Waarskuwings en beloftes

Die Bybelse Barometer

`n Man van Long Island het `n barometer per pos bestel. By ontvangs daarvan was hy baie ontevrede. Dit was stukkend.


Die naald het op dié mooiweerdag, vasgesteek by “Stormweer” wat selfs ‘n orkaan kon aandui.
Hy het dit `n paar keer hard geskud, gestamp, maar die naald het by Storm bly vassteek.
Hy het vir die firma, wat dit verskaf het, ‘n  onbetaamlike brief geskryf oor hulle swak produk. Die volgende oggend, op pad na sy kantoor toe in die stad, het hy die brief, saam met die barometer, vir hulle gepos.

Long Island het daardie dag inderdaad ‘n hewige storm beleef.  Toe hy na werk by die huis opdaag, was daar nie meer ‘n huis nie. Die storm het orkaansterkte bereik en alles voor hom platgevee.
Die barometer was oplaas toe nie stukkend nie, maar het kragte  in `n hoër atmosfeer as die wolkelose, blou lug wat hy met sy oë kon sien, weerspieël.

Uit onkunde en tot sy skade, het hy die akkurate barometer nie vertrou nie en die tydige waarskuwing nie geglo en hom daarop voorberei nie.



Die Woord van God is ons barometer. Die Bybel vertolk ook  kragte in die hoër atmosfeer, die Ewigheid, wat ons met ons menslike waarneming nie raaksien en begryp nie.
Beloftes en waarskuwings oor die Ewigheid word in mensetaal in die Bybel aan ons oorgedra. Baie van daardie beloftes en waarskuwings ken ons goed.

Glo en aanvaar ons dit, of ignoreer ons God se Barometer? Wanneer ons in Sy weë wandel beleef ons geestelike mooiweer. As ons nie die wyse leding van die Woord glo en nastreef nie, beweeg ons in stormweer in.

“Die volk het geweier om daarop ag te slaan … hulle het hulle soos die hardste klip gehou en wou nie luister na…die boodskap wat die HERE die Al­mag­tige deur sy Gees gestuur het nie.” Sag.7:12
In sy Woord roep God ons na Hom toe. Hy maak sy liefde aan ons bekend en wil ons deur sy groot verlossing in die Here Jesus Christus red. Loof die HERE vir diegene van ons wat al geluister het en die boodskap geglo het.

En as ons nog nie geluister en geglo en gered is nie?
“As die Evangelie wat ons verkondig, tog nog …bedek is, is dit bedek net vir dié wat verlore gaan … wie se verstand deur die god van hierdie wêreld verblind is, sodat hulle die lig van die evangelie nie kan sien nie.” 2 Kor.4:3,4

Lees ook Joh 12:37-50.

Gees se gawes laat vrug van Gees groei

Genadiglik het elke Christengelowige verskillende en afsonderlike genadegawes van die Heilige Gees ontvang.
            Die klem lê op die genade van die gawes. Soms ontvang een persoon meer, of minder, gawes as ’n ander.

            Baie kere beskik baie van ons oor dieselfde gawes – alles geskenke uit die hand van God. Gawes wat strek van wysheid, die mate van geloof, onderskeidingsvermoë, tot die vermoë om in tale te kan praat en om dit uit te lê, om wonders te kan doen.

            Gawes wat deur die Heilige Gees aan ons uitgedeel is soos wat Hy (die Heilige Gees) dit goedgedink het. Gawes wat Hý aan ons individueel en afsonderlik gegee het om geestelik reg te kan funksioneer.

            Tog moet ons nie die gawes met die vrug van die Gees verwar nie. Dit wat vanuit hierdie verskeidenheid gawes uitvloei, is die vrug van die Gees.

            Waar die gawes onder gelowiges verdeel word, is al nege aspekte wat die vrug vorm – die een kan nie sonder die ander nie – deel van elke Christengelowige. Hoe meer ons die gawes gebruik, hoe groter en ryper en voller sal die vrug wees.

            ’n Lewe vol van die Heilige Gees vertoon die vrug van die Gees waar liefde, blydskap, vrede, lankmoedigheid, vriendelikheid, goedheid, getrouheid, sagmoedigheid en selfbeheersing sigbaar uitgeleef word.

            Daarom gebruik die Heilige Gees ons gawes om die vrug te laat groei. Dit is as’t ware die oes op die gawes.

            Laat elkeen dan ons gawes gebruik om die vrug te dra, want ’n boom sal aan sy vrug(te) geken word . . . – Ds Johannes de Bruyn, GK, Harrismith

God voorsien altyd...

1 Kon 17:8-16: "Die meel in die kruik sal nie opraak nie, en die olie in die kan sal nie minder word nie, totdat die Here laat reën het" (vs. 14).

Anna Elizabeth Retief (Ouma Hamman), die derde van agt kinders, is op 4 Julie 1874 op Graaff-Reinet  gebore. Sy het onderwyseres geword en haar studies voltooi deur by  maanlig en kerslig te studeer. Soms het sy selfs vuurhoutjies getrek om by dié lig te studeer. Sy was vooruitstrewend en het baie goed op skool sowel as die kollege presteer. Mej. Helen Murray, ‘n suster van dr. Andrew Murray, was destyds hoof van die seminarie.

Dit was in hierdie tyd dat sy die Wedergeboorte deelagtig geword het. Die HERE het die Heilsleër en die South African General Mission, waarvan Dr. Murray ‘n stigterslid was, gebruik om haar tot die Lig te bring.

Anna, beter bekend as Ouma Hamman, is reeds 'n paar dekades gelede op hoë ouderdom oorlede. Sy was 'n merkwaardige vrou van gebed. Tydens die Boereoorlog was sy in 'n konsentrasiekamp, wat bestaan het uit ontruimde huise in Barberton. Haar suster met haar twee kinders was saam met Ouma Hamman in die huis. Weens die hitte van daardie streek het die suster siek geword. Die goedige kampkommandant het besluit om haar na Graaff-Reinet, na haar ouerhuis, toe te stuur.

Sy moes net vir haar eie padkos sorg. Ouma Hamman en sy het besluit dit gaan die beste uitwerk as sy 'n groot baksel beskuit kan saamneem. Met versigtige sorgsaamheid het hulle die bestanddele vir die beskuit bymekaar gekry. Die vet wat hulle nodig gehad het, was egter onbekombaar – van botter nie eens te praat nie! Hulle het, soos altyd, hulle toevlug tot die Here geneem. Maar om vet vir 'n baksel beskuit, in die oorlog, in die konsentrasiekamp, te bekom, was 'n moeilike een. Ouma Hamman vertel dit so:

"Drie dae voor ons sou vertrek, en die laaste dag waarop ek nog kon bak, staan ek voor die kombuisvenster wat op die straat uitkyk met die skottel meel voor my op 'n tafeltjie. Ek bid met 'n swaar hart: 'My Vader, het U my dan hierdie keer vergeet?' Op daardie oomblik kom muilwaens met die troepe se kosvoorraad met groot geraas verbygejaag. 'n Harde klop hamer op die voordeur. Ek gaan maak haastig oop. Voor die deur staan 'n hygende soldaat met 'n yslike blik vet in sy hande. 'Dit het van die wa afgeval. Wil jy dit hê?' Sonder om vir 'n antwoord te wag, rol hy die blik in die gang in en laat vat agter die wa aan.

Jesus self het gesê: “Alle dinge is moontlik vir die een wat glo" (Mar 9:23). "Gee jou kommer oor aan die Here. Hy sal vir jou sorg. Hy sal gelowiges nie teleurstel nie" (Ps 55:23)