Die Nuwe Testament is die Testament wat Jesus aan my en jou as Gelowige nagelaat het. Net soos jou eie testament wat jy eendag nalaat, het Jesus talle dinge aan ons bemaak, maar met voorwaardes. Kom die voorwaardes na en eis jou erfporsie op.
Net soos met enige testament, as mens nie dit wat jy geëerf het opeis nie, word dit nooit joune nie. Dis hoekom jy die Testament moet bestudeer.
Luister wat sê Jesus in Mat 26:28 “Want dit is My bloed, die bloed van die Nuwe Testament, wat vir baie uitgestort word tot vergifnis van sondes.”
Ook in Mar 14:24 “En Hy sê vir hulle: Dit is my bloed, die bloed van die Nuwe Testament, wat vir baie uitgestort word.”
Luk 22:20 Net so neem Hy ook die beker ná die maaltyd en sê: “Hierdie beker is die Nuwe Testament in my bloed wat vir julle uitgestort word.“ 1 Kor 11:15
Die volgende klousule lees: Heb 9:15 “En daarom is Hy Middelaar van ‘n nuwe testament, sodat, terwyl daar ‘n dood plaasgevind het vir die verlossing van die oortredinge onder die eerste testament, die wat geroepe is, die belofte van die Ewige erfenis kan ontvang.”
‘n Gelowige is ‘n erfgenaam, aldus klousule Rom 8:16 “Die Gees self getuig saam met ons gees dat ons kinders van God is.
Rom 8:17 en as ons kinders is, dan ook erfgename, erfgename van God en mede- erfgename van Christus, as ons naamlik saam met Hom ly, sodat ons ook saam met Hom verheerlik kan word.”
Rom 8:18 “Want ek reken dat die lyding van die teenwoordige tyd nie opweeg teen die heerlikheid wat aan ons geopenbaar sal word nie.”
Daar is kere wat ons nie antwoord kry nie. Dit staan in die Testament, maar ons lees dit nie raak.
Vorwaarde 1: “En sonder geloof is dit onmoontlik om God te behaag; want hy wat tot God gaan, moet glo dat Hy is en 'n beloner is van die wat Hom soek.” Heb 11:6
Let op: “Jesus antwoord en sê vir hulle: Julle moet geloof in God hê.
“Want, voorwaar Ek sê vir julle dat elkeen wat vir hierdie berg (probleem) sê: Hef jou op en werp jou in die see — en nie in sy hart (Voorwaarde) twyfel nie, maar glo dat wat hy sê, sal gebeur – hy sal verkry net wat hy sê.
“Daarom sê Ek vir julle: Alles wat julle in die gebed vra, glo dat julle dit sal ontvang, en julle sal dit verkry.
“En wanneer julle staan en bid, (Voorwaarde) vergeef as julle iets teen iemand het, sodat julle Vader wat in die Hemele is, ook julle jul oortredinge mag vergewe.
“Maar as julle nie vergewe nie, sal julle Vader wat in die Hemele is, ook julle oortredinge nie vergewe nie.” Mark 11:22-26
Dus, as ons nie vergewe nie, kan Hy nie vergewe nie en ons erf nie.
Rom 12:2 En word nie aan hierdie wêreld (Voorwaarde) gelykvormig nie, maar word verander deur die vernuwing van julle gemoed, sodat julle kan beproef wat die goeie en welgevallige en volmaakte wil van God is.
(Voorwaarde) “Wie geheime hou sal nie voorspoedig wees nie, wie bely sal genade ontvang.” Spr 28:13
“Halleluja! Welgeluksalig is die man wat die HERE vrees (eerbiedig, eer betoon), wat 'n groot welbehae in sy gebooie het.
“Sy nageslag sal groot wees op die aarde; die geslag van die opregtes sal geseën word.
Kyk wat erf jy: “Oorvloed en rykdom is in sy huis; en sy geregtigheid bestaan tot in Ewigheid.” Ps 112:1-3
Veral plaaskinders getuig, hulle ouers se testament kan vol voorwaardes wees. Jy mag bv die plaas beboer, maar jy erf bv eers as jy 30 jaar oud is en as jy bewys gelewer het dat jy werklik ‘n boer in murg en been is. … so nie word die plaas verkoop en die geld gelykop onder al die kinders verdeel. Erf jy wel die plaas, moet jy sekere bedrae aan jou susters uitbetaal.
Kom die voorwaardes na, en Jesus se hele testament is joune. Ondersoek ook wat jy met jou erfporsie moet maak. Dit sal ‘n wonderlike Bybelstudie (Testament-studie) oplewer. – Wekroep
