Die Hysbakman

 

’n Handelsreisiger moes uit die aard van sy werk dikwels in hotelle tuisgaan. Hy het dan gereeld vir die hysbakman gevra: ”Jy ry gedurig op en af, gaan jou laaste rit op aarde boontoe wees?” Dit het hom aanleiding gegee om met die man ’n gesprekkie oor sy ewige bestemming aan te knoop en vir Christus te getuig.
            Dit laat mens dink aan Paulus se woorde: “...  omdat ek slim was, het ek julle met lis gevang.” 2 Kor 12:16
            Op ’n dag vra hy dit vir ’n jongman wat in die hysbak diens doen. Die hysbakman antwoord: "Ek hoop dit sal boontoe wees.”
“As jy in die Here Jesus Christus glo, sál dit boontoe wees,” verseker die verkoopsman hom.
Die jongman kyk hom verbaas aan en sê: “Elke verstandige mens glo tog aan Christus Jesus.”
“Ja, maar nie almal glo in Hom nie,” vervolg die reisiger. Hierop antwoord die hysbakman: “Wel, ék sien geen verskil tussen aan Hom te glo of in Hom te glo nie.” Die hysbak het die vloer bereik waar die man se kamer was. Hy gee die jongman ’n drukkie op die skouer en stap sonder ’n verdere woord uit.
            Die middag wil hy weer die hysbak gebruik. Hy druk die hysbakknoppie en toe die hysbakdeur oopskuif, is dit dieselfde jongman van die oggend wat in die hysbak staan.
            “Gaan die hysbak af na die eetkamervloer toe?” vra die verkoopsman. “Verseker,” antwoord die jongman.
Die man bly buite staan en kyk na die vervaardiger se handelsnaam wat teen die hysbak se agterkant vertoon word, en sê: “Ek ken daardie firma. Ek glo aan hulle hysbakke, so ek dink ek sal die hysbak gebruik.”
Hy bly egter buite staan. Die hysbakman kyk verwonderd na hom en vra: “Wil u na die eetkamer toe gaan?"
"Ja, sekerlik. Ek moet mos net aan jou hysbak glo en dan sal ek by die eetkamer uitkom?” antwoord die man, maar bly steeds buite staan.
Effens ongeduldig sê die jongman: “Ek is eintlik bietjie haastig. Kom in asseblief.”
Die man kyk hom in die oë: “So? Om by die eetkamer te kom, moet ek aan jou hysbak glo, maar dit is nie genoeg nie, ek moet ook in die hysbak glo en inklim om die nut te ervaar?”
Die jongman knik met sy kop. Die man stap in en die hysbak begin ondertoe gly. Dan sê die jongman “Ek sien dit nou. Ek moet nie net aan Christus glo nie. Ek moet ook in Hom glo, dan sal ek gered word!”
Om in Christus te glo is om Hom aan te neem deur eenvoudige geloof. Glo dat Jesus vir jou sondes gesterf het, dat Hy op die derde dag opgestaan het as jou Redder om jou dag na dag te dra en dat Hy terugkom om jou te haal.
Die Christendom is mense wat aan Christus glo, soos die Mohammedane mense is wat aan Mohammed glo en Boeddhiste mense is wat aan Boeddha glo. Maar ewige redding berus nie op net ’n verstandserkenning nie, maar redding berus op die persoonlike vertroue in die hart, en (let op) belydenis van die mond... dat Christus Jesus my Verlosser is wat ek aangeneem het en in Wie ek vertrou dat Hy my sondes aan die kruis gedra het en uit Wie se opstanding ek die ewige lewe ontvang het.
“As jy met (let op) jou mond bely dat Jesus die Here is, en (let weer op) met jou hart glo dat God Hom uit die dood opgewek het, sal jy gered word. Met die hart glo ons, en ons word vrygespreek; en met die mond bely ons, en ons word gered. Die Skrif sê tog: ‘Niemand wat in Hom glo, sal teleurgestel word nie.” Rom.10:9,10
            “Maar nou het Hy net een keer in die voleinding van die tye verskyn om deur sy offer die sonde weg te neem. ’n Mens is bestem om net een maal te sterf, en daarna kom die oordeel.” Hebr 9:26-27 – Sjibbolet

God verlang dat ons dit ken!

     

Die verborgenhede van die Koninkryk van die Hemele

Dit gebeur met tye dat wanneer ons tot die HERE in ons Hemelse taal bid, dat verborgenhede aan ons openbaar word... aangeleenthede wat nie aan ons van nature bekend is nie. “Want hy wat in 'n taal spreek, spreek nie tot mense nie, maar tot God; want niemand verstaan dit nie, maar deur die Gees spreek hy verborgenhede.” 1 Kor 14:2
            “Want as ek in 'n taal bid, dan bid my gees, maar my verstand is onvrugbaar.” 1 Kor 14:14
            Let op: “Daarom moet hy wat in 'n taal spreek, bid dat hy dit kan uitlê.” 1 Kor 14:13.
Dit was altyd die neiging om te dink dat ‘n uitleg uitsluitlik in die gemeente moet plaasvind.
            Is jou huis dat nie ook ‘n gemeente nie? Jy kan bid dat jy dit selfs in jou binnekamer uitlê.
            “Hoe staan die saak dan? Ek sal met die gees bid, maar ek sal ook met die verstand bid. Ek sal met die gees psalmsing, maar ek sal ook met die verstand psalmsing.” 1 Kor 14:15
            Het jy al in die gees psalmgesing? Het jy al 4 000 mense in Hemelse tale hoor bid of 2 000 vroue in Hemelse tale hoor sing? Dit is verrukkend, besielend, Hemels!
            Let weer op: “Maar daar kom 'n uur (wanneer), en dit is nou, wanneer die ware aanbidders die Vader in gees en waarheid sal aanbid (hoekom?); want die Vader soek ook mense wat Hom (juis) só aanbid.
“God is Gees; en die wat Hom aanbid, moet in gees en waarheid aanbid.” Joh 4:23-24
            Het jy al in die Gees aanbid?
            Kan ons in die geesteswêreld insien, soos om Engele te kan sien? Ja ons kan. Dit het in die Bybelse tyd gebeur en gebeur steeds.
            Let op die volgende gebeurtenis:
            “En toe die dienaar van die man van God vroeg opstaan en uitgaan, was daar ‘n leër met perde en strydwaens rondom die stad.
            “En sy dienaar sê vir hom: Ag my heer, hoe sal ons maak?
            “Maar hy antwoord hom: Vrees nie; want dié wat by ons is, is meer as die wat by hulle is!
            “En Elisa het gebid en gesê: Here, open tog sy oë dat hy kan sien. En die Here het die oë van die dienaar geopen, dat hy kon sien, en meteens was die berg vol perde en waens van vuur rondom Elisa.” 11 Kon 6:15-17
            Die dienaar sien net die oormag van die vyand. Elisa sien ook die oormag, maar hy sien ook God se leërmag.
            Toe die dienaar se geestelike oë open, toe sien hy ook die legioene Engele.
            Lees die hele Kon 6 en sien hoe Elisa die vyand verslaan.
            Ons kan selfs in die Gees sien. Bid dat die HERE ons geestelike oë sal oopmaak. Ons kan Engele sien, ons kan gesigte sien. “En in die laaste dae (dis waar ons nou is), spreek God, sal Ek van my Gees uitstort op alle vlees, en julle seuns en julle dogters sal profeteer, en julle jongelinge sal gesigte sien, en julle ou mense sal drome droom.
“En ook op my diensknegte en diensmaagde sal Ek in dié dae van my Gees uitstort, en hulle sal profeteer.” Han 2:17-18
“Die Vader soek mense wat Hom in Gees en in waarheid sal aanbid.” Nie skrywer nie, nie ‘n kerk nie, maar God soek sulke mense.
            God verkeer met ons in Gees en in Waarheid. Daar’s nie meer ‘n brandende braambos nodig nie, net gees en die Gees is hier.
            God praat met ons in en oor verborgenhede.
            Weer ‘n keer, dis nie skrywer of ‘n kerk wat praat nie, maar God self wanneer Hy sê: “Omdat dit aan julle (let op) gegee is om die verborgenhede van die Koninkryk van die Hemele te ken...” Matt 13:11
            Dis aan ons as erfgename “gegee” om die verborgenhede van die Koninkryk van God te ken.
            En die herhaling in Lukas: “En Hy antwoord: Aan julle is dit gegee om die verborgenhede van die Koninkryk van God te ken.” Luk 8:10
            En verder: “Laat niemand dan op mense roem nie, want alles (let op) behoort aan julle; of dit Paulus is of Apollos of Céfas of die wêreld of lewe of dood of teenswoordige of toekomstige dinge –  (let op) alles behoort aan julle; maar julle behoort aan Christus, en Christus aan God.
“So moet ons dan beskou word as dienaars van Christus en bedienaars (van wat?) van die verborgenhede van God.” 1 Kor 3:21-23; 4:1
            Joshua 5:13 is ‘n weerspieëling van wat tydens die Yom Kippoer Oorlog in Israel gebeur het. God het daardie oorlog met Engele gevoer en die Joodse militêre offisiere het in onderhoude dit aan skrywer bevestig.
            “En terwyl Joshua by Jerigo was, slaan hy sy oë en kyk, en daar staan ‘n man teenoor hom met ‘n ontblote swaard in sy hand; en Joshua het na hom gegaan en hom gevra: Behoort u by ons, of  by ons vyande?”
            Hierdie man met die ontblote swaard was nie vir Joshua identifiseerbaar nie. Daarom vra Joshua hom: Behoort u by ons, of by ons vyande?
            “En die man sê:  Nee, maar Ek is die leërowerste van die HERE; Ek het nou gekom. (Ek het pas gearriveer).”
            Die man het geantwoord hy is die Hoof van die Leër van die HERE!
            Die gedagte verruk ‘n mens se sinne. Dis byna te groot vir die mens om te begryp.
            Ons sukkel met ons perspektiewe omdat ons nie in en deur die Gees van God wandel nie. Ons moet in Gees en Waarheid aanbid.
            “Maar daar kom 'n uur, en dit is nou, wanneer die ware aanbidders die Vader in gees en waarheid sal aanbid; want die Vader soek ook mense wat Hom só aanbid.
            “God is Gees; en die wat Hom aanbid, moet in gees en waarheid aanbid.” Joh 4:23-24
            Maak staat op die Heilige Gees in jou gebedslewe. “En net so kom ook die Gees ons swakhede te hulp, want ons weet nie reg wat ons moet bid nie, maar die Gees self tree vir ons in met onuitspreeklike sugtinge, wanneer ons in ons geestelike of Hemelse taal bid.
            “En Hy wat die harte deursoek, weet wat die bedoeling van die Gees is, omdat Hy ooreenkomstig die wil van God vir die Heiliges intree.” Rom  8:26-27  et
            Besef jy dat die sluise van die Hemel kan oopgaan om soos ‘n vloedgolf die bonatuurlike op die aarde uit te stort?
            God het my en jou gemaak. “Die Here het my voor my geboorte al geroep; toe ek nog in my moeder se liggaam was, het Hy my op die naam geroep.” Jes 49:1
            “U het my gevorm, my aanmekaargeweef in die skoot van my moeder. Ek wil U loof, want U het my op 'n wonderbaarlike wyse geskep. Wat U gedoen het,
vervul my met verwondering. Dit weet ek seker: geen been van my was vir U verborge toe ek gevorm is waar niemand dit kon sien nie, toe ek aanmekaar geweef is diep in die moederskoot. U het my al gesien, toe ek nog ongebore was,
al my lewensdae was in U boek opgeskrywe nog voordat ek gebore is.” Ps 139:12-16
            “U is my hulp van my geboorte af, reeds voor ek in die wêreld gekom het, het U my beskerm.” Ps 70:6
            Die Koninkryk van God lyk nie soos ek en jy nie, maar die verbysterende is dat ek en jy kan verander om soos God se Koninkryk te lyk.
            Is dit moontlik? Vir seker! Let op hoe is ons deur Jesus self geleer, hoe ons moet bid:
            “Onse Vader wat in die Hemele is, laat u Naam geheilig word; laat U Koninkryk kom; laat U wil geskied, (let op) soos in die Hemel net so ook op die aarde.” Matt 6:9-10        
            Let op: Laat U Koninkryk kom... laat U wil geskied... soos in die Hemel... so ook op die aarde... hier waar ek en jy nou is.
            Ons sing: “Doen slegs U wil Heer - U wil met my, U, Pottebakker, met my, die klei. Vorm my en maak my, net soos U wil...”
            “Sal Ek nie soos hierdie pottebakker met julle kan maak nie, o huis van Israel? spreek die HERE. Kyk, soos klei in die hand van die pottebakker, so is julle in my hand, o huis van Israel.” Jer 18:6
            Ons strewe moet wees om soos Jesus te wees. Ons doen dit deur te doen wat hy ons beveel het: Verkondig die Evangelie, doop die Wedergeborenes, genees die siekes, ens., ens. Ons begin in Gees en in Waarheid bid en leef.
            Ons moet die Hemel se werklikhede na die aarde bring. Wonderwerke moet ‘n integrale deel van ons lewenswyse wees.
            Jesus se laaste boodskap aan ons kort voor sy vertrek na die Hemel: “En vir die wat geglo het, sal hierdie tekens volg (let wel, die tekens volg ons, ons volg nie die tekens nie): “In my Naam sal hulle duiwels uitdryf, met nuwe tale sal hulle spreek, slange sal hulle opneem; en as hulle iets dodeliks drink, sal dit hulle geen kwaad doen nie; op siekes sal hulle die hande lê, en hulle sal gesond word.
“Nadat die Here dan met hulle gespreek het, is Hy opgeneem in die Hemel en het gaan sit aan die regterhand van God.” Mark 16:17-19
            Ons hele wese moet vervul wees met die Hemelse werklikhede. Druppels moet strome word en strome moet riviere word. Dis God se begeerte. Dis hoekoms die Wederkoms vertraag word... sodat nog gered kan maak. 2 Pet 3:9)
            Beleef die Engele en hulle boodskappe en hulle hulp aan jou. Die Bybel is vol bonatuurlike gebeurtenisse. Dis ons wat alle bonatuurlike aktiwiteite op aarde in werking moet laat kom. Ons moet in verwagting en afwagting leef en in hoop, hoop soos in feite, toekomsfeite.
            Let op na die opdrag: “Ek vermaan julle dan, broeders, by die ontferminge van God, dat julle jul liggame stel as 'n lewende, heilige en aan God welgevallige offer dit is julle redelike godsdiens (wie van ons het hierdie punt al in ons geestelike lewe bereik?).
            “En word nie aan hierdie wêreld gelykvormig nie, maar word verander deur die vernuwing van julle gemoed, (hoekom?) sodat julle kan beproef wat die goeie en welgevallige en volmaakte wil van God is.” Rom 12:1-2
            Begeer die beste gawes, daardie gawes wat nodig is in jou betrokke bediening, en beweeg en hou nie op om te beweeg nie, in die Gees te beweeg nie.
            Hoe bereik ‘n mens hierdie geestelike vlak? Deur vas en gebed. Wanneer jy jou afsonder om te gaan bid en te wag op die HERE, dan vas jy... dus, daardie betrokke dag.
            Hoekoms vas ‘n mens? Daar vind voortdurende opbouende en afbrekende prosesse in ons liggaam plaas... die metabolisme. Wanneer mens vas, vind daar meer afbrekende as opbouende prosesse plaas en basies sterf mens en wanneer jy sterf, kom jou gees na die oppervlak... vandaar die noue kontak tussen jou gees en die Heilige Gees.
            Jy mag water drink wanneer jy vas. ‘n Mens wat sonder kos gaan, smag na sy vas, eerste na water. Toe Jesus uit sy 40 dae vas uitkom, toe vra hy eerste om kos. Hy moes dus in daardie 40 dae genoeg water ingekry het want Hy was nie dors nie.
            Geniet die Lewende Waters. – Sjibbolet

Wees soos ‘n Revolusionêr

Die profeet Sagaria profeteer oor die toekoms (Sag. 4:6) “Nie deur krag of geweld nie, maar deur My Gees, sê die Here van die leërskare.”
            Die klem val op ‘n nuwe revolusie. Christus was seker in ons taal die grootste revolusionêr van alle tye.  Kyk net wat het Hy nie alles gedoen en bereik nie.
            Nechayev, ‘n Marxis wat in die tronk dood is na die sluipmoord op Tsaar Alexander 11, het gesê:
            “Die revolusionêr is ‘n toegewyde persoon. Hy stel nie sy eie belange voorop nie, ook nie sy eie gevoelens nie, nog minder het hy belang by eiendom, selfs sy naam is nie vir hom belangrik nie. Vir die revolusionêr is alles saamgevat in die enkele eksklusiewe gedagte – die een-passie revolusie!”
            Maar hierdie toegewydheid was nie oorspronklik Kommunisties nie. Dit was Jesus Christus wat gesê het:
            “As enigeen ‘n begeerte het om My dissipel te wees, laat hy homself verloën (homself alles ontsê, van homself en sy eie belange vergeet), sy kruis opneem en My volg (word gelyk aan My voorbeeld wat ek stel in lewe, daad en dood).
            Joshua 5: 15-15 is ‘n weerspieëling van wat tydens die Yom Kippoer Oorlog in Israel in 1973 gebeur het.
            “En terwyl Joshua by Jerigo was, slaan hy sy oë op en kyk, en daar staan ‘n man teenoor hom met ‘n ontblote swaard in sy hand; en Joshua het na hom gegaan en hom gevra: Behoort u by ons of  by ons vyande?
            “En hy sê:  Nee, maar Ek is die leërowerste van die HERE; Ek het nou gekom. (Ek het pas gearriveer).”
            Die Hoof van die Leër van die HERE!
            Die gedagte verruk ‘n mens se sinne. Dis byna te groot vir die mens om te begryp.
            Die harde feite is dat ons in hierdie stadium onsself in ‘n geestelike oorlog bevind.
            Die tweede wat hieraan gelykstaan is dat Jesus Christus die Hoof van ons Leërmag is. Aan Hom is “alle mag gegee in die Hemel en op Aarde.” Matt. 28:18.
            En hier is die mees verstommende aspek van die geestelike lewe wanneer Jesus in Lukas 10:19 sê:
            “Ek gee julle die mag om op slange en skerpioene (die okkultisme, towery, heksery en magte van die duisternis) te trap, en oor al die mag van die vyand, en niks sal julle ooit skade doen nie.”
            Eers is die mag aan Hom gegee, en toe gee Hy dit aan ons. Ek wat maak ons daarmee?
            Ons sukkel met ons perspektiewe omdat ons nie in en deur die Gees van God wandel nie.
            Saam met die Hoof van die Leërmag is etlike legioene Engele.
            Hulle was daar toe die Rooi See oopgekloof is, hulle het die mure van Jerigo  omgegooi, hulle was ook saam met Josafat toe die vyand skielik homself vernietig het, en met Jonathan toe hy die Filistyne bestorm het, saam met Dawid toe hy Goliat  verslaan het, saam met Daniël in die Leeukuil  en helaas, ook telkemale saam met  ons eie volk (in die verlede).
            Die sonde van ons tyd is wanpersepsies omdat ons toelaat dat ander invloede uitwerkings op ons het, in plaas daarvan om te bly in dit wat ons geleer was – die Waarheid en nogmaals die Waarheid soos vervat in die Bybel. Ons lewe onder die omstandighede in plaas van bo die omstandighede.
            God se Engele is oral. Hulle het nie visums en paspoorte nodig nie. Dit is ook hulle wat in Angola ons troepe keer op keer uit benoudhede gered het. Die getroue gebede aan die tuisfront, was nodig.
            Kom ons bid saam vir ‘n magtige Herlewing in SA en weet dat legioene Engele saam met ons beweeg want vir elke siel wat inkom, is daar ‘n Engelefees in die Hemel.
Onthou: "Al loop hy en huil terwyl hy die saaisak dra, hy kom juigend terug terwyl hy sy gerwe dra." Ps 126:6  – Sjibbolet

Bly liewers stil

‘Ik houd liefs mijn smoel’

"Dieselfde gesindheid moet ook in julle wees wat daar ook in Christus Jesus was...tree onder hulle op as ligdraers in die wêreld". Fil 2:5-15
            "Bust-Me-Up" was 'n lomp en lelike ou sleepboot wat tussen Londen en Portsmouth gewerk het en gereeld by botsings betrokke was. Dit kon nooit in 'n hawe inkom sonder om teen een of ander boot of die kaai te stamp en skade te veroorsaak nie. Daarom was die boot se naam "Bust-Me-Up".
Een dag kom die boot pylreguit die hawe ingeseil en word netjies vasgemeer sonder om teen 'n enkele iets te stamp. 'n Matroos wat op die kaai staan, kan nie help om uit te roep: "Wat het met jou gebeur, Bust-Me-Up?"
Een van die boot se bemanning leun oor die reling en skreeu terug: "Nuwe kaptein gekry!" Dit was die geheim van die nuwe gedragspatroon.
            'n Mens kan baie onbedagsaam teenoor mense optree, selfs onbeskof wees en hulle seermaak. Dit kan opsetlik wees, as jou hart nog ver van die Here af is. Of dit kan ook gebeur dat, die dinge uitglip. Wanneer Christus die beheer in die lewe oorneem, verander 'n mens se gedrag.
Eie Ek,  is nie meer aan die stuur nie. Jesus het die kapteinskap oorgeneem en 'n mens se lewensgedrag verander al hoe meer na Jesus se voorbeeld.
            Iemand vertel eendag van ‘n vooraanstaande Suid-Afrikaanse sakeman se onchristelike gedrag. ‘n Toehoorder vra: Wanneer laas had jy met die sakeman te doen gehad?
            Die persoon sê toe dat dit maklik 15 jaar gelede was. Die toehoorder antwoord: Dan weet jy niks van sy Wedergeboorte nie. Daai man is vandag ‘n sieraad van God. ‘n Nederlander wat by die gesprek betrokke was, het opgemerk: Ik houd liefs mijn smoel.
            Iets van Jesus se nederigheid en vriendelikheid kom deur die werk van die Heilige Gees in so 'n lewe te voorskyn. "Maar beklee julle met die Here Jesus Christus, en maak geen voorsorg vir die vlees om sy begeerlikhede te bevredig nie." Rom 13:14 – Sjibbolet

Blydskap, soos strome van lewende water...

Bruce Crozier, 'n sewejarige seuntjie, het van sy pa se jagkamp in die Arizona berge af weggedwaal. Hy het ses dae en nagte na sy pa gesoek. Die nagtemperature was onder vriespunt. Bruce het snags onder hope droë boomblare ingekruip om warm te bly.  Hy had water in die berge.

Bruce het 50km van koers af verdwaal toe hy een dag pootuit en gehawend by ander jagters se kamp aankom. Sy pa en ‘n perdekommando van honderd man was op soek na hom, maar in ‘n heel ander rigting. Die jagters het die seuntjie versorg, na sy storie geluister en toe eers sy ma en daarna se pa op kommando gekontak.

In daardie stadium was beide ouers oortuig dat die seuntjie dood sou wees. Wilde diere sou hom verskeur het. Toe sy ma hom omhels het sy gesê: “Dit is byna onmoontlik om te glo dat ek my seun teruggekry het.” Maar die oomblik was eenvoudig te groot en sy het flou neergeslaan.
Toe Bruce se pa op kommando die nuus kry, en boonop hoor dat sy seun ongedeerd is, het hy bewusteloos inmekaar gesak.

Mens kan die skok begryp  wanneer hulle agterna vertel hoe hulle oortuig was die seuntjie is dood en hulle soek eintlik  na ‘n verskeurde lykie.

            Die Here Jesus het gesê: "Daar is blydskap in die Hemel oor een sondaar wat hom bekeer..." Luk 15:7. Hy probeer vir ons daardie blydskap beskryf uit 'n liefde wat ons ook ken: die liefde van 'n pa vir sy seun.

In die gelykenis van die verlore seun sê Jesus: "Toe hy nog ver aankom, het sy pa hom al gesien en hom innig jammer gekry. Hy hardloop hom tegemoet, omhels hom en soen hom… Hy sê vir sy werksmense: 'Maak gou! Bring klere, die beste, en trek dit vir hom aan …ons kan tog nie anders as om bly te wees nie… hy was verlore en ons het hom teruggekry!'" (Luk 15:20-30).

            As die Hemel so jubel oor een bekeerling, wat doen ons? Kyk weer na die prys wat betaal is sodat ek en jy gered kon word. In ons dag vind ons dat families skeef opkyk wanneer iemand met ‘n getuienis van redding by die huis aankom. Niemand jubel nie, daar word nie fees gevier nie, eerder praatjies gemaak. As jy nie grootse blydskap beleef oor een siel wat gered is nie, bevraagteken dan jou eie Christenskap.



Die Kleinhans broers_

Daar moes oorweldigende blydskap in die Hemel gewees het die dag toe die drie Kleinhans-broers gered is. Ons het hulle hoog in die berge naby Glenconnor opgespoor.
            Net Martiens (met die byl) had effe skool en hy kon lees. Hy het elke dag vir hulle Bybel gelees.
            Die drie het mekaar aangevul en nooit gebedel nie. Deur God se Genade en Liefde het hulle die veld goed geken, kon selfs turksvystroop kook. Hulle had elkeen ‘n klein ongeskiktheidspensioen maar moes bitter ver berg en berg op loop om by ‘n algemene handelaar uit te kom. Hulle het geen drank of tabak gebruik nie.

            Hulle het mekaar se hare geknip en mekaar se tande getrek. Hulle het ‘n kluisenaarslewe gelei. “n Boer het toegelaat dat hulle op sy plaas woon. Hy en ander het die broers soms van kos voorsien.  

            Hulle had geen familie nie, net die HERE. Mens het hulle ook nooit lelik hoor praat nie. Heelwat later is een na die ander Huistoe.

            Hulle was nie eers arm nie, hulle het niks gehad nie. Tot die kruiwa het hulle self gemaak om hout vir vuurmaak te gaan soek. Kenmerkend van die drie was hulle blydskap, liefde, vrede, lankmoedigheid, vriendelikheid, goedheid, getrouheid, sagmoedigheid en selfbeheersing, soos verwoord in Gal 5:22

Die blydskap wat van ons verwag word, gaan nie oor sekere wonderlike omstandighede nie, maar oor ‘n innerlike borrelende fontein.
            Dit is ‘n geskenk uit die hand van God deur Sy seun Jesus Christus, en is een van die belangrikste gevolge van die ondervinding van die Wedergeboorte. As ons gered is, dan het ons hierdie besondere blydskap. Daar is niks wat ons kan doen of nie doen nie, om dit te verkry.
            Blydskap is sinoniem met die blymoedigheid van Matt 5:12 “Verbly en verheug julle omdat julle loon groot is in die hemele.”
            Ook soos in Luk 1:14 “En hy sal blydskap en verheuging vir jou wees.”
            Asook Ps 16:8-9 “Ek stel die HERE altyddeur voor my; omdat Hy aan my regterhand is, sal ek nie wankel nie. Daarom is my hart bly en my eer juig; ook sal my vlees in veiligheid woon.”
             En Ps 33:21 “Ons hart is bly in Hom, omdat ons op sy heilige Naam vertrou.”
            Want Dawid sê van Hom: “Ek het die Here altyddeur voor My gesien, want Hy is aan my regterhand, dat Ek nie sou wankel nie. Daarom is my hart bly en my tong juig, ja, ook sal my vlees nog rus in hoop.” Hand 2:25-26
  
            So groot is die blydskap in Hand 2:46 dat selfs siele gered word: “En dag vir dag het hulle eendragtig volhard in die tempel en van huis tot huis brood gebreek en hulle voedsel met blydskap en eenvoudigheid van hart geniet, terwyl hulle God geprys het en in guns was by die hele volk. En die Here het daagliks by die gemeente gevoeg die wat gered is.”

            Ook Hand 14:16-17 “Hy het in die tye wat verby is, toegelaat dat al die nasies in hulle eie weë sou wandel, al het Hy Homself nie onbetuig gelaat nie, deur goed te doen, van die Hemel vir ons reën en vrugbare tye te gee en ons harte met voedsel en vrolikheid te vervul.”
            Maria sê: “My siel maak die Here groot, en my gees is verheug in God, my Saligmaker.” Luk 1:46
            Jesus Christus sê: “Hy wat in My glo, soos die Skrif sê: strome van lewende water sal uit sy binneste vloei.” Joh 7:38
               “Wees dan nie bedroef nie, want die blydskap in die HERE – dit is julle beskutting.” Neh 8:11
            Hoe behou ons hierdie wonderlike blydskap? Dawid Wilkerson stel dit so:
            Eenvoudig gestel, net die blydskap van die Here voorsien ons met ware krag. Ons kan oor ons tien en twintig jaar wandel met Christus praat soveel as wat ons wil. Ons kan in ons mantel van geregtigheid pronk.
            Maar as ons nie toelaat dat die Heilige Gees die blydskap van die Here in ons harte volhou nie – as ons nie voordurend uitgehonger na sy woord bly nie –   verloor ons ons vurigheid. En ons sal nie gereed wees vir wat die wêreld in die laaste dae sal oorval nie.
            Ons behou die blydskap van die Here op dieselfde wyse as wat ons dit aan die begin verkry het: Eerstens, uitbundige liefde, eer en honger na God se Woord.
            Tweedens, volgehoue wandel in liefde en dankbaarheid vir die HERE.
            Derdens, dat ons, onsself van alle wêreldse invloede afsny. Dit is hoe die persoon van die Heilige Gees of kerk “Jesus blydskap” volhou – altyd vol blydskap, vol van blymoedigheid en vreugde.
            “Daarom, rig die slap hande en die verlamde knieë weer op; en maak reguit paaie vir julle voete (hoekom?), sodat wat kreupel is, nie uit lit raak nie, maar liewer gesond gemaak word. – Sjibbolet

Nie deur Krag of Geweld nie…

·    

‘Die HERE kan ‘n koning se gedagtes verander soos water in ‘n leivoor’

Hier is die bewyse van Goddelike ingryping

Nie deur krag of geweld nie, maar deur my Gees, sê die HERE van die leërskare in Sag. 4:6.
          Die God van die Bybel, is presies dieselfde God wat ons vandag aanbid. Vir Hom is niks onmoontlik nie. Omdat Hy Almagtig is, kan Hy die geskiedenis verander, Hy kan die lewe van enige volk, koning, president of mens op aarde omskep, ja, Hy kan selfs oorloë halt roep – in antwoord op gebed!
            Die Here is in beheer van die koning. Spr 21:1 lees: “Die koning se hart is in die hand van die Here soos waterstrome;  Hy lei dit waarheen Hy wil.”
            Die nuwe vertaling lees: “Die Here kan ‘n koning se gedagtes net so maklik beheer soos water in ‘n leivoor en dit stuur in die rigting wat Hy wil!”
            Israel, ons voorsate, pleeg ‘n gruwelike sonde. Die HERE sê aan Moses: “Laat My dan nou begaan, dat my toorn teen hulle ontvlam en Ek hulle verteer. Let op: Moses gryp in: Maar Moses besluit om 40 dae lank op die berg te gaan bid.


            Dis nie lank nie. Selfs in ons dag bid mense so lank en selfs langer.
            Moses was bang vir die toorn en die grimmigheid van die HERE (Deut. 9:19), maar hy het God nie met rus gelaat nie.
            Dit is wat ons ‘n (magtige of vurige) gebedstryd noem, wanneer iemand bid asof sy lewe daarvan afhang. Jak 5:16
            Moses het nie nodig gehad om so vir sy volk in te tree nie. Sy saak met God was skoon. Hy het boonop God se belofte gehad: “Dan sal Ek jou tot ‘n groot nasie maak!”
            Hy is egter deeglik daarvan bewus wat die uiteinde gaan wees as God sy toorn teen die volk sou verhef. Hy tree vir sy volk in die bres, 40 dae lank. Hoeveel van ons bid ‘n uur lank? En ons kan nie verstaan hoekom niks gebeur nie.
            God is in beheer, maar ons is Sy medewerkers: “Want ons is medewerkers van God; die akker van God, die gebou van God is julle.” 1 Kor 3:9
            Ons sal soos Moses ook moet ingryp deur middel van vurige gebed!
            Aan die Kruis op Golgota bid Jesus dat Sy moordenaars vergewe moet word.  Op die berg bid Moses: “Ag, hierdie volk het ‘n groot sonde begaan en vir hulle goue gode gemaak. Nou dan, as U tog maar hulle sonde sou vergewe. En so nie, delg my dan maar uit U boek wat U geskryf het!”  Ex. 32:31,32.
            Moses het oorwin en so is die lot van ‘n volk bepaal. Is jy op oorwinningsgrond? Ons gebede is soveel werd as wat ons werd is. Die maat waarmee ons meet, sal ons mee gemeet word.
            Daar is Dawid se groot gebed toe Absalom in opstand gekom het en die koning in skaamte moes vlug. Dawid se saak het hopeloos gelyk. Daar sit die indringer in die hoofstad Jerusalem op Dawid se troon.
            Psalms sê Dawid was ‘n man van gebed. In Ps. 3 bid hy: “O HERE, hoe het my teenstanders vermenigvuldig! Baie sê van my: Daar is geen heil vir hom by God nie…  Maar U, HERE, is ‘n skild wat my beskut, my eer en die Een wat my hoof ophef.
            “Luid roep ek die HERE aan, en Hy verhoor my vanaf Sy heilige berg. Ek het gaan lê en aan die slaap geraak; ek het wakker geword, want die HERE ondersteun my. Ek sal nie vrees vir tienduisende mense wat rondom teen my gereed staan nie…  Die heil behoort aan die HERE; laat U seën wees oor u volk!  Sela.”
            Die oorwinning wat later op die slagveld behaal is, Absalom se tragiese einde en die herbevestiging van Dawid as koning, was reeds in die onsigbare area van gebed besleg.
            Christene sit soms maande by beraders in die hoop om gehelp te word met probleme wat oor hulle pad gekom het. Hulle het nog nie die geheim geleer dat selfs die lot van konings en volkere bepaal kan word deur die knie wat in die teenwoordigheid van God buig nie, tesame met die stem van belydenis en smeking wat die Troon van Genade bereik nie.


            Daniël se gebede het die groot Babiloniese en ook die Medo-Persiese ryke geskud. Hy het nie die koning se bevel gevrees nie en het geweier om die beeld te aanbid. Daniël kon dit doen, want hy het met ‘n skoon gewete voor God kon staan.  Dit is ook hoe hy geweet het dat God hom sou red.
            Dit baat nie ons wil ook 40 dae lank bid maar ons saak met God is nie reg nie.  God laat Hom nie bespot nie.
            Daniël se saak met God was reg en daarom kon hy die goddelose politieke kwaaddoeners wat sy ondergang gesoek het, trotseer.
            “En toe Daniël verneem dat die bevelskrif geskrywe was, het hy in sy huis gegaan; en hy het in sy bokamer vensters gehad wat oop was in die rigting van Jerusalem, en hy het drie maal per dag op sy knieë geval en gebid, en lofprysinge teenoor God gespreek.”
            So beland Daniël in die leeukuil. Sy oorwinning in die leeukuil was nie  toe hy heelhuids daar uitklim nie, maar juis toe hy daar ingegaan het. Hy het die leeukuil in oorwinning betree. Hy had ‘n vaste vertroue in sy God.
            Duisende het in afwagting gesit om te sien hoe die leeus Daniël verskeur. En toe gebeur daar niks. ‘n Engel het die leeus se bekke toegestop.
            “Toe het koning Darius aan al die volke, nasies en tale wat op die hele aarde woon, geskrywe: Mag julle vrede groot wees!
“Deur my word bevel gegee dat hulle in die hele magsgebied van my koninkryk moet bewe en sidder voor die God van Daniël, want Hy is die lewende God en Hy bestaan in ewigheid en Sy koninkryk is een wat nie vernietig kan word nie en Sy heerskappy duur tot die einde toe.
“Hy verlos en red en doen tekens en wonders in die Hemel en op die aarde, Hy wat Daniël uit die mag van die leeus verlos het.”


Paulus se middernagtelike gebed in die gevangenis van Filippi was een van die beslissingsoomblikke in die verloop van die mensdom. God sou hom daar uit laat stap om die boodskap van die Kruis in die ganse Europa verkondig, sou hy in ‘n gesig die man van Macedonië hoor sê: “Kom oor en help ons!’
“En omtrent middernag het Paulus en Silas gebid en lofliedere tot eer van God gesing.” Dan skud die fondamente van die gevangenis en die tronkbewaarder roep uit: “Menere, wat moet ek doen om gered te word?” Nie ver daarvandaan nie was ‘n getroue groep gelowiges ook in gebed.
Daar is ‘n uitnodiging ook vandag aan die mensdom: “Roep My aan in die dag van benoudheid: Ek sal jou uithelp en jy moet My eer!”
In die Tuin van Getsémané vind ons Jesus Christus in gebed en word die ewige lotsbestemming van die ganse mensdom besleg. Die Verlosser had die sleutel in Sy hand.
Hy moes gekruisig word, Sy bloed moes vloei, ‘n lam ter slagting gelei. Nie langer hoef die mens ‘n bokkie te neem, sy sondes daarop af te bid en die bokkie te offer nie. Nee, die Lam van God is vir almal se sondes geslag, ‘n volmaakte werk.
Sy Getsémané-gebed was nie oor vrees vir die dood nie, maar dat Hy wat sonder sonde was, die wêreld se sondes op Hom moes neem. Die Seun van die Mens triomfeer egter ook hieroor.
Die mensdom met sy pyn en skande en dood, sal verlossing vind.
Waar is daar ‘n meer kritieke uur in die lewe van die Kerk as toe Graaf von Zinzendorf in 1714 in Herrnhut, Duitsland die naam van die HERE begin aanroep het.
Hy was diep neergeboë in ‘n siele-angs omdat hy gesien het wat aangaan onder Protestantse gelowiges van die verskillende evangeliese bewegings. Dit was ‘n tydperk van vurige vervolging.
Luther het sy taak voltooi. Calvyn het op ‘n magtige wyse gewerk. Huss was ‘n gewyde nagedagtenis. Zwingli het sy volgelinge gelei, maar daar was verwarring en steeds het die bloed van die Christen-martelare gevloei.
Sedert sy jeug was Graaf von Zinzendorf ‘n ywerige Christen asook ‘n man van aksie. Hy het sy deure van sy reuse landgoed vir die vervolgde Protestante van Europa oopgestel, sodat hulle iewers skuilplek teen die genadelose storm kon vind.
Toe het Von Zinzendorf se barenswee begin. Hy het gehoop op liefde en begrip: wat hy gehoor het was die stem van geskille – en ons hoor dit vandag weer.
Die geskille was oor tientalle sake, alles van minder belang. Von Zinzendorf het verlang om God se kinders verenig te sien, maar eindelose teologiese twispunte het die uitdra van die Evangelie verteer.
Von Zinzendorf het dae en nagte in gebed deurgebring. Ander sluit later by hom aan. Op 14 Augustus 1714 het die antwoord gekom. Von Zinzendorf het ‘n Nagmaalsdiens gehou waarheen almal genooi was.
Die heerlikheid was meer as wat vlees en bloed kon hanteer. Gelowiges het in die HERE se teenwoordigheid neergeval. Die Kruis met sy diepste betekenis is onthul. ‘n Goddelike metamorfose vind onder die aanwesiges plaas. Christus word vir almal alles.
Die Morawiese beweging kom op dreef. Hulle het ‘n 24-uurse gebedsiklus gevorm en groepe het dag en nag tien jaar lank gebid. Ja, jy lees reg: Tien jaar lank dag en nag.
Die gevolg daarvan was dat oor ‘n tydperk van 25 jaar 100 sendelinge na alle dele van die aardbol uitgereik het. Die Morawiërs het ‘n wêreldwye beweging op tou gesit wat uiteindelik Protestantisme van polemiek tot sending laat swaai het.
John Wesley, ‘n spruit van die Morawiërs, het na sy grootse ondervinding in Aldersgate na Herrnhut gegaan om die wonderwerk self te aanskou.
Hy skryf aan die gelowiges tuis: “Ek het ‘n kerk gevind waar mens die atmosfeer van die Hemel self inasem.”
Dit is wat Suid-Afrika nodig het: ‘n Goddelike ingryping! Wat baat dit ons om te verklaar dat ons Christene is en niemand sien God in aksie in ons lewens en in ons land nie.
Reg oor SA skakel Christene by gebedsgroepe in. Ons glo daar is ‘n Goddelike ingryping in wording, ‘n kragtige geestelike herlewing is aan die kom, nie net in SA nie, maar reg oor die wêreld.
Ons moet bid want: “Die Here kan ‘n koning (en die volk) se gedagtes net so maklik beheer soos water in ‘n leivoor en dit stuur in die rigting wat Hy wil!”
Nie deur krag of geweld nie, maar deur Sy Gees. – Sjibbolet

‘Die Evangelie nou die mees gehate dogma!’

Nogtans, vertrou op ‘n magtige Herlewing!

Jesus Christus is skielik in die spervuur.  Weer skreeu die gepeupel:  Kruisig Hom!  Ook Sy volgelinge is in die spervuur.
Al hoe meer regerings, verwerp Jesus Christus en God se gesag. Christus is nou ook nie welkom in die nuwe grondwet van die Europese Unie nie en ook nie in die Suid-Afrikaanse grondwet nie... en dit ten spyte daarvan dat ver meer as die helfte van die bevolking verkjlaar dat hulle Christene is, altesame 36 miljoen van hulle.
Reg oor die wêreld word Jesus weggestoot en verstoot. Die staatskerk van Noorweë het pas meer as 25 000 lidmate in ’n maand verloor nadat hy ’n aanlyn registrasiestelsel ingestel het waar mense makliker kan aansluit of hul lidmaatskap beëindig.
Die Independent berig dat die Lutherse Kerk van Noorweë is die amptelike Noorse kerk en amper driekwart van die bevolking is geregistreerde lidmate.
Maar nou het 25 743 lidmate die kerk amptelik verlaat. Intussen het 1 177 die webwerf gebruik om aan te sluit.
“Die getal onttrekkings moet gesien word teen die agtergrond van die groot getal lidmate van die Noorse Kerk,” sê Helga Haugland Byfuglien, hoof van die Noorse Biskoppekonferensie.
Let nou op die volgende skoksyfers: ’n Jaarlikse peiling onder Noorweërs het bevind die meeste Noorweërs sê hulle glo nie in God nie. Altesame 39% van die bevolking het nee gesê op die vraag of hulle glo daar is ’n God, 37% het ja gesê en 23% het gesê hulle weet nie... en dit uit ‘n bevolking van vyf miljoen mense.
In die Verenigde Koninkryk noem slegs twee uit vyf mense hulself Christen.
In 1983 het net minder as ’n derde van Britte gesê hulle volg geen godsdiens nie. In 2014 het amper die helfte van Britte aangedui hulle is sonder godsdiens.
Die persentasie van mense in Suid-Afrika wat hulleself as godsdienstig beskryf het geval van 83% in 2005 tot 64% in 2012, volgens ’n peiling deur die Win-Gallup-groep.
Paige Patterson, president van die Suidwestelike Baptiste Teologiese Seminarie in Texas, sê: “Die mees gehate dogma in die wêreld vandag, is die eksklusiwiteit van Christus as Saligmaker.”
Patterson sê die Evangelieboodskap van redding is nie langer gewild onder koninklikes, baie predikers, akademici, filosowe en politici nie. “Dit is die mees gehate dogma in die wêreld vandag!”
Pastoor Voddie Baucham het vroeër tydens die Suidelike Baptiste Konvensie gesê predikers moet hulle gereed maak om “duur te betaal om die Evangelie te verkondig.” In Rusland moet mens nou betaal vir ‘n permit om die Evangelie te mag verkondig en ook net aan die groepie wat jy op jou aansoek aandui.
Soos Bauchan tereg gesê het, is dit reeds so dat predikers in die VSA reeds voor die keuse gestel word om ’n verwaterde Evangelie te verkondig en om die wette van die mens te gehoorsaam, of om die volle Evangelie te verkondig en die risiko te loop om in die tronke te beland, of selfs die doodstraf opgelê te word.
“Wat ook al gebeur, die Evangelie moet ten alle tye in Gees en Waarheid verkondig word,” het hy gesê.
Baucham het na Hand. 4 verwys waar Petrus en Johannes geweier het om op te hou om Jesus Christus te verkondig toe hulle gearresteer is. Hy het gesê die huidige kultuur mag nie neutraal staan wat betref die Bybelse Christendom nie.
Dit is geen opsie nie want ’n Bybelse Christendom pas nie in by die terme van ons huidige filosofiese denke nie. Dit is waarom ons in die media verkeerdelik voorgestel, verkeerdelik aangehaal en misverstaan sal word – want hulle opereer vanuit ‘n filosofiese denke wat nie kan begryp wat ons glo en waarom nie.  Neutraliteit is dus geen opsie nie,” het Baucham beklemtoon.          
In Europa is verskeie groepe en kerke, selfs die Pous, wat beswaar daarteen maak dat die nuwe grondwet nie verwys na Europa se Christelike wortels nie en geen erkenning aan God die Vader verleen nie. Daar word bloot gepraat van “Europa se kulturele, godsdienstige en humanistiese erfenis.”
Die regerings van Poland, Malta, Slowakye en die Tsjeggiese Republiek het saam met Italië en Portugal beswaar gemaak en gesê dat die kwessie rondom Christus vir hulle en miljoene ander Europeërs ’n prioriteit is.
Terwyl Italië en Portugal die bastions van Europese Roomse Katolisisme is, is dit die ander volkere wat die aandag trek, soos die voormalige godlose Sowjet Republieke van Poland, Lithuanië, Slowakye en die Tsjeggiese Republiek.
Hierdie lande was vir lank onderworpe aan ’n godlose sekulêre humanistiese regime, hulle weet waartoe ’n land in staat is wat geen verantwoordelikheid teenoor God het nie.
            Spanje het vroeër ook geëis dat God in die grondwet genoem word, maar het hulle nou by die sekulêre groep geskaar nadat al-Kaida gehelp het om die Sosialistiese regering aan bewind te bring na die vroeëere bombardement van ‘n trein in Madrid.
Frankryk, wat deur Duitsland en Brittanje ondersteun word om Christus uit die grondwet te laat, sê die grondwet akkommodeer alle mense van alle gelowe en as mens Christus in die grondwet sou inbring, dan ignoreer mens die Jode en die Moslems.
Hoe “vroom” hierdie sienswyse ook al klink, is en bly dit ’n valse begrip, ’n illusie waaraan Christene hulle nie mag onderwerp nie. Hulle word deur God geroep om standpunt in te neem vir die Evangelie van Jesus Christus.
Christene staan voor ‘n (finale) uitdaging: Om Christus te verloën of om Christus te bely! Geen kompromie is hoegenaamd aanvaarbaar nie.
Baucham is natuurlik korrek dat swaar tye op Christene wag wat die Waarheid enduit gaan verkondig. Christene sal vervolg word want dit sal gesê word dat hulle – met die Evangelie – inbreuk maak op die privaatheid van ander mense. Mense sal hulle agter hulle menseregte-illusies verskans, enigiets, solank hulle nie die Waarheid hoef te hoor nie.
            Berigte die afgelope tien dae uit Amerika toon ook ‘n skokkende afval vanuit die Christendom.
Vir die ware Gelowiges is hierdie verwikkelinge geensins ’n verassing nie, want die HERE het Sy volk lank reeds hierop voorberei: “En julle sal deur almal gehaat word ter wille van my Naam.” Matt. 10:22.
Nogtans moedig die HERE Sy volk aan om hulle deur geen mag ter wêreld te laat keer nie en voeg by: “Maar wie volhard tot die einde toe sal (beslis) gered word.”
Die HERE self gaan verder in Matt. 24:4-14 “Pas op dat niemand julle mislei nie. Want baie sal onder my Naam kom en sê: Ek is die Christus! en hulle sal baie mense mislei.
“En julle sal hoor van oorloë en gerugte van oorloë. Pas op, moenie verskrik word nie, want alles moet plaasvind, maar dit is nog nie die einde nie.
“Want die een nasie sal teen die ander opstaan en die een koninkryk teen die ander; en daar sal hongersnode wees en pessiektes en aardbewings op verskillende plekke.
“Maar al hierdie dinge is 'n begin van die smarte.
“Dan sal hulle jul aan verdrukking oorgee en julle doodmaak; en julle sal deur al die nasies gehaat word ter wille van my Naam.
“En dan sal baie tot struikel gebring word en mekaar verraai en mekaar haat. En baie valse profete sal opstaan en baie mense mislei.
En omdat die ongeregtigheid vermeerder word, sal die liefde van die meeste verkoel.
“Maar wie volhard tot die einde toe, hy sal gered word. En hierdie Evangelie van die Koninkryk sal verkondig word in die hele wêreld tot 'n getuienis vir al die nasies; en dan sal die einde kom.”
Feit is ook dat die Christendom as dominante en dinamiese mag in Europa aan die kwyn is, soveel so dat dit vandag niks meer as ‘n godsdienstige sekte soos Islam en Boeddhisme is nie, aldus die redakteur van die wêreldbekende Omega Nuusbrief.
Wat bly vir my en jou oor? Om te bid vir ‘n magtige Herlewing soos nog nooit tevore nie. En dit kom, wees verseker daarvan. – Sjibbolet

Dit moet reën – die Weerburo ten spyt

Kom staan saam vir strome van seën van Bowe...

Die huidige droogte is uitmergelend en daar is geen teken wanneer die droogte gebreek gaan word nie. Die Weerburo het Maandag gesê die droogte duur voort en daar is min of geen reën hierdie lente of somer te wagte nie.
Mense raak mismoedig, selfs depressief, sommige pleeg selfs selfmoord. Oral kla, murmureer mense oor die ondraaglike hitte en droogte.          
God is by verre groter as El Nino en weerverskynsels. Altesame 36-miljoen mense in SA beweer dat hulle Christene is. Wel, die geloof van 36m mense kan enige weerstelsel omkeer.
“En moenie murmureer soos ook sommige van hulle gemurmureer het nie, en hulle het deur die verderwer omgekom.
“Maar al hierdie dinge het hulle oorgekom as voorbeelde en is opgeskrywe as 'n waarskuwing aan ons op wie die eindes van die eeue gekom het.
“Daarom, wie meen dat hy staan, moet oppas dat hy nie val nie.” 1 Kor 10-12
            Ten spyte van alles moet ons soos Habakuk jubel.
            “Alhoewel die vyeboom nie sal bloei en aan die wingerdstokke geen vrug sal wees nie, die drag van die olyfboom sal teleurstel en die saailande geen voedsel oplewer nie, die kleinvee uit die kraal verdwyn en geen beeste in die stalle sal wees nie – nogtans sal ek jubel in die HERE, ek sal juig in die God van my heil.
            “Die HERE God is my sterkte, en Hy maak my voete soos dié van herte, en Hy laat my tree op my hoogtes. Vir die musiekleier op snaarinstrumente.” Hab 17-19
            Ten spyte van wat ook al, jubel Habakuk. Hy was altyd bly.
            Altyd beteken presies wat dit sê soos in: Wees altyd bly.
Dog, hoe is mens bly en dankbaar wanneer daar fout is, wanneer dinge verkeerd loop, wanneer jy onrustig is, of seer het of hartseer is?
            Eenvoudig, ons is bly omdat ons weet dat wat ons omstandighede ook al is, die Almagtige God, ons God, het reeds die antwoord.
            “Wees altyddeur bly.
            “Bid sonder ophou.
            “Wees in alles dankbaar, want dit is die wil van God in Christus Jesus oor julle.” 1 Thes 5:16-18
            Dalk moet alle gemeentes die preke vir ‘n tyd lank op Sondae stop en die hele diens gebruik in lofprysinge, aanbidding en gebed. Waar twe of drie in Sy naam vergader, daar is Hy. Verwelkom hom.
            Onthou, God besit alles, elke liewe ding. Daar is niks wat ons Hom kan gee as net lofprysinge en aanbidding nie. Doen dit!
            ‘n Biddag vir reën baat nie. Dan reën dit en dan gaan almal weer hulle eie weg. Onlangs was daar ‘n biddag vir reën. Steeds reën dit nie, maar pleks van jubel en blydskap, duur die murmureringe voort.
            Paulus had dit nooit maklik nie. Die Here stuur hom na Macedonië.
Met sy aankoms is daar ondervind hulle vriendelikheid, gasvryheid en siele word gered en gedoop.
            Al die tekens is daar om te bevestig ja, die HERE het hom gestuur.
            Die volgende dag open die poorte van die hel, of so het dit gelyk.
Hulle klere word van hul lywe afgeskeur en hulle word met stokke geslaan, omdat hulle dit gewaag het om Jesus Christus te verkondig.
Hulle word in die binneste gevangenis gewerp, ‘n bykomende gevangenis in die middel van die gewone gevangenis met hoër mure. Hulle voete is in ‘n blok vasgemaak. Niemand kom daaruit los nie.
Daar sit hulle in duisternis, bebloed, naak, in pyn en hulle kon begin murmureer het met smartvraat vrae soos: “Hoekom het die HERE dit toegelaat, ens.?”
            Dink maar of jy ooit in so ‘n benarde posisie was en dit boonop onskuldig!    Middernag, bebloed en in pyn, begin hulle lofliedere tot eer van God sing. So hard dat al die gevangenes daarna luister. Paulus en Silas het besef God is groter as die probleem en pleks van te kla en te murmureer oor die bloed en die koue en die pyn, kyk hulle by dit alles verby, reguit na God.
            “En skielik kom daar 'n groot aardbewing, sodat die fondamente van die gevangenis geskud het. En onmiddellik het al die deure oopgegaan en die boeie van almal het losgeraak.
“En die tronkbewaarder het wakker geword; en toe hy sien dat die deure van die gevangenis oop was, het hy 'n swaard getrek en wou homself om die lewe bring, in die mening dat die gevangenes ontvlug het.
“Maar Paulus het met 'n groot stem geroep en gesê: Moenie jouself kwaad aandoen nie, want ons is almal hier.
“En toe hy lig gevra het, spring hy na binne en val bewende voor Paulus en Silas neer.
“En hy het hulle na buite gebring en gesê: Menere, wat moet ek doen om gered te word?
“Toe sê hulle: Glo in die Here Jesus Christus en jy sal gered word, jy en jou huisgesin.
“En hulle het aan hom die woord van die Here verkondig en aan almal wat in sy huis was.
“En in dieselfde uur van die nag het hy hulle geneem en hulle wonde gewas, en hy is onmiddellik gedoop, hy en al sy mense.
“Toe bring hy hulle in sy huis en sit hulle 'n maaltyd voor; en hy het hom verheug met sy hele huisgesin dat hy tot geloof in God gekom het.” Hand 16:26-32
Paulus en Silas het in groot blydskap die lofliedere begin sing omdat hulle geweet het, alhoewel hulle diep in die verknorsing was, had God reeds die antwoord.
Verstaan jy nou wat dit beteken om altyddeur bly te wees, altyd te jubel, wat jou omstandighede ook al is?
Die HERE wou die hele tronk red, vanaf die hoof van die tronk tot by die grootste krimineel. Die HERE het Paulus wel na Macedonië gestuur, maar Paulus sou nie die tronk besoek nie. Toe plaas die HERE vir hom en Silas in die tronk.
Aan die een kant is die hele tronk gered en aan die anderkant groei Paulus en Silas in geestelike wasdom.
En dan staan daar ook: “Bid sonder ophou.
Jesus sê: “Tot nou toe het julle niks in my Naam gevra nie. Bid en julle sal ontvang (hoekom?), sodat julle blydskap volkome kan wees.” Joh 16:24
            Ons is veronderstel om in geestelike wasdom te groei. Paulus kon reeds die geestelike voordeel begryp om dankbaar te wees wanneer mens seer het.
            Lofliedere en gebede neem die fokus van jouself af en plaas dit waar dit hoort, op Jesus Christus.
            Paulus moes telkens storms op see aandurf ter wille van die Evangelie. Hy weet hoe dit voel om in ‘n stormsee met ‘n skip te strand. Maar hy kon baie vermag omdat hy so swaar op die Heilige Gees gesteun het.
            Hy het besef sy eie kragte gaan hom nie dra nie, maar die Heilige Gees kan en sal.
            So moet ons ook groei in geestelike wasdom, situasies kan opsom (gawe van onderskeiding) en met blydskap die stryd takel. Hou op met worstel en gee oor en vertrou op die Heilige Gees. Dan help God jou om die onmoontlike reg te kry. Dan behou jy jou blydskap in pyn en hartseer.
            Paulus en Silas was in baie groot moeilikheid, hulle kon nie sien hoe hulle ooit daaruit sou kom nie, maar hulle het geweet God het altyd ‘n antwoord.
Uiteindelik weet hulle, hulle moes daardeur sodat ‘n hele tronk en die personeel en selfs die hoof van die tronk en sy huisgesig, gered en gedoop kon word.
Ons kan die droogte breek as ons almal elke dag die lofliedere tot God sing en bid.
Let op, Jesus het sy lewe vir jou afgelê en oorwin. Wanneer lê jy jou lewe vir hom af?
Wanneer jy in pyn en verknorsing is, bid en bid en bid omdat jy weet God het die antwoord. Wees bly en bly en bly want jy weet God het die antwoord!
Moenie fokus op die grootheid van die probleem nie, fokus op die grootheid van God. Maak hierdie sin jou slagspreuk: My God is ver groter as die probleem!
My God is groiter as die weervoorspellings. Moenie eers daarna kyk nie. Hou die oë op Jesus.
            Jy sit al twee jaar sonder werk.  Jy het kanker.  Jy is ‘n diabeet.
Dan verbly jy jou... nie in jou werkloosheid nie, nie vir die kanker nie, nie vir die Diabetes nie... jy verbly jou in jou God wat die antwoord het!
Een van God se doelwitte met my en jou, is om te leer dat ons ten volle van Hom afhanklik moet wees.
Luister weer: Jy verbly jou nie in jou probleme nie, jy verbly jou in God se antwoord op die probleem. Jy smeek nie, jy kla nie, jy vertel vir niemand hoe swaar jy kry nie, jy sms niks, jy verbly jou in God se antwoord want jy weet Hy het die antwoord.
Keer die hele Facebook om in lofliedere en aanbidding...
Jy lewe bo en nie onder die omstandighede nie. Jy staan op oorwinningsgrond!
Die verraderlike see suig skrywer een keer diep in die donker waters in. Ek haal nie meer asem nie. My mond is oop en seewater vloei in en uit my. Ek besef die einde is hier. Ek sien my hele lewe voor my afspeel. Dis verby. Ek kan nie bid nie, nie praat nie, nie niks nie.
Dan gee ek oor en ek dink hoe wonderlik dit is om te sterf. Die wonderlike kalmte en heerlikheid wat oor mens spoel.
Dan kom die Engele en haal my uit daai donker dieptes uit... 56 jaar gelede... want die HERE had ‘n belangrike taak vir my.
Jare daarna, een donker nag, gebeur presies dieselfde, en weer haal die HERE my daar uit.
Nog later, een donker nag, is ek in ‘n skuit in die reën op die oop stormsee.  Weer red die HERE my.
En... ek was nie eers Wedergebore nie. Ek het myself net oorgegee aan die Ewigheid. In daardie stadium is jy ‘n niks en kan jy niks meer doen nie. Jy veg vir jou lewe en dan besef jy... jy kan nie meer nie.
Kort daarna was daar ‘n Damaskuspad ondervinding. My ouma, wat dig aan Jesus se sy gewandel het, had haar lysie vir wie sy dag en nag die HERE geloof het dat almal gered wou word. Ouma’s julle het ‘n vername rol om te speel.
            Vandag, as Gelowige, is dit veel makliker. Ek is altyd bly want ek weet, wat ook al oor my pad kom, God het reeds die antwoord, soos onlangs weer.
            Moenie ‘n smartvraat wees nie, moenie dat emosie die oorhand kry nie, laat liewer die blydskap seëvier.
            Jy bekommer jou oor jou kind wat die pad byster is. Gee hom oor in die hande van die HERE en wees bly, bly, bly. Jubel.
            Jou kommer, en vrees, emosies, twyfel en depressie gaan niks oplos nie. Wees altyd bly. Bid sonder ophou.
            Jesus sê ‘n paar keer vir sy eie dissipels: Moenie vrees nie, glo net.
            Jy het as Gelowige mag oor alle dinge. Gebed is die magtigste wapen in die wêreld, dis soos ‘n ballistiese missiel.  Niks kan standhou voor gebed nie.
            Daar is onberekenbare krag in God se Woord.
Wanneer dit goed gaan is ons mos minder intiem met die HERE (swak gewoonte), maar wanneer die “sleg” gaan, dan is Hy skielik ons beste Vriend.
Vervang die plakkers op jou yskas met die Lewende Woord: Wees altyddeur bly. Bid sonder ophou. Wees in alles dankbaar. Sing lofliedere. Speel die DVD’s met lofliedere heeldag.
Doen soos die HERE sê: Wees altyd bly. – Sjibbolet

Die twee soldate..

.
In ‘n Britse hospitaal tydens Wêreldoorlog 11, lê ‘n soldaat ernstig gewond. Sou hy gesond word? Hy was ongered, tel ‘n Bybel langs sy bed op en begin lees. Hy lees dat Jesus leef en dat Hy genees en hy kom agter dat die Bybel 100% op datum is met alles.


Dr Derek Prince
  
Omdat Derek Prince in daardie stadium ‘n filosoof en soldaat was, het hy Efesiërs se verduideliking van die wapenrusting deeglik begryp.
            Hy het Jesus as Saligmaker aangeneem, die HERE vertrou vir sy genesing en is op 88-jarige ouderdom Huis toe. Hy was een van die mees bekende Skrifgeleerdes van sy tyd.        
            Daardie Bybel wat iemand langs sy bed neergesit het, het die ommekeer tot gevolg gehad. So groot dat hy later Dr in Teologie geword het.
            In ‘n ander Britse hospitaal was  'n erg beseerde lugmagman... ook tydens Wêreldoorlog II.
Nadat die dokter sy wonde verbind het, sê die gewonde man vir die lugmagman in die ander bed: "Maat, jy kan 'n ou nie dalk met bietjie godsdiens help nie? Ek het groot geskrik, jy weet."
"Jammer, jong," antwoord die ander man, "ek sal nie kan nie. Maar elke Donderdag kom 'n vrou hierlangs met Bybels en traktaatjies, sy sal jou help."
“Dalk is ek Donderdag nie meer hier nie," sê die eerste man. "Jy kan nie dalk vir my net iets sê nie?"
Die tweede een skud net die kop. Na 'n rukkie sê die eerste man weer: "Ek het gelê en dink. Ek weet nie of dit in die Bybel is en of dit net 'n lied is nie, maar dis iets soos: Laat die kindertjies na My toe kom, want die Koninkryk van die Hemel is hulle s'n."
"Ja, dis definitief in die Bybel," antwoorde die tweede een.
"As Jesus Christus wou hê die kindertjies na Hom toe moes kom, dink jy Hy sal my darem ook vat? Ek het Hom baie nodig, jy weet. In elk geval ek gaan probeer en Hom vra."
Hiermee trek hy die laken oor sy kop. Die laken het nie weer afgekom nie. Sy liggaam is later net verwyder.
            'n Lugmagkapelaan vertel die storie op 'n dag vir 'n groep lugmagmanne in Kingston, Ontario. Na die samekoms kom vra een van die vlieëniers vir hom: "Eerwaarde, dink u daardie man het enige kans gehad?"
Die kapelaan het geantwoord: "Hy het geen kans hoegenaamd gehad nie, hy had net ‘n absolute sekerheid.”
            Jesus self het gesê: "Ek sal hom wat na My toe kom nooit verwerp nie... Dit is die wil van My Vader: dat elkeen wat die Seun sien en in Hom glo, die Ewige Lewe sal hê." Joh 6:37,40.
            Siele word steeds gered en baie moet nog gered word, doen jou deel... bid, glo en getuig sonder ophou. – Sjibbolet