God antwoord vir seker

Nood of behoefte: God antwoord vir seker

Onheil spoel soos ‘n tsoenami  oor die aarde heen. Waar sal ons skuil... tussen die armes?

            Mens verbaas jou oor die getalle gegradueerdes wat boemelaars is, mense wat seergekry het en uit die samelewing verstoot is.

En Jesus sê Hy is lief vir hulle en ek en jy moet Sy liefde aan hulle oordra.

            Gaan sit eendag tussen hulle en neem vir hulle kos en iets te drinke en ‘n geldjie en luister na hulle hartseer stories. Wys dan vir hulle wie Jesus is.

Luister: “Welgeluksalig is hy wat ag gee op die arme; die HERE sal hom red in die dag van onheil.” Ps 41:2

            “Die HERE sal hom ondersteun op die siekbed; sy hele slaapplek verander U as hy krank is.” Ps 41:4

            Leer van Jesus. Sien hoe Hy met deernis die armes versorg, hoe die blindes sien, die verlamdes loop, die dowes hoor, die hongeres voedsel gegee word, ens.

            Daar is ook armes van gees. Ander ly aan verskillende soorte kwale en siektes. Meeste kan nie anti-depressante en sulke medikasie bekostig nie, en hulle kry baie swaar,

            Let op hoe Jesus mense se behoeftes op die daad aangespreek het.

            Wanneer Hy ‘n blinde bedelaar wat langs die pad aantref, het Jesus in die man se onmiddellike behoefte voorsien.

Onthou jy: “En hulle het in Jérigo gekom. En toe Hy en sy dissipels en ‘n aansienlike skare uit Jérigo uitgaan, sit die blinde man, Bartiméüs, die seun van Timéüs, langs die pad en bedel.” Mark 19:46

Dis ook hierdie Skrif wat in 1970 tot skrywer se redding gelei het ...

Die man het uitgeroep na Jesus om hom barmhartig te wees, maar toe hy later by Jesus kom vra Jesus spesifiek vir hom: “Wat wil jy hê moet Ek vir jou doen? En die blinde man sê vir Hom: ‘Rabbónie, dat ek mag sien.’”

Jesus het nie gepreek nie, nie ‘n lang gesprek aangeknoop nie. Nee, Jesus voldoen aan die blinde se versoek en help hom net daar in sy onmiddellike behoefte en genees sy blindheid.

Elke keer as iemand met ‘n behoefte gekom het, het Jesus dit nie geïgnoreer of verskonings gemaak nie. Nee, Hy het die melaatses genees, die verlamdes laat loop, die demone uitgedryf, die dowes kon hoor, selfs dooies in opgewek.

Hand 10:38 gee ‘n beknopte opsomming van Jesus se bediening: “Met betrekking tot Jesus van Násaret, hoe God Hom gesalf het met die Heilige Gees en met krag.

Jesus het die land deurgegaan, goed gedoen en almal genees wat onder die mag van die duiwel was, omdat God met Hom was.”

Inderdaad is die Ewigheid ontsettend belangrik en is die redding van ‘n mens se siel van kardinale belang. Maar ek en jy leef nog hier op aarde. Ons het behoeftes wat nóú uitskreeu om vervulling!

Ek wil jou aanmoedig om die Here Jesus nóú te vertrou met jou onmiddellike behoeftes wanner dit siekes, krankhede en watter nood ook al behels.

Ander dinge soos behoeftes, vertrou mens ook die HERE voor. Soms moet jy wag, maar niemand praat met die God van die Hemel oor ‘n behoefte en die HERE antwoord nie.

Wat is jou behoeftes: Smag jy byvoorbeeld na ‘n Hooglied man as huweliksmaat. Bd. Hy is op pad. Kyk uit vir hom.

Smag jy na jou biologiese kind wat jy destyds vir aanneming moes opgee? Kyk solank uit.

En jy wat na jou biologiese ouers soek? Jy soek dalk net verkeerd. Moet nooit moed opgee nie. Bly positief.

En terwyl jy wag, help ander net waar jy kan, al is dit ook net deur gebed en bemoediging. Bid vir mekaar Jak 5:16 en dra mekaar se laste. Gal 6:2 – Sjibbolet

Ons moet onverwyld operasioneel raak

Wanneer die Hemel Suid-Afrika binneval.

Voorwaarts Christen Stryders... let op, dis altyd en heeltyd Voorwaarts!

Jesus kom vir Sy Oorwinnende en Glorieryke kerk, ‘n Kerk wat deurentyd vorentoe beweeg. Gaan die wêreld in, bid vir die siekes, dryf die demone uit, gee julle... altyd vorentoe en nogmaals vorentoe.

            Nooit retireer ons nie, nooit gee ons moed op nie, nooit wyk ons af nie...!

            David Livingstone, die Skotse mediese sendeling, was gevra: Wat sou jy die graagste vir die HERE wou doen? Sy antwoord: “Enigiets, solank dit vorentoe is.”

            Ons wapenrusting, soos enige soldaat se wapenrusting (Efes 6:10-17) dek net ons voorhoede. Ons durf nie omdraai nie.

            Dis ‘n oorlog, ons durf nie aarsel nie.

            Ons is ‘n Heilige Leërmag, ons val Suid-Afrika binne om dit vir Jesus te oorwin. Ons is nie alleen nie. Saam met ons is talle legioene Engele. Die Heilige Gees leer ons, lei ons.

            Skrywer is een keer belet om in Oranjemund te preek. Hy het vorentoe beweeg en daardie aand tot 1vm diens gehou en die HERE se Leërmag het gewen.

            Evangelis Belinda Paar is onlangs in Nylstroom verbied om die Woord in ‘n sekere ouetehuis te bring. Sy het vorentoe beweeg en ‘n hele week is gevul toe die Hemel die aarde binnegeval het. En sy gaan binnekort weer nadat nog deure oopgegaan het.

            Mense wat die HERE wil stop, speel inderdaad met vuur. Jy wat sulke dinge doen, bevraagteken jou optredes voordat dit vir jou te laat is.

            Die Hemel wil die aarde binneval. Waar is jy, die Hemel het jou nodig!

            Sedert die begin van die verkondiging van die Evangelie vanuit Jerusalem, het die Blye Boodskap voorwaarts reg oor die aarde beweeg en is dit vandag die groot bewegin in die wêreld met die Bybel as loshande die grootste verkoper.

            Ek en jy as Gelowiges is deel van hierdie ontsettende Hemelse Leërmag, komaan, bring jou kant... dis nog net net ‘n klein entjie man, hou moed, ons is amper daar.

            “En Simson het gesê: Met 'n eselskakebeen het ek een klomp, twee klompe, met 'n eselskakebeen het ek duisend man verslaan.

            “En toe hy klaar gespreek het, gooi hy die kakebeen uit sy hand en noem dié plek Kakebeenshoogte.

            “Daarop kry hy baie dors en roep die HERE aan en sê: U het deur die hand van U kneg hierdie groot verlossing gegee, en moet ek nou van dors sterwe en in die hand van die onbesnedenes val?

            “Toe kloof God die holte wat by Legi is, en daar kom water uit; en hy het gedrink, en sy gees het teruggekom, en hy het weer opgelewe. Daarom noem hulle dit Roepersfontein, wat vandag nog by Legi is.” Rigters 15:16-19

            Simson sterf van dors, sy siel verlaat sy liggaam... en met ‘n laaste poging ROEP hy... en hy leef.

            Wanneer ‘n Geestelike Leërmag se troepe iewers vasval, ROEP na die Leidsman. ‘n Paar Amerikaanse troepe se voertuig het in diep modder in Viëtnam vasgeval. Die vyand was op hulle en almal sou sterf.

            Toe ROEP hulle na God en Engele tel daai voertuig uit die modder op en plaas dit op droë grond en hule kon wegkom.

            “Kinders, dit is die laaste uur; en soos julle gehoor het dat die Antichris kom, bestaan daar ook nou baie antichriste, waaruit ons weet dat dit die laaste uur is.

“Hulle het van ons uitgegaan, maar hulle was nie van ons nie; want as hulle van ons was, sou hulle by ons gebly het; maar dit moes aan die lig kom dat hulle nie almal van ons is nie.

“En julle het die salwing van die Heilige Gees en weet alles.” 1 Joh 2:17-20

Die werklikheid is dat niks op hierdie aarde permanent is nie, selfs nie ons lewens nie. Die enigste permanensie is die Ewige Lewe, wat insluit die lewe op die Nuwe Aarde.

Kyk, Ek kom gou! Hou vas wat jy het, sodat niemand jou kroon kan neem nie.

“Wie oorwin, Ek sal hom 'n pilaar in die tempel van my God maak, en hy sal daar nooit weer uitgaan nie; en Ek sal op hom die Naam van my God skrywe en die naam van die stad van my God, van die Nuwe Jerusalem, wat uit die Hemel van my God neerdaal, en my nuwe Naam.

“Wie 'n oor het, laat hom hoor wat die Gees aan die gemeentes sê. Openb 3:12-13

In SA is ‘n groot aantal interkerklike Christenaksies aan die gang, maar om seker te maak die hele land word bewerk, is daar nie net stropers nodig nie, maar ook voetsoldate... om die Getal vol te maak.

Ons het SA reeds binnegeval. Ons moet nou onverwyld operasioneel raak. Doen dit.

As iemand nie in die Ewige Lewe belangstel nie, plaas hom/haar op die gebedslys en beweeg aan na ander wat smag na die Waarheid. – Sjibbolet

·       https://www.youtube.com/watch?v=0Vua7LwiAQ0

Nederigheid bring rykdom, eer en die lewe.

God gee Genade aan die nederiges

Van Gelowiges word nederigheid vereis: Beskeie wees. Nederigheid het niks met verkleinering te doen nie. Om jouself te verkleineer is ‘n sonde.

            “Want die HERE is verhewe; nogtans sien Hy die nederige aan, en die hoogmoedige ken Hy uit die verte.” Ps 138:6

“Dit is beter om nederig van gees te wees saam met die ootmoediges as om buit te verdeel met die trotsaards.” Spr 16:19

“Die loon van nederigheid is die vrees van die HERE, is rykdom en eer en die lewe.” Spr 22:4

“Want so sê die Hoë en Verhewene wat in die Ewigheid woon, Heilig is sy Naam: Ek woon in die hoogte en in die Heilige plek en (en waar nog?) by die verbryselde en nederige van gees, (hoekom>) om te laat herlewe die gees van die nederiges en te laat herlewe die hart van die verbryseldes.” Jes 57:15

Hoogmoed bring mense tot ‘n val. Hulle wat so hoog trots voor God en mens is, gaan iewers tot ‘n val kom en groot vernedering en verleentheid beleef. Maar let op, die regverdige God verhoog terselfdertyd diegene wat hulself in nederigheid voor Hom stel in erkenning van wie Hy is.



·       “Trotsheid kom voor die verbreking, en hoogmoed kom voor die val.” Spr 16:16

·       “Ek sal die trots van die vermeteles laat ophou en die hoogmoed van tiranne verneder.” Jes 13:11

·       “So sal Ek laat bederwe die hoogmoed van Juda en dié van Jerusalem, wat so groot is.” Jer 13:9

·       “Wie homself verhoog, sal verneder word, en wie homself verneder, sal verhoog word.” Matt 23:12

·       “Verneder julle voor die Here, en Hy sal julle verhoog.” Jak 4:10

·       “God weerstaan die hoogmoediges, maar aan die nederiges gee Hy genade.” 1 Pet 5:5

·       “Verneder julle dan onder die kragtige hand van God, sodat Hy julle kan verhoog op die regte tyd.” 1 Pet 5:6

Bovermelde strofes is letterlik vervul in die lewe van koning Herodus in Hand. 12... ‘n trotse man wat hom teen God verhef het. Hy het sommige van die gelowiges in die tronk laat stop en vir Jakobus met ‘n swaard laat ombring. Hand 12:1, 2

            Herodus het ook vir Petrus in die gevangenis gestop met die doel om hom ook later te dood, maar deur die HERE se ingryping van ‘n Engel, het Petrus bonatuurlik ontkom... ‘n ontsettende vernedering vir Herodus.

Op ‘n dag het hy hom koninklik aangetrek en op sy troon gaan sit en die volk toegespreek. Hand 22:12 lees: “Daarop het die volk hom toegeroep: ‘n Stem van ‘n god en nie van ‘n mens nie!”

En wat doen hy, hy het nie soos hy behoort te doen die skare onmiddellik gestop en gesê: “Stop mense, ek is wel ‘n koning, maar ek is nie ‘n god of God nie!” Nee, hy vat die eer vir homself, en wat gebeur toe? Hand. 12:23 – “En onmiddellik het ‘n Engel van die Here hom getref, omdat hy die eer nie aan God gegee het nie; en hy is deur wurms verteer en het gesterwe.”

“Want aan 'n mens wat welgevallig is voor Sy aangesig, gee Hy wysheid en kennis en vreugde...

“Maar aan die sondaar lê Hy die taak op om bymekaar te maak en te versamel, om dit dan te gee aan een wat welgevallig is voor die aangesig van God. Ook dit (daai bymekaarmaak) is tevergeefs en 'n gejaag na wind.” Pred 2:28 – Sjibbolet

Dit het begin reën

“En julle, kinders van Sion, juig en wees bly in die HERE julle God, want Hy gee julle die leraar tot geregtigheid en laat op julle neerdaal die reën, die vroeë reëns en die laat reëns, soos voorheen.” Joël 2:23

            ‘n Geestelike vloed is op pad. Die HERE Yaweh het dit belowe. Hy het ook belowe: “En daarna sal Ek my Gees uitgiet op alle vlees, en julle seuns en julle dogters sal profeteer, julle ou mense drome droom, julle jongelinge gesigte sien.

            “En ook op die diensknegte en op die diensmaagde sal Ek in dié dae my Gees uitgiet.” Joël 2:28-29

            Ons het die deur jare al baie preke hieroor gehoor en soms gewonder hoe sal dit gebeur?

            “Hy wat in My glo, soos die Skrif sê: strome van lewende water sal uit sy binneste vloei.” Joh 7:38

            Hou dop: Die enigste vereiste vir alles in die Nuwe Testament is “Glo.” Vir jou genesing ook… Glo.

            Jy glo elke dag vele dinge, maar wanneer God belowe, dan is jy nie so seker van jou saak nie. Intussen is God die enigte een wat werklik geglo kan word.

            Ons het landwyd gebid vir reën en die afgelope tweke veral stroom al wat rivier en stroompie is in die damme. Die ondergrondse watertafel word aangevul. Die eerste sneeu het begin val. Ons het gebid omdat ons geglo het God kan uitkoms bring. (En hoeveel van ons sê dankie?)

            Die Eindtyd-vloed sal in strome vanuit die Gelowiges vloei en siele tot redding bring. Dit sal vergesel word van tekens en wonderwerke.

            Ons moet die werklikheid besef: Jesus is op pad en dis ons verantwoordelikheid om die siele in te bring. Dit begin deur almal as verlore sondaars lief te hê met die liefde van Jesus en die gebed van intersessie te bid, vurig te bid. “Die vurige gebed van 'n regverdige het groot krag.”Jak 5:16

            Ons het nie opgegee om vir reën vir die Kaap te bid nie, so gee ons ook nie op om verlore siele in die Koninkryk in te bid nie.

            “Bid tot die HERE om (geestelike) reën in die tyd van die laat reëns; die HERE maak die weerligte, en Hy sal aan hulle 'n stortreën gee, plante op die veld aan iedereen.” Sag 10:1

            “Gelowiges moet buite hul kerkbande saamkom as Gelowiges en saam bid, intree vir die verlore siele en ons sal ‘n geestelike vloed belewe, ‘n vloed wat in Eseg 37 belowe word.           

            Begin die HERE loof in sang en in taal en elke musiek instrument wat jy jou hande op kan lê, want die reën het reeds begin val.  Van oral in die wêreld en in SA kom die berigte van redding en wonderwerke in, weliswaar op klein skaal, maar dis die begin van die strome van seën van bowe. – Sjibbolet

Luister na die woorde:  https://www.youtube.com/watch?v=CCoq4BY42OQ

Vaders. Julle moet hierdie hartseer stil

Vadersdag is sommer net nog ‘n dag, maar dit plaas die fokus op vaders. Vir baie aangenome kinders is dit ‘n treurige dag. Hulle soek hulle vaders. In SA, maar ook oral oor die wêreld kom die weeklaag: “Waar is my Pa?” Dis soms hartverskeurend.

            Terselfdertyd soek halfbroers en halfsusters na mekaar. Inderdaad, bloed is dikker as water. Daar is ook ouers wat tans na hulle kinders soek. Die HERE maak die getal vol voor sy Wederkoms. Help waar jy kan, werk saam.

            Die “gees en die krag van Elía, beweeg oor die aarde heen om die harte van die vaders terug te bring tot die kinders...” voordat die dag van die HERE kom, die groot, verskriklike dag.”  Mal 4:5-6

Carin vertel: Ek het in 1992 na my biologiese moeder begin soek. Jare later laat weet CMR my, my moeder is reeds in 1999 nie meer hier nie. Na drie weke se trane, het die HERE my een oggend gewys dat daar ‘n ouma is. Ek besef toe, dat die hele familie nie uitgesterf kan wees nie.

          Ek het ‘n lys gemaak van al die mense in Port Elizabeth met my ma se van en begin bel. Met die sewende oproep toe praat ek met my ouma. Sy was verheug om van my te hoor. Sy’t verduidelik daar was nie destyds geld om my groot te maak nie.

          Ek en my man en een seun het dadelik gaan kuier en daar het ek my pa se naam gehoor.

Dit het 44 jaar geduur, maar uiteindelik is ek en my pa verenig – nadat ek destyds as pasgeborene aangeneem is. My pa het vaderskap ontken, tot vier jaar later in Februarie 1970, toe red die HERE sy siel.

Die volgende oggend in sy kantoor was daar ‘n hoorbare stem: ‘Ek hou jou verantwoordelik vir jou verlore dogter se sieleheil, nie die aanneemouers nie, want mens mag nie jou verpligtinge op ander afskuif nie.”

My pa het met my ma en haar ouers gaan vrede maak en aan my oupa al sy koste betaal wat hy aan my ma se swangerskap en die geboorte bestee het. Hy het met my ook gaan regmaak en sy het hom ook vergewe. Toe het hy saam met my ma na my begin soek.

Ek het my mamma nooit gesien nie. Sy wag vir my in die Hemel.

Ek het gedurigdeur op plekke op die plaas denkbeeldige gesprekke met my biologiese ouers gevoer. Ek het selfs as kind hulle nooit verwyt vir wat ook al gebeur het nie. Ek wou net weet, waarom kan ek nie by hulle wees nie? Waarom was ek weggegee?

Ek het gereeld saam met huiswerkers op die plaas om die pappotte en vure gesit en my lot betreur dat ek nie by my eie ouers is nie.

Ek baie goed grootgeword. My aanneemouers was baie lief vir my, maar iets het geskort.

Na ek die familie ontmoet het, het die soeke na my pa begin.

Ek het my sat gebel, later nie meer geweet hoe nie, want ek het net ‘n naam gehad, en so baie mense het dieselfde naam.

Een keer toe ons met vakansie in Hartenbos was, het ek die HERE gevra: Hoe lank nog voordat ek my pa sal kry... en drie seevoëls het by my verby gevlieg en ek het geweet, nog drie jaar.

Die volgende jaar op Hartenbos het twee seevoëls verby gevlieg.

Desember 2010 het ek ‘n diep geestelike ou oom op ons dorp gevra: “Oom, wat kan ek nog doen om my pa op te spoor? Ek het sy naam, maar kry geen spoor van hom nie.”

Die oom het geantwoord: “Hou op met soek, die HERE gaan jou pa op die regte tyd na jou toe stuur.”

Ek het niks van profesieë en sulke goed af geweet nie, maar wat die oom gesê het, het oneindig sin gemaak.

Dit was eintlik eenvoudige woorde, maar my geloof in God, het my laat besef, dat hierdie wyse woorde was.

Sy woorde: “Hou op met soek, die HERE gaan jou pa op die regte tyd na jou toe stuur, ” het sterk impak op my gemaak. Ek het dit net so aanvaar as ‘n boodskap van die HERE af.

Net daarna het ek gaan bid: “HERE, ek is moeg gesoek, ek gee oor. Ek weet nie meer hoe nie. Kan my pa nie maar net na my toe aangestap kom nie?”

Die gebed was egter die spreekwoordelike laaste strooi – om my volle vertroue op God te plaas.

Van my kindsbeen af het ek na my biologiese ouers verlang. By tye was ek baie hartseer. Ek het my hartseer nooit met iemand gedeel nie.

 Drie weke na hierdie gebed, sien ek ‘n ou oom na my toe aangestap kom terwyl ek in my kantoor sit.

Toe die ou oom by my kom en ek sy trane en hartseer sien en hy af buk na my en deur sy trane vra: “Is jou naam Carin”, toe het my hele wese hier binne my uitgeroep: “HERE, hier is hy nou! Dis my pa! My pa het gekom!”

Ek het doodstil agter my lessenaar bly sit byna versteen. Ek kon nie praat nie, ek het net geknik.

Toe sê hy die mooiste woorde wat ek ooit in my hele lewe gehoor het: “Ek is jou pa.”

Die volgende oomblik was ek in sy arms.

So deur die snikke heen het ek aan hom gesê: “Pa, ek het julle nooit verwyt vir wat ook al gebeur het nie.”

Ek het gevoel hoe my pa se rou snikke deur sy liggaam skeur, ‘n groot man, baie groter as ek, wat huil soos ‘n kind. Ek hoor hy snik: “Ag HERE Jesus, hoe lank het ek nie na haar gesoek nie.”

My blydskap was oorweldigend toe ek hoor my pa het ook na my gesoek. Deur die jare het ek by kere gewonder of hy my sou aanvaar as ek skielik eendag voor hom sou staan en vir hom sou sê: “Pa, ek is jou kind.”

Ons is nou volwaardig pa en kind en kind en pa, lief vir mekaar en onafskeidbaar, soos dit hoort. Ons seën mekaar, besiel mekaar. Glorie Halleluja.

Vier-en-veertig jaar was ‘n baie lang tyd, maar dit was God se tyd. Ek bly die HERE ewig dankbaar.

Ek het nooit besef dat beide my biologiese ouers na my ook gesoek het nie. Na my ma in 1999 Huis toe is, het my pa alleen die soeke voortgesit.

Hy het op ‘n dag die familie gebel en hulle het hom van my besoek aan hulle vertel en gesê waar ek woon... net 160km uitmekaar, al vir jare.

Die volgende oggend het hy die pad gevat na my toe en my in my kantoor verras.

Patricia King, die bekende Amerikaanse Evangelis, het geen kennis van my pa se probleme en my bestaan gedra nie. Hy het haar bloot gevra om vir hom in gebed in te tree. Hy was ook al radeloos van al die gesoek na my.

Kort voor my pa my gevind het, het hy ‘n skrywe van Patricia King ontvang:


“Dear Johann,

“Last night at our Tuesday Night House Fellowship, the Lord gave me an exciting prophetic vision. This morning He told me to deliver it to you!

“I saw a vision of butterflies being released out of Heaven. Thousands of them. They were so beautiful - so free! The Lord says that it is a time of new beginnings for you. Even as a butterfly comes forth from a cocoon into a new state of being, into new freedom, new beauty, new presentation, so also will you!

“The Lord says, "Do not call to mind the former things or ponder the things of the past. Behold, I will do something new, now it will spring forth; will you be aware of it.

“The wind of the Spirit will delicately blow upon you and new fragrances of His grace will be released in and through your life.

“This is a season of new beginnings for you. A season of reward for those who have diligently sought the Lord. The things that held you back in the past will not hold you back in the days ahead.

“Any cloak of shame, humiliation, or bondage is being cast off. A robe of honor is being prepared for you because you have humbled yourself.

“Walk through the door into this new realm of blessing. It is prepared for you. All things are being made new.

“Have a great day and remember that you are a great treasure to His heart.... ours too!

Patricia King

Hierdie boodskap is mos vir jou ook!

Enkele dae nadat ek en my pa ontmoet het, is ek een oggend deur ‘n allemintige swerm skoenlappers omsingel. Skoenlappers is ‘n rare verskynsel op ons dorp. Ek het doodstil bly staan te midde van die gefladder en met trane van dankbaarheid gedink aan Patricia se profetiese woorde. Ek het God inderdaad beleef!

Kort hierna was die kerk een Sondag stampvol en te midde van baie trane van blydskap oral, het my pa my gedoop!

My storie het soveel Goddelike detail, dat dit net God self is wat dit kon bewerk en op Sy tyd.

"Die lof kom God toe wat my gebed nie afgewys het en Sy trou nie van my weerhou het nie." –  Ps 66:20


Moet nooit ophou soek nie. Soek in volle vertroue op God!

Is jou huwelik op Auto Pilot (Outoloodsing)?

Daar is vele redes waarom huwelike skipbreuk ly. Een daarvan is dat mans na ‘n tyd of selfs sommer direk na die huwelik, hul huwelik en gesinslewe op outoloodsing (autopilot) plaas. En dis wanneer alles in ‘n huwelik verkeerd loop.

            Sommige vroue vertel tydens berading hoe die man wat hulle mee getrou het, kort na die huwelik in iemand heeltemal anders verander het. Dit was skielik nie dieselfde man wat hulle voor die huwelik leer ken het nie.

            Navorsing wys dat paartjies wat saam bid, paartjies wat kommunikeer, vir mekaar omgee, nie in die skeihof beland nie.

            Sodra die paartjies nie saam dinge as huwelikspaar beleef nie, stomp alles af. Die man plaas sy huwelik op outoloodsing en begin in ander dinge belangstel.

            Vir ‘n vliegtuig om op “autopilot” ingestel te wees, kan tot ‘n ramp lei. Loodse raak aan die slaap, ander gesels so dat hulle nie eers agterkom die vliegtuig gaan sy landingstrook verby vlieg nie.

            Sommige loodse raak so rustig dat hulle nie agterkom die brandstof is kapot nie. Vele vliegtuie het op outoloodsing neergestort omdat loodse nie ‘n waaksame oog gehou het terwyl die vliegtuig op outoloodg was nie.

            Wanneer ‘n paartjie begin uitgaan is die man hoog toegespits op die meisie. Niks staan in die kêrel se pad om sy meisie die hof te maak nie.

            Na die troue verkrummel die belangstelling. As hy sy huwelik staande wil hou, vir sy kinders ‘n voorbeeld wil stel, moet hy as Hoë Priester van die huis, steeds sy vrou bemin.

            God se ideale situasie is dat die man die hoof van sy huis moet wees, maar meer nog, hy moet die priester van die huis wees, God se verteenwoordiger in die huisgesin. God hou die man verantwoordelik vir die geestelike welsyn van die vrou en die kinders.

            Mans verlaat hul ouerhuise om hul vroue aan te kleef en lief te hê. “Daarom sal die man sy vader en moeder verlaat en sy vrou aankleef. En hulle sal een vlees wees.” Gen 2:24

            ‘n Man is die hoof van die vrou. “Maar ek wil hê dat julle moet weet dat Christus die hoof is van elke man, en die man die hoof van die vrou, en God die hoof van Christus.” 1 Kor 11:3

            Mans moet hulle vroue liefhê. “Manne, julle moet jul eie vroue liefhê, soos Christus ook die gemeente liefgehad en Homself daarvoor oorgegee het.” Efes 5:25. ‘n Man moet sy vrou dus so liefhê dat hy bereid moet wees om homself te offer vir haar.

            Liefde gee die deurslag. Liefde is en bly die grootste Gebod. Met ware getroue liefde vermag mens enigiets, verskuif jy berge.

            Mans moet hul vroue eer. “Net so moet julle, manne, verstandig met hulle saamlewe en aan die vroulike geslag, as die swakkere, eer bewys, omdat julle ook mede-erfgename van die genade van die lewe is – sodat julle gebede nie verhinder mag word nie.” 1 Pet 3:7

            Let op: As ‘n man nie verstandig met sy vrou saamlewe nie en aan sy vrou as die swakkere een, eer bewys nie, word die man se gebede verhinder.

            Baie is altyd gou om strofes aan te haal dat die HERE ‘n mens se gebede beantwoord en dat mens kan vra net wat jy wil, maar hulle laat na om te besef dat die beloftes ook voorwaardes bevat.

            In 1 Pet 3:7 sê die HERE bv. Dat ‘n man se gebed verhoor sal word as hy verstandig met sy vrou saamlewe, as hy aan haar as die swakkere eer bewys.

            Mans moet beheer oor die huishouding neem. “'n Opsiener dan moet onberispelik wees, die man van een vrou, nugter, ingetoë, fatsoenlik, gasvry, bekwaam om te onderrig;

            “geen drinker, geen vegter, geen vuilgewinsoeker nie, maar vriendelik; geen strydlustige, geen geldgierige nie;

            “een wat sy eie huis goed regeer en sy kinders met alle waardigheid in onderdanigheid hou.” 1 Tim 3:2-4

            Let weer op: ‘n Man moet sy kinders in alle waardigheid... in onderdanigheid hou.” Nie met ‘n gevloek en ‘n geskel en dreigemente nie, maar in alle waardigheid.

            Waardigheidheid kweek liefde en eerbied. Enige ander manier is vernietigend.

            En strofes 12-13: “Die diakens moet manne van een vrou wees en hulle kinders en eie huis goed regeer.

“Want diegene wat goed gedien het, verkry vir hulle 'n eervolle plek en veel vrymoedigheid in die geloof in Christus Jesus.”

Net so die vroue ook. “Net so moet die vroue waardig wees, geen kwaadsprekers nie, nugter, betroubaar in alles.” 1 Tim 3:11.

Die vroue is ook die man se helper en die man mag dus sekere take aan die vroue delegeer. Onthou altyd, die man en die vrou is een vlees. Sodra hulle gemeenskap gehad het, is hulle een vlees. Matt 19:5-6

Ons is voorstanders daarvan dat pleks van geslagsvoorligting, daar gesinsvoorligting op skool moet wees, en op grond van die volgende:

“'n Opsiener (die hoof van die huis, die hoof van enigiets in die lewe) dan moet onberispelik wees, die man van een vrou, nugter, ingetoë, fatsoenlik, gasvry, bekwaam om te onderrig;

“geen drinker, geen vegter, geen vuilgewinsoeker nie, maar vriendelik; geen strydlustige, geen geldgierige nie;

“een wat sy eie huis goed regeer en sy kinders met alle waardigheid in onderdanigheid hou.

“Maar as iemand nie weet om sy eie huis te regeer nie, hoe sal hy vir die gemeente van God sorg dra?

“Hy moet nie 'n nuweling wees nie, sodat hy nie verwaand word en in dieselfde oordeel as die duiwel val nie.

“Maar hy moet ook goeie getuienis hê van die buitestanders, sodat hy nie in veragting en in die strik van die duiwel val nie.” 1 Tim 3:1-7

Mans tree in die huwelik sonder dat hulle die vaagste benul het waaroor dit gaan. (Op skool word geslagsvoorligting aangebied pleks van Gesinsvoorligting).

Omdat die man die hoof van die huis is, is hy ook verantwoordelik vir alle besluite wat geneem word. Dit beteken nie dat vroue geen seggenskap het nie, maar dat hulle optree onder die sekuriteit van die man se gesag.

Dit is interessant om te sien dat mans hulle vroue moet liefhê. Dit is ‘n opofferende liefde.

“Wees aan niemand iets skuldig nie, behalwe om mekaar lief te hê; want hy wat 'n ander liefhet, het die (Koninklike) wet vervul.” Rom 13:8

“Want dít: Jy mag nie egbreek nie, jy mag nie doodslaan nie, jy mag nie steel nie, jy mag geen valse getuienis gee nie, jy mag nie begeer nie, en watter ander gebod ook al, word in hierdie woord saamgevat: Jy moet jou naaste liefhê soos jouself.” Rom 13:9

As jy jouself liefhet, respek het vir jouself, vir jouself omgee voor God en die mens, dan sal jy nie egbreek, doodslaan en dergelike dinge doen nie nie.

En weer ‘n keer: “Want die hele (Koninklike - Jak 2:8) Wet word vervul in een woord, naamlik: Jy moet jou naaste liefhê soos jouself.” Gal 5:14

Het jy jouself lief? Hoeveel het jy jouself lief, ‘n bietjie of met jou hele hart? Kyk na die waarskuwing: “Maar as julle mekaar byt en opeet, pas op dat julle nie die een deur die ander verteer word nie.” Gal. 5:15

Liefde is en bly die Groot Gebod. Wandel in die ware liefde en daar sal nooit probleme wees nie. Die liefde, is ‘n Koninklike Wet: “As julle ewenwel die Koninklike wet volbring volgens die Skrif: Jy moet jou naaste liefhê soos jouself – dan doen julle goed.” Jak 2:8

As ons nie onsself lief het nie, kan ons nie ons naaste liefhê nie, nie mekaar liefhê nie, dan doen ons nie goed nie. Naaste aan ons is sekerlik ons huismense.

Dat ‘n man sy vrou moet liefhê, is ‘n opdrag, ‘n Koninklike opdrag. Om daarin te kan slaag om so lief te wees, moet ‘n man sekerlik sy vrou wil liefhê.

As alle mans hierdie opdrag ter harte wil neem, dan sal dit alle struikelende huwelike oornag salf en regruk.

Onthou ook, die vrou is uit die man se ribbebeen gemaak, nie uit sy mond, of sy vuiste of sy voete nie, ook nie uit sy strydlustige gees nie. Uit sy ribbebeen beteken na aan sy, sy... koesterend, liefkosend, beskermend.

“So behoort die mans hulle eie vroue lief te hê soos hul eie liggame. Wie sy eie vrou liefhet, het homself lief;

“want niemand het ooit sy eie vlees gehaat nie, maar hy voed en koester dit, net soos die Here die gemeente.” Efes 5:28-29

Let weer op: Wie sy vrou liefhet, het homself lief!

‘n Man sonder ‘n vrou is nie volledig nie. Wanneer hy in die huwelik tree word hy eers volkome man.

Is hulle ‘n eenheid? Nee. Hulle kan nooit ‘n eenheid wees nie want elkeen het sy eie karakter en persoonlikheid. Eenheid beteken noodwendig eendersheid. So ‘n eendersheid huwelik sou ook maar eentonig gewees het.

Maar hulle kan eendragtig wees, vir seker. Die eendragtigheid word ook gesien in die kinders wat hulle in die lewe bring.

Die vrou moet haar onderwerp aan die gesag van die man. “Vroue, wees aan julle eie mans onderdanig, soos aan die Here. (respekteer julle mans)

“Want die man is die hoof van die vrou, soos Christus ook Hoof is van die gemeente; en Hy is die Verlosser van die liggaam.

“Maar soos die gemeente aan Christus onderdanig is, so moet die vroue dit ook in alles aan hul eie mans wees.” Efes 5:22-24

Die egskeidingsyfer is Suid-Afrika is skrikwekkend hoog. Daar moet ‘n rede voor wees. Berading dui telkens op liefdeloosheid, soos wat sogenaamde Christene se liefde teenoor God ook verflou het.

Almal wat hieraan skuldig is, staan skuldig voor God! “Vreeslik is dit om te val in die hande van die lewende God.” Heb 10:31

“Daarom (as dit nog nie te laat is nie), rig die slap hande en die verlamde knieë weer op; en maak reguit paaie vir julle voete, sodat wat kreupel is, nie uit lit raak nie, maar liewer gesond gemaak word.

“Jaag die vrede na met almal, en die heiligmaking waarsonder niemand die Here sal sien nie; en pas op dat niemand in die genade van God veragter nie; dat geen wortel van bitterheid opskiet en onrus verwek en baie hierdeur besoedel word nie.” Heb 12:12-15

En as dit te laat is deurdat alles vernietig en dood is, bid HERE in jou lewe na die egskeiding vir Vrede, Liefde en Wysheid, sodat jy nie weer dieselfde fout maak nie.  – Sjibbolet

Sy hande is nog steeds op ons!

Hy is nie klaar met ons nie, Sy hande is nog steeds op ons

“So sê die HERE, jou Maker en jou Formeerder van die moederskoot af...” Jes 44:2

            Hy is ons Maker en ons Formeerder van moederskoot af. Hy ken ons beter as wat ons onsself ken.

            “U het my gevorm, my aanmekaargeweef in die skoot van my moeder. Ek wil U loof, want U het my op 'n wonderbaarlike wyse geskep. Wat U gedoen het,  vervul my met verwondering. Dit weet ek seker: geen been van my was vir U verborge toe ek gevorm is waar niemand dit kon sien nie, toe ek aanmekaar geweef is diep in die moederskoot. U het my al gesien, toe ek nog ongebore was, al my lewensdae was in U boek opgeskrywe nog voordat ek gebore is.” - Ps 139:12-16

            ‘n Prediker het ‘n vrou besoek wat ’n moeilike tyd van teleurstelling en beproewing had. Haar mandjie staan daar met haar naaldwerk. Hy tel ’n stuk naaldwerk op en kyk daarna.

“Ek moet sê dis nie vir my eintlik mooi nie,” merk hy op. “Al die steke is dan deurmekaar.”

Half geskok oor sy opmerking  neem sy die werkstuk by hom. “Maar pastor, dis borduurwerk en u kyk na die verkeerde kant. Draai dit om. Die patroon is op die ander kant.”

Hy glimlag. “Ek weet, Suster,” antwoord hy sag. “Ek wil net hê jy moet begryp jy maak met God dieselfde fout. Hy is met ’n borduurwerk in jou lewe besig. Jy sien net die deurmekaar en skynbaar doellose steke aan hierdie kant. Die patroon is aan die ander kant. Hy berei jou voor vir sy Ewige Koninkryk voor.”

            Die deurmekaar steke in sy lewe het vir Job ook verwar. Hy het gevoel, en gedink hy ervaar, dat God hom verlaat het. Al die tyd was God besig om met groot aandag in Job se lewe te werk.

Meer as een keer het Dawid gedink God vergeet hom. “Hoe lank moet ek nog my eie planne maak en my dae met kommer deurbring? Ps.13:2.

Toe Josef deur sy broers aan die Ismaelitiese handelaars verkoop is Gen.37:28, het hy ook met die deurmekaar kant van God se patroon van sy lewe te doen gehad.

Van Gen 41 af begin ons die regte kant van die patroon sien. “Toe sê Josef vir sy broers: ‘Ek is Josef…Maar julle moet nou nie sleg voel…omdat julle my verkoop het nie, want God het my voor julle uitgestuur…’” Gen.45:3,6

Dit is ook Petrus se aanmoediging: “Verbly julle… al is dit nodig dat julle ‘n kort tydjie bedroef gemaak word deur allerhande beproewings sodat die egtheid van julle geloof getoets kan word… tot lof en heerlikheid en eer… by die Wederkoms van Jesus Christus.” 1 Pet.1:6,7

            Die HERE God het vir my en jou gemaak, ons in die moederskoot geweef. Lees weer: Ps 139:12-16

            Ons is deur Jahweh geskep. Ons het nie sommer net hier aangekom nie. Jahweh het ons geskep en Hy bly besig met ons totdat Hy ons kom haal.

            Die HERE se hande was op ons toe Hy ons geformeer het. Sy hande is nog steeds op ons. Skep moed. – Sjibbolet

Doen alles.....

... sonder mumurering

“Doen alles sonder murmurering en teëspraak (hoekom?), sodat julle onberispelik en opreg kan wees, kinders van God sonder gebrek te midde van 'n krom en verdraaide geslag onder wie julle skyn soos ligte in die wêreld, deurdat julle die woord van die lewe vashou, my tot 'n roem teen die dag van Christus, dat ek nie verniet geloop of verniet gearbei het nie.” Fil 2:14-16

            Dit was vir 'n jong meisie moeilik om in haar werkplek vir Christus 'n getuie te wees. Sy het gevoel sy faal as Christen. Sy het oorweeg om van werk te verander. Sy het haar predikant se raad gaan vra.

"Waar plaas 'n mens 'n lig?" vra hy haar. Sy antwoord: "Waar dit donker is."

"Dis reg. Daarom het die HERE jou daar geplaas. Moenie iets besonders probeer doen nie. Hou jou verhouding met die HERE reg en Sy lig in jou sal in jou gewone doen en late uitstraal na ander toe." Hoe donkerder 'n plek is, hoe makliker word 'n lig, selfs 'n dowwe liggie, gesien.

            Dis veral Wedergebore jongmense wat selfs lastig kan raak met hulle praatjies dat hulle “voltyds” vir die HERE wil gaan werk. Daar waar jy werk, daar is jy reeds voltyds.

            Wat jy nodig het is lering, ondervinding en om die pad saam met die HERE te stap. Jy het nog baie te leer.

            Intussen egter sê die HERE: “Die geknakte riet sal Hy nie verbreek en die dowwe lamppit nie uitblus nie; met getrouheid sal Hy die reg uitbring.” Jes 42:3