van hierdie geestelike wesens. Oral waar ek oor die wêreld heen gereis het was ek altyd bewus van hierdie Hemelse wagte wat my beskerm het. Ek het hulle nooit fisies gesien nie, maar in die gees was ek altyd bewus van hulle.”
            Graham se boek maak ook melding van Amerikaanse troepe in die Koreaanse oorlog. ‘n Groep vlootsoldate was vasgekeer en met die kwik 20 grade onder vriespunt he een van hulle, ‘n Gelowige vertel hoe hulle vir ses dae niks te ete gehad het nie.
            ‘n Wilde beer het op hulle afgestorm en skielik reg voor hulle dood neergeslaan. Skielik het ‘n Suid-Koreaner voor hulle gestaan en gesê: Kom, ek lei julle na veiligheid. Hy het hulle deur ‘n woud en berge na veiligheid gelei.
            Toe hulle die man wou bedank was hy weg. Net een verklaring, dit was ‘n Engel.
            Hoe aktiveer ons die Engele: Bloot deur God in die naam van Jesus te vrta dat sy heilige Engele ingryp in ‘n situasie.
            Die rol van Engele is meer omvattend as wat hier beskryf is. Koop vir jou ‘n konkordansie en slaan alles na oor Engele. — Sjibbolet

Liefde is 'n opdrag van God!

 Gehoorsaam jy... Die Koninklike Wet?
Die liefde is ‘n Koninklike Wet. “As julle ewenwel die koninklike wet volbring volgens die Skrif: Jy moet jou naaste liefhê soos jouself – dan doen julle goed.” Jak 2:8
Die skrif verwys telkemale daarna dat ons ander moet liefhê soos onsself.
Is dit moontlik om onsself lief te hê?
            Hierdie kan as ‘n meetinstrument beskou word: Hoe lief ek myself het, bepaal hoe lief ek ander het.
            Dit bepaal ook my geestelike stand in Christus.
Liv 19:18 “Jy mag nie wraakgierig of haatdraend teenoor die kinders van jou volk wees nie, maar jy moet jou naaste liefhê soos jouself. Ek is die HERE.
            Liv 19:34 “Die vreemdeling wat by julle vertoef, moet vir julle wees soos 'n kind van die land wat onder julle is. En jy moet hom liefhê soos jouself...”
            Matt 19:19 “Eer jou vader en moeder; en: Jy moet jou naaste liefhê soos jouself.”
            Matt 22:39 “En die tweede wat hiermee gelykstaan: Jy moet jou naaste liefhê soos jouself.”
            Wat ons ook hieruit leer is dat dit belangrik vir ons is om te weet in watter mate ons onsself lief het.
            Jy moet jouself liefhê. Ontlok hierdie woorde ‘n negatiewe reaksie by jou? Klink dit nie selfsugtig en egoïsties nie?
            Om jouself lief te hê beteken nie om selfgesentreerd te wees nie. Dit beteken om respek vir jouself te hê, om jouself te beskerm, vir jouself om te gee.
            Kyk weer na Liv 19:18: “Jy mag nie wraakgierig of haatdraend teenoor die kinders van jou volk wees nie, maar jy moet jou naaste liefhê soos jouself. Ek is die HERE.” Moet dus nooit ‘n wrok teenoor iemand hê nie, maar “hê jou
naaste lief soos jouself.” Of het jy ‘n wrok teen jouself, teen iemand anders?
            En moet nou nie in ‘n geredekawel vasval van “Wie is my naaste” nie. Jy weet tog dis jou huisgenote en diegene in jou daaglikse omgang.
            As jy dus nie vir jouself lief is nie, dan sal jy wraakgierig of haatdraend teenoor ander wees. Dit mag nie so wees nie, dan is daar fout met hoe lief jy jouself het. Is jy wraakgierig en haatdraend met jouself? Sommige mense is. Dit is al bewys dat as mens iemand haat, jy, en nie die ander persoon nie, die eintlike lydende party is.
            Daar was die vrou wat gebel het en gevra het ons moet haar besoek want sy verlang gebed omdat sy baie siek is. Op pad na die adres het die Heilige Gees reeds  deur die gawe van onderskeiding, dit duidelik gemaak dat haat die oorsaak van die vrou se ernstige siekte is.
            Met ons aankoms daar het ons dit so aan haar meegedeel. Sy het bevestig dat sy iemand verskriklik haat, maar het sy bygevoeg: “Darem nie meer so erg nie.”
Ons het aan haar gesê dat die haat nog steeds so verterend is, maar dat die bloedkanker intussen sulke ernstige afmetings begin aanneem het, dat haar gedagtes nou meer bevange is met haarself en die dreigende dood, as met die haat.
            Ons het haar ook meegedeel dat die haat die oorsaak van haar ernstige siekte is. Sy wou nog skerm, toe ons sê: “Nou goed, as daar nou ‘n geklop aan die voordeur is en jy maak oop en daar staan die mense wat jy so haat, sal jy bv sê: ‘Goeie naand, lank laas van julle gehoor. Kom in, maak julle tuis. Wat drink julle, tee of koffie?’
            En sy het geantwoord: “Nee, darem nie so nie.”
            Die vrou het nie haarself liefgehad nie. Sy het toegelaat dat die verterende haat haar liggaam vernietig.
            Alhoewel sy versoek het dat ons vir haar moet bid vir genesing, was 1 Tim 5:22 van toepassing: “Moenie haastig iemand die hande oplê nie, en moet ook nie met die sondes van ander gemeenskap hê nie. Hou jou rein.”
            As ons summier vir haar die hande opgelê het, het ons gemeenskap met haar sondes gehad, dan was ons onrein.
            Na berading het ons vir haar gebid en gevra dat God haar asseblief moet genees, maar op voorwaarde dat sy die haat los en vrede met die ander mense maak.
            Ons het haar drie jaar later in ‘n supermark raakgeloop. Sy het oorgeloop van vreugde en blydskap, sy was volkome genees.
            Mens weerspieël ook jou liefde vir jouself wanneer jy jou vader en moeder eer. Matt 19:19
            Moet mens die ongereddes ook liefhê? Natuurlik! Mark 12:30 “Jy moet die Here jou God liefhê (Hoe?) uit jou hele hart en uit jou hele siel en uit jou hele verstand en uit jou hele krag. Dit is die eerste gebod. Lees dit weer want dis nogal ‘n gewigte saak.
            En strofe 31: “En die tweede, hieraan gelyk, is dit: Jy moet jou naaste liefhê soos jouself. Daar is geen ander gebod groter as dié nie.”
            “Hieraan gelyk” beteken “dieselfde”. As ek God moet liefhê met my hele hart, my hele siel, my hele verstand, my hele krag, dan moet ek my naaste ook so liefhê. Die liefde vir God staan gelyk aan die liefde vir myself en my liefde vir ander. Hoekom? Omdat God vir jou en die ander persoon ewe lief is.
            In die lig hiervan, vra weer: Hoe lief het ek myself?
            Ongereddes is op pad na die ewige verdoemenis. As iemand nie vir jou en vir my liefgehad het nie, dan was ons ook nog op die verkeerde pad.
            “Wees aan niemand iets skuldig nie, behalwe om mekaar lief te hê; want hy wat 'n ander liefhet, het die (Koninklike) wet vervul.” Rom 13:8
            “Want dít: Jy mag nie egbreek nie, jy mag nie doodslaan nie, jy mag nie steel nie, jy mag geen valse getuienis gee nie, jy mag nie begeer nie, en watter ander gebod ook al, word in hierdie woord saamgevat: Jy moet jou naaste liefhê soos jouself.” Rom 13:9
            As jy jouself liefhet, respek het vir jouself, vir jouself omgee voor God en die mens, dan sal jy nie egbreek, doodslaan en dergelike dinge doen nie nie.
            En weer ‘n keer: “Want die hele (Koninklike) wet word vervul in een woord, naamlik: Jy moet jou naaste liefhê soos jouself.” Gal 5:14
            Het jy jouself lief? Hoeveel het jy jouself lief, ‘n bietjie of met jou hele hart? Kyk na die waarskuwing: “Maar as julle mekaar byt en opeet, pas op dat julle nie die een deur die ander verteer word nie.” Gal. 5:15
            Liefde is en bly die Groot Gebod. Wandel in die ware liefde en daar sal nooit probleme wees nie. Die liefde, is ‘n Koninklike Wet: “As julle ewenwel die Koninklike wet volbring volgens die Skrif: Jy moet jou naaste liefhê soos jouself – dan doen julle goed.” Jak 2:8
            As ons nie onsself lief het nie, kan ons nie ons naaste liefhê nie, nie mekaar liefhê nie, dan doen ons nie goed nie.
            Mense wat iewers in die lewe seergekry het, sien soms net die  veroordelende taal in die Bybel raak. Hulle besluit dan verkeerdelik dat dit God se wil is dat hulle sonder eerbied en liefde in die lewe behandel is.
            Die euwel van ons tyd is persepsies en wanpersepsies, pleks van feite. Met die korrekte lering verstaan hulle heelwat later in die lewe dat God vir hulle lief is, dat hulle hulself moet liefhê. Dan begryp hulle eers dat die nare ondervindinge van die verlede nie van God af gekom het nie.
            Daar is Christene wat onder die waan verkeer dat alhoewel ons ander mense moet liefhê, dit verkeerd is om jouself lief te hê. Hulle besef nie die een liefde gaan hand aan hand met die ander liefde, wat dieselfde liefde is nie.
            Die Bybel leer dat ons nederig moet wees, maar om onsself te verkleineer is verkeerd.
            Die wanbalans het in menige ouerhuis ontstaan. As ‘n kind grootword in ‘n omgewing van kritiek, van verbale mishandeling, van haat, van skande, dan sal so ‘n kind net so in sy volwasse lewe optree. Die rede daarvoor is dat die kind in vrees lewe, vrees dat hy of sy weer en weer kan seerkry. Hulle lewensstyl is een van voortdurende selfbeskerming.
            Jy voel bedreig deur diegene wat jou juis opreg liefhet en opreg vir jou omgee, selfs onder jou huisgenote, vir jou is dit te goed om waar te wees. Jy vertrou nie die vrede nie.
            Tog vind jy dit vreemd dat elke keer wanneer jy sulke opregte mense ‘n koue skouer gegee het, hulle selfs afgejak het, lelike dinge vir hulle gesê het, dan loop jy dae aaneen en worstel, want diep hier binne jou weet jy, jy het nie reg opgetree nie, maar o wee, om verskoning te maak, te sê jy is jammer, is ‘n byna onoorkombare struikelblok.
Sommige mense beleef ‘n misverstand oor wat berou is. Berou is nie perfeksie nie, maar ‘n verandering van rigting. Die verlore seun het gedink hy doen reg. Sy berou het beteken dat hy van rigting moes verander. Dit het beteken ‘n verandering van gedagte, ‘n verandering van hart en ‘n verandering van rigting.
Wanneer ‘n mens omdraai, dan is daar geen verwyte nie, geen oordele nie, net trane en blydskap.
“En toe hy nog ver was, het sy vader hom gesien en innig jammer vir hom gevoel [liefde van vanuit die Vader se hart gestraal vir sy seun] en gehardloop en hom omhels en hartlik gesoen. En die seun sê vir hom: Vader, ek het gesondig teen die Hemel en voor u en ek is nie meer werd om u seun genoem te word nie. Maar die vader sê vir sy diensknegte: Bring die beste kleed en trek hom dit aan, en gee 'n ring vir sy hand en skoene vir sy voete.  En bring die vetgemaakte kalf en slag dit, en laat ons eet en vrolik wees. (Hoekom?) Want hierdie seun van my was dood en het weer lewendig geword; en hy was verlore en is gevind. En hulle het begin vrolik word.” Hulle het ‘n partytjie, ‘n fees gehou.”
Maar alles is nie verlore nie. Daar is steeds tyd om in wasdom te groei en te genees.
Andrew Wommack verduidelik dit so: “Sommige mag dink, wel, toe ek die eerste keer aan God geglo het, toe het ek geglo dat ek geheel en al vergewe was en gereinig is en alles was goed, maar sedertdien het ek gesondig, ek het God weer gefaal.
“As jy gefaal het, het jy gefaal in jou verstandelike en emosionele deel, maar jou gees het nie gesondig nie.
“Jou gees is geseël soos wat ‘n vrou konfyt in ‘n fles plaas, kerswas oorgooi om dit lugdig te maak om alle onsuiwerhede uit te hou en draai dit dan styf toe. God het jou verseël en sonde kan nie jou gees binnedring nie.
“Jy het ‘n nuwe identiteit.
“Vir jou om ‘n verhouding met God te hê, moet jy met Hom verkeer en Hom aanbid, juis gebaseer op wie jy is in jou gees en nie jou vlees nie. Dit is in werklikheid die groot transformasie in die Christelike lewe, dat ‘n persoon se identiteit moet verander.
“Ons moet aan God verwant wees, nie gebaseer net op wat ons in die fisiese  doen nie, ook nie met wat in ons gedagtes aangaan nie, maar juis met wie jy in jou gees is op grond van wat Hy vir jou gedoen het. Dit is ‘n voltooide werk, en iets wat nooit verander nie, nooit fluktueer nie.
“Jy is geskape in geregtigheid en ware heiligmaking. Dit is die geestelike deel van jou. Jy moet gemeenskap met God hê in gees en in waarheid. Jy moet vasstaan in hierdie identiteit van wie jy in Christus is.”
            Kyk na die teenoorgestelde: As ‘n kind grootword in ‘n omgewing van
lof en bemoediging, dan sal so ‘n kind leer om te waardeer en selfvertroue opbou.
            As ‘n kind grootword in ‘n omgewing van verstandhouding, uitdruklike voorwaardes en waardes, wedersydse begrip, dan sal ‘n kind leer om geduldig te wees.
            As ‘n kind in ‘n regverdige omgewing grootword, dan sal hy ook regverdig wees. En as ‘n kind in ‘n veilige liefdevolle omgewing grootword dan sal hy glo en vertrou.
           So lei ‘n lewe van goedkeuring tot die ontwikkeling van selfwaardering. Aanvaarding en vriendskap lei tot liefde vir ander.
As mens nie so grootgeword het nie, dan kan jy soms ‘n buffel wees, ongenaakbaar, wreed, maar jy is en bly die een wat daaronder ly. Jy het jou eie grootste vyand geword. Jy is nie lief vir jouself nie en nou kan jy nie lief wees vir ander nie.
            As ons onsself liefhet en ons skep ‘n omgewing van lof, bemoediging, wedersydse begrip, veiligheid, goedkeuring, ondersteuning, aanvaarding, vriendskap en liefde, dan bereik ons wasdom as man en as vrou. Dan word so ‘n man en vrou mense van waardering, van oortuiging, van vertroue, van billikheid, dat sal hulle van goeie inbors wees en  liefdevol teenoor diegene om hulle.
            Om ander lief te kan hê, moet ons onsself liefhê.
•          Onthou: Die liefde, is ‘n Koninklike Wet: “As julle ewenwel die Koninklike wet volbring volgens die Skrif: Jy moet jou naaste liefhê soos jouself – dan doen julle goed.” Jak 2:8
            As jy nie die Koninklike wet volbring nie, dan doen jy nie goed nie. As mens nie die Koninklike wet kan volbring nie, dan moet mens met selfondersoek begin. Jy durf nie so voortlewe nie.
            Wanner mens begin om jouself te respekteer, wanneer mens vir jouself grense van behoorlikheid stel (soos dat jy nie vuil grappe sal vertel of die Bybel of die Hemel sal bespot, of jouself dronk drink nie, of iets neem wat nie aan jou behoort nie), wanneer jy die skoon dinge in die lewe ontdek, daardie dinge waarvan jy hou, dan word jou lewe klaar veel verdraagsamer, dan kan jy ander begin liefkry.
            God het ‘n plan om my en jou te laat floreer, maar dan moet ons, ons gebrek aan ware liefde erken, dit bely en vergifnis verkry. Die waarheid maak ons vry. As ‘n vreemdeling met jou ‘n gesprek gevoer het em van jou af weggaan, moet dit vir hom of haar voel asof hulle in die teenwoordigheid van Jesus self was.
            Mens wonder oor die baie egskeidings, gebroke huise. Is dit dan nie mense wat een mooi dag hul liefde aan mekaar verklaar het nie, wat belowe het om saam te staan tot die dood hulle skei nie, wat trou aan mekaar belowe het nie?
            Een van die twee, of beide, had nie hulself lief nie en daarom kon hulle nie mekaar liefhê nie. Beradings bring die probleem gou na vore. Die vraag moet selfs gevra word of hulle God liefgehad het met hul hele hart, hele verstand, hele siel en al hulle krag, toe hulle getrou het.
            Lees aandagtig hoe lees Efes. 5:28-29 “So behoort die mans hulle eie vroue lief te hê soos hul eie liggame. Wie sy eie vrou liefhet, het homself lief. (hoekom moet ‘n man sy eie liggaam liefhê?) want niemand het ooit sy eie vlees gehaat nie, maar hy voed en koester dit, net soos die HERE die gemeente.” Let op die vergelyking.
            ‘n Man moet sy eie vrou liefhê (Hoe moet hy haar liefhê?) soos wat hy sy eie liggaam liefhet. En, as hy sy eie liggaam liefhet, dan sal hy altyd sorg dat sy liggaam skoon is, dat hy sy liggaam voed en koester sodat hy altyd vir sy vrou lieflik en aanvaarbaar sal wees. Hy sal dit doen net soos wat die HERE sy gemeente liefhet en voed en koester.
            Strofe 31 lees dat die man sy ouers sal verlaat en sy vrou sal aankleef en liefhê omdat hulle “een vlees” is.  ‘n Man moet dus sy vrou liefhê soos wat hy sy eie liggaam liefhet. Hy moet haar sien as sy vlees, want hulle is een vlees.
            Ons moet die Koninklike wet gehoorsaam. Ons moet ander liefhê soos wat ons onsself liefhet. Vraag is: Hoe lief het ons onsself?
In ‘n mate is jy lief vir jouself. Jy trek altyd netjies aan. Jou hare is altyd netjies gekam, jy is glad geskeer, jou naels kort en skoon, jou skoene blink, jou werkplek is netjies, jou motor blink, jy is stiptelik, getrou. Die fondament is daar, bou net voort daarop!
            Paulus sê ons moet bo die omstandighede leef en nie daaronder nie. Jy moet aan die voorpunt wees, nie aan die stertkant nie. Wees lief vir jouself, beskerm jouself... en, doen dieselfde vir andere. Wat jy vir jouself gun, gun dit ook vir ander.
            Onthou jy die gelykenis van die talente. As jy jou talente gebruik gee Hy vir jou meer. So lief soos wat jy jouself het, wees ook net so lief vir ander!
            Om jouself lief te hê beteken nie om ‘n trotsaard vol wêreldse liefde en selfverheerliking en arrogant te wees nie. Wees dankbaar vir die mens wat God jou geskape het.
            Die bagasie wat bindinge in jou gees opbou weens self-verwerping, self-haat, onwilligheid om jouself te vergewe, is soos selfmoord. Wat beteken dit?
            Self-verwerping, om nie jouself te aanvaar soos wat God jou gemaak het nie en jouself daaroor te kasty, vreet soos ‘n vernietigende kanker aan jou lewe.
Dis presies dieselfde as wanneer jy jouself haat, wanneer jy ‘n smartvraat is, jouself blameer vir baie dinge, foute uit jou verlede teen jouself te hou, onvergewensgesind wees, met bitterheid rondloop oor wat ander aan jou gedoen het. So vernietig jy jouself geestelik, fisies en emosioneel.
            Jy sien jouself as waardeloos en wil bewys dat dit nie so is nie, daarom druk jy jouself in onredelike prestasies in sodat jy goed kan voel. Jy wil jouself gereeld bewys terwyl jy eintlik niemand beïndruk nie.
            Baie mense is nie tevrede met hul eie gesigte en liggame nie. Hulle beskou hulself as dom, lelik, onnosel, lomp, nikswerd... en dit terwyl hulle in die beeld van God geskape is. As jy fout met jouself vind, vind jy fout met God se handewerk. Gen 1:26
Ons moet dankbaar wees. Ons moet sê soos Dawid “Ek loof U, omdat ek so vreeslik wonderbaar is; wonderbaar is u werke! En my siel weet dit alte goed.” Ps 139:14. Ek en jy is ook “vreeslik wonderbaar!”
            Dawid het nie gespog nie, maar hy het sy dankbaarheid teenoor God betuig.
            Ons moet onsself vergewe! (Hoekom?) Want God het ons vergewe. “So ver as die ooste verwyderd is van die weste, so ver verwyder Hy ons oortredinge van ons.” Ps 103:12
            Noord en suid is sowat 19 200 km van mekaar af, maar die afstand tussen oos en wes, is onmeetbaar.
            Is jy nou in die moeilikheid by die HERE? Stellig nie.  “Welgeluksalig is hulle wie se ongeregtighede vergewe en wie se sondes bedek is.” Dit is die sleutel: “Welgeluksalig is die man aan wie die Here die sonde nie toereken nie.” Rom. 4:7-8
            “Daarom, rig die slap hande en die verlamde knieë weer op; en maak reguit paaie vir julle voete, sodat wat kreupel is, nie uit lit raak nie, maar liewer gesond gemaak word.” Hebr 12:12-13 – Sjibbolet

Jy kon lankal vry gewees het

 

“So lok Hy u dan ook uit die mond van die nood na ‘n onbeperkte ruimte en na die behaaglikheid van u tafel wat vol is van vet spyse.” Job 36:16
            As Job geluister het en gehoorsaam was aan die stem van God en Sy roede, en  homself onderwerp het aan God se kastyding en geduldig sy ellende gedra het, en na God gekeer het, dan sou God lank reeds vir Job uit sy moeilikheid uitgebring het na ‘n groter ruimte waar daar geen engte sou wees nie – uit die eng vasgekeerde  omstandighede waarin Job was, na vryheid, na ‘n groot oop plek soos wat Dawid in Ps. 4:2 ondervind het:
            “As ek roep, verhoor my, o God van my geregtigheid! In benoudheid het U vir my ruimte gemaak; wees my genadig, en hoor my gebed!” Ps 4:2
            Dit het betrekking op die fisiese sowel as die geestelike. In die fisiese was Job in groot moeilikheid, armoede en ellende vasgekeer. Soos wat Job dit self stel in Job 19:8 “Hy het my weg toegemuur, sodat ek nie verby kan nie; en oor my paaie het Hy duisternis gesprei.”
            As Job hierdeur nederig sou word en verootmoedig het dan sou God hom uit sy teenspoed verlos het en die HERE sou hom in ‘n groot ruimte van  voorspoed geplaas het. So sê die HERE self.
            Job sou soos Dawid kon sê: “Ek wil juig en bly wees in U goedertierenheid, omdat U my ellende aangesien, my siel in die benoudhede geken het en my nie oorgelewer het in die hand van die vyand nie; U het my voete op vrye grond laat staan.” Ps 31:8-9    
            Dawid is self deur diep donker waters van groot benoudheid. Hy kon onder daardie omstandighede voortgeleef het, homself bejammer en verknies het, of hy kon homself oprig, verneder en sy saak met God regmaak.
            In ‘n geestelike sin beland mense ook op ‘n plek waar hulle vasgekeer sit. Hulle kan nie vry uitkom in die oopte van genade en diensbaarheid nie.
            Hulle het geen vryheid in die HERE nie, hulle geloof faal, hulle het haas enige hoop. Hulle is vasgevang in hul eie medelye, klaagliedere, so asof hulle in ‘n tronk is.
            Sommige gaan kerk toe, maar sit daar byna leweloos.
            Moeilikhede en omstandighede het beheer oor hul lewens oorgeneem. Hulle weet nie eers wanneer laas hulle iemand met blydskap uit die Woord bemoedig het nie. Hulle kan net oor hul probleme gesels.
            Hoe langer hulle in hierdie toestand verkeer, hoe erger word dit, so erg dat hulle later aanvaar dis maar hulle lot.
            Die antwoord lê daarin om jouself te verneder en te verootmoedig. Maak jou sake reg met God sodat Hy jou uit daardie verknorsing kan haal en jou in die vry oop ruimtes kan inbring.
            Dan dek die HERE vir jou ‘n tafel vol vet spyse, die beste proviand, snoeperye, die beste koring, goeie vleis, en beste van alles is, dat jou tafel oor en oor gedek sal word.
            Ps. 63:5-9 sal vir jou waar word: “Só sal ek U prys my lewe lank, in u Naam my hande ophef.
            “Soos met vet en vettigheid sal my siel versadig word, en my mond sal roem met jubelende lippe as ek aan U dink op my bed, in die nagwake oor U peins.
            “Want U was ‘n hulp vir my, en in die skaduwee van u vleuels sal ek jubel.
            “My siel is aan U verkleef; U regterhand ondersteun my.”
            Komaan, gaan met ‘n gebroke hart na Jesus en maak reg want jy durf nie langer so voortgaan nie. Jesus heel die gebroke harte.
            “Want so sê die Hoë en Verhewene wat in die ewigheid woon, Heilig is sy Naam: Ek woon in die hoogte en in die heilige plek en (waar ook?) by die verbryselde en nederige van gees (hoekom?) om te laat herlewe die gees van die nederiges en te laat herlewe die hart van die verbryseldes.” Jes 57:15
            “Daarom, rig die slap hande en die verlamde knieë weer op;  en maak reguit paaie vir julle voete, sodat wat kreupel is, nie uit lit raak nie, maar liewer gesond gemaak word.”  Heb 12:12-13 – Sjibbolet

In die naam van God — Dink!

Demosthenes, die groot Atheense patriot, het, toe dit geblyk het dat sy landgenote te verward en verdeeld was om die Masedoniese aanslag teen te staan, het hy luidkeels uitgeroep: “In die naam van God, ek smeek julle: Dink!
            Vir ‘n geruime tyd daarna het die Athene, Demosthenes bespot. Dit was te begrype want Masedonieë  was nogal ver en daar was baie tyd.
            Hulle kon nie dink dat hulle oormore sou moes boedel oorgee nie.
            So is dit met ons Christene vandag. Ons is te traag om te dink. Ons kon lankal besef het ons gaan uitlewer word, keer op keer. Dink!
            Moenie vrees nie, moenie praat nie, moenie vlug nie.... Dink!
            Donderdag 2 April 2015 is 147 Christen studente op ‘n Keniaanse kampus vermoor. Die Islamitiese studente is vrygelaat. Meer sulke voorvalle kom die afgelope tyd in Afrika en ook reg oor die wêreld voor.
            Hoeveel Christene is nie sedert 1994 op plase, dorpe en stede in Suid-Afrika vermoor nie – Dink!
            Die Demosthenes pleidooi word vandag herhaal: In die naam van God, ek smeek julle – Dink!

Die vierjarige Christen meisietjie Hudea, gevries weens vrees, hensop haar bebloede handjies in die Atmeh-vlugtelingskamp op die grens van Sirië toe sy ‘n joernalis se kamera aangesien het vir ‘n geweer. Haar pa is doodgeskiet. Haar bebloede handjies is skynbaar weens die vlug grondlangs. Mens hensop met jou hande oop, maar sy kon skynbaar nie haar beseerde handjies oopkry nie. Die mamma en die drie  kindertjies het sedert 2012 in die Atmeh-kamp gewoon en  twee weke gelede die noodlottige besluit geneem om na Idib te vlug, maar tevergeefs, want Idib is kort daarna deur Al-Qaeda oorgeneem, aldus the UK Daily Mail.

Die aanslag teen die Christendom is wêreldwyd aan die toeneem en dit lyk of die Christendom magteloos is. Is dit?
            ‘n Mens sonder beginsels, is ‘n beginsellose mens. ‘n Volk sonder beginsels, is ‘n onbeskaafde volk.
            As ‘n Christenvolk sy beginsel vergeet, oorboord begin gooi, dan verval hy in barbarisme.
            As ‘n volk gesonde beginsels verwerp, word hy ‘n dweepsieke volk.
            Die denkende Christen moes deur die jare gelede sy gesonde beginsels op verskeie fronte verdedig het. Vandag het hy weer geleentheid om dit te doen:
            Die eerste is  teen die verwaarlosing van alle beginsels wat lei tot sosiale en persoonlike agteruitgang.
            Die ander is die aanname van vals beginsels wat die wêreld in anargie dompel.
            Die gevaar op die oomblik is dat ‘n groot deel van ons volk vergeet het dat ons Christen- en politieke beginsels ooit bestaan.
            Ons moet onsself verdedig deur vernuwing van ons bewuste ware geestelike, morele, politieke en ekonomiese beginsels. Ons moet dit ook onverwyld in elke sektor van ons  volks-, gemeenskaps- en gesinslewe toepas.
Dit is die Christen se identiteit in Christus wat uitgeleef moet word. Maar as die Christen nie langer met sy eie identiteit bekend is nie, het ook hy net ‘n klinkende simbaal geword.
Die Christene is gered om ‘n verskil te maak, maar gebeur dit?  Is ons werklik anders? Ons behoort te wees! Die Lig het geen gemeenskap met die duisternis nie.  Die Lig moet die duisternis verdryf deur die Koninkryk van God uit te bou.
Mens moet in gedagte hou dat daar vele vreemde bedmaats onder die linkses in Rusland, Sjina en elders is, asook onder die linkse  intellektuele liberales in die Weste. Hierdie mense glo onwrikbaar dat Kommunisme – ook bekend as “Ware Sosialisme”  of  “1917 Sosialisme” – gekaap was deur Stalinisme en Maoisme, en dat dit nooit ‘n werklike kans op sukses gegee was nie.
Hierdie mense – aangedryf deur ‘n sogenaamde Godsdienstige verbintenis tot sosiale kollektivisme – glo dat Kommunisme nog nie waarlik gebore is nie, wat nog te sê van vernietig is. Hulle werk steeds in die rigting van ‘n ware Kommunistiese renaissance.
Die ekstremistiese Islam glo hy doen God ‘n guns deur die Christene te vermoor.
Dit glo hulle omdat hulle nog nooit soos ek en jy met die Waarheid kennis gemaak het nie. Hoekom nie? Omdat ek en jy hulle nie die Waarheid aanbied nie?
Saulus, voordat hy Paulus geword het, was ‘n terroris. Vandag is daar miljoene terroriste. Die belangrikste vraag nou is: Hoe moet ons as gelowiges optree teen hierdie Saulusse?
            “Nie deur krag of deur geweld nie, maar deur my Gees!” Sag 4:6
            Die terroriste maak gebruik van krag en brutale geweld, maar die Gelowiges volg ‘n veel meer uitnemender weg,
“Maar daar kom 'n uur, en dit is nou, wanneer die ware aanbidders die Vader in gees en waarheid sal aanbid; want die Vader soek ook mense wat Hom só aanbid. God is Gees; en die wat Hom aanbid, moet in gees en waarheid aanbid.” Joh 4:23-24
            Gelowiges is ‘n revolusionêre aanvalsmag in eie reg: “Maar Ek sê vir julle: Julle moet jul vyande liefhê; seën die wat vir julle vervloek, doen goed aan die wat vir julle haat, en bid vir die wat julle beledig en julle vervolg (hoekom?) sodat julle kinders kan word van julle Vader wat in die hemele is; want Hy laat sy son opgaan oor slegtes en goeies, en Hy laat reën op regverdiges en onregverdiges.” Matt 5:43-44
            Die opdrag van God is dat ons hom in Gees moet aanbid. Waarom moet ons, (ek en jy), hoegenaamd bid?
            Wanneer die Here sê dat Sy Liggaam vir die regering moet bid, dan is dit ‘n opdrag wat eenvoudig uitgevoer moet(!) word, al is dit ook hoe moeilik.             As daar nie vrede in die land is nie, dan is dit heel waarskynlik omdat die Liggaam nie vir die regering bid nie.
            Die Here is in beheer van die koning. In Spreuke 21:1 lees ons: “Die koning se hart  is in die hand van die Here soos waterstrome; Hy lei dit waarheen Hy wil.”
            Die nuwe vertaling lees: “Die Here kan ‘n koning se gedagtes net so maklik beheer soos water in ‘n leivoor en dit stuur in die rigting wat Hy wil!” Skitterend!
            So, kom maar gerus u plig en opdrag na en bid vir die Owerhede. Hulle dink maar hulle is in beheer.
            Luister wat sê Psalm 149 oor “Lofgesang en Oorlogswaard”:

            Halleluja! Sing tot eer van die Here ‘n nuwe lied,
            Sy lof in die vergadering van die gunsgenote!
            Laat Israel hom verheug in sy Maker;
            Laat die kinders van Sion juig oor hul Koning!
           Laat hulle Sy naam loof in koordans,
            Hom psalm sing met tamboeryn en siter.
            (Hoekom?)
            Want die Here het ‘n welbehae in Sy volk;
            Hy versier die ootmoediges met heil.
            Laat die gunsgenote juig in heerlikheid;
Laat hulle jubel op hul bedde.
Lofverheffinge van God is in hulle keel,
en ‘n tweesnydende swaard in hulle hand;
(Hoekom?)
om wraak te oefen onder die heidene,
strafgerigte onder die volke;
om hulle konings met kettings te bind
en hulle edeles met ysterboeie;
(Hoekom?)
om ‘n vonnis wat opgeskrywe is,
aan hulle te voltrek.
‘n Eer is dit vir Sy gunsgenote!
Halleluja!
         
            Dus, nie deur krag of geweld nie, maar deur lofprysinge aan die God van ons heil. Lofprysinge is ‘n tweesnydende swaard: Terwyl ons God loof, oefen ons ook wraak uit onder die heidene, strafgerigte onder die volke, om hulle konings in kettings te bind en hulle edeles met ysterboeie…… Waarom? Om ‘n vonnis te voltrek wat reeds opgeskrywe is!
            In 2 Pet. 1:2 staan: “Mag genade en vrede vir julle vermeerder word  (hoe?) deur die kennis van God en Jesus, onse Here!
            As ons bely dat ons Christene is dat is ons verplig om die kennis wat die Woord ons bied, op te doen...  sodat genade en vrede vir ons kan vermeerder.
            As ons ooit in ons lewens gebid het en God veertrou ghet, dan is dit nou. – Sjibbolet

Moenie ons kinders vermoor nie!

Die koning van Egipte het destyds besluit dat derduisende babaseuntjies vermoor moes word. Net meer as duisend jaar later het ’n soortgelyke besluit van Herodus gelei tot die doodmaak van kinders by Bethlehem.
            Nou, 2 000 jaar later het die “konings” van al die Westerse Christenlande ook besluit dat  babas doodgemaak mag word deur middel van aborsie.
            Maar pas is in Amerika besluit dat kinders – hulle sogenaamde kinderregte ten spyt – ook geestelik vermoor mag word.
            Die Amerikaanse Hoërhof het besluit dat Federale wetgewing van 1998 wat daarop gemik was om pornografie op die Internet aan bande te lê, ongrondwetlik is.
            Die hof het besluit om pornografie vanaf die Internet te verban ‘n “skending van die regte van vryheid van spraak” sou wees.
            Intussen rol pornografiese sedebedorwende videos op die Internet voort in biljoene huishoudings wêreldwyd. Daar is letterlik meer as 800 miljoen webblaaie oor pornografie binne bereik van elke kind.
            Die Amerikaanse Kongres wou die wet van krag maak om minderjariges teen pornografie te beskerm. Mens vind dit lagwekkend en pateties dat die sogenaamde wet al in 1998 geformuleer is, en dat dit nou eers toegepas sou word.
            Die een oomblik – skynbaar wanneer dit die politici pas – word kinderregte hoog aangeskryf, die volgende oomblik loop die media oor van kinderverkragtings en kindermishandeling.
            Die Amerikaanse departement van Justisie het die wet aan die Hoërhof voorgelê sodat die hof kwansuis die wet kon beoordeel.
            Die betrokke wet maak daarvoor voorsiening dat mense wat die Internet gebruik, gedwing word om gebruik te maak van kredietkaarte of toegangskodes en persoonlike ID nommers.
            Oortreders kan tot ses maande tronkstraf en boetes van tot R300 000 per dag opgelê word.
            Die besluit  van Regter Anthony Kennedy beteken dat die Departement van Justisie niemand kan vervolg ingevolge die sogenaamde “Kinder-aanlyn Beskermingswet” nie.
            Kennedy het die saak terugverwys na die Federale Hof in Filadelfia. Daar moet kwansuis gekyk word of die blok en filter van sagteware nie “minder beperkend as die betrokke wet is nie.”
Ware Christene staan verbaas en is besorg oor die vloedgolf van permissiwiteit, pornografie en perverse immoraliteit wat oor SA en die Wester Wêreld land spoel.  Dis of die hekke van die hel oopgeswaai het en ‘n stroom dodelike gif uitgespuug het wat alles voor hom wegvee.
Nogtans is die Christen-stem stil, veral in ‘n land soos Suid-Afrika waar meer as 32 miljoen Suid-Afrikaners op hulle sensusvorms ingevul het dat hulle Christene sou wees.
Die meeste kerke neem geen standpunt nie, inteendeel, hulle akkommodeer hierdie onheile deur skielik die sedewette van die Bybel weg te redeneer met allerlei liberale denke.
Daar word elke Sondag sowat 8 000 preke in Christen kerke in SA gelewer en nog sowat 4 000 boodskappe by weeklikse bidure, maar mens hoor nie die Kerk nie.  Waar is die Kerk wat hierdie dinge moet aanpreek, wat leiding en rigting moet gee, wat standpunt moet inneem?
Sowat 3,7 miljoen Blankes alleen, het in die jongste sensus gesê dat hulle Christene is wat aan Christen-kerke behoort.  Waar is hierdie Christene?
Besef hulle nie hulle is Christene sodat hulle ‘n verskil aan ‘n land, volk en ‘n gemeenskap moet maak nie?
Besef hulle nie God hou hulle verantwoordelik vir die situasie nie?
Dit is nodig dat die profetiese stem gehoor word:  As die behoudendes nie die goddelose gaan waarsku en by God gaan intree oor hierdie alles-vernietigende toestand nie, sal God die goddeloses uitdelg, maar hulle bloed van  sal van die behoudendes geëis word. Eseg. 3: 18-21.
Die ruggraatlose, kleurlose, passiewe indiwidue staan algemeen bekend as die “Swygende Minderheid” en vorm die brug waaroor die stroom van verdorwendheid voortbeweeg om die lewens van die opkomende geslag te ondergrawe en tot ondergang te lei, om kinders soos vuilgoed oor die afgrond te stoot.
Ons handelswyse van vandag, bepaal die toekomstige toestande.  As daar nie nou dadelik opgetree word nie, gaan die Christene van SA en die Weste hulself  vernietig. Dit sal die SA en die Westerse lande se ondergang beteken.
Daadwerklike optrede kan  hopelik nog doeltreffend kan wees.  Dit is nodig dat mense teen hulself beskerm word.
Sogenaamde menseregte, in plaas van die insettinge van die Almagtige God, sê daar bestaan geen absolute norme vir sedelike gedrag nie, elke persoon het die reg om te besluit wat sy of haar gedragspatroon moet wees ten einde geluk volkome te verseker met die mins moontlike voorbedagte nadeel vir die ewenaaste – en dit, asof ‘n kind vir homself kan besluit.
            Die eindresultaat van so ‘n benadering of dan belydenis, is presies voorspelbaar.  Algemene aanvaarde gedragspatrone, gebaseer op Christen-etiese beginsels deur die eeue gehandhaaf, stort nou ineen en die sedelike spierkrag en karaktervastheid van die Suid-Afrikaners en die Weste is besig om te verkrummel.
            Die ontstellende feite van aborsies, verkragtings, geslagsiektes, dwelmverslawing, ens., bevestig die waarheid hiervan.
            Die kernwaarheid is nie dat Suid-Afrikaners as sulks so versleg het nie, maar die handelswyse wat voorheen as verkeerd beskou is, ongeag deur hoe baie of hoe min te bedryf is, word nou as algemeen normaal aanvaar!
            Ouers wat nog graag hulle kinders in ‘n gemeenskap wil laat grootword waar hulle nie aan sulke ondermynende invloede blootgestel is nie, is aan die kwyn soos wat selfs die ouers hulle nou aan welluste oorgee.
            Dank God daar is darem nog jongmense wie se helder en openhartige blik getuig van ‘n skoon sedelike lewe.  Dit is hierdie jongmense wat se denkwyse gemobiliseer moet word om nie alleen ‘n magtige bolwerk te vorm teen die permissiewe aanslag en vernietiging nie, maar om ook as doeltreffende teenwig te dien.
Daardie jeug sal deur die herinnering aan die Waarheid en die Lig, weer die suiwere gesindhede moet opwek. Die jeug is op homself aangewese wat sy toekoms betref.
Die behoud van die gesonde, sterk Christen-morele kode is nie die taak van enkele kampvegters nie.  Dit kan ook nie deur wetgewing verskans word of deur ‘n bykomende 200 000 polisiemanne aan bande gelê word nie, maar moet liewer bestendig word deur ‘n samelewing wat bewus gemaak word van die toestand van rampspoed en tot optrede geaktiveer word.
            As die bestryding van besoedeling die taak van elke regdenkende burger is, is die stryd teen die veel gevaarliker sedelike besoedeling des te meer jou (die leser hiervan) se verantwoordelikheid.
            Onheilspellende kragte is tans in SA aktief om die volbringing van ons Godgegewe bestemming teen te werk.  Die liberale geroep het veroorsaak dat ons nou in pas is met die res van die wêreld wat ook morele beperkings op literatuur, films, teater en vermaak oorboord gegooi het.
            Ons is almal skuldig want ons het toegegee en ons eie Godsdiens-oortuigings en tradisies, wat van ons ‘n nasie van erns en voorspoed gemaak het, oorboord gegooi.
            Dit is tyd dat die vroue van SA in opstand kom oor die wyse waarop die vroulike liggaam in die media, klubs, die TV en die Internet uitgebuit word deur gewetenlose geldmafia’s.
            Skooldogters moet hulle by die protes van die vroue skaar.  Studente aan ons universiteite en technikons moet ook by hierdie protes inval.
            Mans sal as die beskermer van die vrou en as hoof van die huisgesin, hulle regmatige plek moet inneem om hul gesinne in Gees en in Waarheid te lei, die liefde en die dissipline terugplaas in hul huise.
            Ouers sal moet terugkeer na die huisaltaar.
            Alle Christene sal landswyd oral gebedswake moet begin of by bestaande gebedswake moet inskakel.
            Ons almal sal moet verootmoedig, na God en Sy weë moet terugkeer, of die verbysterende en aaklige gevolge moet dra.
            Soos ‘n Jona van ouds bring ons die profesie van lewe en dood.  As Ninevé hom nie bekeer het nie, het ook hy in vlamme opgegaan soos Sodom en Gomorra.
            Maak jou keuse nou, begin werk, want die nag kom nader!
            Oor al hierdie aangeleenthede is daar Christene in Amerika wat hulle nou gaan afskei in ‘n eie staat want hulle besware teen al hierdie euwels word deur die Bush-regering geignoreer!
            Inderdaad het ons het die oorlog teen die norme verloor.
            In 1975 waarsku die U.S. Congressional Record dat hy ‘n publikasie genaamd “The Naked Communist” bekom het wat strategiese beplanning bevat oor hoe om die Weste – Suid-Afrika inkluis – te verlam.
            Die waarskuwing is destyds wyd in Suid-Afrika gepubliseer.  Wanneer mens vandag na die waarskuwing kyk, dan is dit duidelik dat ons die oorlog teen die norme verloor het:

•          Vernietig alle sedelike norme deur die bevordering van pornografie en sedeloosheid in boeke, tydskrifte, rolprente, radio, TV en die vrye pers;
•          Doen weg met alle wette wat onsedelikheid veroordeel deur dit die benaming “sensuur” te gee en dit ‘n skending van die vryheid van die pers en die indiwidu te noem;
•          Verkry beheer oor die sleutelposisies in die radio, TV en rolprente;
•          Verkleineer die huisgesin as instelling.  Moedig vrye liefde aan en vergemaklik egskeidings;
•          Beklemtoon die noodsaaklikheid om kinders weg van negatiewe invloed van hul ouers op te voed.  Skrywe vooroordeel, geestelike belemmering, verstandelike vertraging by kinders aan die onderdrukkende invloed van hul ouers toe;
•          Beskou homoseksualiteit, ontaarding en vrye liefde as normaal, natuurlik en gesond;
•          Verkleineer kulturele standaarde deur alle vorme van kuns uitdrukkings te verlaag.  Vervang goeie kultuurskatte in parke en openbare geboue met mismaakte, lompe en betekenislose vorms;
•          Infiltreer die kerke en vervang geopenbaarde godsdiens met sosiale godsdiens.  Trek Die Bybel in twyfel en dring aan op intellektuele volwassenheid wat nie ‘n ”godsdienstige stut” nodig het nie;
•          Skakel gebed en enige ander godsdienstige beoefening by skole uit;
•          Dra sommige van die polisie se regte van arrestasie oor aan sosiale instansies.  Beskou alle gedragsprobleme as sielkundige afwykings wat slegs deur psigiaters verstaan en behandel kan word;
•          Skep die indruk dat geweldpleging en oproer wettige aspekte van die land se tradisie is en dat studente en simpatieke instansies in opstand moet kom om ekonomiese, politieke en sosiale probleme met geweld op te los; en
•          Werp alle koloniale regerings omver voordat die bevolking vir selfregering gereed is.

Lees hierdie strategie maar ‘n paar keer deur en jy sal die Suid-Afrikaanse situasie goed kan begryp.  Lank voordat 1994 se verkiesing aangebreek het, was daar byvoorbeeld reeds groot druk deur insypelaars vanuit sommige media- en kunskringe dat die Wet op Publikasies en Openbare Vermaaklikheid omver gewerp moet word.
Die waarskuwing van 1975 het net mooi niks gehelp nie.  Mag God gee dat die waarskuwing wat ons nou rig, wel vrugte afwerp! – Sjibbolet

Geskryf  deur‘n tienderjarige meisie:

Whose Delinquency?

We read in the papers,
We hear on the air,
Of killings and stealings and crime everywhere;
We sight, and we say as we notice the trend:
This young generation – where will it end!

But can we be sure that it’s their fault alone,
That may-be, a part of it isn’t our own?

Too much money to spend,
Too much idle time,
Too many movies of passion and crime,
Too many books not fit to be read,
Too much of evil
In what they hear said;
Too many children encouraged to roam
By too many parents who won’t stay at home.

Kids don’t make the movies,
They don’t write the books,
They don’t paint a gay picture of lusting and crooks,
They don’t make the liquor,
They don’t run the bars,
They don’t make the laws,
And they don’t buy the cars,
They don’t make the drugs that addle the brain,
It’s all done by the older folks – greed for pain;
And in how many cases
We find that it’s true
The label “Delinquent” fits older folks too!

Jou Tong het mag oor Lewe en Dood...

Dood en lewe is in die mag van die tong; en elkeen wat dit graag gebruik, sal die vrug daarvan eet.” Spr. 18:21.
            Spreek jy lewe, of spreek jy dood?
            Lewe jy onder die omstandighede, of bo, die omstandighede?
            “Uit dieselfde mond kom seën en vervloeking. Dit, my broeders, behoort nie so te wees nie.
“‘n Fontein laat tog nie uit dieselfde oog vars en bitter water opborrel nie?
“‘n Vyeboom, my broeders, kan tog nie olywe voortbring, of ‘n wingerdstok vye nie? So kan geen fontein brak en vars water voortbring nie.” Jak. 3:10-12.
As ons verklaar dat ons Gelowiges is, dan lewe ons bo die omstandighede, dan spreek ons seën, selfs in die mees benarde situasie, en nie verdoemenis nie.
“Nie wat in die mond ingaan, maak die mens onrein nie; maar wat uit die mond uitgaan, dit maak die mens onrein.” Matt. 15:11.
“Die goeie mens bring uit die goeie skat van sy hart goeie dinge te voorskyn, en die slegte mens bring uit die slegte skat slegte dinge te voorskyn.” Matt. 12:35
Soms trap ons in die slagyster en ons vergeet dat as Gelowiges, het ons ‘n “goeie skat in ons hart” en dan praat ons negatiewe, ydele dinge.
“Maar Ek sê vir julle dat van elke ydele woord wat die mense praat, daarvan moet hulle rekenskap gee in die oordeelsdag.
“Want uit jou woorde sal jy geregverdig word, en uit jou woorde sal jy veroordeel word.” Matt. 12:36-37.
Ydele woorde, is woorde van hopeloosheid, wanhopig, van skyn, bog, nietigheid, waardeloos, vrugteloos, nutteloos. Dis ook wanneer mense grootpraat, wanneer hulle bluf, verwaand is, roemsugtig, ook wanneer mens die naam van die HERE verkeerdelik gebruik.
Dood en Lewe, is in die mag van die tong.
As mens elke dag van jou lewe aanhou verdoemend praat van ander, elke dag praat oor die euwel van misdaad en die negatiewe beklemtoon, spreek jy ydele woorde, spreek jy wanhoop, spreek jy dood.
Om gedurig die duisternis aan te val, is om dood te spreek, alles verder te vernietig. Moenie die duisternis aanval nie, steek eerder ‘n lamp op, spreek Lewe!
Gelowiges besef dit nie almal nie, maar inderdaad is hulle in beheer van die situasie, en hulle kan die situasie omkeer deur Lewe te spreek.
Kyk hoe pragtig is die volgende: “Die mond van die regverdige is ‘n fontein van lewe, maar die mond van die goddelose verberg geweld.” Spr. 10:11.
“Die wyse lê kennis weg, maar die mond van die dwaas is ‘n ondergang wat naby is.” Spr. 10:14.
Let op wat gebeur wanneer mens inderdaad die Bybel bestudeer, wanneer mens navorsing oor ‘n onderwerp soos bv. die tong doen: Jy was jouself skoon, jy reinig jouself. Strofe na strofe is soos helende waters wat oor jou gees en siel spoel.
Sonder kennis van die Skrif, gaan selfs ‘n hele volk ten gronde.
“Wie sy mond bewaak, bewaar sy lewe; wie sy lippe wyd oopmaak, vir hom is daar ondergang.” Spr. 13:3.
Lees weer: “Dood en lewe is in die mag van die tong; en elkeen wat dit graag gebruik, sal die vrug daarvan eet.” Spr. 18:21.
Spreek mens dus dood, gaan jy beslis die vrugte daarvan eet. Spreek mens Lewe sal jy vir seker die vrug daarvan eet.
Ons het dit reeds genoem, maar ons herhaal: Ja, dit gebeur dat ons soms in slagysters trap.
“Want ons almal struikel dikwels. As iemand in woorde nie struikel nie, is hy ‘n volmaakte man, in staat om ook die hele liggaam in toom te hou.
“Kyk, ons sit stange in die perde se bekke, sodat hulle ons gehoorsaam kan wees, en ons stuur hulle hele liggaam daarmee.
“Kyk, ook die skepe, alhoewel hulle so groot is en deur hewige winde voort gedryf word, word gestuur deur ‘n baie klein roer net waarheen die stuurman wil.
“Net so is die tong ook ‘n klein lid en beroem hom op groot dinge – kyk hoe ‘n groot hoop hout steek ‘n klein vuurtjie aan die brand.
“Die tong is ook ‘n vuur, die wêreld van ongeregtigheid. Net so ‘n plek neem die tong onder ons lede in; dit besmet die hele liggaam en steek die hele lewensloop aan die brand en word uit die hel aangesteek.
“Want elke soort natuur van wilde diere en voëls en kruipende sowel as seediere word getem en is getem deur die menslike natuur.
“Maar die tong kan geen mens tem nie; dit is ‘n onbedwingbare kwaad, vol dodelike gif.
“Daarmee loof ons God en die Vader, en daarmee vervloek ons die mense wat na die gelykenis van God gemaak is.
“Uit dieselfde mond kom seën en vervloeking. Dit, my broeders, behoort nie so te wees nie.” Jak. 3:2-10
Dit is so dat ons stange in die perde se bekke sit sodat ons beheer oor hulle kan hê om hulle te stuur waar ons wil.
Gebruik dan die Woord as die stang in ons monde sodat die Heilige Gees ons kan stuur waar Hy wil.
Gebruik die Woord as die roer in ons lewens sodat ons nie rigtingloos, doelloos, op die see van die lewe ronddobber nie.
Die woorde wat ons spreek: Bied dit aan ons en ander rondom ons Lewe, of dood? Bied ons woorde hoop, of wanhoop?
Dis baie duidelik dat ons verantwoordelik is vir dit wat ons spreek!
Spreek ons dan verantwoordelike of onverantwoordelike dinge?
Wanneer ons ander gereeld aanval en beledig, selfs al is dit met rede, dan spreek ons dood. Dan gee ons krediet aan die euwels.
Wanneer ons dood spreek, word ons gebede ook nie beantwoord nie.
“En wanneer julle staan en bid, vergeef as julle iets teen iemand het, sodat julle Vader wat in die hemele is, ook julle jul oortredinge mag vergewe.
“Maar as julle nie vergewe nie, sal julle Vader wat in die hemele is, ook julle oortredinge nie vergewe nie.” Markus 11:25-26
Dit is hoe dit is: Sonder vergifnis word ons gebede nie beantwoord nie.
Met vergifnis en wanneer ons Lewe spreek, kan ons die ganse situasie in bv. Suid-Afrika, maar ook in ons eie lewens en huise, skole en werkplekke, omkeer.
In Rigters 6:1 sê God aan Gideon: Maar, toe die kinders van Israel gedoen het wat verkeerd was in die oë van die Here, het die HERE die kinders van Israel oorgegee in die hand van die Midianiete – sewe jaar lank!
            Sewe jaar lank! Dis mos nie nodig om langer vrae te vra nie. Ons eie situasie moet vir ons mos nou meer duidelik wees as ooit te vore.
            Dit lei geen twyfel nie dat die Skrif verwag dat die Christen hom moet onderwerp aan die Owerheid wat oor hom aangestel is.
            So, loof die HERE, bid vir die owerheid, dien die HERE. Spreek Lewe! Alles is nog lank nie verlore nie. Dit lyk maar net so.
            Die prentjie word verder ingekleur wanneer God ons verbied om te vergeld. God sê dat Hy ‘n jaloerse God is en dat die wraak Hom (alleen) toekom.
            Met ander woorde, terwyl ons wraak wil neem met allerlei verset en optredes, staan God terug, want ons probeer doen wat God sê Sy eksklusiewe reg is. Die Christen moet sy verstand afskakel sodat hy kan hoor wat die Gees van God aan hom wil sê.
            Wanneer die HERE sê dat Sy Liggaam vir die regering moet bid, dan is dit ‘n opdrag wat eenvoudig uitgevoer moet(!) word, al lyk dit ook hoe moeilik. As daar nie vrede in die land is nie, dan is dit waarskynlik omdat die Gelowiges nie vir die regering bid nie.
            Die HERE is in beheer van die koning. In Spreuke 21:1 lees ons: “Die koning (staatspresident) se hart is in die hand van die HERE soos waterstrome; Hy lei dit waarheen Hy wil.”

·       Die nuwe vertaling lees: “Die HERE kan ‘n koning se gedagtes net so maklik beheer soos water in ‘n leivoor en dit stuur in die rigting wat Hy wil!” Skitterend!

So, kom maar gerus jou plig en opdrag na en bid vir die Owerhede. Hulle dink maar hulle is in beheer. Die waarheid is dat die Christendom in beheer van die wêreld is, en dit onder Leierskap van die Almagtige GOD.
            Luister wat sê Psalm 149 oor “Lofgesang en Oorlogswaard”:
         
Halleluja! Sing tot eer van die Here ‘n nuwe lied,
Sy lof in die vergadering van die gunsgenote!
Laat Israel hom verheug in sy Maker;
Laat die kinders van Sion juig oor hul Koning!
Laat hulle Sy naam loof in koordans,
Hom psalm sing met tamboeryn en siter.
Want die Here het ‘n welbehae in Sy volk;
Hy versier die ootmoediges met heil.
Laat die gunsgenote juig in heerlikheid;
Laat hulle jubel op hul bedde.
Lofverheffinge van God is in hulle keel,
en ‘n tweesnydende swaard in hulle hand;
Hoekom?
Om (sodoende) wraak te oefen onder die heidene,
strafgerigte onder die volke;
om hulle konings met kettings te bind
en hulle edeles met ysterboeie;
om ‘n vonnis wat opgeskrywe is,
aan hulle te voltrek.
‘n Eer is dit vir Sy gunsgenote!
Halleluja!

Dat die HERE opsoek is na voorbidders maar hulle selde vind, word weerspieël in die pyn van Sy uitroep deur Jesaja:
            Hy het gesien dat daar niemand was nie en Hom verbaas dat niemand tussen by tree nie,”
            En sy teleurgestelde protes deur Esegiël:
            “Ek het onder hulle ‘n man gesoek wat ‘n muur kan bou en voor My aangesig in die bres kan staan vir die land…  maar Ek het niemand gevind nie.” —  Sjibbolet

Hoekom kerk toe gaan?

 

Ons moet met verwagting en blydskap uitsien na geestelike byeenkomste.

Kyk, hoe goed en hoe lieflik is dit dat broers ook saamwoon! Dit is soos die kosbare olie op die hoof, wat afloop op die baard, die baard van Aäron, wat afloop op die soom van sy klere. Dit is soos die dou van Hermon wat neerdaal op die berge van Sion; want daar gebied die HERE die seën, die Lewe tot in Ewigheid! Ps 133:1-3

Ons ontvang geestelike voeding (1 Pet 2:1-3) en bemoediging (Hebr 10:25-26), ons bou ons geloof (Rom 10:17), ons betoon Liefde aan God (Joh 14:23), ons word gereinig (Joh 6:63; Rom 12:1-3)

So woon ons ook huisdienste en bidure by, elke keer met verwagting. Daar stig ons mekaar, leer ons van mekaar, bid ons vir mekaar, dra ons mekaar se laste. So word ons Dissipels (1 Kor 12:14-27; 1 Kor 14:26; Hand 2:38-47; Efes 4:12)

Ontdek die Wonder om met God in ‘n Hemelse Taal te kan praat.

 

“Maar daar kom 'n uur, en dit is nou, wanneer die ware aanbidders die Vader in gees en waarheid sal aanbid; want die Vader soek ook mense wat Hom só aanbid. God is Gees; en die wat Hom aanbid, moet in gees en waarheid aanbid.” Joh 4:23-24

Jesus wil jou doop met die Heilige Gees. Matt 3:11
Vra God om jou met die Heilige Gees te doop. Luk 11:9-13
Die spreek in ‘n Hemelse taal is ‘n uiterlike manifestering van die doping met die Heilige Gees. Hand 2:4

Om met God in die Gees te kan kommunikeer is ‘n Belofte van God aan alle gelowiges. Mark 16:17; Hand 2:39; Rom 8:26

Ontvang die doping in die Heilige Gees soos wat jy jou Wedergeboorte ontvang het – in die Geloof. Maak eenvoudig jou mond oop en begin praat. Hand 2. – Sjibbolet

Ontvang jou grootste Geskenk ooit!

Immers, sy Goddelike krag het ons ALLES GESKENK  wat  tot die LEWE en GODSVRUG dien (hoe?) deur die kennis van Hom, wat ons geroep het deur Sy heerlikheid en deug; waardeur Hy ons ook DIE GROOTSTE EN DIERBARE BELOFTES GESKENK HET (hoekom?), sodat julle deelgenote kan word van die Goddelike natuur, (wanneer?) nadat julle ontvlug het (wat?) die verdorwenheid wat deur die begeerlikheid in die wêreld is. – 2 Pet. 1:4.

Dit klink na ‘n meer as redelike “aanbod”. As kinders gehoorsaam is, kry hulle geskenke. Die vereistes is eintlik gering.
As ek en jy die verdorwenheid ontvlug en kennis van God deur Sy Woord opdoen, dan ontvang ons die grootste geskenk wat enige mens kan hoop om te ontvang:  Alles wat tot die Lewe en Godsvrug dien!
Die HERE se Goddelike krag, Sy Glorie en deug skenk dit aan ons!
Strofe 1 handel oor die oorwinning deur vertroue. Glo in die gebod van Almag vir oorwinning oor al die bose magte, en oor al die moontlikhede van sonde.
Glo in die God van wysheid vir die allerbeste voorsiening van middele om die liefde uiteindelik te laat seëvier.
            Glo in die God van Liefde in elke ramp wat oor jou mag kom, elke skaduwee of droefheid wat jou mag tref. Glo in God. Glo in Jesus Christus. Glo in die kragtige werking van die Trooster, die Heilige Gees!
            Baie mense meen om te kan glo, dit iets is wat hulle nie het nie en iewers moet kry. Om GOD te glo, is dieselfde geloof waarmee jy in jou ouers glo. Eggenotes glo aan mekaar. Broers glo aan mekaar.
            Glo is om te aanvaar, om te vertrou. Jy het geloof in Jesus Christus ontvang die dag toe jy Wedergebore is. Jy het dus geloof, al wat jy moet doen is om dit te gebruik en uit te bou.
            Wat jy beslis nie mag doen nie, is om te twyfel. Jak. 1:6-7. Iemand wat twyfel, ontvang niks.
            Strofes 2 en 3 bied ook die belofte van ‘n gewisse Hemel. Die Hemel verloor sy vaagheid en word ‘n werklikheid, anders is Jesus Christus nie eg nie.
            Dit is Sy trekkrag (2). Die Hemel is ons Vader se woning. Christus het vir ons ‘n Woning voorberei. Wat ‘n lewensverrykende feit is dit nie!
            Die vreugde van Christus sou nie volmaak wees as Sy bloedgekooptes nie daardie wonings met Hom kan deel nie.
            Die Hemel sal ‘n tuiste, ‘n harmonie en vreugdevolle geluk wees.
            Maar onthou, niemand kan daar ingaan wat nie persoonlik deur Jesus Christus voorberei is nie. Hy sê Hy begin die werk in ons en Hy sal dit voleindig.
            “Ek dank my God elke maal as ek aan julle dink — en ek bid altyd in al my gebede vir julle almal met blydskap — oor julle gemeenskap aan die Evangelie van die eerste dag af tot nou toe,
            “omdat ek juis hierop vertrou, dat Hy wat 'n goeie werk in julle begin het, dit sal voleindig tot op die dag van Jesus Christus...” Fil. 1:1-6.
            Strofe 6 van 2 Pet. 1 bring die belofte van “Die Weg, die Waarheid en die Lewe.”
            Aan hulle wat die pad na sielswelstand, geluk en die Hemel, byster geraak het, is en bly Jesus Christus die enigste Weg. Die Weg is gekenmerk deur eenvoud en Oppermag. Joh. 10:9 toon dat dit insluitend is —  “enigeen”, maar dit is ook uitsluitend — “deur My.”
            Christus is die Waarheid, die Opperste  werklikheid. Hy is ook die Waarheid:

·        In die volheid daarvan
·        In die doelmatigheid daarvan
·        Hy is die Lewe
·        Hy is die voorbeeld, en
·        Die Lewenskrag wat dit moontlik maak om die Voorbeeld na te streef.

Strofes 7-12 beklemtoon die Vaderskap van God. Die geroep van die mens se hart is na God wat ook Vader is. Die Christendom is die resultaat van daardie geroep.
Weet dit maar dat almal word die een of ander tyd geroep, maar net hulle wat reageer, word gered.
God is ‘n algenoegsame Vader (8) – genoegsaam vir sonde en lyding, vir verlossing en diens, vir Aarde en Hemel. Die een voldoende reël vir teologie en sosiologie is “vertolk deur God se Vaderskap.”
Strofes 13 en 14 beklemtoon die belofte vir volhardende gebed.
Die moontlikheid van gebed – God as Vader. Ons kan ons gebed tot Sy Liefde rig, maar nie tot die Wet nie.
Die doel van gebed – “dat die Vader verheerlik mag word.” Daar is geen sekerheid van ‘n antwoord op enige ander soort gebed nie.
Die krag van gebed – “in My naam”. Die naam staan vir die karakter. As ons in Sy naam vra, moet Hy ons karakter waarborg by God. Dit is die lewe wat bid, nie ons lippe nie.
Die versoek van gebed – “wat julle ook al vra” Fil. 4:6.
Die vereiste van die gebed – “vra”. Hoe? Soos in Lukas 11:5-10.
Die belofte van gebed – “dit sal Ek doen”.
Strofes 15-24 bring die belofte vir die gehoorsame lewe tesame met die volgende versekerings deur Christus:

·        ‘n Blywende Helper (16,17)
·        Ewige Lewe (19)
·        Die inwonende Vader (20)
·        Vader se spesiale Liefde (21)
·        Openbaring van die Vader (21)
·        Die blywende Vader (23)

Strofes 27-31 verseker ons van die belofte van voortdurende vrede. Dit is die erflating aan sondegeteisterde siele: Vrede met God (Rom.5:1) en die Vrede van God (Fil. 4:7).
Onthou altyd: Aan die einde van hierdie lewe waarin jy jou nou bevind, is daar ‘n Ewige Lewe en ‘n Ewige Dood. Daar kom ‘n nuwe Hemel en ‘n nuwe Aarde. Lees Open. 21. Is jy op pad na die Nuwe Jerusalem?
Sy Woord is die padkaart wat ons moet volg na die Nuwe Jerusalem. Sonder hierdie padkaart is ons die weg byster en op pad na die afgrond.
Iemand sê nou anderdag: “Ek dien nie God nie, ken hom nie eers nie, en kyk net hoe suksesvol is ek. Ek ken nie die einde van die sukses nie.” Die arme man het nog nooit gehoor van ‘n suksesvolle mislukking nie.
Dit is nie vir jou as kind van God verkeerd om R10 miljoen rand se bates te hê nie, maar daar is groot fout as die R10 miljoen se bates jou het.
Die uitnemender weg is om die verdorwenheid te ontvlug en die Christus-weg deur die Woord te volg om die grootste geskenk van alle tye, vandag nog te ontvang. —  Sjibbolet