Ewige Rots, geklief vir my… en jou

Augustus Toplady is in 1740 in Engeland gebore. Sy pa was lid van die Koninklike Vloot en is kort na Augustus se geboorte oorlede. Augustus se ma moes hom alleen grootmaak.

Augustus het grootgeword en ‘n toenemende belangstelling in godsdiens getoon. Hy het geestelike joernale begin skryf en ‘n mooi lewe gelei.

Toe hy 15 jaar oud was het hy ‘n Metodiste Herlewing in Ierland bygewoon en so nabye ontmoeting met die HERE gehad dat hy besluit het om predikant te word.

Hy sou ‘n Metodiste prediker word omdat hy tydens ‘n Metodiste diens tot bekering gekom het. Nadat hy op universiteit egter die 39 artikels van die Church of England (Anglikaanse Kerk) bestudeer het, het hy besluit om ‘n Anglikaan te word.

In daardie tydstip was die debat tussen die Arminiane en Calvyne so erg dat dit lelik begin word het. Dit het ‘n breuk tussen Toplady en John Wesley veroorsaak, ‘n breuk wat nooit opgeklaar sou word nie want Toplaby is op 38-jarige ouderdom in 1778 aan tuberkulose oorlede.

Tog het die HERE Toplady gebruik om ‘n lied te skryf wat steeds vandag nog die Evangelie met groot vrug uitdra: “Eewge Rots geklief vir my.”

Toplady het ‘n paar geestelike liedere geskryf, maar “Eewge Rots geklief vir my,’ is vandag nog steeds een van die mees bekendstes.

Die eerste koeplet van die lied het in 1775 in die The Gospel Magazine verskyn. The Gospel Magazine is die eerste ker in 1766 verskyn en verskyn steeds. http://www.grace.org.uk/orgs/tgm/

Die volledige lied is die volgende jaar in Toplady se boek Psalms and Hymns for Public and Private Worship gedruk.

http://www.challies.com/wp-content/uploads/2013/04/371627068_tp.jpgDie storie word vertel dat Toplady eendag in ‘n onverwagte storm skuiling moes soek. Vandag nog staan die reusagtige rots in die bergpas bekend as Burrington Combe in Somerset Noord, Engeland.

Terwyl hy binne die rots geskuil het, het hy aan die volgende Skrif gedink: “Die HERE is my rots, my skuilplek en my redder, my God, my rots, by wie ek skuil…” Ps 18:3, en begin hy die lied skryf...


1. EWiGE ROTS, GEKLIEF VIR MY,

   LAAT MY VEILIG IN U BLY!

   LAAT DIE WATER EN DIE BLOED

   UIT U SY, AS LEWENSVLOED,

   MY TOT HEIL WEES EN TOT KRAG

   TEEN DIE SONDESKULD EN MAG!



2. WAT KAN EK OOIT BRING OF DOEN

   OM MY SONDE TE VERSOEN?

   SOU MY HART VAN YWER GLOEI,

   SOU MY TRANE EWIG VLOEI -

   NOG GEBEDE, NOG GEWEEN

   KAN MY RED, HEER: U ALLEEN!



3. LEDIG EN MET SKULD BELAS,

   KLEM EK AAN U KRUISHOUT VAS;

   NAKEND KOM EK KLEDING VRA,

   HULP'LOOS SMEEK EK OM GENA;

   VUIL SOEK EK U HEILFONTEIN,

   WAS MY, HEILAND, MAAK MY REIN! 



4. GAAN MY LEWENSLAMP EENS UIT,

   AS DIE DOOD MY Oë SLUIT;

   MOET EK UIT DIE WêRELD GAAN,

   EENMAAL VOOR U VIERSKAAR STAAN -

   EEWGE ROTS, GEKLIEF VIR MY,

   LAAT MY VEILIG IN U BLY!



Die Engelse weergawe:  https://www.youtube.com/watch?v=gM7gt_cSxjw
Preview YouTube video Rock of Ages

Ons as Gelowiges, as God se Volk, is geseënd

Maar ons spreek Sy seëm oor mekaar uit. So is die Volk in die Ou Testament geseën:



“Die HERE sal jou seën en jou behoed;

die HERE sal sy aangesig oor jou laat skyn en jou genadig wees;

die HERE sal sy aangesig oor jou verhef en aan jou vrede gee.

So moet hulle dan my Naam op die kinders van Israel lê; en Ék sal hulle seën.” Num 6:13-17



In die Nuwe Testament word dit ietwat gewysig:

“Die genade van die Here Jesus Christus

en die liefde van God

en die gemeenskap van die Heilige Gees

sy met julle almal! – Amen.” 2 Kor 13:13



Die een vervang nie ander nie. Beide kan gesamentlik aanvaar word as God se

seën oor ons, sy Volk Israel. Dis hoe ons ook mekaar moet seen.

       Wanneer laas het jy iemand geseën… jou kinders, jou huis?

       Herinner almal altyd aan die seën van die HERE. Dis ‘n Ewig blywende seën.

Die lewenssee en ons optrede

'n Groep koloniste uit Nieu- Seeland het per geleentheid per skip na Engeland gereis om familie en vriende te besoek. By die laaste hawe, voordat hulle hul bestemming sou bereik, het hulle almal vir hul mense telegramme gestuur om te laat weet hoe laat hulle die volgende dag sou aankom.

Hulle boot vaar voorspoedig met die Kanaal op. Teen middag sak digte mis oor hulle toe. Die kaptein gooi anker.

Uur na uur lê die skip daar. Dr. W. F. Boreham was een van die passasiers. Gewoond daaraan dat sy ongeduld in 'n situasie botoon voer, soek hy die kaptein op en sê vir hom: "Kaptein, dit is darem 'n uiters tergende situasie. Ons het ons mense laat weet hoe laat ons aankom. Dit gaan darem vir hulle baie ongerieflik wees om soveel ure op die hawe op ons te wag."

Die kaptein antwoord: "Dr Boreham, u bevind u op 'n 10 000 ton lynboot. U wil hê ek moet in die mis vaar en die klein bootjies soos bruin papier voor my opfrommel. Nee, ons het ander om aan te dink!"

            Soms het ons in 'n situasie 'n meerdere gesag en ons kán óns wil en óns sin laat geld tot skade of ongerief van ander.

In so 'n geval verloën die Christen homself en dink aan die ander wat ook betrokke is. "Moet niks uit selfsug of eersug doen nie, maar in nederigheid moet die een die ander hoër ag as homself.




Op 28 Mei 1914 vertrek die statige SS Empress uit die hawe van Quebec, Kanada op sy seevaart van 4 500km na Liverpool, Engeland. Daar was 1 057 passasiers aanboord, insluitende 171 senior lede van die Heilslëer op pa na ‘n internasionale geestelike konferensie in Engeland.

Die skip was 185m in lengte en 22m van bak- na stuurboord.

Toe die SS Empress sy vaart daardie middag 4:30nm begin het ‘n reuse orkes van die Heilslëer “God is met julle tot ons weer ontmoet, op die hoofdek gespeel. Die Empress sou ‘n groot deel van sy vaart op die St Lawrencerivier aflê omdat dit veiliger en vinniger is.

Die volgende nag sowat 1vm in digte mis bots die SS Torstad, ‘n steenkooldraer masimaal gelaai, teen die Empress en die Empress sink vinnig met ‘n lewensverlies van 1  012 aan passasiers en bemanning. Meeste het in hul kajuite verdrink.

 

Altesame 147 lede van die Heilslëer was weg, ook 138 kindertjies. Meer passasiers het op die Empress omgekom as op die Titanic. Op die Titanic het meer bemanningslede omgekom.

Die twee kapteins het met mekaar per radio gepraat. Hulle het ooreengekom dat hulle stuurboord by mekaar  verby sou beweeg met etlike kms spasie tussen hulle. Die Empress het teen slakkepas al teen die een kant van die rivier afgevaar.

Ons beskik oordie hele verhaal van die erge trauma in die donker nag, maar dis te lank om hier te herhaal.

Die kaptein van die Torstad is skuldig bevind. Hy het dwarsoor die 50km breë rivier beweeg en die Empress in sy stuurboord sy gestref en ontsettende skade aangerig. Die Empress het snel water ingeneem, sy enjinkamers oorstroom en was gou sonder krag of enige kommuniksiemiddel.

“Julle moenie net elkeen aan sy eie belange dink nie, maar ook aan dié van ander." Fil 2:3,4

            "Ons gee niemand enige aanstoot nie... in elke opsig laat ons, ons ken as diensknegte van God... deur die betoning van die teenwoordigheid van die Heilige Gees, deur opregte liefde..." 2 Kor 6. – Sjibbolet.buro@gmail.com

‘Maak reguit paaie vir julle voete’

Michelangelo, die hoogs gekultiveerde kunstenaar met uitgebreide kennis van die natuur- en geesteswetenskappe, het die hele voorste muur van die Sistine Kapel in die Vatikaanstad gebruik om in opdrag van die pous, die Laaste Oordeel te skilder.

Michelangelo het 300 mense, mans en vroue geskilder wat heen en weer tussen die aarde en die Hemel beweeg. Almal is Hemel toe vir die Laaste Oordeel. Diegene wat geslaag het, het in die Hemel gebly, die ander is teruggestuur aarde toe, na die groot verdoemis.

Dit is hoe dit lyk:

 

Dit het vier jaar geduur (1536 – 1541) om die werkstuk te voltooi.

Die sekretaris van die pous destyds was iemand wat sy neus oral ingesteek het en was ‘n regte beterweter. Hy het voortdurend met Michelanglo se werk fout gevind. Dis toe dat Michelangelo die hel onder in die regterhoek skilder. In die hel staan die sekretaris met ‘n slang om sy middellyf. Hy was hoogs ontsteld en het by die Pous gaan kla.

Die pous het kom kyk. Na ‘n ruk het die pous gesê hyself het geen gesag oor die hel nie en as Michaelengelo hom daar ingesit het, sal hy maar daar moet bly.

Kyk, hy is vandag nog daar:


Die sekretaris het nooit om verskoning gevra nie en hy is nooit vergewe nie. Sy optrede was strydig met die Skrif: “As dit moontlik is, sover dit van julle afhang, leef in vrede met alle mense." Rom 12:18

  Terwyl die skilder, Leonardo da Vinci, toe hy met sy beroemde skildery, Die Laaste Avondmaal, besig was om die Persoon van Jesus, juis Jesus se gelaatstrekke, te skilder toe het hy en 'n vriend van hom 'n uitval gehad.

   In sy ergerlikheid het die skilder vir sy vriend 'n paar baie onvriendelike en lelike dinge gesê. Hy het sy vriend selfs met wraak gedreig.

Hy het na die uitval, na sy werk, toe teruggegaan en wou voortgaan om Jesus se gesig te skilder. Hy kon egter nie vorder nie. Sy geesteswroeging het dit vir hom onmoontlik gemaak om die trekke van teerheid en liefde op Jesus se gesig na vore te bring.

Hy het opgestaan en sy vriend gaan opsoek en hom nederig om vergifnis gevra. In sy hart het kalmte gekom. Hy het teruggegaan na sy taak toe en nou kon hy die teer en sagte uitdrukking op Jesus se gesig aanbring.

   Ons as Christene in hierdie wêreld moet Jesus se Persoon, by wyse van ons daaglikse lewe en woorde van ons getuienis, na vore laat kom. Deur ons lewe moet ander Hom leer ken, en hiervoor is nodig, harte wat self vrede het.

Jesus se laaste woorde aan Sy dissipels was: "Maar julle sal krag ontvang wanneer die Heilige Gees oor julle kom, en julle sal My getuies wees..." Hand 1:8

Die Heilige Gees bring die Persoon van Jesus, as ons inwonende HERE in ons hart, in ons gedrag en gesindhede na vore.

As ons hart egter ontstig is deur allerlei dinge – rusies, geskille met ander, nydigheid, kwaai woorde, kwaadpraat – kan Jesus nie deur óns lewe aan ander oorgedra word nie. Dan leef ons met ‘n binding in ons gees.

Daardie binding sal eers aangespreek en verbreek moet word, voordat ons weer soos normale mense, veral Gelowiges, die pad verder sal kan stap.

“Daarom, rig die slap hande en die verlamde knieë weer op; en maak reguit paaie vir julle voete, (hoekom?) sodat wat kreupel is, nie uit lit raak nie, maar liewer gesond gemaak word.

    Jaag die vrede na met almal, en die heiligmaking waarsonder niemand die HERE sal sien nie; en pas op dat niemand in die genade van God veragter nie; dat geen wortel van bitterheid opskiet en onrus verwek en baie hierdeur besoedel word nie.

Laat niemand 'n hoereerder wees nie, of 'n onheilige soos Esau, wat vir één spysgereg sy eersgeboortereg verkoop het.

Want julle weet dat hy, toe hy ook later die seën wou beërwe, verwerp is, want hy het geen geleentheid vir berou gevind nie, al het hy dit met trane vurig begeer.” Hebr 12:12-17 – Sjibbolet

Nader my God by U, steeds naderby…

Die Onse Vader, is ‘n gebed vir die oomblik wat ons dit bid. Dis nie vir more of oormore nie, dis vir die nou,

            Soos in die Hemel, so ook op die aarde. Dis die dieper paWaarheid en Gees – wat ons nou moet begin loop.

            Begryp dit so: Wanneer ons vir siekte bid,dan moet ons besef daar is nie siekte in die Hemel nie en ons bid volle vertroue vir daadwerklike genesing, redding, bevryding.

As dit nie in die Hemel is nie, hoort dit ook nie onder Sy volgelinge op aarde nie.

            Daar is ‘n geestelike kultuur in die Hemel, wat net so hier op aarde onder ons ook moet wees.

            Hierdie kultuur het ‘n eie waardestelsel, ‘n kultuur wat ons lewensstyl moet wees.

            Toe ons gered is, het ons reeds die Ewige Lewe ontvang. Daarmee saam het ons nuwe burgerskap verkry, die van die Hemel.

 Oor hierdie burgerskap, skryf Pastoor Piet Smit van Malmesbury so:

“Wanneer ons dus die dag ons harte vir Jesus gee, moet ons die aardse burgerskap aflê en aanvaar ons slegs die één nuwe burgerskap nl. die Hemelse. Jy kan nie dubbele burgerskap hê wanneer jy ‘n Hemelse burger word nie.

Alhoewel ons nog hier op aarde is, het kinders van God nie meer aardse burgerskap nie. Ons is bloot bewoners van die aarde. Ons word dan ambassadeurs, verteenwoordigers en gesante van die Hemel hier op aarde. 2 Kor. 5:20 sê: “Ons tree dan op as gesante om Christus wil.” Daarom dat Jesus tot Sy Vader bid t.o.v. Sy dissipels (Joh. 17:16): “Hulle is nie van die wêreld nie.” Ons is wel ín die wêreld, maar beslis nie meer ván die wêreld nie. Ek sê: Wat ‘n voorreg dat die bloed van Jesus jou so nuut maak dat dit selfs jou ou burgerskap ophef en jy oorgaan na hemelse status. Efe 2:6

Vele kinders van God leef soos mense wat dubbele burgerskap het. Wanneer dit hulle pas, is hulle Hemelse burgers en wanneer dit hulle nie pas nie dan leef hulle soos aardse burgers. Die een voet in die wêreld en die ander voet in die kerk.

Hulle wil op twee weë tegelyk loop, die breë en die smal pad tegelyk. En dit kan nie en dit mag nie. Hoor hoe stel die Woord dit op ‘n ander manier: Efe. 5:8 – “Want vroeër was julle duisternis, maar nou is julle lig in die HERE — wandel soos kinders van die lig.”

Kom kinders van die Here, laat ons leef soos ware burgers van die Hemel. Ons is op pad na die stad met fondamente, die Nuwe Jerusalem, waar ons saam met Jesus gaan wees – wat ‘n vooruitsig!

            Moet tog nie dat daar sleg gespreek word van ons land van burgerskap, omdat óns nie soos waardige burgers van die Hemel wandel nie. Efe. 4:1

Ons gedrag en lewenstyl moet so aantreklik wees dat almal wat ons sien en met ons te doen kry, begerig sal wees om Hemelse burgerskap op te neem!” (Pastiir Smit se beskrywing van ons burgerskap was so treffend dat skrywer dit net so gebruik het.)

            Jou kultuur is jou waardestelsel. Dis hoe jy reageer op alles wat met jou en rondom jou gebeur.

            Daar is egter ook ‘n Koninkryk Kultuur, hoe alles in die Koninkryk funksioneer.                     

Ons bid “soos in die Hemel, so ook op die aarde.” Hierdie gebed het niks met die toekoms of die Ewigheid te doen nie. Dit behels elke oomblk ons lewe sodat ons lewens en optrede ‘n spieëlbeeld is van die Hemel.

Wat nie in die Hemel is nie, het ook nie plek in ons lewens hier nie. Daar is geen siekte nie… dan ook nie onder ons nie. Daarom is dit nie vreemd dat Jesus belowe om alle siekes onder ons te genees nie.

            Ons weet uit ondervinding dat onvergewensgesindheid genesing verhoed. Let op, ons moet ook verhoudings in die Hemel hier weerspieël… m.a.w., onvergewensgesindheid is nie indie Hemel nie en daarom hoort dit in die eerste plek nie onder ons nie.

            Na Wedergeboorte is ons nie langer burgers van die aarde nie, maar burgers van die Nuwe Jerusalem, van die Hemel.

   Dit moenie ‘n teorie wees nie, maar ‘n werklikheid, soos bv: “Maar as Ek deur die Gees van God die duiwels uitdryf, dan het die koninkryk van God by julle gekom.” Matt 12:28

Dit was dus meetbaar of illustreerbaar: Die demoon is weg, die person is vry. Dit illustreer dus dat die Koninkryk van die Hemel naby gekom het,

Die Hemel berus op skoonheid en krag. Dis hoe dit hier op aarde ook moet wees.

            Ons geestelike lewe beweeg deur groeiorisesse, seisoene. Soos wat ons groei in die Koninklike Kultuur, leer ons al hoe meer van die Hemel en God se krag.

            Hierdie kultuur word so deel van ons dat dit oral met ons saam beweeg, letterlik oral.

            Daar is lering wat lui: Eerste is God, dan Christus, dan die man, dan sy vrou… en so gaan hulle voort.

            Daar bestaan nie so iets nie. Die HERE God Yaweh is is nie nommer een nie, Hy is alles.

            Soos wat mens groei en kennis opdoen van die Koninklike Kultuur, begin mens alle onbelangrike goed in jou lewe uitsny. Jy streef na skoonheid.

            “Dit is die Gees wat lewend maak, die vlees is van geen nut nie; die woorde wat Ek tot julle spreek, is (Let op) gees en is lewe.” Joh 6:63

            En: “Maar daar kom 'n uur (wanneer?), en dit is nou, wanneer die ware aanbidders die Vader in gees en waarheid sal aanbid; want die Vader soek ook mense wat Hom só aanbid.

Luister: God is Gees; en die wat Hom aanbid, moet in gees en waarheid aanbid.” Joh 4:23-24

Soos wat mens dieper in die Koninklike Kultuur inbeweeg, begin jy ook in Gees bid en leef. Soos in die Hemel so ook op die aarde.

Soos wat jou gees as jongmens uitgegaan het na jou beminde, so wil jou gees nou net in kontak bly met die Heilige Gees.

Dis hoe ons ook gaan slaap sodat die Heilige Gees  God se waarhede en verborgenhede self met jou in jou slaap sal deel.

Ons praat ook van die Lewe in Christus. Dis hierdie lewe wat ons ook in staat stel om die Koninkjlike Wet te kan nakom en uit te leef.

Let op: “As julle ewenwel die Koninklike Wet volbring volgens die Skrif: Jy moet jou naaste liefhê soos jouself – dan doen julle goed.” Jak 2:8

            Soos wat die Koninklike Kultuur ons lewens oorneem word ons lewe omvou in ware vrede, volle vertroue en heerlikheid (glorie!), totale oorwinning, en het ons nie weer professionele hulp nodig nie.

            Die heerlikheid (Glorie), soos in die Hemel, is aan ons op aarde gegee… sodra ons dit as Hemelse Kultuur ontvang, sal Jesus se pleidooi in vervulling gaan en sal ons werklik een wees. Geen gemeente sal ooit weer skeur nie..“En Ek het hulle die heerlikheid gegee wat U My gegee het, sodat hulle een kan wees, net soos Ons een is.” Joh 17:22

In Johannes 12 bid jesus en sê aan God die Vader: “Hulle, (dis nou en en jy) is nie van die wêreld nie, net soos Ek nie van die wêreld is nie.” John 17:16

            Maak vrede hiermee en pas aan en groei. – Sjibbolet


 https://www.youtube.com/watch?v=v1mQT1u_45I

Sien jou kinders Jesus in jou?

Die seuntjie vra aan sy beskonke pa: “Pappa, hoe lyk Jesus?” Die pa kan nie antwoord nie en maak of hy TV kyk terwyl hy nog ‘n bottel oopmaak.

Die dogtertjie vra ook: “Pappa, lyk liewe Jesus soos jy? Ek wil graag vir liewe Jesus sien wanneer ek na pappa kyk. Vir die pa raak dinge eens te erg en snou die kinders uit die sitkamer uit.

'n Man het een nag by 'n plattelandse gesin oornag. Die oulikheid en mooi maniere van die mense se seuntjie van 5 jaar, het hom groots beindruk.

Die volgende oggend ontdek hy die rede vir die kind se goeie gedrag. Die ma was in die kombuis besig om die roomafskeier te was, toe die seuntjie met 'n boek in die hand by haar inkom. "Ma," vra hy, "wat maak die man hier in die prent?"

Tot die kuiergas se verbasing, staak sy haar werk, droog haar hande af, hurk by hom en saam met hom kyk sy na die prent en verduidelik wat in die prent aangaan. Na die kind weer die kombuis verlaat het, gaan hy na die ma toe en spreek sy verbasing uit dat sy haar werk onderbreek het en soveel tyd aan die seuntjie bestee het.

"Meeste ma's sou vir hom gesê het om te gaan speel en later na haar toe te kom." Die vrou het geantwoord: "Ek verwag om nog vir baie jare elke oggend die roomafskeier te was, maar my seuntjie sal my dalk nooit weer daardie bepaalde vraag vra nie. Ek kon so 'n geleentheid nie verby laat gaan nie."

Dit is 'n goeie geleentheid om op so 'n stadium, die Here Jesus en Evangeliewaarhede by ons kinders tuis te bring. Die voorbeeld wat dan ook, met ons eie lewe en toewyding aan die HERE gestel word, is belangrik.

Die digter, Samuel Coleridge, en 'n vriend het in Coleridge se tuin gestap en die gesprek het oor die opvoeding van kinders gegaan.

Die man sê vir Coledridge, "Ek leer my kind niks oor godsdiens nie. Dis 'n moeilike onderwerp en hy moet self, as hy eers groot is, sy keuses maak."

Juis toe stap hulle by 'n pragtige bedding aarbeie verby. Coleridge sê: "Ek wou die onkruid laat uithaal, maar jy het my nou goeie raad gegee. Ek gaan wag tot die aarbeie eers groot is."

"Dan sal die onkruid die oorhand hê!" sê die man verbaas.

"My vriend, wat dan van jou kind?" vra die digter sag.

'n Man het by sy leraar se studeerkamer ingeloop. "My dogtertjie is skielik vanoggend dood," sê hy verslae. "Ek hoop sy is na God toe.

Wat sal sy vir God sê?

In haar pa se huis en van haar pa se lippe het sy nooit 'n gebed gehoor nie. Ag, as ek haar net een dag weer by my kan hê," sug die pa erg bedruk.

Gebedlose huise, gebedlose ouers, stilte in die huis wat die vermelding van Jesus se Naam as ons Verlosser en elke mens se ewige toekoms betref, is vir 'n kind 'n onberekenbare terugslag.

Is jou klein kindertjies nog by jou? Jou kleinkinders? Maak gebruik van die geleentheid om hulle na Jesus te lei.

"Laat die kindertjies na My toe kom en verhinder hulle nie, want aan sulkes behoort die Koninkryk van God... En Hy het Sy arms om hulle geslaan en hulle geseën." Mark 10:14,16

Pa, jy is die Hoë Priester van jou huis. Is daar ‘n huisaltaar? Is jy die voorganger soos dit hoort?

As daar nie ‘n Huisaltaar (Boekevat) aand is nie, vertel die kinders daarvan, vra om verskoning dat julle dit nou eers gaan begin. Sing heerlik saam en bid heerlik saam. Elkeen moet bid.

Jesus sal dit elke keer bywoon. – Sjibbolet

God red die “Vodka Koning”

Die verhaal van die seuntjie wat nie skoolgegaan het nie, en ‘n multi-miljoenêr geword het. Sy pa se onderneming het bankrot gegaan en Lars Olson Smith moes op agtjarige ouderdom gaan werk. In sy tiende jaar is hy reeds ‘n suksesvolle sakeman en op 14 was hy ‘n entrepreneur.

            Kort hierna bekroon die sakewêreld hom as die “Vodka Koning.”

            Toe gryp Jesus, die Koning van die Heelal, in.

 

Lars Olson Smith van Swede, was in die middel van die jare 1800 bekend as die Vodka Koning van Swede. Vir baie jare het hy sowat driekwart van die totale hoeveelheid Vodka in Swede geproduseer, verkoop en uitgevoer en miljoene verdien.

Toe kom hy tot bekering. Sy lewe het geheel en al omgekeer. Hy het 'n afskaffer en 'n geesdriftige maatskaplike hervormer geword.

Lukas 19:1-10 ; "…waar ek iets van iemand afgepers het, gee ek dit vierdubbel terug," is dadelik van toepassing.

Hy het die skuld van driekwart van sy landgenote se ellende, armoede en sonde, op hom en sy vorige bedryf geneem. Van die oomblik van sy bekering af het hy alles in sy vermoë gedoen, om te probeer vergoed vir wat hy as die vrug van sy verkeerde bedryf beskou het. Sy groot fortuin het hy aangewend om spaarbanke te open, bougenootskappe te stig, koöperatiewe besighede te organiseer wat vir hoeftige mense maklik toeganklik was. Hy het openbare kombuise geopen waar behoeftiges, teen lae koste, voedsame kos kon koop. Hy het verklaar: "Ek reken dis reg om die geld wat ek bymekaar gemaak het op 'n manier, waardeur ek duisende van my medemense ten gronde laat gaan het, te gebruik om so ver moontlik, die kwaad wat ek gedoen het ongedaan te maak."

   Ware berou word geken uit die verlange, om wat verkeerd gedoen is, ongedaan te maak. 'n Mens maak reg, met woorde of met geld, wat mens in 'n sondige gesindheid, aan 'n ander verkeerd gedoen het.

   Dit was die beginsel van Saggeus se voorneme om mense wat hy bedrieg het te vergoed. Nadat Jesus saam met  Saggeus  aan tafel was, he Saggues begeer om wat in sy lewe verkeerd was, reg te maak. Dit is ook hoe Die Bybel dit vir ons leer… hy (moet) teruggee wat hy geroof het of waarmee hy iemand te kort gedoen het. Lev 6:4

As ek regmaak met 'n medemens wat ek aan hom verkeerd gedoen het, bring dit grootse vrede en blydslap in my hart. In die poging om sake so reg te maak, kry ons die ondersteuning en genade van die HERE in ons hart. Die finale troos in die sondebewuste hart, is dat Jesus die sonde aan die kruis ten volle betaal het en Hy ons volle vergifnis gee.

Ons ken Sy belofte in 1 Joh 1:9: "As ons ons sonde bely, Hy is getrou en regverdig om ons sondes te vergewe, en (let op) ons van alle ongeregtigheid te reinig."

Maak asseblief jou sake eg met die HERE en jou medemens. Daar’s werk! – Sjibbolet.buro@gmail.com

Het jy Oorvloed?

“Ek het gekom, dat hulle lewe en oorvloed kan hê”  Joh. 10 : 10.

            Wyle Dr Andrew Murray, spreek hierdie nodige kwesie soos volg aan: Almal verstaan die onderskeid tussen ‘n lewe wat swak en sieklik is, en een wat oorvloedige lewenskrag het. Paulus praat van die Christelike lewe van die Korintiërs as nie geestelik nie, maar vleeslik. Hulle is soos klein kindertjies in Christus wat nie in staat is om vaste spyse te verteer nie.

            Hulle kan dus nie die dieper waarhede van die Evangelie begryp nie.  1 Kor. 3 en Heb. 5

Daar is Christene (die meerderheid) wat nooit verder kom as die eerste beginsels nie. Hulle is swaar van oor en bly vleeslike Christene.

Daar is egter ook andere (die minderheid) wat die oorvloedige rykdom van genade in hul lewens weerspieël.

            Ons vind hierdie verskil dwarsdeur die geskiedenis van die Kerk. Ook vandag is die getal wat in volle oorgawe vir God wil lewe, baie klein. Deurdat hulle geestelik gesind is, beywer hulle hul vir die oorvloedige lewe wat daar in Christus is. Hulle getuig van die heerlikheid van Christus wat “vol van genade en waarheid” is:  “En uit Sy volheid het ons almal ontvang, ja, genade op genade.” Joh. 1: 16

            Die oogmerk van die uitdraer van God se Woord behoort te wees om die volheid van God se genade in Jesus só voor te hou, dat Christene sal skaam word vir die armoede van hul geestelike lewe. Dat dit hulle sal aanmoedig om te glo dat die “lewe en oorvloed” in die volheid van die Gees, vir hulle bedoel is.

            Leser, vra jouself af of jy so 'n oorvloedige lewe lei as wat Jesus gekom het om te gee. Kom dit te voorskyn in jou liefde vir die Heiland en in die oorvloed van vrug wat jy tot eer van God dra?

So nie, bid dat God jou krag mag gee om te glo dat Hy mag het om alle genade oor jou oorvloedig te laat wees, sodat jy “altyd in alle opsigte volop kan hê en oorvloedig kan wees tot elke goeie werk.” 2 Kor 9:8

Laat Jesus vir jou dierbaar wees, en hou daaglikse gemeenskap met Hom. Hy sal jou deur sy Heilige Gees leer om Hom te eer met 'n oorvloedige lewe, Aldus Dr Murrray.

Kyk ook so daarna: Die HERE sê Hy voed die voëltjies. Daar is dus genoeg wurmpies vir al die voëltjie, maar die HERE sit nie die wurmpies in hul nessies nie.

Die dieper lewe in Christus is beskikbaar, ook die oorvloed, maar ons moet self  daardie heerlikheid in ons hart en lewens indra.

Tot nog toe was baie oortuig dat oorvloed beteken oorvloed van geld en aardse wins.

Maar ons hoort oorvloed te hê in liefde, embarming, sagmoedigheid, geduld, geloof,  blydskap, vrede, vriendelikheid, goedheid, getrouheid, selfbeheersing. Uit hierdie oorvloed bedien ons, ons naaste.

Let op:  “Maar soos julle in alles oorvloedig is -- in geloof en woord en kennis en alle ywer en in julle liefde vir ons -- sorg dat julle ook in hierdie liefdedaad oorvloedig is.

“Ek sê dit nie as 'n bevel nie, maar om deur die ywer van ander ook die egtheid van julle liefde op die proef te stel.” 2 Kor 8:7-8 – Sjibbolet

Die Totale Aanslag

Wêreldwyd is daar ‘n totale aanslag op die Christendom, pleks van die omgekeerde.

            “So, sê Ek vir julle, is daar blydskap voor die Engele van God oor een sondaar wat hom bekeer.” Luk 15:10

Hoe kan enige Gelowige dit nie begeer om deel van so ‘n Hemelse blydskap te wees nie!

            Ons kan, as ons die volgende doen: “Sing tot eer van die HERE, loof sy Naam, verkondig sy Heil van dag tot dag.  Vertel onder die nasies sy eer, onder al die volke sy wonders.” Ps 96:3

            By Sjibbolet is ons ‘n paar mense wat saamwerk om die Goeie Nuus selfs oor die grense van die land uit te dra. Ons versprei die Woord meesal in gedrukte vorm, maar sommige predik ook voor groepe.

            Ons ontvang briefies en e-posse van Gelowiges wat vra: “Wat is daar wat ek vir die HERE kan dien?” Ander sê: “Ek wil ook graag iets vir die HERE doen.”

Die oes is baie groot en gereed om in te bring. Die arbeiders is min.  Dit alles kos egter geld.  As jy nog nie weet hoe die HERE jou wil gebruik in die oesveld nie, begin dan en help  ten minste vir ons en ander om die werk te kan doen en leer van ons.

VOORDELE VAN DIE GEDRUKTE WOORD

*  Dit bereik mense op die mees afgelëe plekke;

*  Dit bring die Woord aan skole, universiteite, gevangenisse, hospitale. Daar gaan meer mense deur die hospitale en gevangenisse van die wêreld as deur die kerke.

*  Dit beweeg oor taalgrense heen en is nooit bevooroordeeld nie;

*  Dit reis baie goedkoop en het nie ‘n paspoort of visum nodig nie;

*  Dit bring aan ryk en arm, bekend en onbekend, presies dieselfde boodskap;

*  Dit spreek vir so lank  as wat dit mag bestaan en herhaal sy boodskap oor en oor;

*  Dit word nooit mismoedig nie, werk 24 uur per dag, 365 dae per jaar;

*  Dit keer nooit leeg terug nie, want dit bly die Lewende Woord.

            Jare gelede het ons traktaatjies op sypaadjies en op straathoeke verspei. Mense wil dit nie langer so aanvaar nie. Versprei die boodskappe per e-pos, of maak fofostate en versprei dit in posbusse, in tydskryfte in spreekkamers, glip dit in iemand se sak of inkopies.

            Daar is plek in die Hemel vir boemelaars ook. Wanneer jy vir hulle ‘n geldjie of kos gee, gee sommer ‘n boodskap saam.

            Hou altyd boodskappe in jou motor aan, daar is baie mense langs die pad vir wie jy dit kan gee. Bid daaroor en dank die HERE dat sy Woord nooit leeg terugkeer nie.

            Moet dit nooit in motors se ruitveërs plaas nie. Ruitveërs is die sensitiefste deel van ‘n voertuig en speel ‘n belangrike rol,. Mens durf dit nie beskadig nie.

            Ons beplan  groter uitbreidings. Ons vra nooit geld nie. Mense gee soos wat die Gees van die HERE hulle lei

Ons versprei ook kos, klere, skoene en Bybels.

            Onthou: Jesus heel die gebroke Harte. “Want so sê die Hoë en Verhewene wat in Ewigheid woon -- Heilig is Sy naam: Ek woon in die hoogte en in die heilige plek, maar Ek woon ook by die verbryselde en nederige van gees -- waarom?

            “Om te laat herlewe die gees van die nederiges en te laat herlewe die hart van die verbryseldes.” -- Jes. 57:15.  –  Sjibbolet.buro@gmail.com 

Net jy kan oor jou toekoms besluit!

"Laat dié een van julle wat sonder sonde is 'n klip op haar gooi... toe hulle dit hoor, het hulle, deur hul gewete bestraf, een vir een weggegaan..." Joh 8:7,9 Die Griekse woord vir gewete is suneidesis, wat letterlik beteken, "weet saam met jouself" (a knowing with oneself). Dit kan 'n pynlike proses wees.

       Aan Timotheus skryf Paulus van mense as "gebrandmerk in hulle eie gewete".

       Shakespeare het geskryf: "To be alone with my conscience is hell enough for me!"

      Jare gelede, vertel Dr. R. E. Neighbour (1912 – 1916) die eerste pastor van die Baptiste Tabernakel in Georgia, Amerika, van 'n pa wat in 'n vlaag van woede, sy byl geswaai en sy seun doodgekap. Die pa is dadelik tronk toe geneem.

       Tydens sy aanhouding voor sy verhoor, had hy baie tyd om te rou en te ly oor sy aaklige daad, want hy het sy seun liefgehad.

       Die Regter het sy saak aangehoor en na hy geluister en beraadslaag het, sê die regter: "Ons het jou in hierdie gemeenskap geken as 'n eerbare wetsgehoorsame burger. Jou aaklige daad was onopsetlik. Jou vonnis gaan wees die herinnering aan jou daad. Jy is nou vry om te gaan."

       "Kon daar 'n pynliker straf wees?" vra dr. Neighbour. "Ek glo nie."

       ‘n Puntdig lees so:

       Vertrou my, geen marteling wat die digters verdig,

       Kan ooreenstem met die erge onuitspreekbare pyn,

       wat jy nag en dag sonder rus, beleef nie, want jy dra jou aanklaer in jou bors!

      As jy so iets mens moet oorkom, is dit baie, baie moeilik om vrede vir jou gewete te kry. In so 'n geval speel nie net die gewete nie, maar ook selfverwyt die groot rol. Dit is nie net só 'n ernstige gewetekwelling wat 'n mens se lewe kan moeilik maak nie, maar ook kleiner gewetensonrus. Dit staan tussen 'n mens en die HERE God Jaweh.

       Die Dodesel is die einde van die pad.  Alle moordenaars het in die Dodesel geleentheid gehad om hulle saak met God uit te maak, maar sommige is weens hul eie besluit sonder God die Ewigheid in.

       Sommige van diegene wat in Suid-Afrka daar deur is, beskryf dit so:

       ‘n Vrou wat man se toebroodjies werk toe met gif gesmeer het: “Die spanning in die Dodesel is seker die ergste wat  die menslike wese kan verdra. Ek is onskuldig. Ek het nie my man vermoor nie; ek sweer ek het hom nie vermoor nie.

      “Dit is die swaarte en bitterste tyd wat ek ooit deurgemaak het. Bedags gaan dit aan, maar snags slaap ek nooit nie. Ek huil en bid die nagte om.

      “Ek weet nie wat gaan gebeur nie, maar ek hoop en vertrou dat God my weer uit  die aaklige  Dodesel gaan lei.”

      Die oggend toe hierdie vrou gehang is, het sy geweier op die Dodesel te verlaat. Sy moes met geweld uit die Dodesel na die galgtou gesleep word.

      ‘n Ander vrou was 124 dae in die Dodesel toe haar Appèl misluk het. Haar laaste nag op aarde het sy feitlik niks geslaap nie. ‘n Predikant en die Kapelaan het haar besoek. Ook sy het volgehou dat sy ‘n  “skoon gewete” het en dat sy gaan boet vir ‘n misdaad wat sy nie gepleeg het nie.

      Haar kinders is by haar in die Dodesel toegelaat. Twee ure voordat sy sou hang, is die kinders gevra om die Dodesel te verlaat. Sy het die kinders gegroet en aan elkeen ‘n angelier gegee. Dit was traumatiese  oomblikke.

      In haar geval het sy sonder enige bystand van die Dodesel deur die gang na die galgkamer gestap.

      Die lied “Bly by my Heer” het opgeklink toe sy by die selle van die ander gevangenes verby gestap het. Sy het saamgesing en in die galgkamer verdwyn.

      Op die valdeur se merke het sy saggies “Rus my siel, jou God is Koning” begin sing.

      Sy het net “Jesus” uitgesnik toe die galgtou oor haar kop afgesak het. Sekondes later was sy nie meer nie.

        ‘n Man het geskryf: “In die Dodesel is ‘n mens  so naby en tog so ver van die dood af. Elke asemhaling in die Dodesel is soos ‘n druppel gif wat jy drink en wat jou uiteindelik doodmaak.”

        ‘n Ander het geskryf: “Ek sien gedurig die gesiggie van die kind voor my. Snags kan ek nie slaap in die helderverligte  Dodesel nie,

      “Die Dodesel is ‘n plek van verterende vuur wat binne ‘n mens brand. Dit brand die lewe uit jou uit.

      “Hier is jy gevoelloos, sonder gedagtes, net met ‘n besmette gewete.”

      Hierdie man het nooit snags geslaap nie. Met uitgestrekte hande het hy na die dak gegryp. Dan weer met sy hande langs die muur gevryf en uiteindelik nog ‘n keer gekniel en hardop gehuil en gebid.

      In laaste dae in die Dodesel het hy geskryf: “Die brandpyn in my murg en gees verlaat my  nooit nie. Dis soos ‘n verterende onuitblusbare vuur.”

       Die volgende persoon  was verskriklik bang om ‘n galgdood te sterf.

      Hy het  geskryf: “In die Dodesel is niks in die menslike verstand normaal of blywend nie. In jou ontsteltenis kom en gaan gedagtes in vlietende sekondes verby.

      “Net soos die sand in ‘n uurglas, loop alles vinnig uit om nie weer herroep te word nie.

      “Daar is net een beeld wat jou immer en helder voor die gees staan soos vanoggend se droom... jou kinderdae.”

      Die volgende man  het so geskryf: “In die skadu van die galg, wanneer ek my laaste dae in  stilte en bepeinsing deurbring, dink ek aan die onberekenbare verdriet wat ek op my dierbares geplaas het.

     “Ek het bitter berou, maar berou kom altyd te laat.

     ‘n Man wat ‘n meisie vermoor het, het geskryf: “Die hel en al sy magte kan nie so nimmereindigend wees soos die dae, veral hierdie laaste drie dae, wat ek in die Dodesel deurgebring het nie.”

     Verkeer jy op hierdie oomblik in die Dodesel van die lewe? Is jy ook sonder God, sonder hoop, sonder lewe, sonder liefde? Beleef jy ook ‘n hel van vrees, angs en trauma?

     Daar is genade vir jou. Jy kan die hel ontvlug. Jesus Christus wag vir jou. Hy het ‘n besliste afspraak met jou.

     Neem Hom nou aan. Gebruik asseblief die vrymoedigheid om aan ons te skryf  indien jy gebed of geestelike  hulp verlang.

     Hebreërs beskryf die genesing van 'n kwellende gewete: "...hoeveel te meer sal die bloed van Christus, wat Homself deur die ewige Gees aan God sonder smet geoffer het, julle gewete reinig van dooie werke om die lewende God te dien."

     As ons ernstig is oor ons verhouding met die HERE, maar iets hinder die hart se vrede, dan neem mens dit na die HERE toe in ernstige gebed en oordenking. Die Heilige Gees lei dan ook ons gedagtes om Jesus se kruisdood te onthou en 'n volledige gemoedsgenesing te bekom.

     Jou toekoms word deur ‘n besluit bepaal wat net jy kan neem. – Sjibbolet