Ons wil graag help!

As Paulus vandag in Suid-Afrika sou sê: “Suid-Afrikaners, ek sien dat julle in elke opsig baie godsdienstig is... maar”

           Kerkgeboue, kerksale, pastorië in SA beloop etlike miljarde rand. Baie jare gelede het ware gelowiges in huise, motorhuise, opslaangeboutjies, waenhuise, tente en gehuurde persele byeen gekom. Op ‘n dag het die gemeente besluit om ‘n boufonds te begin sodat hulle ‘n kerkgebou, ‘n kerksaal, ‘n pastorie, ens kan bou.

            Die geheim is in die “besluit” opgesluit. ‘n besluit baar. Toe die besluit genem is, het die gebed rigting gekry, het die kerrie en rys aande, die basaars, pannekoekaande, ens momentum gekry. Almal het in liefde saamgewerk en kort voor lank is ‘n predikant beroep. Dit was alles mooi en goed.

            Die jare het aangeloop, die gemeentes het verwêrelds. Tweespalt het ontstaan en by gebrek aan kennis is daar niks aangedoen nie. Wat verkeerd was het vererger.

            Basaars vind steeds plaas, maar met drank bottels onder die tafels, veral by die manne wat so graag die braaiwerk wil doen. By begrafnisse is daar meer belang by die kriekettelling as die begrafnis en ry die drank saam om die vrese van die dood aan te spreek.

Predikers is van elders ingeroep om te kom help. Vurige boodskappe is gelewer. Sommige lidmate probeer weens die predikant regop kom, maar dis net tydelik.

Die rede: Die lidmate is bekeerlinge, hulle is nie dissipels nie!

“Gaan dan heen, maak (let op) dissipels van al die nasies, en doop hulle in die Naam van die Vader en die Seun en die Heilige Gees; en leer hulle om alles te onderhou wat Ek julle beveel het.” Matt 28:19

En ons beweeg nader aan Jesus se voorspelling: “Baie sal in daardie dag vir My sê: Here, Here, het ons nie in u Naam geprofeteer en in u Naam duiwels uitgedrywe en in u Naam baie kragte gedoen nie?

“En dan sal Ek aan hulle sê: Ek het julle nooit geken nie. Gaan weg van My, julle wat die ongeregtigheid werk!

“Elkeen dan wat na hierdie woorde van My luister en dit doen, hom sal Ek vergelyk met 'n verstandige man wat sy huis op die rots gebou het.” Matt 7:22-24

            “Want ek getuig van hulle dat hulle 'n ywer vir God het, maar sonder kennis.

“Want omdat hulle die geregtigheid van God nie ken nie en (let op) hulle eie geregtigheid probeer oprig, het hulle hul aan die geregtigheid van God nie onderwerp nie.” Rom 10: 2-3

            Jakobus sê: “As iemand onder julle meen dat hy godsdienstig is en sy tong nie in toom hou nie, maar sy hart mislei, die godsdiens van hierdie man is tevergeefs.” Jak 1:26

            En so sien ons die vyf dwase maagde. Daar is vandag 7.8 biljoen mense op die aarde. Net 2.2 biljoen van hulle steek hulle hand op dat hulle Christene is. As net 50% dus 1.1 biljoen wyse maagde is, dan is daar oneindig baie werk op te doen.

            Altesame 32miljoen Suid-Afrikaners het op hul sensusvorms aangedui dat hulle Christene is. As dit waar is, hoekom is die land in so ‘n toestand?

            Let oop op: As jy met jou mond bely EN met jou hart glo sal jy gered word. Duisende bely in massa dienste dat hulle gered is, maar min van hulle glo uiteindelik met die hart.

            “As jy met jou mond die Here Jesus bely en met jou hart glo dat God Hom uit die dode opgewek het, sal jy gered word; want met die hart glo ons tot geregtigheid en met die mond bely ons tot redding.” Rom 10:9-10

            Die teenpool van dit alles, lees so: “Hy wat in My glo, soos die Skrif sê: strome van lewende water sal uit sy binneste vloei.” Joh 7:38

            As jy verlang dat Lewende Waters ook so vryelik uit jou binneste moet vloei om sodoende ander met die Lewende Woord te bereik, is ons as ‘n span, met onder meer ons Elohim Gebedsgroep, hier om jou te help. Skryf aan Belindapaar@gmail.com - Wekroep

Die verskil tussen ‘n Gelowige en ‘n Dissipel

Let op na Jesus se opdrag: “Gaan dan heen...

“maak Dissipels” van al die nasies,

en doop hulle in die Naam van die Vader en die Seun en die Heilige Gees;

en “leer hulle” om alles te onderhou wat Ek julle beveel het.” Matt 28:20

Jesus het gesê “maak” dissipels. Ons kan niemand Wedergebore maak nie. Dis die werk van God en die Heilige Gees, maar Dissipels moet “gemaak” word.

            Ons word gered en ons is Gelowiges, maar om ‘n Dissipel te word is ‘n proses, ‘n leerproses.

            Wie ken dit nie: “Want so lief het God die wêreld gehad, dat Hy sy eniggebore Seun gegee het, sodat elkeen wat in Hom glo, nie verlore mag gaan nie, maar die Ewige Lewe kan hê.” Joh 3:16. Nie “kan” hê nie, “sal” hê.         

            Die strofe praat met die Christen, die Gelowige. Om te weet en kerk toe te gaan, maak jou nie ‘n Gelowige nie. Jy moet “glo”

En jy moet Christus as Saligmaker aanneem. Dan begin die reis na Dissipelskap.

In die verhaal van die “Verlore Seun” kom die seun uiteindelik daar tussen die varke tot sy sinne en besef dat selfs sy vader se huurlinge is beter af as wat hy is en besluit hy sal terugkeer na syvader en aan sy vader sê: ”Vader, ek het gesondig teen die Hemel en voor u, en ek is nie meer werd om u seun genoem te word nie; (let op) ‘maak’ my soos een van u huurlinge.” Luk 15:19 

            Jesus sê: “Kom agter my aan, en Ek sal julle vissers van mense “maak”.

            Jesus sê aan die ryk jongman in Matt 19: “Gee jou rykdom aan die armes en volg my.” Die jongman se probleem was sy besittings het hom gehad. Niks verkeerd om miljoene in die bank te hê nie, maar as die miljoene jou het, het jy groot probleme.

            Gelowiges verwag altyd alle goedheid en guns van die HERE af, maar let nooit op wat die HERE van hulle verwag nie. As jy geluk soek, wees heilig en die geluk kom vanself. “Maar soek (let op) eers die Koninkryk van God en Sy geregtigheid, en al hierdie dinge sal vir julle (let op) bygevoeg word.” Matt 6:33

            Ons kan nie net verbruikers Christene wees nie. Geloof sonder die werke is dood. Jak 2:26. Om verstandelik te glo, bereik niks. Dis die geloof en die werke-aksie wat die antwoord oplewer. Geloof is dus 50% met die ander 50% die uitvoering daarvan.

            “Deur die geloof het Noag, toe hy 'n goddelike waarskuwing ontvang het met eerbiedige vrees die ark gereed gemaak.

Let op, die geloof en die aksies in Hebr 11: “Deur die geloof het Abraham, toe hy geroep is, gehoorsaam weggetrek na die plek wat hy as 'n erfenis sou ontvang; en hy het weggetrek sonder om te weet waar hy sou kom.

            “Deur die geloof het hy as vreemdeling gaan woon in die land van belofte soos in 'n vreemde land en in tente gewoon met Isak en Jakob, die mede-erfgename van dieselfde belofte. “

“Deur die geloof het Sara self ook krag ontvang om bevrug te word; en toe sy oor die leeftyd was, het sy gebaar, omdat sy Hom getrou geag het wat dit beloof het.”

            “Deur die geloof het Abraham, toe hy op die proef gestel is, Isak geoffer...

“Deur die geloof het Isak vir Jakob en Esau geseën met die oog op die toekoms.

“Deur die geloof het Jakob op sy sterfbed altwee die seuns van Josef geseën.

“Deur die geloof het Josef aan die einde van sy lewe melding gemaak van die uittog van die kinders van Israel en bevel gegee aangaande sy gebeente.

“Deur die geloof is Moses ná sy geboorte deur sy ouers drie maande lank weggesteek, omdat hulle gesien het dat die seuntjie mooi was; en hulle het nie die gebod van die koning gevrees nie.

“Deur die geloof het Moses, toe hy grootgeword het, geweier om die seun van Farao se dogter genoem te word.

“Deur die geloof het hy Egipte verlaat sonder om die toorn van die koning te vrees, want hy het volgehou soos een wat die Onsienlike sien.

“Deur die geloof het hy die pasga gehou en die besprenkeling van die bloed, sodat die verderwer hulle eersgeborenes nie sou aanraak nie.

“Deur die geloof het hulle die Rooi See deurgegaan soos oor droë grond, terwyl die Egiptenaars, toe hulle dit probeer, verdrink het.

“Deur die geloof het die mure van Jérigo geval nadat daar sewe dae lank omheen getrek was.

“Deur die geloof het Ragab, die hoer, nie saam met die ongehoorsames omgekom nie, omdat sy die spioene in vrede ontvang het.

“En wat sal ek nog meer sê? Want die tyd sal my ontbreek as ek van Gídeon, Barak en Simson en Jefta, Dawid en Samuel en die profete sou verhaal, wat deur die geloof koninkryke oorweldig het, geregtigheid uitgeoefen, beloftes verkry, bekke van leeus toegestop.”

            So kan jy alles van Jesus weet en glo, maar jou geloof word eers werklikheid wanneer jy Jesus as jou Saligmaker aanneem, later ‘n dissipel word en Hom dien.       

            Jy glo jy gaan op laerskool en later op hoërskool deurkom, maar as jy nie die werke by jou geloof voeg en getrou studeer nie, gaan daar niks van kom nie.

            Jy is ’n Gelowige, maar jy moet aksie daarby voeg en ‘n Dissipel word. Die Dissipel wil weet hoe hy of sy God kan behaag. Die Dissipel dien die HERE op die mees angeleë tye, ook wanneer dit swaar en moeilik is. ‘n Dissipel vra nie vrae nie, hy bring offers.

            Die dissipel leef nie meer van melkkos nie. “En ek, broeders (Gelowiges), kon met julle nie spreek soos met geestelike (Dissipels) mense nie, maar soos met vleeslike, soos met klein kinders in Christus.

“Ek het julle met melk gevoed, nie met vaste spys nie, want julle was nog nie daartoe in staat nie, en julle is nou nog nie daartoe in staat nie, omdat julle nog vleeslik is; want aangesien daar onder julle jaloersheid en twis en tweedrag is, is julle nie vleeslik nie en wandel julle nie na die mens nie?” 1 Kor 3:1-3

Die Dissipel het ‘n persoonlike verhouding met God. Hy is n leier. Hy is verantwoordelik. Hy stel God en die Godssaak altyd eerste. Hy is ‘n volwasse volgeling van Jesus. Gelowiges wil gesien word, Dissipels wil nie gesien word nie. “Want as ek die Evangelie verkondig, is dit vir my geen roem nie; want die dwang is my opgelê, en wee my as ek die Evangelie nie verkondig nie!

“Want as ek dit vrywillig doen, het ek loon; maar as ek dit onwillig doen, is 'n rentmeesterskap (moet ek rekenskap gee) aan my toevertrou.” 1 Kor 9:16-17.

As Koningskind is jou motief groter as dit wat jy doen! God kyk altyd na die motief van ons harte. Die Christen doen alles wat hy wil en verwag God moet hom seën. Die Dissipel wag en doen wat God van hom verlang want dan is hy beslis uit en uit geseënd. Die Dissipel soek eers die Koninkryk van God.

Die Dissipel sê: U wil geskied... in die Hemel, so ook op die aarde. “Want hoewel julle vanweë die tyd leraars (Dissipels) behoort te wees, het julle weer nodig dat 'n mens julle die eerste beginsels van die woorde van God moet leer, en julle het weer behoefte aan melk en nie aan vaste spys nie.

“Want elkeen wat melk gebruik, is onervare in die Woord van geregtigheid, omdat hy 'n kind is.

“Maar vaste spys is vir volwassenes, vir die wat geestesvermoëns besit deur die gewoonte geoefen, om goed van kwaad te onderskei.

Let op: “Daarom moet ons nie bly by die begin van die prediking aangaande Christus nie, maar na die volmaaktheid voortgaan sonder om weer die fondament te lê van die bekering uit dooie werke en van die geloof in God.” Hebr 5:12 - 6:1

Laat hierdie boodskap almal bemoedig en aanspoor om Dissipels te word sodat ook julle Dissipels kan maak. – Wekroep

Is jy al ‘n Dissipel?

In een van die jaarlikse, geestelike Keswick konferensies in Engeland, getuig ‘n man het van die groot geestelike seën wat hy by die konferensie ontvang het.
Die leier van die getuienisdiens wou hê die man moet meer spesifiek wees en sê hoedanige seën hy ontvang het.

Hierop het die man dit soos volg verduidelik: "Ek was reeds 'n Christen voor ek na Keswick toe gekom het. Christus was my koning. Maar Hy was net 'n konstitusionele koning en ek was steeds die eerste minister in my lewe. Ek het besluit wat ek doen en hoe ek lewe. Christus was die koning op die agtergrond en moes net Sy stempel van seën op my doen en late plaas.

“Hier het ek na die predikers geluister wat, soos die Nuwe Testament dit leer, oor volkome oorgawe aan Christus gepreek het. Ek het 'n nuwe ontmoeting met die HERE gehad. Deur die krag van die Heilige Gees het ek Hom nou absolute koning in my lewe gemaak. Hy regeer nou oor my en ek dien Hom. Dít is die seën wat in my lewe ingekom het.”

            In Markus 12 wys Jesus die skrifgeleerdes daarop dat koning Dawid die Messias, Christus, HERE noem. Dawid het Christus se gesag bo sy eie koningskap verhef. As gelowiges behoort ons aan die HERE en ons glo in Hom en dien Hom.

Luister mooi: Daar is egter 'n Christenskap wat dieper loop as net geloof. Dit is oorgawe aan die HERE. So 'n Christenskap word dissipelskap genoem. In Calvary Church News word 'n onderskeiding tussen gelowig wees en dissipel wees, gemaak:

            Om 'n gelowige te wees, kos niks. Om 'n dissipel te wees is duur.

“’n Groot menigte het saam met Jesus gereis. Hy draai toe om en sê vir hulle: ‘Iemand wat nie sy eie kruis dra en agter My aan kom nie, kan nie My dissipel wees nie.’” Luk 14:25-27.

Christenskap beteken geloof in Christus, maar dissipelskap is die uitleef van hierdie geloof.
Ek glo in Christus se verlossingswerk aan die kruis vir my, maar dissipelskap is die resultaat van Sy verlossing in my lewe.

            Gelowiges stel hulleself eerste, dissipels stel Christus eerste.
Gelowiges word aan hulle woorde geken, dissipels word aan hulle vrugte geken.
Geloof red my siel, maar dissipelskap verheerlik Christus.

Gelowiges word soms weens hulle gedrag en taal nie as Christene geken nie, maar dissipels is as Christene bekend.

Gelowiges gaan Hemel toe; dissipels ontvang daar beloning. “Julle moet baie versigtig wees sodat julle die hele beloning kan ontvang wat God beloof het.”  2 Joh 8
Dissipels wen siele vir die Koninkryk.