Die gevreesde 666

·   

Wie se Merk dra jy?

Die instelling van die Merk van die Dier is so ‘n gegewe as wat die geboorte van Jesus Christus was, as wat Sy sterwe was, en ook Sy opstanding en ook Sy Hemelvaart en beslis ook Sy Wederkoms.  Dit is op pad!
            Wat gaan gebeur as jy die Merk van die Dier aanvaar?
            Openb. 14: 9-11 sê:  “As iemand die Dier en sy beeld aanbid en ‘n merk op sy voorhoof of op sy hand ontvang sal hy self ook drink van die grimmigheid van God wat ongemeng ingeskink is in die beker van Sy toorn, en hy sal gepynig word met vuur en swawel voor die heilige Engele en voor die Lam.
            “En die rook van hulle pyniging gaan op tot in ewigheid, en hulle het dag en nag geen rus nie – hulle wat die Dier en sy beeld aanbid, en elkeen wat die merk van Sy naam ontvang.”
            Ons is op die vooraand van die instelling van die Merk van die Dier.  Let op die snelle tegnologiese ontwikkeling in die digitale wêreld.  ‘n Magdom inligting kan op ‘n skyfie so groot soos ‘n speldekop geberg word.
            Merke, soos jou handtekening, wat onsigbaar is vir die oog, maar sigbaar onder sekere beligting, is lank reeds moontlik.  Daar is geen twyfel oor die beskikbaarheid van die Merk nie.
            Wat wel saak maak, is wie die merk gaan ontvang. Die Bybel sê die mense sal die Merk ontvang.  Daaruit wil mens aflei dat elkeen ‘n keuse sal hê of hy die Merk wil ontvang al dan nie.
            Omstandighede gaan miljoene mense dwing om die Merk te ontvang:  Aan die een kant omdat hulle nie die gevaar daarvan sal besef nie, en aan die anderkant omdat niemand sonder die Merk sal kan handel dryf nie – Openb. 13: 16  “En hy maak dat aan almal, klein en groot, en die rykes en die armes, en die vrymense en die slawe ‘n merk op hulle regterhand en op hulle voorhoofde gegee word; sodat niemand kan koop of verkoop nie, behalwe hy wat die Merk of die naam van die Dier of die getal van sy naam het.”
            Finansiële instellings wil in toenemende maat nie meer tjeks uitskryf nie.  Jy moet ‘n bankrekening hê. Geldverwisseling begin al hoe meer aanlyn geskied.  Sonder jou strepieskode ID-boekie is jy deesdae verlore.  Die poskantoor wil nie eers jou eie pakkie aan jou oorhandig as jy nie oor die nuwe strepieskode boekie beskik nie.
            Alles wat jou lewe beheer werk met ‘n nommer, vanaf jou ID-nommer tot by jou mediese fonds, al die koopkaarte, alles.  Die moontlikheid om kontant te hanteer verklein by die dag.
            Bedrog in die finansiële wêreld gaan maak dat kontant, tjeks en koopkaarte verdwyn.  Die Merk, of dan nommer, sal op jou voorkop en/of jou hand verskyn.
            Dis hier wat jy sal moet vasskop en waar jou pad op aarde finaal gaan skei van diegene wat die Merk ontvang.  Al wat vir jou sal oorbly is ruilhandel en daarvan weet ons mense niks, maar ons sal vinnig moet leer.
            Iemand wat onlangs afgetree het, het vir homself R1 miljoen se klein goue munte gekoop.  Hy meen hy sal goue munte vir al sy aankope kan verruil.  Wat het ek en jy om te verruil?
            Ons sal iets moet hê om in ruil te gee vir ‘n nuwe bril, nuwe kunstande, vir medisyne, vir motoronderdele, vir kos, vir brandstof, ens.
            Waar gaan ons woon? Want ons sal nie ons water- en kragrekenings kan betaal nie. Maak maar jou eie skrikwekkende lysie.
            Een ding is seker, omstandighede gaan die ware gelowiges nader aan mekaar dwing. Die talle dinge wat nou skeiding onder ons veroorsaak, sal (moet) verdwyn.  Ons gaan mekaar absoluut nodig kry.
 Daar sal nie langer kerke wees nie, ons sal Christus se gemeente, Sy Bruid, wees.
Ons sal ‘n nuwe dispensasie binnegaan wat drasties van die huidige gaan verskil. Selfs ons hoogmoed en inhibisies gaan verdwyn. Ons sal ‘n totale metamorfose deurmaak, want die Here Jesus sê Hy kom haal sy Bruid en sy sal sonder vlek of rimpel (moet) wees. Efes. 5:27
            Daar is mense wat meen dat wanneer die Merk van die Dier ingestel word, die ware gelowiges weggeraap gaan word. Dit lyk egter nie so volgens Openb. 14: 12 nie:  “Hier kom die lydsaamheid van die heiliges te pas; hier is hulle wat die gebooie van God en die geloof in Jesus Christus bewaar.” Wat beteken dit?
            Dit is ‘n woord van bemoediging en vertroosting aan die gelowiges. In die dag van oordeel mag hulle nie verskrik raak nie, maar moet hulle standvastig bly in die geloof (Openb. 13:10 en 5:8).
Die volharding kom daarin tot uitdrukking dat hulle in die dae van nood en stryd vasstaan in die gebooie van God (Openb. 12:17;  1 Joh. 3:23, en in die geloof in Jesus Christus (Open. 14:4), teenoor diegene wat die Dier aanbid.
            Wie se Merk gaan jy dra, die merk van die Dier, of die merk dat jy verseël is deur die Bloed van die Lam.
            Hoe sterk staan jy as gelowige? Gaan jy daardie dag kapituleer, of gaan jy volhard en vasstaan? Jou besluit sal onherroeplik finaal wees.
Kyk hoe min van ons mense het vandag ‘n woord van eer. Ons mense verbreek hulle woord na willekeur, so erg dat ons al onder mekaar sê:  Ons kan niemand meer vertrou nie.
Mense gee hulle hand en hulle woord vir mekaar in die huwelik en in twee uit elke drie huwelike verbreek hulle dit vir elke rede denkbaar. Hulle het beloftes aan God gemaak oor kinders, beloftes wat hulle ook nie nakom nie. Kyk net  na die kinders sonder morele waardes.
Ons mense het nie meer ‘n woord van eer nie, nie teenoor mekaar nie en ook nie teenoor God nie.
Daardie dag sal jy nie langer so kan maak nie. Jou woord, jou besluit, is finaal.
Hoe gereed is jy vir daardie dag? Dien jy die HERE,  groei jy? En wat van bid en Bybelstudie? Leef jy volgens die voorskrifte van die HERE? Bely jy Christus? Jy sal nou reeds moet leer om sterk te staan.
Jy moet jou voorberei vir die gewigtigste besluit in jou hele bestaan.
            So seker soos wat die Merk van die Dier ingestel gaan word, so seker is die sewe jaar van verdrukking. Sommige redeneer gelowiges spring die verdrukking vry, ander meen ons sal die helfte van die tyd moet deurmaak en nog ander meen ons sal die hele sewe jaar tydperk moet deurloop. Almal het Skrifgronde vir hulle aannames.
            Maar wat maak dit saak, ek en jy het geen beheer daaroor nie. Dis in God se hande. Wat wel waar is, is dat Jesus Christus kom om Sy Bruid (ek en jy) te haal en ons sal “sonder vlek of rimpel” wees.
            Iets moet dus gebeur wat ons waarlik Bruid sal maak, wat ons vir die huwelik en die huweliksmaal moet voorberei, as ons dit nie self doen nie. Om die Merk van die Dier te weier en die verdrukking deur te gaan, lyk mos na die wyse waarop hierdie voorbereiding mag geskied!
            Let op hoe drasties die wêreldtoneel verander wees die toename in losbandigheid, misdaad en terrorisme. Polisiemagte wêreldwyd sukkel om die status quo te handhaaf, veral weens die toename in misdaad in eie geledere. Het jy al gedink wat gaan gebeur wanneer die polisiemagte nie meer weerstand kan bied nie?
            Vir diegene wat die Merk ontvang het, sal daar geen verdrukking wees nie. Hulle is dan deel van die stelsel. ‘n Sondaar kan nie sondig nie want hy is sondig.  Sonde gaan die wêreld in totaliteit oorheers.
Pornografie het byvoorbeeld reeds ‘n aanvaarde norm geword, selfs op  die TV en die Internet in jou huis. Naakte sekstonele en wellus is nou die norm.
            Maar hulle tyd kom wanneer die gelowiges Christus tegemoet gaan in die lug. Dan eers sal diegene met die Merk drink van die wyn van die grimmigheid van God …. (Openb. 14: 9-11).
            Hoe gaan die Merk van die Dier lyk? Wat maak dit saak? Dit sal die Merk van die Dier (onheil) en nie die merk van God wees nie. Dit sal na verwagting ‘n nommer wees.
            Mens kan vandag jou pinkode in syfers of alfabeties insyfer. Jou selfoon kan in syfer en in alfabet kommunikeer. Dit gaan nie oor hoe die Merk gaan lyk nie, maar of jy dit gaan aanvaar al dan nie.
            Moenie redeneer dat jy gaan wag vir die dag van die instelling van die Merk en dan sal jy Christus kies nie. Jy sal vir seker die toets dop. Jy sal nie die geestelike en Goddelike stukrag wat dit gaan vra om vas te staan nie.
            In daardie stadium gaan die misleiding en verleiding op sy hoogste vlak fungeer want die Dier gaan geweldige mag uitoefen, groot tekens doen, sodat hy selfs vuur uit die hemele laat neerdaal op die aarde voor die oë van die mense. Openb. 13: 11-18).
            Jy sal daardie dag die dood in die oë staar want Openb. 13:15 sê hy gaan diegene wat die Merk nie wil aanvaar nie, ook doodmaak! Dit sal gaan soos nou met5 ISIS: Of jy versaak Christus of jy word op die plek onthoof. Net veel erger.
            Die ware gelowige sal die dood nie vrees nie, want hy het reeds geleer om nie diegene te vrees wat die liggaam kan doodmaak nie. In daardie dae sal mense ook weens vrees aan hulle harte beswyk.
            Wyse maagde hou hulle lampe vol olie.  Dwase maagde het nie genoeg olie nie. Wat dan van jou wat geen olie het nie?

Herlewing begin by jou en my…

“Wees nie traag in die ywer nie; wees vurig van gees; dien die Here.” Rom 12:11. Die klem val op: “Wees vurig van gees!”
            Komaan, kry jou geloof in aksie! "Die vurige gebed van die regverdige het groot krag!" Jak 5:16



            Die opdrag is duidelik: Ons moet aan die brand wees vir die HERE. Ons leef in ‘n tydvak van louheid, die mees gevaarlike toestabnd vir ‘n Gelowige om hom- of haarself in te bevind. Louheid ontstaan wanneer Gelowiges toelaat dat die tydelike dinge van hierdie wêreld hul lewens oorheers en selfs die Bybel stof vergader.
            Wil jy graag ‘n lewensveranderde belewenis met die Heilige Gees beleef?
            Kom terug in die Woord sodat die HERE met jou kan praat. Vra die HERE om jou oë te open sodat jy Sy verborgenhede kan sien en beleef. “En hulle sê vir mekaar: “Was ons hart nie brandende in ons toe Hy met ons op die pad gepraat en vir ons die Skrifte uitgelê het nie?” Luk 24:32. Word ‘n Emmausganger… stap saam met Jesus deur die Woord.
            Die Woord steek ‘n nuwe vuur in jou hart aan. Elke woord in die Bybel is lewendig. Die Bybel het deur eeue heen behoue gebly. Vergeet die negatiewe en die satan se praatjies. Hy het nooit gewaag om sy eie Bybel ten boek te stel nie want hy is en bly ‘n leuenaar.
            Mens dink skielik aan die vrou wat gekniel het om haar lewe opnuut aan die HERE toe te wei, toe sy bid: “Djere, djy ken voor my want Djere, Djy’t my siel gered, maar ai Djere, die Satan hy het nie my adres gaverloor nie.”
            Stook die vuur van gebed in jou lewe. As jy nie weet wat om te bid nie, bid dan die volgende… jy kan dit ook singend bid, op jou knieë:

WAT 'N VRIEND HET EK IN JESUS,
HY WAT IN MY PLEK WIL STAAN;
WAT 'N VOORREG OM GEDURIG
TOT GODS TROON DEUR HOM TE GAAN!
HOE VERBEUR EK TOG DIE VREDE,
AG, HOE DIKWELS LY EK SMART,
NET OMDAT EK NIE MY NODE
UITSTORT IN GODS VADERHART!

AS VERSOEKING EN BEPROEWING,
OF AS KWELLING MY BEDREIG,
LAAT EK NOOIT MISMOEDIG WORD NIE,
LAAT MY BEDES OPWAARTS STYG.
NêRENS IS 'N VRIEND GETROUER,
AS HY WAT MY NODE WEET;
JESUS VOEL MET AL MY SWAKHEID,
EN WIL DEEL IN AL MY LEED.

IS EK SWAK, GEDRUK DEUR LASTE,
ONDER KOMMER NEERGEBUK,
DIERB'RE HEILAND, MY GANSE TOEVLUG,
O BEVRY MY WEER VAN DRUK!
AS MY VRIENDE MY VERSAAK HET,
SOEK EK IN GEBED DIE HEER,
AAN SY BOESEM IS EK VEILIG,
HY VERTROOS MY KEER OP KEER.

Jesus is ons Vriend. “Julle is my vriende as julle alles doen wat Ek julle beveel.
“Ek noem julle nie meer diensknegte nie, omdat die dienskneg nie weet wat sy heer doen nie. Maar Ek het julle vriende genoem, omdat Ek alles wat Ek van my Vader gehoor het, aan julle bekend gemaak het.” Joh 15:14-15
‘n Vuur hou net aan met brand as jy voortdurend hout op sit. Jou stiltetyd saam met die HERE is van kardinale belang. Jesus, jou beste Vriend, wag vir jou. Let op: “Want watter groot nasie het gode wat vir hulle so naby is soos die HERE onse God so dikwels as ons Hom aanroep?” - Deut 4:7
            Mens kan nie oorleef sonder gereelde gemeenskap met die HERE nie. Jy mag selfs nagmaal in jou stiltetyd gebruik. Gebed is soos jou broodnodige asemhaling wat jou geestelik lewend hou.
            Wat ook al die rede is vir jou louheid, maak dit vandag nog reg.
            Jy mag sing in jou stiltetyd, jy mag jou hande klap van blydskap, jy mag selfs in die agtergrond pragtige geestelike liedere speel en selfs saam sing. Jy mag ook huil en selfs lag. Jou stiltetyd is ‘n brandende vuur. Loof die HERE, sag of hard.
            “Ek vermaan julle dan, broeders, by die ontferminge van God, dat julle jul liggame stel as 'n lewende, heilige en aan God welgevallige offer dit is julle redelike godsdiens. En (uiters belangrik) word nie aan hierdie wêreld gelykvormig nie, maar word verander deur die vernuwing van julle gemoed (hoekom?), sodat julle kan beproef wat die goeie en welgevallige en volmaakte wil van God is.” Rom 12:1-2 

Dalk kan ons gekweste land ontkom.

Daar is tans ’n natuurvideo in omloop waarin vyf leeus ’n buffel plattrek. Die buffel is al erg beseer toe die leeus onderling begin baklei en die buffel in die proses kans kry om op die been te kom en te ontsnap.

Dié video het my laat dink aan ’n soort ingryping van God wat ’n paar keer in die Bybel vermeld word, naamlik dat Hy verwarring onder die vyande van Sy volk gebring het en hulle mekaar self in die proses uitgewis het sonder dat Israel veel hoef te gedoen het.

Die bekendste geval is seker dié van Gideon met sy 300 manne teen die menigte Midianiete en waar ons lees dat “die Here die swaard van die een teen die ander gerig het”. (Rigt. 7:22)

2 Kron. 20:22+23 vertel hoe die Here vir ’n oormag vyande wat op Jerusalem toegesak het ’n “hinderlaag opgestel” het en hoe hulle “mekaar in die verderf gehelp” het.

Die Here het ongewone maniere om met Sy vyande te werk. Ja, God het inderdaad vyande. Veral mense wat leuens, valsheid, korrupsie en bedrog eerder as die waarheid kies, posisioneer hulself as vyande van God.

Hy is die hoogste uitdrukking van waarheid. Trouens, Hy word “Waarheid” genoem. Waarheid word aan Hom gemeet.

Hy is die definisie van waarheid. God kan nie met leuens en leuenagtiges geassosieer word nie.

Die laaste paar weke is Suid-Afrika toenemend ontsier en onteer deur politieke slinkshede, intriges, bedrog, valsheid, sameswerings, korrupsie en leuens – en dit veral deur hulle in die hoogste gestoeltes.

Dis sleg as hulle wat die land moet regeer kwalik enige geloofwaardigheid meer in die oë van die landsburgers het.

Hiermee posisioneer ek God nie soseer teen ’n politieke party nie, maar teenoor mense wat ter wille van magsug en hebsug sal lieg, bedrieg, konkel, saamsweer en selfs moor om hul selfsugtige doelwitte te bereik.

Terwyl eerbare mense uit verskillende sektore van ons samelewing al hoe meer probeer om korrupsie en bedrog in ons land te ontmasker en te beveg, is meer Christene as ooit tevore ook diep onder die indruk van die rol wat hulle kán en behóórt te speel.

Die laaste paar maande het individuele gelowiges, gebedsgroepe en kerke op ’n ongekende wyse tot die Here vir Sy ingrype gebid. Hierdie geestelike ontwaking en mobilisering reflekteer dalk nie in die media nie, maar wel dáár waar dit regtig saakmaak – voor God se troon.

Dit word al hoe duideliker dat daar grootskaalse verwarring en tweespalt onder die vyande van waarheid en geregtigheid plaasvind.

Mense van karakter, met ’n sin vir waarheid en integriteit, vind hulself al hoe meer genoop om onder die donker skadu van bedrog en korrupsie uit te beweeg en standpunt in te neem – selfs teen hul eie partylede en ­jare lange kamerade.

As magsugtige politieke roofdiere onder mekaar begin veg, is daar dalk hoop dat ’n gekweste land kan ontkom en oorleef.

Dalk aanskou ons ook nog soos Israel van ouds dat ’n Godgestuurde verwarring ’n hoopvolle toekoms vir Suid-Afrika inhou!

Dr. Isak Burger

Verwag altyd die Goeie, want God is Goed

          

Ons lewe in ‘n tydvak waar ons daagliks eerder slegte as goeie nuus verwag. Die slegte nuus van oorloë en dergelike is egter goeie nuus wat die profetiese beeld oor die Eindtyd voltooi. Hoe nader ons aan die einde van hierdie wêreld beweeg, hoe meer opgewonde moet ons raak want ons verlossing is na by.
            Wanneer die telefoon laataand of vroegoggend lui, is ons eerste gedagte dat dit slegte nuus moet wees. Ons dink meesal eerste oor dood. Wanneer die voorman jou laat roep kan dit nog gaan, maar wanneer die besturende direkteur jou laat roep, dan bewe jy al. Jy vermoed jy gaan afbetaal word of straks nog erger dinge. ‘n Laataand klop aan die voordeur, laat meeste van ons ook in vrees regop sit.
Ons kan nie so in vrees lewe nie. Dit sal ons vernietig.  “En neem aan die helm van verlossing en die swaard van die Gees – dit is die woord van God…” Efes 6:17
            Ons is geneig tot negatiwiteit, maar as Wedergeborenes staan ons op Oorwinningsgrond, geklee in die helm van verlossing… en verder: “Maar laat ons wat van die dag is, nugter wees, met die borswapen van geloof en liefde aan, en as helm die hoop op die saligheid.” 1 Thes 5:8
            As jy op die oomblik deur ‘n moeilike tyd gaan, beklee jou met 1 Thes 5:8 en glo dit as uitgemaakte saak dat God antwoord en die problem opgelos is. Ons kan nie en sal ook nie ooit die onderspit delf nie.
            Ons lewe op hoop, nie soos in “ek wens” nie, maar “ek weet”. Vir die Wedergeborene is hoop altyd “toekoms-feit” soos in hoopvolle toekoms.
            Natuurlik sterf mense, natuurlik is daar ongelukke, maar as Wedergeborene leef ons BO die omstandighede en nie ONDER die omstandighede nie.
            As mens ‘n studie doen oor die rol van Engele in ons lewens, dan sal jy besef dat mens in elk geval nooit alleen is nie. Natuurlik is daar demone ook, maar hulle word totaal oorskadu deur ‘n magdom Engele, groeperinge… elk met ‘n eiesoortige bediening.
            God is IN ons en Hy is by verre groter as hy wat in die wêreld is. 1 Joh 4:4

Is hierdie straks jou Eindtyd roeping?

“Kyk, Ek stuur julle die profeet Elía  (wat beteken: God is YAWEH) voordat die groot en vreeslike dag  van die HERE aanbreek (hoekom?) “En hy sal die hart van die vaders terugbring tot die kinders, en die hart van die kinders tot hulle vaders (hoekom?), sodat Ek nie hoef te kom en die land met die banvloek tref nie.” Mal 4:5-6
            Die HERE roep Sy volk op tot gesinsherstel.  Hierdie wekroep behels die volgende:
1. dat daar ’n oordeelsdag kom;
2. dat die Here vooraf spesiaal Sy volk oproep;
3. dat hierdie wekroep oor die herstel van gesinne gaan.

Gesinslewens in Suid-Afrika, is feitlik oral aan flarde. Praat met beraders, predikante, skoolhoofde en dis duidelik die verbrokkeling van gesinne en van ’n normale gesinslewe is aan die orde van die dag.
Bloufilms, die Internet, TV, egskeidings en selfone speel ‘n kardinale rol hierin. Die gesagstrukture by meeste huise en die skole het getuimel. Ouers voed nie meer hulle kinders op nie. Baie kinders laat hulle ook nie opvoed nie.
Die kommunisiekasiegaping het ‘n liederlike afgrond geword. Daar is in sommige gevalle vyandskap tussen ‘n kind en ouer en onderwyser en kind. Baie kinders loop eenvoudig weg en beland op talryke verkeerde weë. Hulle twis selfs oor godsdiens en kerk.
            God se wil is dat almal gered sal wees. Versplinterde gesinne noodsaak selfs dat die HERE met ‘n spesiale aksie in hierdie tyd kom om die gesinne te versoen.
            Behalwe genoemde feite, is daar die ouers wat hulself vandag in huwelike bevind waar hul huweliksmaat en kinders geen kennis dra van ‘n buite-egtelike kind iewers in die verlede wat naarstigtelik na sy biologiese ouers soek nie.          
            Daar is tienduisende kinders op verskeie webtuistes in SA wat na hul biologiese ouers soek en en in ‘n mindere maat ouers wat na hul biologiese kinders soek.
            Jou eie kind sal jy nooit kan wegwens nie. Dit is en bly jou kind en die Gees van God dring julle in hierdie en die toekomende tyd na mekaar toe. Daar is gevalle van mense wat gedink het, hulle neem hul geheim saam na hul graf, maar helaas, kort na die begrafnis kom die waarheid aan die lig.
            Vaders en moeders wat nie in die lig wandel met mekaar nie, sit met ‘n binding in hulle gees. Daardie binding het allerlei negatiewe gevolge wat soms selfs tot ‘n egskeiding lei.
            Ons lewe in die Laaste Uur. Dis God se wekroep dat ouers en kinders mekaar vind, met mekaar regmaak  en gereed maak vir die Koms van Jesus Christus.
            Die Oordeelsdag waarvan Maleagi en ander profete praat, gaan oor niks anders nie as die gereedmaak vir die Koms van Jesus Christus nie.
            Of jy is gereed daarvoor en leef in afwagting, of jy bly agter saam met miljoene ander en beleef die Groot Verdrukking. Die keuse is joune.
            Maleagi 4:5-6 weerspieël die Liefde van die HERE. Elia kom nie terug aarde toe, maar Jesus en al die geroepe Elia’s is besig om in die krag en die gees van Elia te beweeg:
“En hy sal voor Hom uit gaan in die gees en die krag van Elía (hoekom), om die harte van die vaders terug te bring tot die kinders en die ongehoorsames tot die gesindheid van die regverdiges (hoekom?), om vir die Here 'n toegeruste volk te berei.
            Maar wie was Elia? Vanaf 1 Kon 17 lees Elia se geskiedenis onder meer soos volg:

•          Elia was ’n profeet in ’n tyd toe die HERE se volk afgedwaal het;
•          maar hy’t aangehou om hulle terug te roep na die HERE toe, al wou hulle nie na hom luister nie en hom daaroor wou doodmaak;
•          hy was eintlik in die Ou Testament tyd ‘n voorbeeld van hoe ’n profeet moes wees.

            En nou belowe die HERE hier deur Maleagi dat Hy Elia na Sy volk toe sal stuur voordat die oordeelsdag kom:
•          Hy sal deur Elia met hulle praat;
•          Hy sal, soos in Elia se tyd, ’n kragtige wekroep tot hulle laat uitgaan.

Die HEREe bedoel hiermee nie dat die Elia van die OT weer hier op aarde gaan kom lewe nie. Die Nuwe Testament leer ons duidelik dat voordat Jesus die eerste keer gekom het, Johannes die Doper die Elia was wat die HERE se volk teruggeroep het na Hom toe.
In ’n tyd toe mense se godsdiens oppervlakkig en skynheilig geword het, het Johannes met groot krag vir hulle gepreek:  “Bekeer julle, want die Koninkryk van die Hemel het naby gekom.” Mat 3:2
In hierdie Eindtyd, voordat Jesus Christus weer kom, sien mens hierdie Elia-gees oral in groot krag, heerlikheid en getrouheid kinders en die vaders versoen, die versplinterde gesinne restoureer.
Diegene wat ons reeds vooruitgegaan het, sal in die Hemel versoen wees. Vir seker.
            Wat moet hierdie Elia’s wat die HERE stuur, doen?
            Let op: “Want Ek het geen behae in die dood van hom wat sterwe nie, spreek die Here HERE. Bekeer julle dan en lewe.” Eseg 18:32
Maleagi profiteer:
•          hierdie Elia wat Hy stuur, sal die hart van die vaders terugbring tot die kinders
•          en die hart van die kinders tot hulle vaders;
•          Hierdie Elia’s gaan gebruik word om gebreekte gesinne te herstel;
•          hy gaan werk aan versoening tussen ouers en kinders; want ’n volk wat gereed is vir die Here se koms, is ’n volk waar die hart van die vaders en die hart van die kinders bymekaar is, waar die geslagte mekaar weer gevind het.
            Hierdie Elia’s gaan daarin slaag om ouers en kinders wat van mekaar verwyderd geraak het, weer bymekaar uit te bring?
Hulle gaan doen wat die eerste Elia gedoen het: Elia het mense teruggeroep na die Here toe – die vaders en die kinders. 7 Lk 1:17
            Elia bring vaders en kinders bymekaar deur hulle na die HERE toe te roep. En waar dit gebeur, is mense gereed vir die Here se koms, en hoef hulle niks te vrees nie.
            Voordat die HERE kom, stuur Hy Sy oproep dat Sy kinders moet terugkeer na Hom toe en restoureer Hy die gesinslewens.
Sy liefde word weer eens gesien in: “Want so sê die Hoë en Verhewene wat in die ewigheid woon, Heilig is sy Naam: Ek woon in die hoogte en (waar nog) in die heilige plek en by die verbryselde en nederige van gees (hoekom?), om te laat herlewe die gees van die nederiges en te laat herlewe die hart van die verbryseldes.” Jes 57:15
Ons het almal ‘n Roeping om die getal vol te maak. Is dit jou roeping om die versplinterde gesinslewens te restoureer? Oral in SA is sulke mense nodig. Net soos in enige ander roeping, lei die Heilige Gees ook hierdie mense hoe om die gesinslewens te heel.
Jou roeping is vagemaak in die Koninklike Wet in Jak 2:8.
Is hierdie ook jou Eindtyd roeping?
Almal wat betrokke is by gebedsgroepe, bid asseblief daagliks vir die herstel van gesinslewens en Herlewing. Gesinne is die pilare van ‘n volk en as die pilare meegee, val die volk. Maleagi bring hoop… God se wekroep dat die gesinslewens moet herstel. As dit jou roeping is, is jy nie alleen nie. Die Heilige Gees dra jou. 

Dankie Jesus vir Hoop...

God wil dat ons as Sy kinders, hoop op ‘n aaneenlopende grondslag moet beleef en geniet. Nie hoop soos in “dalk” nie, maar hoop soos in “toekoms-feit”, want God sê daar is hoop.
Die Almagtige God is die God van hoop. Hoop is een van die gawes wat God aan ons skenk, vandaar ook die Afrikaanse spreekwoord dat “die hoop sal nooit beskaam nie!”
Nogtans verval ons soms in wanhoop en word ons mismoedig. Mismoedigheid is veronderstel om vir die Christen ‘n kortstondige moment te wees op pad terug na hoop.
Ons het hoop as integrale deel van ons bestaan nodig want ons kan nie sonder hoop lewe nie.
Sonder hoop voel dit vir ons of die lewe nie die moeite werd is nie... soos wanneer jy totaal hulpeloos in die diepsee weggly en jou lewe voor jou verby sien flits. Soos wanneer jy middernag met ‘n visboot in die stormsee en gietende reën ure lank sukkel om veiligheid te bereik met net ‘n paar roeiers.
Of soos wanneer jy letterlik alles in die lewe verloor en die enigste oplossing selfmoord is, maar ‘n reuse Engel jou verhoed om dit te doen.
Al is jy ‘n kind, moenie eers aan selfmord dink nie want daar is hoop. Selfs al kan jy dit nie sien nie, weet dit, daar is hoop.
Die Heilige Gees in ‘n grootmens, is nie ‘n kleiner gees in ‘n jongmens of in ‘n kind nie. Die Heilige Gees is in Sy volheid ook vir en in jou as jongmens en selfs as kind.
Wanneer ons hoop het, dan voel ons soos wat God ons gemaak het.
Sonder hoop voel ons soos ‘n regte ou nikswerd – totdat ons besef, daar is hoop!
Daar is hoop! Dit maak nie saak wat jou omstandighede is en watter probleme jy in die gesig staar nie: Daar is beslis hoop. Solank jy nog lewe en asemhaal is daar hoop.
Omstandighede kan verander. “Want solank iemand by al die lewendes behoort, is daar hoop.” – Pred. 9:4.
“’n Lewendige hond is beter as ‘n dooie leeu.” – Pred. 9:4.
Luister weer, wat jou omstandighede ook al mag wees, al staar jy die dood in die gesig, is daar hoop.
Al het jy jouself afgeskryf en heeltemal moed opgegee, is daar hoop, want jy is heelwaarskynlik in jou huidige situasie omdat jy jouself daarin geplaas het.
Onthou, ander mense raak ook mismoedig, soos Koning Salomo. Hy was die mees wyse man wat ooit geleef het. Hy was ‘n magtige koning, en selfs hy net by ‘n plek in sy lewe gekom waar hy gevoel het dit beter sou wees om liewer dood te wees. – Pred. 4: 1-2.
Selfs Dawid het in wanhoop verval in Ps. 142:3.
Natuurlik kom daar tye en omstandighede in ons lewens wat ons spreekwoordelik op moedverloor se vlakte laat sit. Ons kan maar daar sit, maar hoop verlaat ons nooit nie. Daar is altyd hoop, want God het dit beloof!
As jy moedverlore sou word, dink maar daaraan dat jy in belangrike geselskap soos die van Koning Salomo, Koning Dawid en Jesus Christus is.
Juis omdat Jesus Christus opgestaan het, is daar hoop, en boonop hoop op hoop.
Daarom durf ons nie in ‘n staat van mismoediging bly nie. Ons moet die kole van hoop aanblaas tot ’n magtige hoopvolle vuur.
Dink weer ‘n keer: Daar is mense wat sê hulle sal sterwe vir Christus. Klink nogal edel né. Die waarheid is dat God nie verlang dat jy vir Hom moet sterwe nie, maar juis dat jy vir Hom moet Lewe!
Lewe om ander te bemoedig. Lewe om die gevangenes en die siekes te besoek, die ellendiges op te help, jou man, jou vrou, jou kinders lief te hê, die Lewegewende Evangelie te verkondig, om Christus voor die mens te bely.
Waar daar lewe is, is daar hoop, sê ons altyd. Maar selfs in die dood is daar hoop want ‘n Christen gaan nie dood nie, hy het die Ewige Lewe.
Hoop lei tot verandering, tot restourasie, tot nuwe lewe, tot nuwe moed, ‘n nuwe visie, ja, tot ‘n totale metamorfose!
Verandering verwyder die haat, die nyd en die liefdeloosheid uit jou lewe. Hoop herstel huwelike en verhoudings.
Hoop gee jou aangenome kind aan jou terug en aan die aangenome kind sy ouers terug. Mal 4:5-6
Hoop sê: “Staan op, neem jou bed op en loop!” – John. 5:8.
Die besluit om hoop te aanvaar berus egter by jouself. Jy moet die keuse maak.
Hoop sê: “As jy (as Christen gestruikel het) jou sondes bely, Hy is getrou en regverdig om jou, jou sondes te vergewe, en (boonop) jou van alle ongeregtigheid te reinig. – 1 Joh. 1:9. Hoop maak alles nuut, ook vir jou.
Heb. 7:19 sê: “… daar is die invoering van ‘n beter hoop waardeur ons tot God nader.”
Hoop sê in Sag. 9:12: “Keer terug na die vesting o hoopvolle gevangenes! Ook kondig Ek vandag aan dat Ek jou dubbel sal vergoed!”
Hoop sê in Klaagl 3:21-26: “Dit sal ek ter harte neem, daarom sal ek hoop: dit is die goedertierenheid van die HERE dat ons nie omgekom het nie, want Sy barmhartighede het geen einde nie (let op: geen einde nie); hulle is elke more nuut; U trou is groot!
“Die HERE is my deel, sê my siel, daarop sal ek op Hom hoop. God is die HERE vir diegene wat op Hom hoop, vir die siel wat Hom soek. Dit is goed om in stilheid te hoop op die hulp van die HERE!”
Hoop sê in Heb. 6:18-19: “Daarom het God, omdat Hy nog kragtiger aan die erfgename (dis ek en jy as Christene) van die belofte die onveranderlikheid van sy raad wou toon, dit met ‘n eed gewaarborg:
“Sodat ons deur twee onveranderlike dinge, waarin dit onmoontlik is dat God sou lieg, kragtige bemoediging kan hê, ons wat ontvlug het, om vas te hou aan die hoop wat voorlê; en ons het dit as ‘n anker van die siel, wat veilig en vas is en ingaan tot die binnekant van die voorhangsel.”
Dit is noodsaaklik dat jy ‘n studie maak van Heb. 6. Dit staan bekend as die hoop-hoofstuk.
In Joël 2 doen hoop ‘n ernstige beroep tot bekering, want daar is hoop en in Joël 2:25 kom die genadige en regverdige God en sê hy sal diegene wat terugkeer na die hoopvolle vesting vergoed vir die jare wat die sprinkane verslind het.
Maak altyd die regte keuse, kies HOOP! – Sjibbolet

Iemand se gebed nou anderdag:

Ek is ‘n Koningskind!
Ek is meer as Oorwinnaar deur Christus wat my krag gee
Ek is die wenner en nie die verloorder
Ek is tot alles in staat weens Sy krag
Ek sit saam met Jesus in hemelse plekke
Ek regeer saam met Hom oor die vyand en sy werke
Satan ek weerstaan jou, jou werke en jou planne;
Ek bind jou en maak jou kragteloos in Jesus’ naam
Jy’t genoeg gesteel en geslag
Jou tyd is op
Die bloed van Jesus is teen jou
Wyk van my af!
Ek eis duisendvoudig terug, al’s wat jy van my gesteel het
Ek eis ‘n siel vir elke sent wat jy van my beroof het
God sal jou straf.. dis reeds so opgeskryf!
Ek neem my gesag in Christus op,
Hy leef in my en ek deur Hom...
Met Jesus loop ek ‘n bende storm,
Met Hom spring ek oor ‘n Muur,
In Jesus’ naam
Amen

‘n Eenvoudige traktaatjie

In A Victory Tract vertel 'n man in die eerste persoon sy storie onder die titel: Jou kaartjie asseblief!

Ek het 'n bus uit die stad huis toe gehaal. Nie lank nie of die kondukteur kom my kaartjie vra. Ek gee dit vir hom en ook 'n traktaatjie. Hy lag. "Jy gee my elke keer een van daardie godsdienstige leesgoed. Jy moet dink ek is 'n slegte man. Maar ek is net so goed soos enige ander persoon."
Ek het my Bybel opgehou en gevra: "Sien jy hierdie boek. Dit sê vir my: ‘Bedrieglik is die hart bo alle dinge, ja, verdorwe is dit; wie kan dit ken? (Jer. 17:9).' Dit beteken jou hart en my hart." "O, wel," sê hy, "daar is vir my nog baie tyd om oor hierdie dinge te dink. Ek is nog jonk."
"Ja, ek sien so," antwoord ek hom, "maar jy kan na enige begraafplaas toe gaan en jy gaan grafte van verskillende groottes daar kry. 'n Dogtertjie het eendag vir haar ma gevra hoe oud moet mens word voor jy doodgaan. Die verstandige ma het vir haar 'n lang stuk lyn gegee en gesê sy moet na die begraafplaas toe gaan en dan meet sy elke graf. Elke keer maak sy 'n knopie in die lyn om die lengte aan te dui. Na 'n ruk het sy met haar lyn teruggekom. Die lyn was vol knope. "Kyk, ma, die grafte is alle lengtes." "Dit is so, my kind, dit is wanneer mense doodgaan: enige tyd en enige ouderdom." Die kondukteur het weer gelag en gesê: "Vir my is daar nog baie tyd."
Toe ek by my bestemming afklim sê ek vir hom: "Onthou die tyd is kort. Jy hoef nie na 'n Christuslose graf en hel toe te gaan nie. Christus het ook vir jou gesterf." Die jongman was nog maar ses of agt weke op daardie busroete, maar ek het dikwels met hom 'n gesprekkie aangeknoop en elke keer vir hom 'n traktaatjie gegee.
Die volgende dag na ons gesprek ry ek met dieselfde bus, maar daar is 'n ander kondukteur. Hy vertel my die man met wie ek die vorige dag gepraat het, wou na werk vinnig by sy klub kom. Hy het uit die bus gespring om die ander bus te haal. Hy het misgetrap en onder 'n voertuig beland. Hy is hospitaal toe geneem, maar hy is 'n kort rukkie later die ewigheid in.
Die nuus het my hewig ontstel, want dit beteken die man is toe regtig, soos ek hom gewaarsku het, na 'n Christuslose graf toe en hy is dan reeds in die verdoemenis. Net 'n rukkie later kom een van sy vriende by my aan en vertel my dat die man voor hy gesterf het Christus as Saligmaker aangeneem het, en gevra het hy moet dit vir my kom sê.
Na al die traktaatjies wat hy gelees het, het hy genoeg kennis gehad om te weet hoe om die Here aan te neem as sy Verlosser. Ek het na sy huis toe gegaan en ek is toegelaat om na sy lyk, wat toe reeds in 'n kis was, te gaan kyk. Toe ek op sy stil gesig afkyk het ‘n intense gedagte my vervul, wat ek ook hier neerskryf. Wat 'n dringende, vreeslike waarskuwing is dit nie, vir enige iemand wat dink hy het nog baie tyd nie.
“'n Mens is bestem om net een maal te sterf, en daarna kom die oordeel.” Heb.8:27. In sy liefde en genade het God aan hierdie jongman ‘n kans gegee om sy oordeel te ontvlug. God het hom ook 'n laaste boodskap gegee. Wat ek nou skryf mag God se laaste boodskap aan jou wees. "Kyk, nou is dit die regte tyd, nou is dit die dag van redding." 2 Kor.6:2
Bereik dit jou op veilige grond? Jy weet jy is gered! Of doen jy nog net jou bes om vir die Here te lewe? Vertrou jy daarin vir jou saligheid? Luister na die Here se woord: "Wie op sy eie hart vertrou, hy is 'n dwaas..." Spr.28:26. : "'n Man wat baie bestraf is, en sy nek verhard, sal onvoorsiens verbreek word sonder dat daar genesing is." Spr.29:1
Die man wat die traktaatjie vir die buskondukteur gegee het en met hom gepraat het, kan ook bly wees: Hy het sy werk vir die Here getrou gedoen. Daar is talryke getuienisse van mense wat weens ‘n eenvoudige traktaatjie gered is.
Ons is in die Laaste Uur. Bring die siele in. Jy kan tog nie alleen Hemel toe gaan nie. Gee om vir andder en neem hulle saam.