Hoop op Hoop

Ek klop, soos so baie keer, aan ‘n vreemde deur. ‘n Vrou maak oop.

  Ek, Bybel in die hand: “Goeiemiddag mevrou, ek is op pad Hemel toe. Ek kom net hoor, as dit vanmiddag sou wees, gaan u saam met my...”

  Met vrees antwoord sy bang: “Nee meneer.”

  Ek: “Maar waarom nie...

  Sy: “Ek hoop ek kan saamgaan, maar ek het te veel sonde meneer.”

  Ek kry haar innig jammer. Sy lyk skielik so beteuterd.

  Op my vraag of ek kan inkom, nooi sy my binne en ons begin gesels...

Ek verduidelik dat “hoop” in die Bybel beteken toekomsfeit. “Die geloof dan is 'n vaste vertroue op die dinge wat ons hoop, 'n bewys van die dinge wat ons nie sien nie.” Hebr 11-1

Hoop beteken nie “dalk” nie. Hoop beteken “verwagting, begeerte en opwinding.”

“En mag die God van die hoop julle vervul met alle blydskap en vrede deur die geloof, dat julle oorvloedig kan wees in die hoop deur die krag van die Heilige Gees.” Rom 15:13

God IS die HOOP – soos wat Hy die Liefde is.

“'n Uitgestelde hoop maak die hart siek; maar 'n wens wat uitkom, is 'n lewensboom. Spr 13:12

Hoe kragtig is dit! Hoop wat uitgestel is, is maar net vertraag. Dit beteken eintlik. dit is op pad.   Dit Kom! EN DAN....wanneer dit kom sal dit soos ‘n Lewensboom wees! Hoe kragtig is dit!                                                                                                                                                                                     

Die  vertraging is net ‘n toets, nie ‘n versoeking nie.

God toets ons nie op ons swakhede nie – die duiwel doen dit. God toets ons sterkpunte juis om dit sterker te maak!

  En as jy straks in versoeking sou val, kwel jou nie daaroor nie, maar: “Ag dit louter vreugde, my broeders, wanneer julle in allerhande versoekinge val... Jak 1:2

  As Jesus alle toetse kon slaag, kan ons ook want ons het dieselfde Gees as Jesus.

”Want 'n oomblik is daar in sy toorn, 'n lewe in sy goedgunstigheid; saans vernag die geween, maar smorens is daar gejuig.” Ps 30:6

  Ons lewe in ‘n tyd waar ‘n mens maklik van jou hoop beroof kan word. Moet dit nie toelaat nie.

Hoop het nog nooit iemand beskaam nie. Staan vas want jy weet aan God se beloftes dat Hy ‘n waarmaker van sy Woord is.

  Sarah had geen hoop nie en later kry wel hoop en uiteindelik baar sy toe tog. Vir hoeveel kinderlose vroue is nie al in ons tyd die hande opgelê en dan het hulle gebaar nie.

  Net soos wat mens jou spiere oefen, moet mens ook jou geloof oefen.

  Luister: “God is geen man dat Hy sou lieg nie; of 'n mensekind dat dit Hom sou berou nie. Sou Hy iets sê en dit nie doen nie, of spreek en dit nie waar maak nie?” Num 23:19

              Nogtans verval ons soms in wanhoop en word ons mismoedig.  Mismoedigheid  is veronderstel om vir die Christen ‘n kortstondige moment te wees op pad terug na hoop.

  Ons het hoop as integrale deel van ons bestaan nodig want ons kan nie sonder hoop lewe nie.

  Sonder hoop voel dit vir ons of die lewe nie die moeite werd is nie.

  Wanneer ons hoop het, dan voel ons soos wat God ons gemaak het. Sonder hoop voel ons soos ‘n regte ou nikswerd – totdat ons besef, daar is hoop!

  Daar IS hoop! Dit maak nie saak wat jou omstandighede is en watter probleme jy in die gesig staar nie: Daar is beslis hoop. Solank jy nog lewe en asemhaal is daar hoop.

  Omstandighede kan verander.  “Want solank iemand by al die lewendes behoort, is daar hoop.” Pred. 9:4.- Sjibbolet

Begin Weer…

Jesus breek die reëls, die wette, die tradisies want ons moet by al daardie goed verby kom sodat Jesus sentraal in ons lewens is.

            Jesus bring in die plek daarvan die “begin weer” konsep. Nie “probeer weer” nie, “begin weer”.

            Die dissipels wat  groot vissermanne was, vang ‘n hele nag geen vis nie. Vroeg die volgende oggend sê Jesus begin weer, “gooi die net (nie aan dieselfde kant nie) aan die anderkant van die skuit uit.” Toe was daar meer as genoeg vis.

            Die vissers kon gesê het maar hulle is moeg van heel nag probeer, ook dat hulle geharde vissermanne is en die see ken, as hulle gedink het mens kon vanoggend weer probeer dan sou hulle. Hulle het egter positief reageer toe Jesus die reëls breek en sê: Probeer weer... maar die keer aan die “anderkant” van die skuit.

            Die egbreekster word na Jesus gebring.  Volgens die wet moet die vrou met klippe doodgegooi word. Jesus breek die reëls: “Laat enigeen van julle wat sonder sonde is, die eerste klip gooi.”

            Almal het weggeloop en Jesus sê aan die vrou: “Ek veroordeel jou nie, gaan heen en sondig nie meer nie.” Begin weer.

            Die geskeide vrou sê ek trou nooit weer nie, geen man sal ooit weer die voorreg hê om my te mishandel nie.

            Die HERE se onmeetbare genade sê: Begin weer. Trou weer en maak seker jy herhaal nie jou foute van die verlede nie.

            Jesus het gesê dat niemand mag skei nie, behalwe oor owerspel. Definieer owerspel. By ‘n ander vrou ingegaan of die vrou het ‘n ander toegelaat om by haar in te gaan. Is dit al?

            God het dan aan die volk Israel ‘n skeibrief uitgereik oor hulle geestelike owerspel, hulle gelollery met ander gode. Dit was owerspel.

            Jou man bv. lol nie met ander vroue nie, maar hy toon geen respek vir sy vrou nie, nie soos wat die HERE uitdruklik in sy Woord voorskryf hoe die man se optrede teenoor sy vrou en sy huis moet wees nie.            Jou man lewe net vir homself.  Sy selftrots distansieer hom van jou. Dan is dit mos ook owerspel.

            Wanneer ‘n man aan pornografie verslaaf is, dan is dit mos ook owerspel. As hy net begeer om by ‘n ander vrou te slaap, pleeg hy al egbreuk. Matt 5:28

            Die man is byna nooit by die huis waar hy na sy vrou en kinders moet omsien nie, met hulle ‘n band, ‘n verhouding moet bou nie. Sy vrou raak kil en die kinders raak verward en spat uiteindelik in alle rigtings. Die man wat die hoë priester van sy huis moet wees, is afwesig. Is dit nie owerspel nie?

            As ander dinge buite die huwelik vir die man of vrou belangriker as hulle huwelik en gesin word, dan is dit owerspel.

            Die pa wat in die kroeë tussen sy drinkebroers rondhang en sy huislike en ouerpligte versaak, is dit nie owerspel nie?

            Die verklaring van owerspel is: Dat ‘n man ontrou is aan sy vrou, en omgekeerd. Een party kan op talryke wyse ontrou wees aan die ander, deur nie hul volwaardige rol te vertolk nie.

            Is dit hoekom ‘n man en ‘n vrou in die huwelik tree? Om nie trou aan mekaar, hul huwelik en hul gesin te wees nie? Beslis nie. Hulle is tog een, of veronderstel om een te wees.

Op skool word geslagsonderrig gegee. Dit gaan meesal oor hoe om swangerskappe te keer. Waar is die ouerlike drukgroep wat dit verander moet kry na GESINSonderrig. Mense trou en weet nie eers wat die huwelik behels nie.

            Daar is mense wat sê hulle trou nooit want hulle wil nie ‘n egskeiding beleef nie. Jy sal geen egskeiding beleef as jy en jou vrou jul;e self verseker van waaroor die huwelik werklik gaan nie en hoe mens jou kinders moet grootmaak in die Sy weë nie, nie wanneer jy en jou vrou saambid nie.

            ‘n Ondersoek in Amerika het bewys dat paartjies wat hul lewe lank saam bid, skei nie.

            Daar is die man wat vir predikant gestudeer het, maar niks het uitgewerk nie. By sy eerste gemeente het niks reg geloop nie. Hy belowe homself hy wil nooit weer ‘n predikant  wees nie. Die HERE sê na ‘n tyd: “Doen dit weer.”

            Alles wat met Josef gebeur het verlore voorgekom, maar dit was intussen alles deel van God se plan… die uiteinde: Josef begin weer.

            Waar sit jy vandag? In sak en as, moedverlore, sonder visie, sonder roeping, steeds treurend oor jou mislukking. Dis alles waar wat jy sê, maar die tyd loop uit en die HERE verwag dat jy weer begin. Kry ‘n nuwe werk, leef jou droom uit, trou weer...

            Begin hierdie keer reg… Bid soos Salomo, die HERE om wysheid. Net dit. Die res volg vanself.

            Daar word elke dan en wan, soos nou deur Forbes, verwys na die Top 10 rykste mense in die wêreld… multi-biljoenêrs. Daar is nou al triljoenêrs. Baie van hierdie manne en vroue vertel dat hulle op ‘n kol bankrot was en weer moes begin.

            In vandag se terme bereken was Salomo ryker as enigiemand vandag. Salomo  bid vir wysheid, net dit… Hy wil nie foute maak nie, hy besef hy het die HERE se wysheid nodig.

            En die HERE sê: “En dit was goed in die oë van die Here dat Salomo dit (wysheid) begeer het. Lees 1 Kon 3:11-14

Die HERE God Jahweh voeg by: “So doen Ek dan volgens jou woord: Kyk, Ek gee jou 'n wyse en verstandige hart, sodat een soos jy vóór jou nie gewees het en een soos jy ná jou nie sal opstaan nie.

“Ja, selfs wat jy nie begeer het nie, sal Ek jou gee, rykdom sowel as eer, sodat onder die konings niemand soos jy sal wees al jou dae nie.”

Jesus sê: “Maar soek eers die Koninkryk van God en Sy geregtigheid, en al hierdie dinge sal vir julle bygevoeg word. Kwel julle dus nie oor môre nie, want môre sal hom oor sy eie dinge kwel.Matt 6:33:24 .

Waarop wag jy? Begin weer…

Ons is die Heiligdom

Is ons ‘n “Geestelike Huis gebou met Lewende boustene?”

“En laat julle ook soos lewende stene opbou, tot ‘n geestelike huis.” 1 Pet 2.5

            Jesus Christus het nie aan die Kruis gesterf sodat ons derduisende kerke moes stig elk met sy eie kamstig suiwer leer nie, die een verskillend van die ander nie.

            Dat daar gemeentes sou wees, ja beslis, maar nie kerkgenootskappe nie... met die gepaardgaande harwar “Hier is die Christus, nee, daar is die Christus” nie.

            Elkeen het sy eie vertolking van wat reg is, netjies gebind in grondwette en ordonnansies en allerlei fatsoenlike name... die grootste verwarring op aarde.

            En daar is haas liefde tussen die spul.

Die liefde is ‘n Koninklike Wet. “As julle ewenwel die Koninklike Wet volbring volgens die Skrif: Jy moet jou naaste liefhê soos jouself – dan doen julle goed.” Jak 2:8

            Moenie dink dat Ek gekom het om die wet of die profete te ontbind nie. Ek het nie gekom om te ontbind nie, maar om te vervul.” Matt 5:17

Hoe het Jesus toe die Wet vervul?

Net voor Sy vertrek na die Hemel, vra die dissipels Hom: “Meester, wat is die groot gebod in die wet?

“En Jesus antwoord hom: Jy moet die HERE jou God liefhê met jou hele hart en met jou hele siel en met jou hele verstand.

“Dit is die eerste en groot gebod.

“En die tweede wat hiermee gelykstaan: Jy moet jou naaste liefhê soos jouself.”

En dan sê Jesus: “Aan hierdie twee gebooie hang die hele wet en die profete.” Matt 22:36-40

Hoe so? Want as jy waarlik liefhet, dan sal jy nooit enige wet oortree nie.

Ons is veronderstel om lewende boustene te wees waarmee God Sy Koninkryk kan bou, ‘n Geestelike Huis, maar sonder sement (Liefde) tussenin sal die spulletjie aanhou intuimel... en steeds nuwe kerke word gestig.

Die Skrif verwys telkemale daana dat ons ander moet liefhê soos onsself.

As jy jou vrou mishandel, hoe lief het jy jouself?As jy die predikant en ander gemeentelede beskinder... hoe lief het jy jouself?

Is dit moontlik om onsself lief te hê?

            Hierdie kan as ‘n meetinstrument beskou word: Hoe lief ek myself het, bepaal hoe lief ek ander het.

            Dit bepaal ook my geestelike stand in Christus.

Liv 19:18 “Jy mag nie wraakgierig of haatdraend teenoor die kinders van jou volk wees nie, maar jy moet jou naaste liefhê soos jouself. Ek is die HERE.

            Liv 19:34 “Die vreemdeling wat by julle vertoef, moet vir julle wees soos 'n kind van die land wat onder julle is. En jy moet hom liefhê soos jouself...”

            Matt 19:19 “Eer jou vader en moeder; en: Jy moet jou naaste liefhê soos jouself.”

            Matt 22:39 “En die tweede wat hiermee gelykstaan: Jy moet jou naaste liefhê soos jouself.”

            Wat ons ook hieruit leer is dat dit belangrik vir ons is om te weet in watter mate ons onsself lief het.

            Jy moet jouself liefhê. Ontlok hierdie woorde ‘n negatiewe reaksie by jou? Klink dit nie selfsugtig en egoïsties nie?

            Om jouself lief te hê beteken nie om selfgesentreerd of opgeblase  te wees nie. Dit beteken om respek vir jouself te hê, om jouself te beskerm, vir jouself om te gee.

            As jy dus nie vir jouself lief is nie, dan sal jy wraakgierig of haatdraend teenoor ander wees. Dit mag nie so wees nie, dan is daar fout met hoe lief jy jouself het. Is jy wraakgierig en haatdraend met jouself? Sommige mense is. Dit is al bewys dat as mens iemand haat, jy, en nie die ander persoon nie, die eintlike lydende party is.

            Mens weerspieël ook jou liefde vir jouself wanneer jy jou vader en moeder eer. Matt 19:19

            Moet mens die ongereddes ook liefhê? Natuurlik! Mark 12:30 “Jy moet die HERE jou God liefhê (Hoe?) uit jou hele hart en uit jou hele siel en uit jou hele verstand en uit jou hele krag. Dit is die eerste gebod. Lees dit weer want dis nogal ‘n gewigte saak.

            En strofe 31: “En die tweede, hieraan gelyk, is dit: Jy moet jou naaste liefhê soos jouself. Daar is geen ander gebod groter as dié nie.”

            “Hieraan gelyk” beteken “dieselfde”. As ek God moet liefhê met my hele hart, my hele siel, my hele verstand, my hele krag, dan moet ek my naaste ook so liefhê. Die liefde vir God staan gelyk aan die liefde vir myself en my liefde vir ander. Hoekom? Omdat God vir jou en die ander persoon ewe lief is.

            In die lig hiervan, vra weer: Hoe lief het ek myself?

            “En beklee julle bo dit alles met die liefde wat die band van die volmaaktheid is.” Kol 3:14. Let op: “Beklee julle met die liefde.” Dis ‘n proses. Hoe lank die proses neem, is hoe lank jy neem om jouself met die liefde te beklee.

            Ongereddes is op pad na die ewige verdoemenis. As iemand nie vir jou en vir my liefgehad het nie, dan was ons ook nog op die verkeerde pad.

            “Wees aan niemand iets skuldig nie, behalwe om mekaar lief te hê; want hy wat 'n ander liefhet, het die (Koninklike) wet vervul.” Rom 13:8 – Sjibbolet

Met leë hande... Groote Schuur ten spyt

‘n Man vertel: Op laerskool in 1955 se koers moes die klas elke oggend die skooldag met Godsdiens begin. Die klasmeneer was egter nooit teenwoordig nie. Dit was of hy dit wou ontvlug, en tog was hy so ‘n goeie meneer.
Die kinders het gesing, iemand het later uit die Bybel gelees, iemand het gebid en dan was die periode verby en die dag se skoolwerk het begin.
            Die kinders het sonder musiekbegeleiding Hallelujaliedere gesing. Hulle  kon om die beurt ‘n lied opgee om gesing te word.
            Die een seun het altyd gevra die klas moes lied 177 sing: “Moet ek gaan met leë hande, moet ek so my Heer ontmoet, nie een siel na hom gelei nie, niks te offer aan Sy voet.”
            Die seun was nie gered nie. Inteendeel, hy het niks van Wedergeboorte of redding begryp nie. Nogtans was dit vir hom ‘n pragtige lied, maar ook ‘n hartseer lied want hy wou nie eendag voor die HERE gaan staan met leë hande nie.
            Hy het die lied gereeld gesing in die hoop dat hy die antwoord sou kry hoe om seker te maak dat hy nie daar met leë hande aanland nie. Maar niks het gebeur nie. Hy kon ook nie verstaan hoekom mens siele na die HERE toe moet lei nie.
            Hy het baie nagte wakker gelê en gesien hoe hy voor die HERE met leë hande staan en sê: “Ek is so jammer Jesus, ek het niks.” Dan het hy homself aan die slaap gehuil.
Hy was ‘n eenkantkind en het homself al hoe meer afgesonder. Die lied het hom gereeld baie hartseer gemaak, maar hy wou nooit afskeid neem van die lied nie want hy het begeer om eendag met hande vol siele by die HERE op te daag, wat dit ook al beteken het.
            Die lied het hom sy lewe lank bygebly. Later as grootmens, het twee mense met hom oor sy eie siel gepraat. Beide het gevra hy moes agter hulle aanbid en dan by die afsluiting gesê: “Veels geluk, jy is gered”.
            Maar dit was leë woorde. Dit had geen betekenis vir hom nie.
            Heelwat later, so 49 jaar gelede, bevind hy hom in Groote Schuur se hartafdeling. ‘n Predikant wat daar diens doen, wou kort voor die operasie met hom oor sy siel gesels. Hy het die leraar afgejak.. en lank daarna een dag bely...
            In die kamer langsaan was William Bill Killops, SA se vierdie hartontvanger wat vie dae na sy oorplanting oorlede is. Hy en Killops het dieselfde balkon gedeel. Hulle het oor alles behalwe hul operasies en probleme gesels. Hulle is telkens saam in rystoele na eenhede gestoot waar talryke toetse op hulle gedoen is.
            Op die operasietafel toe die eerste naald hom binnedring, het hy gevra: “Gee my asseblief net ‘n oomblik.” Hy het in wanhoop in die oë van die verpleegsuster langs hom gestaar en gevra: “Kan ek asseblief net ‘n paar oomblikke lank jou hand vashou?”
            Sy het haar hand in syne geplaas, en toe vra hy: “HERE, as daar ‘n lewende God is, maak asseblief my oë vir my amderkantkant hierdie doodsvallei oop.”
            ‘n Ruk daarna het drank en dwelmmiddels het hom een nag ingehaal. Hy het letterlik alles verloor wat hy in die lewe bymekaar gemaak het. Nou was hy stoksielalleen. Dit was ‘n wrede ontnugtering, veral wanner ‘n mens teleurgesteld in jouself is.
            Toe besluit hy om selfmoord te pleeg. Hy het in sy studeerkamer gesit waar hy laataand in doodse stilte alles haarfyn uitgewerk het.
            Toe hy by die studeerkamer wou uitstap om die daad by die woord te voeg, toe staan daar ‘n reuse “man” daai hele deur vol, mens sou nooit by die “man” verby kon kom nie. Toe word hy ontsettend bang en begin huil.
            Hy onthou van ‘n klein advertensie wat hy eendag in ‘n koerant gesien het: ‘n Telefoonnommer waarheen mens kon bel vir gebed of geestelike hulp. Hy bel die nommer gesjakel en ‘n vrou antwoord, meer as duisend km ver in ‘n ander stad.
            Hy vra in trane: “Help my asseblief, ek wil selfmoord pleeg en hier is ‘n reuse “man” wat my keer...” Die vrou het onmiddellik begin bid, hoe lank, kan hy nie onthou nie, hy was net bewus van die wonderlike rustigheid wat oor hom gekom het. Dit het vir hom as leek geklink of die vrou eers oorlog maak en daarna die vrede van die HERE afgesmeek het.
            Na die gebed wou hy sy Bybel in sy slaapkamer gaan haal. Die groot “man” was nie meer daar nie. (Later sou hy besef, dit was ‘n Engel van die HERE).
            Hy het in baie jare nie die Bybel gelees nie en maak dit oop by die verhaal van die blinde man van Jerigo. Hy lees die verhaal en sien homself in sy geestesoog
met sy vuil kleed langs die stowwerige voetpad  sit. Hy wis nie sy kleed is vuil nie want hy is blind.
            Hy het van tyd tot tyd ook gehoor van die man Jesus en wat Hy doen, maar hy kon nie by Jesus uitkom nie, want hy  was blind. Maar daardie dag hoor hy hier kom mense aangestap en Jesus is onder hulle.
            Hy roep: “HERE, HERE seun van Dawid, wees my barmhartig!” Diegene wat voor gestap het, het hom stilgemaak. Hulle en Jesus was op pad na ‘n afspraak, Jesus kon nie nou gepla word nie.
            Beseffende dat hy dalk nooit weer so naby aan Jesus sal kon kom nie, skreeu hy harder: “HERE, HERE seun van Dawid, wees my barmhartig!”
            Jesus vra vir hom: “Wat kan Ek vir jou doen?” Hy antwoord: “Dat ek kan sien,” en Jesus sê “jy sien” en hy het gesien.
            Die man het in die slaapkamer by sy bed op sy knieë neergeval en geroep: “HERE, HERE, seun van Dawid, wees my barmhartig!”
            Toe kom ‘n groot duisternis oor hom, en hy hoor die vraag: “Is jy van jou sinne beroof. Hoe sal jy ooit van die dwelms en drank ontslae raak. Dis onmoontlik.” Hy onthou hoe  hy al probeer het om van die dwelms af te kom, die ontsettende onttrekkingsimptome, die rou jeukende sere wat hy uitgeslaan en stukkend gekrap het...
            Maar dis of hy besef sy tyd het gekom... Jesus is nou hier en hy gaan dalk nie weer verby kom nie... Hy het Jesus laas in Groote Schuur afgejak....
            En toe roep hy oorverdowend: “HERE, HERE, seun van Dawid, wees my barmhartig!”
            En daar was Lig.
            En hy bid: “HERE nou vra U wat U vir my kan doen... ag HERE, gee tog dat ek kan sien.”
            Die duisternis was weg, daar was baie, baie trane. Die uiteindelike deurbraak was daar. Tot laatnag het hy daar op sy knieë deurgebring want daar was so baie wat hy met die HERE wou uitgesels. So het hy aan die slaap geraak en die volgende oggend wakker geword, ‘n splinternuwe skepsel... en sonder enige onttrekkingsimptome.
            En toe verstaan hy Lied 177 en weet hy, hy gaan met baie siele eendag by die HERE aankom.
            Sien jy kans om met leë hande by die HERE op te daag? — Sjibbolet

Dit gaan oor ons gesindheid

"Maar Jesus sê: Laat haar staan; waarom val julle haar lastig? Sy het 'n goeie werk aan My gedoen.” Matt 26:10
            Die beroemde Buckner-Weeshuis in die staat Texas is in 1879 gestig deur Eerw Robert Cooke Buckner. Buckner is in 1919 Huis toe.
Duisende weeskinders het in daardie weeshuis 'n heenkome gevind. In die beginjare van die weeshuis se bestaan, was die stigter, dr. Buckner, soms vir weke lank weg van die huis af om fondse vir die weeshuis in te samel.

Dr Buckner

Die kinders was almal baie lief vir hom. Hy was vir hulle 'n pa en vriend. As dit aangekondig word, "Vader Buchner kom op 'n bepaalde dag terug", breek groot opwinding tussen die kinders los. Hulle trek dan hulle beste klere aan en maak geskenkies van blomme en mooi klippies op, om vir hom te gee.
            Een van die inwonertjies was 'n klein, swaksinnige dogtertjie. Sy is gehelp om haar mooiste klere aan te trek, maar sy moes self haar geskenkie opmaak. Sy het nie die verskil tussen 'n bossie blomme, 'n bossie onkruid of 'n bondel takkies geken nie.


Die Buckner kampus
Wanneer dr. Buchner aankom, het die kinders om hom saamgedrom, elkeen angstig om eerste te wees om hom te groet en te soen, raakgesien te word en die geskenkie te oorhandig.
As hierdie groot, goedhartige man dan so tussen die woelende kleingoed staan, het dit gelyk of hy na iemand soek. Dan sien hy haar: die ou dommetjie, op die buiterand van die opgewonde, stoeiende kinders, met haar bondeltjie takkies in haar hand.
Hy beur tussen almal deur en gaan na haar toe. Hy neem haar geskenkie en bewonder dit. Dan tel hy haar op in sy arms, druk haar teen hom vas, soen haar. Baie teer vra hy hoe dit met haar gaan en hy praat vertroostend met haar.
            Jesus se hart gaan immer na die swakstes toe uit, die verdruktes, die armes, die siekes, die kindertjies.
"Hy sien toe ook 'n arm weduwee, twee klein muntstukkies ingooi, en Hy sê: 'Dit verseker Ek julle: Hierdie arm weduwee het meer ingegooi as al die ander.'" Luk 21;3.
Nie die hoeveelheid van ons gawes of dade of diens nie, maar die gesindheid van toewyding en liefde, dikwels uit swakheid gedaan, is vir die HERE kosbaar.
            “Want so sê die Hoë en Verhewene wat in die Ewigheid woon, Heilig is sy Naam: Ek woon in die hoogte en in die heilige plek en (waar nog?) by die verbryselde en nederige van gees (hoekom?), om te laat herlewe die gees van die nederiges en te laat herlewe die hart van die verbryseldes.” Jes 57:15

Word Sy kind!

Ken jy God ook net op ‘n afstand?

Steve Flaig, van Grand Rapids, Michigan, het geweet hy is 'n aangenome kind. Op sy 18e verjaarsdag besluit hy om uit te vind, wie sy regte ma is. Sy aanneemouers, Pat en Lois Flaig, het hom in sy voorneme gesteun.

Pat Flaig het by DA Blodgett for Children, die agentskap wat Steve se aanneming hanteer het, vir agtergrond inligting aangeklop. 'n Paar maande later kry hy Steve se eie ma se naam, Christine Tallady. Sy was enkel en baie jonk toe Steve gebore is. Sy het die aannemingsrekord laat oop bly, met die hoop haar seun eendag na haar sal soek.

            Na Steve sy eie ma se naam gekry het, het hy op die Internet na haar woonadres begin soek. Sonder sukses. Na vier jaar ontdek hy, hy spel haar naam verkeerd as Taladay, terwyl sy Tallady is. Eers toe kry hy haar adres.

Dit was minder as 'n 2km van Lowes Store af, waar hy werk, af. Opgewonde vertel hy dit die volgende oggend vir sy baas by Lowes Store. Verbaas sê sy baas: "Bedoel jy Christine Tallady, wat hier werk?” Steve was stomgeslaan.

Steve sê hieroor: “Vir ‘n paar weke het ek om haar geloop en haar goed dopgehou, maar nie geweet hoe ek haar  moet benader nie. Sou ek eenvoudig na haar toe stap en sê ‘hi, ek is Steve jou seun?’ En wat sou gebeur as sy my verwerp?”

Op Vrydag 14 Desember 2007, ontmoet Steve en Christine, wat mekaar al so lank op 'n afstand ken, mekaar as moeder en kind! "Dit was ‘n wonderlike ontmoeting, maar ‘n tranedal,” het Steve later vertel.

As ons God net op 'n afstand ken, soos Steve en sy ma, kan ons deur die HERE Jesus Christus as 'n eie kind naby aan God kom. Vertrou in Jesus as jou Verlosser. Sê vir Hom, hardop of in jou hart: "HERE Jesus, red my, asseblief." En word 'n naby kind van God deur Sy Gees in jou hart.

            “Die Gees... laat julle nie weer in vrees lewe nie; nee, julle het die Gees ontvang wat julle tot kinders van God maak...” Rom 8:15.