Wat die here God JAWEH betref is daar geen verskil tussen Gelowiges en Jode nie.
Die Hebreeuse woord Hanukkah beteken Inseëning. Die naam herinner aan die Heilige Herdenking van die herinseëning van die Heilige Tempel in Jerusalem na die Joodse oorwinning oor die Siries-Griekse magte 165 vC.
In 168 vC het Siries-Griekse soldate die Tempel oorgeneem en dit toegewy aan die god Zeus. Dit het die Jode erg ontstel, maar baie Jode was bang vir verdere vervolging. In 167 vC het die Siries-Griekse keiser Antiochus, Judaïsme tot ‘n misdaad verklaar waarvoor die doodstraf opgelê is. Hy het ook opdrag gegee dat alle Jode Griekse gode moet aanbid.
Die bekende Menorah wat by die Hanukkah Feesvieringe aangesteek word.
Joodse weerstand het in die dorpie Modi naby Jerusalem begin opwel. Griekse soldate het die Jode gedwing om ‘n afgod te aanbid en varkvleis te eet. ‘n Griekse offisier het die Hoë Priester Mattatias gedwing om gehoor te gee aan Griekse opdragte, maar Mattatias het geweier. ‘n Ander dorpenaar het aangebied om namens Mattatias saam te werk, maar die priester het in woede uitgebars en die dorpenaar met sy swaard gedood en toe die Griekse offisier ook dood gekap.
Mattatias se vyf seuns en die ander dorpenaars het toe saamgespan en al die Griekse soldate doodgemaak. Mattatias en sy familie het in die berge gaan skuiling soek. Jode wat ook die Grieke wou uitdelg, het by Mattatias-hulle aangesluit. Hulle het uiteindelik daarin geslaag om hulle land van die Grieke te bevry. Hierdie rebelle het bekend gestaan as die Makkabeërs.
Die Makkabeërs het na die Tempel in Jerusalem gegaan. Teen hierdie tyd was die Tempel geestelik besmet deur die aanbidding van afgode en vark offerandes. Joodse soldate wou die Tempel reinig deur agt dae lank olie in ‘n Menora kandelaar in die Tempel te brand. Hulle had egter net olie vir een dag. Hulle het die kandelaar in elk geval aan die brand gesteek en tot almal se verbasing vind ‘n Goddelike wonderwerk plaas en die klein bietjie olie brand agt dae lank.
Dit is die wonderwerk van die Hanukkah olie wat sedertdien jaarliks deur die Jode gevier word. Volgens Joodse wetgewing is Habukkah een van die minder belangrike Joodse vakansiedae, maar dit het meer gewild begin raak omdat dit so naby aan Kersfees is en soms selfs ingevolge die Joodse kalender in die Kerstyd val. Omdat die Jode in Christen gemeenskappe woon het die Hanukkah baie meer feestelik begin word en die Jode gee selfs geskenke aan hul kinders.
Die Menora kandelaar bestaan uit nege kerse. Die eerste kers, reg in die middel stel die Messias voor. (Onthou, die Jode het nog nooit Jesus misken nie, maar geglo dat Hy nog moet kom. Hierdie wanpersepsie verdwyn nou vinnig. Die vyeboom bot lankal nie meer nie, maar dra veel vrug. Daar is nou 279 Joodse Christen (Messiaanse) gemeentes in en om Jerusalem. In die res van die wêreld is daar reeds meer as 400 Messiaanse gemeentes.)
Mens steek eerste die middelste kers aan, dit is die Messias en met daardie kers word die ander agt kerse aangesteek soos wat Jesus as Lig, die Lig versprei. Agt beteken ook Nuwe Begin. Alle gemeenskappe het hul eie unieke Hanukkah vieringe, maar die aansteek van die Menorah is sentraal aanwesig. By die vieringe word net olie gebraaide kosse en lekkernye geëet. Een van die gunstelinge is om aartappel en uie pannekoeke in olie te braai en appelsous oor te gooi.
Soos wat die Jode al meer gered word, vermeng ons en hulle tradisies ook.
Geseënde Hanukkah! – Wekroep
· Luister hoe getuig die Jode (kliek op enige getuienis) https://www.youtube.com/user/JewishTestimonies
